TE MAU ’API NŌ PĀTIFITA
’Ua ha’amana’o te ta’ata nō Porinetia farāni i tō rātou mau tupuna here i te mahana nō te tūramara’a
I te mau matahiti ato’a i te mahana tūramara’a (Toussaint), te 1 nō Novema ’e i te roara’a o te mahana nō te feiā pohe, i te 2 nō Novema, e fa’ata’a te ta’ata nō Pōrīnetia farāni i te taime ’e e rave ta’a ’ē rātou i te fa’anehenehera’a o te mēnema o tō rātou mau ta’ata pohe herehia.
Tē tāmau noa nei te mau melo o Te ’Ēkālesia a Iesu Mesia i te Feiā Mo’a i te mau Mahana Hope’a nei i teie peu nō te ha’amana’ora’a i tō rātou mau tupuna here tei pohe.
Te fa’a’āpīra’a, te pēnira’a, te tāmāra’a ’e te fa’anehenehera’a i te mau mēnema, e tuha’a ïa nō teie peu e fa’ahanahana i te feiā i pohe. E fa’anehenehe te mau pūpā tiare, ma te hōro’a i te ’ū rau ’e te ora.
I te pae hōpe’a, e fa’ahanahanahia te feiā pohe i te taime nō te « tūramara’a », te fa’a’amara’a i te mau mēnema i te pō nō te 1 nō Novema, ’e tae noa atu te ’āparaura’a i te mau ha’amana’ora’a ’e te ’utuāfare i ni’a i te mēnema.
I Porinētia, i teie matahiti, ’ua rahi atu ā te māuiui o te « mahana nō te feiā pohe » inaha e 636 tei fa’aru’e mai i roto i te pararera’a ma’i pe’e Tovi-19. ’Ua fa’ata’a te fenua i te hō’ē minuti nō te vai mū noa i te mahana piti, i te 2 nō Novema, i te hora 10:30 nō te ha’amana’o i teie mau ta’ata.
Tē fa’ati’a nei te mau melo o te ’Ēkālesia, nāhea teie taime fa’ahanahanara’a i te ha’afātatara’a i te mau ’utuāfare i tō rātou mau tupuna i pohe ’e ia Iesu Mesia ato’a, te Fa’aora o te ao nei.
Tē parau ra Toriki Chung Tien, 16 matahiti, nō Tubuai ē : « ’Ua pēni māua tō’u teina i te mēnema o tō māua pāpā rū’au ’e ’ua tauturu i tō māua māmā ’ia fa’anehenehe i tōna mēnema ma te te’ote’o ’e te ’oa’oa. I te mau taime ato’a e paraparau mātou nōna ’e i te mau ha’amaita’ira’a tāna i fa’atupu, e ’ite au tei reira ’oia ’e e tahe tō’u roimata. Maoti te ’evanelia ’e te ti’afa’ahoura’a, ’ua ’ite au ē, ’ia tae i te hō’ē mahana e fārerei fa’ahou mātou ’ei ’utuāfare ’e e fārerei fa’ahou vau i tō’u pāpā rū’au tā’u e mihi nei. »
Kamihiria Teriitemoehaa, 13 matahiti, nō Punaauia i te fenua Tahiti e parau nei ē : « I te mau matahiti ato’a, e tāmā mātou i te mēnema. Maoti te reira e ti’a ai iā’u ’ia ’ore roa e ha’amo’e i tō mātou mau fēti’i pohe, ’ia fa’aro’o ana’e au i te mau melo o te ’utuāfare ’ia fa’ati’a i te mau ’ā’amu nō rātou. E mau taime māhanahana ’e te ’āre’are’a mau nō’u. I rāpae i te mahana tūramara’a, e ha’amaita’ira’a nō’u i te fa’ahanahanara’a i tō’u mau tupuna tei pohe nā roto i te ravera’a i tō rātou ’ōro’a i roto i te fare mo’a o te Atua. ’Aita vau i ta’a maita’i i te tā’āto’ara’a, ’ua ’ite rā vau e mea faufa’a te reira nō’ū ’e tō’u ’utuāfare. ’Ua ’ite ato’a rā vau ē maoti Iesu Mesia, e mea mure ’ore te mau ’utuāfare ».
E putapū noa ā Mehiti Rima, 26 matahiti, nō Avera i te fenua Raiatea, i te mau taime ato’a e ha’amana’o ’oia i tōna metua tāne tei pohe ’a ’ahuru matahiti i teienei. « E huti mai au i tō’u pūai i roto i te Mesia ’e i roto ato’a i teie parau e fa’aitoito nei i tō’u ’ā’au ’e ’o tē tāmarū iā’u i te mo’era’a o tō’u metua tāne : ‘Nō te mea e ta’ata herehia nō tātou i te ra’i ra, e vāhi iti ïa o te ra’i i roto i tō tātou fare’ ».
