Hina’aro ānei ’outou ’ia ’oa’oa ?
’A fa’aea i ni’a i te ’ē’a nō te fafaura’a. E ’ōhie roa tō ’outou orara’a, pōpou, ’e te īra’a ’o te ’oa’oa.
Hina’aro ānei ’outou ’ia ’oa’oa ? E aha te mea i ’ore ai ’outou e ’oa’oa ? ’Ua parau te peresideni Russell M. Nelson :« Mai te mea e hina’aro ’outou i te māuiui, ’a ’ofati ïa i te ture—’eiaha roa atu e tātarahapa. Ia hina’aro āna’e ’outou i te ’oa’oa, ’a faʼaea noa i niʼa i te ʼēʼa nō te fafauraʼa. »1 E ere ānei i te mea ’ōhie ’ia ’oa’oa ? ’A rave i te mau fafaura’a ’e ’a ha’apa’o i te reira i roto i tō ’outou orara’a. E hi’o ’āmui tātou i te tahi mau fa’anahora’a tei tauturu ia tātou ’ia fa’aea i ni’a i te ’ē’a nō te fafaura’a ’e ia ’oa’oa tātou.
1. E aha te ’ē’a nō te fafaura’a ?
’Ia au te parau a Elder Dale G. Renlund, « terā parau ē’a nō te fafaura’a, e pāpa’a fafaura’a ïa e haere mai ai tātou i te Mesia ’e e tū’ati ai iāna. Nā roto i teie tā’amura’a nō te fafaura’a, ’ua matara nō tātou te ’ē’a nō tōna mana mure ’ore. E ha’amata terā ’ē’a ma te fa’aro’o ia Iesu Mesia ’e te tātarahapa, ’āpe’ehia mai e te bāpetizora’a ’e te fāri’ira’a i te Vārua Maita’i. »2 E faʼaʼāpī tātou i teie fafauraʼa i te mau sābati atoʼa i te taime ’a rave ai tātou i te ʼōro’a.
’Ōmuahia e te fafaura’a nō te bapetizora’a, e rave tātou i te mau fafaura’a i te roara’a o tō tātou orara’a. ’Ua parau fa’ahou ā ’o Elder Renlund : « E arata’i te ’ē’a nō te fafaura’a i te mau ’ōro’a o te hiero, mai te ’ōro’a hiero. Te ’ōro’a hiero, e hōro’a ïa nā te Atua, e hōro’a nō te mau fafaura’a mo’a e fa’atū’ati hope atu ā ia tātou iāna ra.3
2.Tei ni’a ānei ’outou i te ’ē’a nō te fafaura’a ?
I te tahi mau taime ’ia rave ana’e tātou i te mau fafaura’a, e’ita tātou e ha’apa’o i te reira. ’Ia tupu ana’e te reira, nāhea tātou e ho’i fa’ahou ai i ni’a i te ’ē’a nō te fafaura’a ? Teie te tahi mau hi’ora’a nō te ho’i-fa’ahou-ra’a mai i ni’a i te ’ē’a nō te fafaura’a.
’A tahi ’āva’e i teienei, ’ua fa’atae mai te tahi misiōnare tei fa’aoti i tāna misiōni, i te hō’ē poro’i, hō’ē ā mātou i te tāvinira’a. Teie taua parau ra : « Te mau mahana i ma’iri e mea fifi mau. Te ’arora’a i te māna’ona’o ahoaho ’e te ’aravī i te mau mahana ato’a tei ha’ateimaha iā’u ’e e mea rave ’atā roa. ’Ua ha’amo’emo’e roa vau ’e te ahoaho. ’Ua pure onoono vau i te Metua i te ao ra nō te tahi ’arata’ira’a ’ia hau ’e ’ia tāmāhanahanahia vau i roto i teie mau tāmatara’a tā’u e ’aro nei […] I te taime ’a pure ai au, fa’ari’i atu ra vau i te fa’aurura’a a te Vārua tei parau mai iā’u ē ’ia ’aufau i te tā’āto’ara’a o tā’u tuha’a ’ahuru […] ’Ua pūai te fa’aurura’a a te Vārua i ni’a iā’u ’e ’ite atu vau i te rū o teie ’ohipa. Nō tō’u hia’ai e nā reira, fāri’i fa’ahou ā vau i te parau ē, ‘’ia ’aufau ana’e ’oe i te tuha’a ’ahuru, e ’āfaro te mau mea ato’a.’ Te ’aro noa nei au ’ia ’itehia iā’u te hau, terā rā tē vai ra tō’u ’itera’a pāpū nō tō tātou Fa’aora ’e nā roto i tō’u ha’apa’o e ’ite atu vau i te hau ’imihia e au i roto i tō’u ’ā’au ’e tō’u ferurira’a. Nō fa’aoti atu vau i te ho’ira’a mai i roto i te ’Ēkālesia ’e i te ’imi i te Vārua i roto i te mau ’ohipa ato’a tā’u e rave. »
I teienei e mea maita’i roa ’oia. E ’ani ato’a paha ’outou i te Metua i ni’a i te ra’i ra nō te hau, terā rā e nehenehe te pāhonora’a e tū’ati ’ore i tā ’outou e mana’o ra. ’A imi noa atu ā ’outou nō te ’ite atu i te huru o te Fa’aora ’e ’a pure noa atu ā ho’i i te Metua i te ra’i ra, e hōro’a mai ’oia i te tahi pāhonora’a e tano maita’i i ni’a ia ’outou.
