Ngaahi ʻAta ʻo e Tuí

Ko e Mālohi ʻo e Faʻifaʻitakiʻangá

Fai ʻe Agim Deda, Tīlani, ʻAlapēnia

Naʻá ku ʻiloʻi ko e founga pē ʻe taha te u lava ai ʻo ʻomi hoku uaifí ki he Siasí, ko ʻeku tā sīpingá. ʻI he taimi naʻá ku liliu ai hoku ʻulungāngá, naʻe kamata ke ne ongoʻi e Laumālie ʻo e ʻOtuá.

Faitaaʻi ʻe Cody Bell

ʻI ha ʻaho ʻe taha ʻi heʻeku ʻalu ki he ngāué, ne u sio ki ha ongo talavou naʻá na malanga ʻaki e folofola ʻa e ʻOtuá ʻi he halá. Naʻá na fehuʻi mai pe ʻoku ou fie ʻilo lahi ange ʻo kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe ʻikai ke u ʻilo he taimi ko iá, pe ko e fē feituʻu ʻoku fakataumuʻa ki ai hoku fāmilí. Naʻe ʻikai haʻamau kāpasa fakalaumālie ke kumi ʻaki homau halá.

Naʻá ku inu kava mālohi he pongipongi ko iá, ko ia ʻoku ʻikai ke u fuʻu manatuʻi e meʻa naʻe talamai ʻe he ongo faifekaú. Ka naʻá na foaki mai ha Tohi ʻa Molomona mo ha tohitufa fekauʻaki mo e Palōfita ko Siosefa Sāmitá, fakataha mo ʻena fika telefoní. Kimui ange ʻi he ʻaho ko iá, naʻe kamata ke u laukonga. Naʻe ʻi ai ha meʻa ne ongo ki hoku lotó ʻi he taimi naʻá ku lau ai e Tohi ʻa Molomoná, pea naʻá ku ofo ʻi he lava ʻe ha kiʻi tamasiʻi taʻu 14 ʻo maʻu ha vīsone maʻongoʻonga pehē.

Naʻá ku fekumi ki he moʻoní, ko ia naʻe kamata leva ke u talanoa mo e ongo faifekaú. Hili hano fakahoko mai ha konga lahi ʻo e ngaahi lēsoní, naʻá ku ʻiloʻi naʻe fiemaʻu ke u papitaiso. Ka ʻi he ofi ke hokosia e ʻaho ʻo hoku papitaisó, ne mau fai ha lēsoni naʻe faingataʻa ke u fanongo ki ai. Ko e lēsoni ko iá ʻi he Lea ʻo e Potó.

Naʻe faingataʻa ʻa e lēsoni ko iá kiate au he naʻe lahi ʻeku inu (kava mālohí). Naʻe faingataʻa hoku ʻātakai ngāué. Naʻe konā ʻa e tokotaha kotoa pē naʻá ku ngāue mo iá, pea naʻá ku fai pehē foki mo au. Naʻá ku faʻa ʻalu ʻo inu kava mālohi ʻi he tuku ʻa e ngāué peá u foki ki ʻapi kuo fuoloa e poʻulí.

Ka naʻe fakahoko ʻe he ongo faifekaú ha ngāue lelei moʻoni. ʻOku ou kei ʻofa pē ʻiate kinaua koeʻuhi ko ia. Naʻá na akoʻi au ʻoku finangalo ʻa e ʻOtuá ke tau mālohi pea naʻá Ne foaki mai ʻa e Lea ʻo e Potó ke tāpuakiʻi kitautolu. Naʻe faingataʻa ʻaupito kiate au ke talangofua ki he fono ko ʻení, ka naʻe māmālie ʻa e kamata ke u tauhi iá. ʻOku ou manatuʻi ʻeku telefoni ki he ongo faifekaú ʻi he ʻaho kotoa pē, ʻo fakamatalaʻi ʻeku fakalakalaká, peá u talaange ne ʻikai ke u inu he ʻaho ko iá. Naʻá na fuʻu fiefia ʻi heʻeku fakalakalaká.

