“Tui ʻi he Fakapoʻulí,” Ki Hono Fakamālohia ʻo e Toʻu Tupú, Tīsema 2022.
Tui ʻi he Fakapoʻulí
Ko ha ngaahi fokotuʻu ʻeni ʻe niʻihi kuo nau tokoniʻi au ʻi he ngaahi fehuʻí mo e veiveiuá.
Laʻitā mei he Getty Images
ʻI heʻeku kei siʻí, naʻe faʻa ʻaʻahi hoku fāmilí ki he Paʻake Fakafonua ʻo e Ano Vai Lahí ʻi Nevata, USA. Ko e meʻa fakaofo ʻe taha ʻi he paʻaké ko e Ngaahi ʻAna Leimaní.
ʻOku taki koe ʻe ha tokotaha takimamata ki he ʻaná, pea ʻi ha feituʻu pau, ʻokú ne tamateʻi kotoa ʻa e ngaahi māmá. ʻOkú ke aʻusia ʻa e fakapoʻuli lōlō. Ko ha ongo mamafa ia, pea ʻoku lōmekina kita ke fakakaukau atu ki hono kumi ho hala ki tuʻá ʻo ʻikai ha maama. Meʻamālié, ʻoku hanga maʻu pē ʻe he tokotaha taki mamatá ʻo toe fakamoʻui ʻa e māmá pea taki atu koe ki tuʻa.
Ko e taimi ʻe niʻihi ʻoku tau fehangahangai ai mo ha ngaahi fehuʻi mo ha veiveiua fekauʻaki mo e Siasí mo ʻetau ngaahi fakamoʻoní. ʻE lava ke ongo mamafa mo taʻe-pau, ʻo hangē ko e ʻi he ʻana fakapoʻulí.
ʻOku sai pē ke ʻi ai ha ngaahi fehuʻi mo ha ngaahi meʻa ʻoku fai ki ai ha hohaʻa. Ko e meʻa te ne fakahoko ʻa e faikehekehe lahi tahá ko e founga hoʻo fakakaukau kiate kinautolú.
Ko ha ngaahi fokotuʻu ʻeni ʻe niʻihi kuo nau tokoniʻi au.
Fakaʻaongaʻi e Tuí
Kuó u fakatokangaʻi kapau te u tali e ngaahi fehuʻí mo e hohaʻá mei ha tuʻunga ʻo e tuí, te u lava maʻu pē ʻo ʻilo ha founga ke u laka ai ki muʻa. “ʻOku ikai ko e tuí ʻa e maʻu ha ʻilo haohaoa ki he ngaahi meʻá” (ʻAlamā 32:21). Pea “kapau foki ʻoku ʻikai te mou lava ʻo fai ha meʻa lahi ange ʻi he holi pē ke tuí, tuku ʻa e holí ni ke ngāue ʻiate kimoutolu” (ʻAlamā 32:27
ʻE talaatu ʻe māmani kapau he ʻikai te ke lava ʻo fakamoʻoniʻi ha meʻa ʻaki ha tuʻunga fakasaienisi, ʻoku ʻikai ke moʻoni ia. ʻOku ʻikai ko e founga ʻeni ʻa e ʻEikí. Hangē ko e folofola ʻa e Fakamoʻuí kia Tōmasí, ʻa ia naʻe ʻikai tui kae ʻoua kuó ne ala ki he ngaahi kafo ʻo e Fakamoʻui kuo toetuʻú maʻana, “ʻOua naʻá ke taʻe-tui, kae tui” (Sione20:27).
Kole, Kumi, Tukituki
ʻOku toutou ʻasi ʻi he folofolá ʻa e kupuʻi lea ko e “kole, kumi, tukituki” (vakai, Mātiu 7:7; Tokāteline mo e Ngaahi Fuakava 88:63). Ko e founga ʻoku tokoniʻi ai kitautolu ʻe he ʻEikí ʻetau ngaahi fehuʻí, ko hono fai kiate Ia ha ngaahi fehuʻi.
“Ka ai hamou taha ʻoku masiva ʻi he potó, ke kole ʻe ia ki he ʻOtuá” (Sēmisi 1:5). ʻAlu hangatonu ki he tupuʻanga ʻo e moʻoni kotoa pē. ʻOku ʻofa ʻa e ʻOtuá ʻiate koe pea te Ne tokoniʻi koe.
Hoko ko ha Tokotaha Fekumi ki he Moʻoní
Kuó u ʻiloʻi ko kinautolu ʻoku fekumi ki he moʻoní ʻi he faitotonu mo loto fakatōkilaló te nau maʻu ʻa e tali ki heʻenau ngaahi fehuʻí. ʻI he tafaʻaki ʻe tahá, ko kinautolu ko ia ʻoku nau fekumi pē ke maʻu ha fehalaākí, te nau ʻunu ʻo mamaʻo ange mei he moʻoní.
Hoko ko ha tokotaha fekumi ki he moʻoní. ʻOku ʻi ai ha moʻoni, pea te ke lava ʻo maʻu ia.
Faʻu ha Puha “Ke Toki Tali ʻAmui Ange”
Ko e hā leva e meʻa te ke fai kapau kuó ke fekumi ʻi he loto fakatōkilalo mo fakamātoato ki ha ngaahi tali pea hangē ʻoku ʻikai pē ke maʻú?
ʻOku ou toe fili ke fakahoko ia ʻi he tui. Kuó u faʻu ha kiʻi puha ʻi ha funga laupapa ʻi hoku ʻatamaí— ʻoku hangē ha puha tukuʻanga koloa fakaʻofoʻofá. ʻOku tohi ai ʻa e ngaahi lea “Ke Tali ʻi ha ʻAho ʻAmui Ange.”
Ko e taimi pē ʻoku ʻi ai haʻaku fehuʻi pe hohaʻa ʻoku ʻikai ke u lava ʻo fakaleleiʻi, ʻoku ou tohi ia ʻi ha laʻipepa ʻoku ou fakakaukau ki ai, pelupelu fakalelei ia, pea faʻo ia ki he puhá. Hili ia peá u toe hili ia ʻi he funga laupapá.
ʻI heʻeku fai iá, ʻoku ou ngāue ʻi he tui ʻe ʻi ai e ʻaho ʻe tali ia ʻe he ʻEikí. Mahalo pē te Ne fai ia, mahalo pē he ʻikai. Ko e meʻa pē ia ʻAʻana ʻi Hono poto taʻe-fakangatangatá.
Kaekehe, Kuo tali mai ha niʻihi ʻo ʻeku ngaahi fehuʻí. Ka ko e lahi tahá ʻoku kei ʻi he puhá. Pea ʻoku SAI pē ia kiate au.
Siʻoku ngaahi kaungāmeʻa ʻofeina ʻia Kalaisi, hoko ko e kau fekumi ki he moʻoní.
ʻI he tupulaki hoʻomou tuí, ʻe ʻiate kimoutolu ʻa e ʻEikí. Pea ʻi hoʻo haʻu kiate Ia ʻi he tuí, te Ne fakahā kiate koe ʻa e ngaahi meʻa ʻoku fie maʻu ke ke ʻiló ʻi he taimi totonú.