Ngaahi Fakavaʻe Mālohí

Ko Hono Maʻu ʻo e Fiefiá ʻi he Ngāue Fakamūsiká

Tā fakatātaaʻi ʻe ʻEmilī Sōnasi

Naʻá ku kamata ako tā piano ʻi hoku taʻu fitú. ʻI he kamataʻangá, naʻe faingataʻa ke lau ʻa e ngaahi nota ʻo e hivá mo tokanga lolotonga ʻeku ngaahi lēsoní. Naʻe ʻikai pē ke u fie ako tā piano au.

Naʻe kole mai ʻe heʻeku faʻeé ke u tā ʻa e “ʻI Heʻeku Papitaisó” (Tohi Hiva ʻa e Fānaú, 53) ʻi hoku papitaisó. Ko e fuofua taimi ia ke u tā (piano) ai ʻi he lotú. Naʻá ku manavasiʻi ka naʻá ku laukau ʻi heʻeku fai iá.

Naʻe ʻikai fuoloa kuó u femoʻuekina he akó peá u loto ke tuku ʻeku tā pianó, ka naʻe poupouʻi au ʻe heʻeku ongomātuʻá ke hokohoko atu ʻeku akó. Naʻá na pehē kapau te u kei tā (piano) pē, te u lava ʻo maʻu ha fiefia ʻi he ngāue maʻá e ʻEikí.

Talu mei ai mo ʻeku manako ke tā piano. Naʻá ku kamata tā (piano) ʻi he houalotu sākalamēnití, pea ʻi he hoko hoku taʻu 12, naʻe ui fakaʻofisiale au ke u hoko ko e tokotaha tā piano ʻa e uōtí. Naʻá ku fiefia ʻaupito! Naʻá ku tā ʻi he ngaahi polokalama ʻa e Palaimelí pea kau fakataha mo e kuaea ʻa e uōtí ʻi he ngaahi konifelenisi fakauōtí mo e ngaahi fakataha lotú. Naʻe aʻu ʻo ui au ko e tokotaha tā piano ʻa e kuaea fakasiteikí pea naʻá ku tā ʻi he konifelenisi fakasiteikí.

ʻOku ou fakamālō ki heʻeku ongomātuʻá ʻi hono fakalotolahiʻi au ke fai hoku lelei tahá. Te u houngaʻia maʻu ai pē ki he Tamai Hēvaní ʻi he talēniti kuó Ne foaki mai maʻakú. ʻOku ou ʻilo te u lava ʻo fakaʻaongaʻi hoku ngaahi talēnití ʻi heʻeku ngāue fakafaifekaú pea ʻi ha ngaahi ngāue tokoni kehe ʻi ha ʻaho. ʻOku ou maʻu moʻoni ha fiefia ʻi he ngāue maʻá e ʻEikí.

Saili S., Feituʻu Kolomuʻa Fakavahefonua, ʻOtu Filipainí