’Ua ha’api’i te peresideni Thomas S. Monson :
« Te ha’api’ira’a rahi roa ’o tā tātou e nehenehe e ’apo mai i roto i te tāhuti nei, ’oia ïa, ’ia parau ana’e te Atua ’e e fa’aro’o tātou, ’ua tano noa ïa tātou. »4
« ’Ua ’ite ’oia ē, ’ia ha’apa’o ana’e tātou i te mau fa’auera’a, ’e ’oa’oa a’e tō tātou orara’a, e ’ī a’e tō tātou orara’a, ’e e iti te fifi. E ’ōhie a’e tō tātou mau tāmatara’a ’e tō tātou mau fifi ’ia amo, ’e e fāri’i tātou i te mau ha’amaita’ira’a [tā te Atua] i fafau mai. »5
I tō’u pi’ira’ahia ’ei ’episekōpo, tei roto ïa i te hō’ē taime fifi roa nō tō’u orara’a. E metua tāne ’āpī au i roto i tē 30ra’a o te matahiti teie rā, tei roto roa vau i te fifi moni ’ore nō te fifi i roto i te ’utuāfare. ’Aita tā’u e rave’a nō te ha’amatara i taua fifi ra, ’e ’ua mana’o vau ē, e ’ore roa tō’u fifi e matara. ’Ua oti roa vau i te pae faufa’a ’e i roto ato’a i tō’u ferurira’a. Ha’amata atu ra vau i te fē’a’a i te pūai o tō’u fa’aro’o. Tei taua taime mau ra o tō’u fifi i pi’ihia ai au e te peresideni titi. ’Ua fāri’i atu vau i te pi’ira’a, noa atu ē e mea pa’ari.
’Ua tītau-ato’a-hia tō’u hoa here e te peresideni titi nō te tahi ’āparaura’a, teie rā, e’ita tāna e nehenehe e parau ’ē, ’aita ato’a i parau ’aita, ’ua tahe noa rā tōna roimata. ’Ua ’oto ’oia i te tā’āto’ara’a o taua hepetoma ra, ma te ani i te Metua i te ra’i ra : « Nō te aha i teienei ? », ’e « ’Ua ’ite pāpū ānei ’oe i te ta’ata tāta’itahi ? » ’Aore roa ’oia i fa’ari’i i te pāhonora’a, terā rā ’ua pāturuhia vau ’ei ’episekōpo i te sābati i muri mai. ’Aita roa atu ’oia i ani fa’ahou i te Metua i te ra’i ra i taua mau uira’a ra, teie rā ’ua pāturu maita’i ’oia iā’u i roto i tā’u pi’i’ra’a i nā matahiti e ono.
I te sābati i ha’amāuruuruhia ai au, ’ua fa’aro’o tō’u hoa here i te hō’ē reo i te taime i rave ai ’oia i te ’ōro’a. E reo iti ha’iha’i iāna ra : « Nō te mea e ’ere roa atu i te mea ’ōhie nō ’oe i te hāhaere, ’Ua pi’i au iāna ’ei ’episekōpo ’ia tāpe’a ia ’oe ’e ’ia haere nō ’oe. » Hi’o atu ra ’oia i muri i nā matahiti e ’ono, i reira ’oia i te ’itera’a ē te raura’a o te tāmatara’a ’aore e hōpe’a ’ua fa’a’āfarohia ïa i roto te horora’a o te tau.
’Ua ha’api’i māua ē, ’ia mana’o a’e tātou ē e ’ere i te taime tano nō te fa’ari’i i te pi’ira’a, tei taua taime mau ra e tītauhia taua pi’ira’a ra. ’Ia ani noa atu te Fatu ia tātou ’ia tāvini i roto i te mau pi’ira’a, te mea māmā ’e ’aore ra tei teimaha, tē ’ite ra e aha tē tītauhia nō tātou. E hōro’a mai ’oia i te pūai hina’arohia e tātou ’e ’ua fa’aineine ’oia i te mau ha’amaita’ira’a ’ia nīni’i mai i ni’a iho ia tātou ’ia tāvini tātou iāna ma te ha’apa’o maita’i.
