“Langa ʻi ha Kelekele Fefeka,” Ki Hono Fakamālohia ʻo e Toʻu Tupú, Sānuali 2023.
Ngaahi FakavaʻeMālohi
Langa ʻi ha Kelekele Fefeka
Tā fakatātaaʻi ʻe ʻEmilī Sōnasi
Naʻá ku siofi, puputuʻu, ʻi heʻeku fuʻifuʻi mo hoku fāmilí ʻa e fakavaʻe sima ʻo homau falé. Naʻá ku ongoʻi ngalivale. Ko hai kuó ne fanongo ʻi hono fuʻifuʻi ʻo ha fale? ʻI heʻemau hiki ki Tekisisi, USA, naʻe fakamatalaʻi mai ʻe homau kaungāʻapí, naʻe fie maʻu ʻi he feituʻu ko iá ke fuʻifuʻi e fakavaʻe homau falé koeʻuhí ke ʻoua naʻa hanga ʻe he ʻeá ʻo ʻai ke mafahifahi ʻa e falé. Ko ia ne u fuʻifuʻi e falé, neongo ne u ongoʻi ngalivale ʻi hono fai iá.
Naʻe tokoni hono fuʻifuʻí ʻi ha kiʻi taimi, ka naʻe faifai pē pea kamata ke mafahifahi homau falé. Naʻe ʻikai fuoloa kuó ma ʻiloʻi naʻe ʻikai langa homau falé ʻi ha kelekele fefeka. Naʻe langa ia ʻi ha lingiʻanga veve, ʻa ia naʻá ne fakatupunga e ngoto homau falé ʻi he fakaʻau ke popo ʻa e veve ne tanu ʻi laló. Naʻa mau fuʻifuʻi ʻa e fakavaʻé, ka naʻe kei mafahifahi pē homau falé. Ko ia ne faifai peá ma hiki.
ʻOku fakamanatu mai ʻe he aʻusia ko ʻení ʻa e mahuʻinga ʻo hono langa hoku fakavaʻe fakalaumālié ʻi he kelekele fefeka ʻo e ongoongolelei ʻo Sīsū Kalaisí. Kuo ʻi ai ha ngaahi taimi ne ʻikai ke u ongoʻi ai ha tui mālohi feʻunga ki he ongoongoleleí. ʻI heʻeku fili ke tuí, naʻá ku “fuʻifuʻi ʻa e fakavaʻe” ʻo ʻeku tuí kae ʻoua kuó u lava ʻo langa ha fakamoʻoni ʻi he kelekele fefeka ʻo e ongoongoleleí. ʻI heʻeku fili ko ia ke moʻui ʻaki e ongoongolelei ʻo Sīsū Kalaisí, kuó u langa ai ha fakavaʻe mālohi he ʻikai toe mafahifahi.
ʻʻEni J., Melileni, USA