“Ngaahi Fāmilí mo e Maama ʻo Māmaní,” Liahona, Sānuali 2023.
Maʻá e Ngaahi Mātuʻá
Ko e Ngaahi Fāmilí mo e Maama ʻo Māmaní
Siʻi Ngaahi Mātuʻa,
Ko e fāmilí ko ha konga mahuʻinga ia ʻo e palani ʻo e fiefia ʻa e Tamai Hēvaní maʻa ʻEne fānaú. ʻE lava ke tokoniʻi koe ʻe he ngaahi fakamatala ʻi he makasini ʻo e māhina ní ke fakaleleiʻi ʻa e fetuʻutakí ʻi he ngaahi fāmilí pea tokoni ke fakahaohao mei he ngaahi faingataʻá ʻi he ngaahi vā fetuʻutaki fakafāmilí. Te ke lava foki ʻo fakaʻaongaʻi ʻa e makasini ko ʻení ke tokoniʻi koe ke ke akoʻi ki he fānaú ha ngaahi lēsoni mahuʻinga mei he Fuakava Foʻoú.
Fealēleaʻaki ʻi he Ongoongoleleí
Ko Sīsū Kalaisi ʻa ʻEtau Maama Moʻoní
Vahevahe mo ho fāmilí ha ngaahi akonaki mei he fakamatala ʻa Palesiteni Pālati he peesi 4 fekauʻaki mo e fatongia ʻo Sīsū Kalaisi ko e Maama ʻo Māmaní. Mou faʻu fakafāmili ha lisi ʻo e ngaahi maʻuʻanga tokoni kehekehe ʻo e māmá ʻi homou ʻapí pea aleaʻi e ngaahi meʻa kehekehe ʻoku fai ʻe he māmá maʻatautolú. Ko e hā ha ngaahi founga ʻoku tokoniʻi ai kitautolu ʻe Sīsū Kalaisi, ʻi Heʻene hoko ko e maʻuʻanga maʻongoʻonga taha ʻo e maama fakalaumālié?
Fetuʻutaki Tauʻatāina ʻi he Ngaahi Fāmilí
ʻOku mahuʻinga ke mateuteu fakalaumālie ki he ngaahi faingataʻa ʻo e moʻuí. ʻI he peesi 12, lau ha niʻihi ʻo e ngaahi faleʻi mei ha fai faleʻi ki he moʻui lelei fakaeʻatamaí ki he founga ke maʻu ai ha fepōtalanoaʻaki mahuʻinga mo fakamālohia mo hoʻo fānaú. Ko e fē ʻi he ngaahi fakakaukau mo e ngaahi fokotuʻu ko ʻení te ke lava ʻo fakahoko mo ho fāmilí?
Ko Hono Teuteuʻi Hotau Lotó ki he Folofolá
Lau ʻa e fakamatala ʻa Brother Kamako ʻi he peesi 38 fekauʻaki mo e talanoa fakatātā ʻo e tangata tūtūʻí. Aleaʻi mo ho fāmilí ʻa e meʻa ʻoku fakataipe ʻe he faʻahinga kelekele kehekehe ʻi he talanoa fakatātaá. ʻE lava ke tā ʻe he fānau iiki angé ha ngaahi meʻa mei he talanoa fakatātaá pea talanoa fekauʻaki mo kinautolu, pea ʻe lava ke lau ʻe he fānau lalahi angé ʻa e talanoa fakatātā ʻi he Maʻake 4:3–20 pea vahevahe ʻenau ngaahi fakakaukaú pe ngaahi fehuʻí.
Fiefia Fakafāmili ʻi he Haʻu, ʻo Muimui ʻIate Aú
Ko Hono Fai ʻo e Ngaahi Meʻa Faingataʻá ʻi he Tokoni ʻa e ʻOtuá
Hangē ko Mele mo hono kāinga ko ʻIlisapeti ʻi he Fuakava Foʻoú (vakai, Luke 1:5–55), ko e taimi ʻe niʻihi ʻoku kole mai ke tau fai ha ngaahi meʻa faingataʻa pea mahalo te tau fifili pe te tau lava.
-
Fokotuʻu ha faʻoʻanga meʻa , hangē ko ha kane pe ko ha puha, ʻi ha ngataʻanga ʻe taha ʻo e lokí.
-
ʻOange ki he mēmipa takitaha ʻo e fāmilí ha fulufuluʻi moa.
-
Kamata ʻi he tafaʻaki ʻe taha ʻo e lokí mei he faʻoʻanga meʻá, ʻai ke feinga ʻa e mēmipa takitaha ʻo e fāmilí ke ʻai ʻenau fulufuluʻi moá ki he loto faʻoʻanga meʻá ʻaki ʻene puhi ia ke tētē ʻi he ʻeá lolotonga ʻenau kolosi ʻi he lokí.
-
Ke toe faingataʻa angé, tuku pē ha sekoni ʻe 30, pea fakaʻaongaʻi ha situloa (straw) ke puhi ʻaki e ʻeá ki he fulufuluʻi moá. Hokohoko atu hono fakasiʻisiʻi e taimi ʻoku vahe atú kae ʻoua kuo ʻikai toe lava ʻo fakahoko ʻa e ʻekitivitií.
Fealēleaʻakí: Manatuʻi ʻoku ʻi ai ha ngaahi faingataʻa he ʻikai lava ke fakaleleiʻi ʻi he moʻuí ni, vahevahe ha aʻusia naʻá ne fakamālohia hoʻo fakamoʻoní “ko e ngaahi meʻa ʻoku ʻikai mafai ʻe he tangatá, ʻoku mafai ia ʻe he ʻOtuá” (Luke 18:27) Ko e hā ha fanga kiʻi sitepu iiki te ke lava ʻo fakahoko he ʻaho takitaha ke aʻusia ai ha ngaahi ngāue ʻi hoʻo moʻuí ʻoku ngali taʻe-malavá?