“Ko Hoku Feituʻu Manako … ke Fakalaulauloto Aí” Ki Hono Fakamālohia ʻo e Toʻu Tupú, Sānuali 2023.
Ko Hoku Feituʻu Manako …
ke FakalaulaulotoAí
ʻOku ʻi ai nai hao feituʻu manako ke fakalaulauloto ai?
ʻI hoʻo fakalaulaulotó, ʻokú ke maʻu ai ha fakakaukau ʻoku taʻengata angé. Te ne toe lava foki ʻo tokoniʻi koe ke fakaleleiʻi hoʻo moʻui lelei fakaʻatamaí ʻaki hono fakaʻataʻatā hoʻo fakakaukaú mei he puputuʻú mo e loto mafasia mei he ngaahi ʻahiʻahí mo e ngaahi meʻa ʻo e moʻui fakaʻahó ʻoku nau tohoakiʻi hoʻo tokangá. ʻOku ʻi ai ha kakai ʻe niʻihi ʻoku ʻi ai ha feituʻu makehe ʻoku nau manako ke fakalaulauloto ai. Vakaiʻi ha niʻihi ʻo e ngaahi feituʻu fakalaulauloto ko ʻeni naʻe vahevahe ʻe he toʻu tupu kehé!
Fakalaulaulotó: ʻOku ʻuhinga ʻa e fakalaulaulotó ki hono fakaava ho ʻatamaí mo e lotó ki he ngaahi ueʻi ʻa e Laumālie Māʻoniʻoní ʻi hoʻo ako mo fakakaukau ki he ongoongoleleí. Ko e fakalaulauloto moʻoníi, ʻa ia ʻe lava ke hoko ʻi ha feituʻu pē, ʻoku fie maʻu ke ke fai ha ngāue fakalaumālie ʻi hoʻo fekumi ki ha fakahaá.
ʻI he Vaí
Ko e feituʻu ʻoku ou manako ke fakalaulauloto aí, ko ha faʻahinga feituʻu pē ʻoku ʻi ai ha vai, hangē ko ha anovai pe tahi. ʻI he laʻitā ko ʻení, ne u heka ʻi he vaka ʻo ʻeku kui tangatá. ʻOku ou saiʻia ai he ʻoku ou ongoʻi ofi ki he Laumālié, tautautefito ki he hopo pe tō ʻa e laʻaá. ʻOku ou faʻa maʻu ha ueʻi fakalaumālie pea ʻoku ou maʻu ai ʻa e kotoa ʻo ʻeku ngaahi fakakaukau lelei tahá.
Meisī M., 16, Tekisisi, USA
Kumi hao Taimi Toko Taha
Ko e feituʻu lelei taha kiate au ke fakalaulauloto ai, ko e taimi ʻoku ou toko taha aí. ʻOku ou fakalaulauloto maʻu pē, ʻi heʻeku kaukaú pe ʻi ha feituʻu lōngonoa hangē ko ʻapí lolotonga ʻeku ako folofolá. ʻOku ou ʻalu ʻo heka pasikala, pea ʻoku ou faʻa fanongo he taimi ʻe niʻihi ki ha podcast ʻo e Haʻu, ʻo Muimui ʻIate Aú . ʻOku ou tuku ha taimi ke u tangutu toko taha ai ʻi he natula fakaʻofoʻofá mo fakalaulauloto ai foki.
Kalānite R., taʻu 14, Tekisisi, USA