“ʻOku ou faʻa ongoʻi he taimi ʻe niʻihi ʻoku fuʻu tōtuʻa hono fakaangaʻi au ʻe heʻeku ongomātuʻá. ʻE founga fēfē nai haʻaku tali ʻi he loto-fakaʻapaʻapa?,” Ki Hono Fakamālohia ʻo e Toʻu Tupú, Sānuali 2023.
Ngaahi Fehuʻí mo e Talí
“ʻOku ou faʻa ongoʻi he taimi ʻe niʻihi ʻoku fuʻu tōtuʻa hono fakaangaʻi au ʻe heʻeku ongomātuʻá. ʻE founga fēfē nai haʻaku tali ʻi he loto-fakaʻapaʻapa?”
Tuku Taimi ke Mou Feohi Ai
ʻOku fai atu ʻe hoʻo ongomātuʻá ha faleʻi mo ha fakatonutonu koeʻuhí ʻokú na ʻofa ʻiate koe mo fie tokoniʻi koe ke ke lavameʻa. ʻI he taimi ʻoku ongo taʻe- totonu ai e fakatonutonu ko iá, tuku ha taimi ke aleaʻi taha taha ia mo hoʻo ongomātuʻá ʻi ha taimi te mo fakatou ongoʻi fiemālie aí. Te ke lava ʻo maʻu ha taimi ʻokú mo fakatou fai ai ha meʻa ʻokú mo saiʻia ke fakahoko fakataha, hangē ko e feimeʻatokoní pe fakamālohisinó. ʻOku tokoni ʻeni ke fakaafeʻi ʻa e Laumālié ki he fepōtalanoaʻakí.
Lepeka M., 17, Meulileni, USA
Manatuʻi ʻOkú Na ʻOfa ʻIate Koe
Kapau ʻokú ke manatuʻi ko hono fakatonutonu mo faleʻi koe ʻe hoʻo ongomātuʻá koeʻuhí ko ʻena ʻofa ʻiate koé, tā ʻoku faingofua ange ai ke ke tali ʻena fakatonutonú. ʻE tokoni atu hono fakahoko ha kiʻi lotu nounou ke kolea e tokoni ʻa e Laumālié ke ke anga fakaʻapaʻapa mo loto fakatōkilalo, ke ke fetuʻutaki lelei ange ai mo kinaua.
Loleini M., taʻu 16, Tekisisi, USA
ʻOku Fakamoʻui ʻa e Faitotonú
ʻE lava ʻe he fepōtalanoaʻaki lelei mo faitotonú ʻo fakaleleiʻi ʻa e ngaahi faʻahinga kehekehe ʻo e fepakipakí. Tangutu hifo mo hoʻo ongomātuʻá ʻo talanoa mo kinaua. Talaange kiate kinaua ʻa e meʻa ʻokú ke mamahi aí, pea fakafanongo ki he meʻa ʻokú ne ʻai ke na loto-mamahi pe taʻe-fiemālié. Tuku ha taimi lahi ange ke mou feohi ai, pea tanumaki ʻa e ʻofá mo e melinó ʻi homou vā fetuʻutaki mo homou ʻapí. ʻI he taimi ʻokú ke ʻita aí, kole ki he Tamai Hēvaní ke fakanonga ho lotó.
Lafaela P., taʻu 17, Sao Paulo, Palāsila
Fakahā Ange ʻOkú ke ʻOfa ʻIate Kinaua
Te ke lava ʻo tali ʻi he loto fakaʻapaʻapa, neongo kapau ʻoku faingataʻa. Talaange ki hoʻo ongomātuʻá ʻokú ke ʻofa ʻiate kinaua, ʻokú ke tokanga kiate kinaua, pea ʻokú ke ʻiloʻi ʻokú na ʻofa ʻiate koe. ʻAi ke na ʻilo ko e meʻa ʻokú na lea ʻakí ʻokú ne fakamamahiʻi ho tuʻunga fakaelotó, fakalaumālié, mo fakaʻatamaí. Faʻa lotu. ʻE tokoniʻi moʻoni koe ʻe he Tamai Hēvaní.
Uele S., taʻu 13, Luanitā, ʻEngikola
ʻOku Nau Fakatokangaʻi e Meʻa Te Ke Malavá
ʻOku fie maʻu ʻe he ʻOtuá ʻa e lelei tahá meiate kitautolu pea lava ke [Ne] ʻafioʻi hotau tuʻunga malava totonú. Ko e ʻuhinga ʻeni ʻokú Ne fie maʻu ai ha meʻa lahi meiate kitautolú. ʻOku vakai foki hoʻo ongomātuʻá ki he meʻa te ke malavá pea ʻokú na fie maʻu ʻa e lelei tahá maʻau pea ke ke lavameʻa! Mahalo he ʻikai ke na haohaoa ʻi hono poupouʻi hoʻo fakalakalaká, pea ʻoku ʻikai ke ke haohaoa ʻi hono aʻusia iá. Fakahoko ha fepōtalanoaʻaki faitotonu mo ʻofa mo hoʻo ongomātuʻá, pea ʻe tataki koe ʻe he Laumālié ke maʻu ha mahino.
Puluki T., taʻu 18, ʻAlesona, USA
Hoko ko ha Tokotaha Fakafanongo Loto-fakatōkilalo
Kuó u feinga kimuí ni mai ke u hoko ko ha tokotaha fakafanongo lelei ange. ʻOku ou feinga ke fakafanongo fakalongolongo ki he meʻa ʻoku lea ʻaki ʻe heʻeku ongomātuʻá kae ʻikai fakafekiki pe taungutu kiate kinaua. ʻOku fie maʻu ki ai ha faʻa kātaki mo ha loto fakatōkilalo lahi, ka ʻe lava ʻe hono fai ʻení ʻo fakamālohia ho vā fetuʻutaki mo hoʻo ongomātuʻá pea lava ai ke maʻu ha mahino lahi ange ʻi he ongo tafaʻakí fakatouʻosi.
Kami K., 18, ʻIutā, USA