E rave rahi fa’anahora’a ’ē atu tei ha’anevaneva ia tātou ’ia fa’aea i ni’a i te ’ē’a nō te fafaura’a. Noa atu te ’ohipa e tupu ra, ’aita tātou i tāere nō te fāriura’a i tō tātou ’ā’au i ni’a i te Metua i te ra’i ra nō te ani i te tauturu. Tē ha’api’i mai ra ’o Elder Paul V. Johnson : « ’Ia pe’e tātou ia Sātane, e hōro’a tātou i te mana iāna. ’Ia pe’e tātou i te Atua, e hōro’a mai ’oia i te mana ia tātou. »6
’Ua fa’a’ite te ari’i Beniamina i tōna ’itera’a pāpū i roto i te Buka a Moromona : « ’E ’oia ato’a, ’ua hina’aro ho’i au ’ia ha’amana’o ’outou i te huru ha’amaita’ihia ’e te ’oa’oa o te feiā e ha’apa’o i te mau fa’auera’a a te Atua. Inaha ho’i, e ha’amaita’ihia rātou i te mau mea ato’a, i te pae tino ’e i te pae vārua ato’a ho’i ; ’e mai te mea e ha’apa’o maita’i noa rātou ē tae noa atu i te hope’a ra, e fāri’ihia īa rātou i te ao ra, ’e e pārahi rātou i piha’i iho i te Atua i roto i te ’oa’oa hope ’ore ra. »5
3. E nāhea te ha’apa’ora’a i te mau fa’auera’a e te Atua e fa’atupu ai i tō ’outou ’oa’oa ?
’Ua parau mai tō’u hoa here e nā tō māua fa’aipoipora’a e tā’amu zugo ia māua, ’e maoti te reira e ti’a ai iāna i te rave i te mau ’ohipa tei ore e ti’a iāna i te rave i muta’a ra. ’Ei hi’ora’a, i tōna ’āpīra’a, mea fifi nōna i te haere ’ōna ana’e iho i te pō, ’āre’a i teienei, e ’ere ïa i te mea fifi fa’ahou i te mea ē ’o māua tē haere atu. Mea huru poto ’oia ’e e’ita e ti’a iāna ’ia ra’ehia i te teiteira’a o te pa’epa’e maoti rā e fa’a’ohipa ’oia i te pārahira’a ’e ’aore rā i te ’ē’a, terā rā e ra’ehia iā’u te mea e hina’arohia e āna nō tōu ho’i fāito roa. Mai teie ato’a te huru te amora’a i te zugo a te Fa’aora i ni’a ia tātou. ’Ia zugo āna’e tātou i tō tātou Fa’aora, e rave ïa tātou i te mau mea e ’ore e ti’a ia tātou i te rave i te mea ē, e ti’a iāna i te rave i te mau mea ato’a tei ’ore e mara’a ia tātou.
’Ua parau ’o Elder David A.Bednar : « ’Ia rave ’e ’ia ha’apa’o tātou i te mau fafaura’a mo’a, nā te reira e tā’amu ia tātou i ni’a i te Fatu ia Iesu Mesia. Te aura’a mau, tē tītau manihini mai nei te Fa’aora ia tātou ’ia ti’aturi iāna ’e ’ia huti ’āmui tātou ’e ’o ’oia, noa atu ē, ’aita tā tātou tauto’ora’a maita’i roa a’e e ’aifāito i tāna, ’e e’ita roa iho ā e fa’aauhia i tāna. Mai te mea ē, e ti’aturi tātou iāna, ’e e huti tātou i tā tātou hōpoi’a ’e ’o ’oia ato’a i roto i te tāhuti nei, e mea pāpū roa ē, e mea marū tāna zugo ’e e māmā tāna hōpoi’a. »8
’Ua ha’api’i ato’a te peresideni Nelson :
« Mai te mea e nati ’outou ia ’outou i ni’a i te Fa’aora, te aura’a ra, e roa’a ia ’outou tōna pūai ’e tōna mana tāra’ehara ».9
« Te tao’a hōro’a nō te fa’aturara’a i te mau fafaura’a i te Atua, ’o te mana ïa nō te ra’i—te mana e ha’apūai ia tātou nō te fa’aruru maita’i a’e i tō tātou mau tāmatara’a, mau fa’ahemara’a, ’e mau māuiui o te ’ā’au. E fa’a’ōhie te reira mana i tō tātou haere’a. Te feiā e ha’apa’o i te mau ture teitei a’e a Iesu Mesia, e fāna’o rātou i te mana teitei a’e. »10
« Te ha’apa’ora’a i te mau fafaura’a, e fa’ariro te reira i te orara’a ’ei mea ’ōhie a’e ! Te mau ta’ata ato’a e rave i te mau fafaura’a i roto i te vāhi pāpetitora’a ’e i roto i te hiero—’e e ha’apa’o i te reira—’ua fa’arahi ïa rātou i te fāna’ora’a i te mana o Iesu Mesia. »11
E au mau taea’e, e au mau tuahine here ē, ’ua hina’aro ānei ’outou ia ’oa’oa ? ’A fa’aea i ni’a i te ’ē’a nō te fafaura’a. E ’ōhie a’e tō ’outou orara’a, e pōpou a’e, ’e e ’ī a’e i te ’oa’oa. Tē tītau manihini nei tō tātou Fa’aora ia tātou : « E haere mai ’outou iā’u nei, e te feiā ato’a i ha’a rahi ’e tei teiaha i te hōpoi’a, e nā’u ’outou e fa’aora. »12 ’O Iesu te Mesia ora. ’Ua amo ’oia i tā tātou mau hōpoi’a ’e ’ua fa’a’ōhie ’oia i tō tātou orara’a. I te i’oa o Iesu Mesia, ’āmene.