“Ko e Lea Fakafonua ʻo e Laumālié,” Liahona, Sānuali 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Lea Fakafonua ʻo e Laumālié
Naʻá ku ʻilo ʻe lava ke tokoniʻi kitautolu ʻe he Laumālié ke tau fakahoko e ʻofa ʻa e Tamai Hēvaní, ʻo aʻu ki he taimi ʻoku tau ongoʻi taʻe-feʻunga aí.
Taá ʻi he angalelei ʻa e tokotaha naʻá ne faʻú; tā fakatātaá ʻe Jennifer M. Porter
Tā fakatātaaʻi ʻe Jennifer M. Potter
Naʻá ku faʻa fononga ʻi ha ngaahi faʻahitaʻu māfana ʻi ʻIulope mo ha timi hulohula. Naʻe kehekehe ʻemau kau fanongó, founga fakahokó mo e tuʻunga ʻo e iví, ka naʻe ʻi ai ha tukufakaholo ʻe taha naʻe tatau maʻu pē: ne mau fakaʻosi e fakaʻaliʻali kotoa pē ʻaki hono hivaʻi e “ʻOku ʻa e ʻOtuá Kitauá”1 ʻi he lea fakafonua ʻo e fonua ne mau ʻaʻahi ki aí. Koeʻuhí ko e tokolahi taha ʻo ʻeku timi hulohulá naʻe kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻa mau saiʻia ʻi he tukufakaholo ko ʻení. Ko ha founga fakaʻofoʻofa ia ke fetuʻutaki ai mo e kakaí mo vahevahe e ʻofa ʻa e Tamai Hēvaní.
ʻI he fakaʻosinga ʻo e taha ʻo e ngaahi fononga ko ʻení, naʻa mau toki kolosi pē ʻi he kauʻāfonuá ki Siamane ʻo ako hiva ʻi he foʻi hivá ʻi he lea faka-Siamané ki he ngaahi fakaʻaliʻali ka hokó. Ka ʻi heʻema aʻu atu ki aí, naʻá ma ʻiloʻi ai naʻe lea faka-Sopiani ʻa e vahefonua ko ʻeni ʻo Siamané, ko ha lea naʻe ʻikai fuʻu tatau mo e foʻi hiva naʻa mau ako faivelengá.
ʻI heʻemau heka pasi ki heʻemau fakaʻaliʻalí, naʻá ku ongosia pea naʻá ku fiemaʻu pē ke u mohe ʻi he lolotonga e fonongá. Ka naʻe ʻi ai ha ngaahi fakakaukau kehe ʻa ʻemau kau talēkitá. Naʻa nau kole mai ki heʻemau kau fai fakahinohinó ke liliu ʻa e himí ki he lea faka-Sopianí. Ko ʻeni, naʻa nau fiemaʻu ʻa e kotoa ʻo e kau faiva fiemoheá ke nau ako ʻa e foʻi hivá ʻi ha ngaahi houa siʻi pē kimuʻa pea mau fakaʻaliʻalí.
Naʻa mau fai homau lelei tahá. ʻI he fakaʻosinga ʻo e polokalamá, naʻa mau tuʻu fakataha ʻi muʻa he siteisí ʻo kamata ke mau hiva. ʻOku ou manatuʻi ʻeku ʻohovale ʻi he faingofua pē ʻeku fakakaukau ki he ngaahi lea naʻe ʻikai ke u maheni mo ia ʻi he ngaahi houa siʻi kimuʻá. Naʻá ku ongoʻi kuo mōlia atu ʻa ʻeku ngaahi veiveiua kimuʻa fekauʻaki mo ʻemau mateuteu ke hivá ʻi heʻeku fakafalala ki he Laumālié ke fakamanatu mai kiate au ʻa e ngaahi leá.
ʻI he ʻosi ʻemau hulohulá pea kamata ke mau hivá, naʻe ʻomi ʻe he Laumālié ʻa e fakalea ʻo e hivá kiate au.
Laʻitā ne maʻu ʻi he angalelei ʻa e tokotaha naʻá ne faʻú
Naʻe ʻohovale mo fiefia ʻa e haʻofangá pea nau fiefia. ʻI he ʻosi ʻa e hivá, naʻe fakalongolongo ʻa e fuʻu kakaí. Naʻa nau tuʻu leva ʻo kamata ke hivaʻi mai ha foʻi hiva kiate kimautolu, ʻa ia naʻa nau fakamatalaʻi kimui ange ko ha hiva ʻo e loto houngʻia naʻa nau faʻa tuku pē ki ha ngaahi meʻa makehe naʻe hoko.
Naʻá ku ongoʻi mālohi ʻa e Laumālié ʻi he momeniti ko iá, neongo naʻe ʻikai mahino kiate au ʻa e meʻa naʻa nau hivaʻí. Naʻá ku houngaʻia ʻaupito ʻi hono tokoniʻi au ʻe he ʻEikí ke u fakahoko ʻEne ʻofá neongo ʻeku ongoʻi taʻe-feʻungá. Naʻá ku manatuʻi ko e ʻofa ʻa e Tamai Hēvaní ko ha pōpoaki fakamāmani lahi ia. Neongo pe ko e hā e ngaahi faikehekehe ʻoku tau maʻú, ka ʻe lava ke mahino kiate kitautolu kotoa ʻa e lea fakafonua ʻo e Laumālié.