“Naʻá Ke ʻi Fē Ai Pē?,” Liahona, Sānuali 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻá ke ʻi Fē Ai Pē?
Naʻe pau ke u tali e taimi mo e ngaahi taumuʻa ʻa e ʻOtuá ʻi heʻeku ako ke ʻofa ʻi heʻeku kuifefiné ʻo hangē ko e ʻofa ʻa e Tamai Hēvaní mo Sīsū Kalaisi ʻiate iá.
Neongo e puke ʻa e Kuifefiné, ka ko e meʻa kotoa pē ʻokú ne fai maʻakú, ʻoku tupu ia mei heʻene ʻofa ʻiate aú.
Laʻitā ne maʻu ʻi he angalelei ʻa e tokotaha naʻá ne faʻú
Naʻe fehuʻi mai ʻe heʻeku kuifefiné ʻi heʻene tali mai ʻeku tukituki ʻi hono matapaá, “Naʻá ke ʻi fē ai pē siʻeku tama?” Ne u toki foki mai pē mei haʻaku ngāue fakafaifekau taimi kakato ki ʻEla Salavatoa. Naʻe fofonga fiefia ʻeku Kuifefiné ʻi heʻene toe sio mai kiate aú. Naʻe molū mo māfana hono ongo nimá ʻi heʻene fāʻofua ʻi hoku kiá.
Naʻá ma talanoa fiefia ʻi heʻeku tali ʻene ngaahi fehuʻi fekauʻaki mo ʻeku ngāue fakafaifekaú. Naʻá ku ongoʻi loto-māfana ʻi heʻeku fakamatala ange ki ai fekauʻaki mo e kakaí, meʻakaí, ngāue mālohí, mo e ngaahi mana ʻo ʻeku ngāue fakafaifekaú. ʻI he ʻosi ʻeku fakamatalá, naʻe fakafokifā pē ʻene fakalongolongó. Naʻá ne fehuʻi mai, “Naʻá ke ʻi fē ai pē siʻeku tama?”
Ko hono moʻoní, naʻe ʻikai ke ne fanongo. Ko ia, naʻe toe kamata leva ʻema pōtalanoá. Ne ʻikai ʻosi ha miniti ʻe 20 mei ai, kuó ne fehuʻi tuʻo tolu mai, “Naʻá ke ʻi fē ai pē siʻeku tama?”
Naʻe ʻi ai ha meʻa ne fehalaaki. Naʻe ʻikai fuoloa kuó u ʻiloʻi ne hili pē ha taʻu ʻe taha ʻo ʻeku ʻalu ʻo ngāue fakafaifekaú, naʻe ʻilo ʻoku puke ʻeku kui fefiné ʻi he ʻAlasaimā.
Naʻá ku ongoʻi ha holi lahi ke tokoni ki heʻeku Kuifefiné. Naʻá ku malangaʻi ʻi ha taʻu ʻe ua ʻa e ʻofa ʻa e ʻOtuá ki Heʻene fānaú. Kuó u maʻu ʻeni ha faingamālie ke moʻui ʻaki e ngaahi akonaki ko iá. Neongo naʻá ku ʻiloʻi ʻe faingataʻa, ka naʻá ku talaange te u hiki ʻo nofo fakataha mo ia ke u lava ʻo tokoni ki ai.
Ko e ngaahi ʻuluaki māhiná naʻe faingataʻa tahá. Hangē ko ia ʻi he malaʻe ngāue fakafaifekaú, naʻe hoko ʻa e faʻa kātakí mo e mapuleʻi ʻo e ʻitá ko ha ngāue taimi kakato. Pea ʻi he lolotonga ʻeku ngāue fakafaifekaú, naʻe pau ke u tali e taimi mo e ngaahi taumuʻa ʻa e ʻOtuá ʻi heʻeku ako ke ʻofa ʻi heʻeku kuifefiné ʻo hangē ko e ʻofa ʻa e Tamai Hēvaní mo Sīsū Kalaisi ʻiate iá.
Taimi ʻe niʻihi ʻoku hangē e nofo mo ʻeku Kuifefiné ko e nofo mo ha kakai kehekehe ʻe toko tolu. Taimi ʻe niʻihi ʻoku ʻikai ke ne lava ʻo kātakiʻi ke ʻi ai ha taha kehe ʻi ʻapi. Ko e taimi ʻe niʻihi ʻokú ne fiemaʻu ʻeku tokangá, pea fiefia ʻoku ʻikai ke ne tuenoa. Taimi ʻe niʻihi ko e meʻa pē ʻokú ne fakakaukau ki aí ko e meʻa ke fafanga ʻaki hono mokopuna tangata ne toki foki mai mei heʻene ngāue fakafaifekaú. ʻE lava ke vave ʻa e hoko ʻa e “ʻOua te ke fai iá!” ko e “Ko e hā ʻoku ʻikai ke ke fai ai eé?”
Ka kuo hoko ʻeku kuifefiné ko ha tāpuaki maʻongoʻonga kiate au. ʻOku ou ʻiloʻi neongo ʻene puké, ka ko e meʻa kotoa pē ʻokú ne fai maʻakú, ʻoku tupu ia mei heʻene ʻofa ʻiate aú.
ʻOku maʻu e ngaahi lea fakaʻofoʻofa mo fakamātoato taha ʻa ʻeku kuifefiné ʻi he taimi kotoa pē ʻoku ou foki ai ki ʻapi mei he akó pe ngāué. ʻOkú ne fāʻofua mo ʻuma ʻi hoku kouʻahé, mo ne fehuʻi mai, “Naʻá ke ʻi fē ai pē siʻeku tama?”