« ’Aita i maoro a’enei ’ua pohe tō’u māmā, e vahine fa’aro’o rahi, tei ha’api’i itoito iā’u i te ’evanelia », ’ua parau ’o Teuruhei Lin Sin, metua vahine nō e piti tamari’i, nō Papeete i Tahiti. « Maoti ’oia, ’ua fāri’i au i tō’u iho ’itera’a pāpū ’e ’ua tā’atihia tō’u ’utuāfare ’e ’o vau i roto i te hiero. ’Ua ’ite au ē e fārerei fa’ahou vau iāna. ’O te mea ïa tā’u i au roa i roto i teie ’evanelia. Tē ani manihini nei te ’Ēkālesia ia tātou ato’a ’ia fa’ahanahana i te mahana o te feiā pohe nā roto i te fāriura’a i tō tātou ’ā’au i ni’a i te Fa’aora, ’ia ’itehia mai i te tīa’ira’a ’e te tāmāhanahana. Te feiā ato’a tei fa’aru’e mai, ’ua haere ïa i terā pae mai o te pāruru. ’Ia tae i te taime, e fārerei fa’ahou tātou i te mau ta’ata tei herehia ».
’Ua parau Avearii Teriihaunui, nō Avera i te fenua Raiatea ē, « tē mihi nei au i tō’u pāpā tei fa’aru’e mai ’a piti ’āva’e i teienei. ’Ua vaiiho mai ’oia i te hō’ē faufa’a ’āi’a nō te fa’aro’o, te tāvinira’a ’e te fa’aitoito-noa-ra’a. ’Ua here māite ’oia i te Atua ’e i te Fa’aora. ’Ua tāvini ’oia ma te here i tōna ’utuāfare ’eiaha mātou ’ia ’ere i te hō’ē mea, i te pae vārua ’e i te pae tino. ’Ua tāvini itoito ’oia i te mau melo o te pāroita ’e o te titi. ’Ua fa’a’ite mai ’oia ia mātou i te ’ē’a o te Fa’aora ’e e nāhea i te pe’e i te reira ».
« Tē māuruuru nei au i tō’u pāpā rū’au nō te mea ’ua ha’api’i ’oia iā’u i te faufa’a nō te ’ohipa », ’ua parau Viritahi Roi, e taure’are’a pa’ari nō Paea. « Tē mihi rahi nei au iāna. ’Ua māuruuru vau nō te mau hiero tā te Fatu i tu’u mai i’ō nei i te fenua nei, ’ia ti’a iā’u ’ia putapū i tōna aro ’e i te hō’ē mahana ’ia ho’i iāna ra ».
’Ua parau Narii Pou, e taure’are’a tamāroa nō Papeari ē : « Tē māuruuru nei au nō tāna fa’anahora’a nō te ’oa’oa tei hōro’a iā’u i te tīa’ira’a ’e te ha’apāpūra’a ē i te hō’ē mahana e fārerei au i tō’u pāpā tei fa’aru’e mai i tō’u vai-’āpī-ra’a. Mea au roa nāna e rave i tāna ’ohipa ’e ’ia fa’a’ite i te ’oa’oa o te ’evanelia i te feiā e ha’a’ati nei iāna, ’aita roa a’enei ’oia i parau ’aita, nō te tāvini i te hō’ē ta’ata i roto i te fifi, nō te reira ’ua pi’ihia ’oia ‘te wonderful’ [fa’ahiahia] i roto i tā mātou titi. »
« Te mahana nō te tūramara’a, e tupu tō’u ’oto ’ia ha’amana’o vau i tō’u taea’e ’e i tō’u pāpā, maoti rā te Mesia ’e tāna tāra’ehara, e tāmarūhia tō’u ’oto » tē fa’ata’a nei ’o Rani Maere, nō Faaa.
E metua pa’ari ’o Roger Chung Tien nō Tubuai i te mau fenua Tuha’a pae. Tē parau nei ’oia ē : « E fa’aho’i mai te tāmāra’a i te mēnema o tō’u pāpā iā’u i te mau ha’amana’ora’a. Tē mihi nei au iāna, ’ua ’ite rā vau tē ora nei ’oia i roto iā’u nā roto i te mau ha’api’ira’a ’eta’eta ato’a tāna i ha’api’i iā’u. Tē māuruuru nei au, ’e ’ua ha’amaita’ihia vau i te ’itera’a ē e fārerei fa’ahou vau iāna ’e tō tātou Metua i te ao ra ’e tāna Tamaiti ’o Iesu Mesia nā roto i te ti’afa’ahoura’a ».
E ’ite mai te feiā mo’a i te mau mahana hōpe’a nei i te tāmāhanahana i roto i te mau pāpa’ira’a a te Faufa’a ’Āpī : « Mai te ta’ata i hope i te pohe ia Adamu, e hope ato’a i te fa’aorahia e te Mesia » (1 Korinetia 15:22).