“Fakafehokotakí,” Ki Hono Fakamālohia ʻo e Toʻu Tupú, Sānuali 2023.
Fakafehokotakí
Tosonilini R.
17, Matakasikā
Faitaaʻi ʻe Valisoa Lakoto
Ko hoku hingoá ko Tosonilina mei ʻAnitananalivo, Matakasikā. ʻOku ou saiʻia he fanongo ki he ngaahi hiva fakafiemālié, lau tohí, mo e vaʻinga pasiketipoló mo e soká.
Naʻá ku fili ke u papitaiso ʻi hoku taʻu valú. ʻI hono fakauku au ʻi he vaí, naʻá ku ongoʻi ha fiefia makehe naʻe maʻu mei he Laumālié. Hili ha taimi nounou mei hoku papitaisó, ne mālōlō ʻeku faʻeé. Naʻá ku ongoʻi loto mamahi, loto-mafasia, mo loto-foʻi. ʻOku ʻikai totonu ke ʻilo ʻe ha fānau ʻa e ongo ʻoku maʻu ʻi he mole ʻo ʻenau faʻeé.
Ka neongo ia, hili ha taʻu ʻe tolu mei ai ne mau ʻalu ki he temipalé pea silaʻi kimautolu ko ha fāmili. Naʻe toe foki mai ʻa e ongo makehe ʻo e Laumālié ʻi he ʻaho ko iá, pea naʻá ku ongoʻi naʻe ʻi hoku tafaʻakí ʻa ʻeku faʻeé ʻi he temipalé. ʻOku ou tui te u toe mamata kiate ia ʻi ha ʻaho.
ʻOku ou feinga ke manatuʻi maʻu pē ʻa e ongo naʻá ku maʻu ʻi he temipalé. ʻOku ou tauhi ʻa e Laumālié ʻiate au ʻaki ʻeku lau e folofolá mo ako fekauʻaki mo e ngaahi tāpuaki ʻo e temipalé. ʻI he taimi ʻoku feinga ai e ngaahi pōpoaki fakamāmaní ke fakapuputuʻuʻi aú, ʻoku ou ako e folofolá mo falala ki he ngaahi lea ʻa e kau palōfitá. ʻOku nau fakalotolahiʻi mo fakamālohia ʻeku tuí.