“Hangē Ange ko Kalaisi,” Ki Hono Fakamālohia ʻo e Toʻu Tupú, Sānuali 2023.
Hangē Ange ko Kalaisí
Ko e konga ʻe taha ʻo e polokalama Fānaú mo e Toʻu Tupú ko e feinga ke hoko ʻo hangē ange ko Kalaisí ʻaki e tupulaki fakalaumālie, fakasōsiale, fakatuʻasino, mo fakaʻatamai (vakai, Luke 2:52). Tui ki ai pe ʻikai, ʻoku ʻikai fie maʻu ke faingataʻa e ngāue ki he ngaahi taumuʻá ʻo hangē ko hoʻo fakakaukaú. Vakaiʻi e founga ʻoku tupulaki ai e toʻu tupu he funga ʻo e māmaní ke hangē ange ko Kalaisí!
Fakalaumālie
Hingoá: Katalina
Feituʻú: Silei
Taumuʻá: Lau e folofolá mo lotu ʻi he ʻaho kotoa pē
“ʻOku ou feinga ke ofi ki he Laumālié ʻaki haʻaku lotu. ʻOku ou lotu ʻi he pō kotoa kimuʻa peá u mohé peá u toki lau ʻeku folofolá. ʻOku ou ngāue mālohi ke mahino lelei ange kinautolu kiate au. ʻI he taimi ʻoku ou laukonga mo lotu ai ʻi he ʻaho kotoa peé, ʻoku ou ongoʻi nonga mo ofi ange ai ki he ʻOtuá.”
Fakasōsiale
Hingoá: Laisa
Feituʻú: Haʻamoa
Taumuʻá: Feinga ke maheni lelei ange mo e kau finemui ʻi heʻene kalasí
“Mahalo pē ne u ʻiloʻi e hingoa ʻo e finemui kotoa pē ʻi hoku uōtí, ka naʻe ʻikai ke u ʻiloʻi pe ko hai kinautolu pe ko e hā e meʻa ʻoku nau saiʻia aí. Ko ia ne u kamata taha-taha pē mo e kau finemuí, pea ki ha tokotaha mā hangē ko aú, ne u fiefia ʻi heʻeku ʻiloʻi e ngaahi meʻa lahi ʻokú ma faitatau aí. Ko e lahi ange e taimi naʻá ku fakaʻaongaʻi ke maheni ai mo kinautolú, ko e lahi ange ia ʻeku vakai ki he kau finemui fakaʻofoʻofá ni ʻi he founga ʻoku ʻafio mai ai e Tamai Hēvaní kiate kinautolú.”
Fakatuʻasino
Hingoá: ʻIusini
Feituʻú: Keniā
Taumuʻá: Fakalakalaka ʻi he ʻakapulú (soka)
“Naʻá ku kamata akoako mo ha ngaahi kaungāmeʻa he māhina kuo ʻosí. Kuo tokoni e aʻusiá ke mahino kiate au ʻoku ʻikai finangalo e ʻOtuá ke tau fai toko taha ʻeni. ʻE lava ke kau fakataha hotau ngaahi kaungāmeʻá mo kitautolu ʻi heʻetau ngaahi taumuʻa ke hoko ʻo hangē ange ko e Fakamoʻuí. ʻOkú Ne ʻafioʻi ʻoku fie maʻu ke tau fetokoniʻaki ke lavameʻa. Kapau te tau lotu, te Ne ʻomi ha kakai ki heʻetau moʻuí ke tokoniʻi kitautolu ke tau aʻusia hotau lelei tahá.
Fakaeʻatamai
Hingoá: Siakisoni
Feituʻú: Saute Kalolaina, USA
Taumuʻá: Taimi lōloa: Maʻu ha loli fakatau meʻakai ʻi ha ʻaho; taimi nounoú: Ako fekauʻaki mo hono ngaohi ʻo e meʻakaí
“Naʻá ku talaange ki ha taha ʻo ʻeku kau taki ʻi he Kau Talavoú fekauʻaki mo ha taumuʻa ke ʻi ai haʻaku loli fakatau meʻakai. Naʻá ne pehē mai, ʻKo e taʻu kotoa pē ʻoku ou fai ai ha paati foki-ki he-akó. Fēfē kapau te ke haʻu ʻo feimeʻatokoni maʻa kimautolu?’ Naʻá ku fai leva ia. Naʻá ku ngaohi ha sōsisi mo ha hamipeka ʻe 50 nai ʻi ha miniti pē ʻe 45. Naʻá ku saiʻia ke feohi mo e kau talavou ʻi heʻeku kōlomú, pea ne u maʻu ha fakamatala lelei mei he aʻusia ko iá mo e ngaahi fakahikihikí. Pea naʻá ku ako ha meʻa lahi.”