“Ko e Hā ʻOku ʻIkai Ke u Lava Ai ʻo Fakamolemoleʻí?,” Liahona, Sānuali 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Hā ʻOku ʻIkai Lava Ai Ke u Fakamolemoleʻí?
Naʻá ku lotua ke tokoniʻi au ʻe he Tamai Hēvaní ke u ikunaʻi ʻeku ngaahi ongoʻi koví pea fakamolemoleʻi.
Tā fakatātā ʻa Allen Garns
Naʻá ku kau fakataha mo ha kau tangata kehe ʻi hoku uōtí ke tokoni ki ha fefine ke hiki. Ka ʻi heʻemau aʻu atu ki he ʻapi naʻe nofo totongi aí, naʻe ʻikai ke tau fakalelei ʻa e veeni naʻe ʻi aí pea ʻikai ke mau lava ʻo aʻu ki hono feituʻú ʻi heʻemau vēní.
Naʻá ku telefoni leva ki he fika telefoni he tafaʻaki ʻo e vēní ʻo kole ki ha taha ke haʻu ʻo ʻunuakiʻi ʻa e vēní. Naʻe tali mai ʻe ha tangata mo palōmesi mai ʻe vavé ni pē haʻane haʻu.
Hili ha miniti ʻe 15, naʻá ku toe telefoni ki ai, ka naʻe ʻikai ke ne tali mai. Hili ha toe telefoni ʻe taha, naʻá ne ʻasi mai mo ha fānau ʻe toko ua. Naʻá ne ʻita peá ne lea ʻaki ha meʻa ne tau kovi kiate au. Naʻá ku feinga ke fakangaloki ia ʻi heʻemau hoko atu e fehikitakí.
Naʻá ku fakakaukau ʻi he efiafi ko iá ki he meʻa naʻe hokó. Naʻá ku lotua ke tokoniʻi au ʻe he Tamai Hēvaní ke fakangaloʻi ʻeku ngaahi ongó mo fakamolemoleʻi ʻa e tangatá. Naʻá Ne tali ʻeku lotú.
Ne hili ha kiʻi taimi siʻi mei ai, naʻá ku lau ha nusipepa fakafeituʻu peá u fakatokangaʻi ha fakamatala fekauʻaki mo e tangatá ni. Naʻe kau ai hono laʻitaá. Naʻe toe foki mai ʻeku ongoʻi taʻe-fiemālie kiate iá. Ko ia, naʻá ku toe fakahoko pē ʻa e meʻa tatau. Naʻá ku kole ki he ʻEikí ke ʻoua muʻa naʻá ku toe hohaʻa ki he meʻa taʻe-mahuʻinga ko ʻení pea ke Ne tokoniʻi au ke u fakamolemoleʻi ʻa e tangatá. Ne u maʻu ha ongoʻi fiemālie.
Naʻe ʻikai fuoloa kuó u fetaulaki mo e tangata tatau ko ʻeni ʻi ha falekoloa. Naʻe toe foki mai pē ʻeku ngaahi ongo koví. Naʻá ku ofo. Naʻá ku fehuʻi ki he ʻEikí pe ko e hā naʻe ʻikai ke u lava ai ʻo ikunaʻi ʻa e aʻusia ko ʻení. Hili ha ngaahi ʻaho siʻi mei ai, naʻá Ne akoʻi mai ha lēsoni.
ʻI he ʻai ke u mavahe mei he kelekele ʻo e Temipale Helsinki Finland ne u fakatokangaʻi ʻa e tangata tatau pē ʻoku ngāue ʻi he ngoue ʻo e temipalé. Naʻe ʻikai ke u faʻa tui ki he meʻa naʻá ku sio ki aí. Naʻe fakaava hoku ʻatamaí pea naʻe mahino kiate au naʻá ne ngāue maʻá e ʻEikí ʻo hangē pē ko aú, pea ʻokú ne hangē pē ko aú ʻo loto-mamahi ʻi he taimi ʻoku ʻikai lelei ai ha meʻá. Naʻe lava leva ke u vakai ki he tangatá ni ko hoku tokoua. Naʻá ku ongoʻi fakaʻapaʻapa mo ʻofa kiate ia ʻaki ha vakai foʻou. Hili iá, naʻe mavahe ʻa e ngaahi ongo kimuʻá ʻo ʻikai toe foki mai.
ʻI he taimi ʻoku tau vakai ai ki he niʻihi kehé ʻo hangē ko e ʻafio mai ʻa e ʻEikí kiate kitautolú, te tau lava ʻo muimui ki Heʻene fekau ke fakamolemoleʻi kakató (vakai, Mātiu 6:14–15; Tokāteline mo e Ngaahi Fuakava 64:9–10). Ko e aʻusia ko ʻení ko ha ʻaloʻofa ongongofua mo fakangalongataʻa ia ʻa e ʻEikí, ʻa ia ʻoku ou kei fakalaulauloto ki ai ʻi hoku lotó.