Naʻá na tokoniʻi au peá u papitaiso peá u hū ki he tākanga ʻa Sīsū Kalaisí. Ne u ongoʻi ʻa e Laumālié ʻi he ʻaho fakaʻofoʻofa ko iá. Ka naʻá ku toko taha pē ʻi he taimi naʻá ku kau ai ki he Siasí. Naʻá ku fiemaʻu ke u kau fakataha mo hoku fāmilí.

ʻI heʻeku talanoa mo hoku uaifi ko Kilimé fekauʻaki mo e Siasí, naʻe ʻikai ke ne fie fanongo ʻi he kamataʻangá. Naʻe kau ʻene kui tangatá ki ha tui fakalotu kehe, pea naʻá ne fifili pe ko e hā ne haʻu ai ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki ʻAlapēniá. Naʻá ku ʻiloʻi ko e founga pē ʻe taha te u lava ai ʻo ʻomi ia ki he ongoongoleleí, ko ʻeku tā sīpingá. ʻE lava ke ʻiloʻi ʻe he kakaí ʻi heʻetau ngaahi tōʻongá, pe ko hai moʻoni kitautolu.

Naʻe fakatokangaʻi ʻe Kilime ha ngaahi liliu ʻiate au ʻi heʻeku tukuange ʻa e kava mālohí pea kamata ke u foki vave ki ʻapi mei he ngāué. Koeʻuhí ko e ngaahi liliu naʻá ku faí, naʻe kamata ke ne ongoʻi ʻa e Laumālie ʻo e ʻOtuá ʻi heʻeku fakamatala ange fekauʻaki mo e Siasí. He ʻikai ke u lava ʻo fakamatalaʻi ʻa e ongoʻi fiefia naʻá ku maʻu ʻi heʻene talamai ʻi he ʻaho ʻe taha te ne papitaiso foki mo ia. Naʻe ʻikai fuoloa kuo kamata ke ne ako e ngaahi lēsoni ʻa e kau faifekaú, pea ne u tokoni ki hono akoʻi ia ʻe he ongo faifekaú. Naʻá ku mātuʻaki fiefia ʻaupito ʻi he taimi naʻá ne fokotuʻu ai ha ʻaho ki hono papitaisó, hili ia ha māhina ʻe ono mei hoku papitaisó.

ʻI hono papitaiso iá, pea mo hono papitaiso ʻema fānau ʻe toko uá ʻi he hoko hona taʻu valú, naʻá ku ongoʻi ʻe lava ke mau hoko ko ha fāmili taʻengata. Naʻe hoko ʻa e papitaisó ko e kamataʻangá pē ia. Naʻá ma ʻiloʻi ko e teuteu ke hū ʻi he temipalé, kuo pau ke ma muimui ki he ʻOtuá ʻo aʻu ki he ngataʻanga ʻo ʻema moʻuí, tauhi e ngaahi fekaú, ʻalu ki he lotú, maʻu e sākalamēnití, ngāue ʻi he ngaahi uiuiʻí, lau e folofolá, mo ako lahi ange fekauʻaki mo e ngaahi fuakavá mo e palani ʻo e fakamoʻuí.

Ko ha ʻaho fakaʻofoʻofa ʻe taha ʻa e ʻaho naʻe silaʻi ai kimautolu ko ha fāmili ʻi he Temipale Frankfurt Germany. Naʻe mahino lahi ange kiate au ʻi he temipalé fekauʻaki mo e palani ʻo e fiefia ʻa hotau ʻOtuá maʻatautolú, pea naʻá ku ongoʻi ʻEne ʻofá.

ʻOku ou kei manatuʻi pē ʻa e ngaahi palōmesi naʻá ku fai mo Kilime ʻi he temipalé. Ko e taimi pē ʻoku fehālaaki ai ha meʻa pe ʻoku mau faingataʻaʻia, ʻoku foki leva ʻeku fakakaukaú ki he ngaahi talaʻofa ko iá.

ʻOku feinga homau fāmilí ke mau nofo melino he ko e meʻa ia ne ma ongoʻi ʻi he temipalé. Ko e taimi kotoa pē ʻoku ou fakakaukau ai ki he temipalé, ʻoku ou ongoʻi fiefia mo faitāpuekina. ʻOku ou ʻilo ʻoku moʻoni ʻa e ʻOtuá pea ʻokú Ne ʻofa ʻiate kitautolu mo finangalo ke tau fiefia.