Fa’a’itera’a pāpū nō Iesu Mesia nā roto i te parau ’e te mau ’ohipa
’A tūtava ai tātou ’ia ora i tō tātou orara’a mai te au i te ’evanelia a Iesu Mesia, e riro tā tātou mau peu ’ei ’itera’a pāpū ora nō te Fa’aora.
I te bāpetizora’a, hō’ē o te mau fafaura’a tā tātou e rave ’oia ho’i te hina’arora’a ’ia rave i te i’oa ’o Iesu Mesia i ni’a ia tātou. Tā’u fā i teie mahana, ’ia fa’aha’amana’o ia tātou, e nehenehe tātou e fa’a’ite atu i te Atua ē, tē rave nei tātou i te i’oa o tāna Tamaiti i ni’a ia tātou ma te fa’a’ite-pāpū-pinepine-ra’a ’o Iesu te Mesia, nā roto i te parau ’e te ’ohipa.
I tāna taime aupurura’a ’e e tāna ha’api’ira’a i te mau ta’ata i Amerika i muri mai i tōna ti’afa’ahoura’a, ’ua nā ’ō mai te Fa’aora :
« ’Aita ānei rātou i tai’o i te mau pāpa’ira’a mo’a, ’o tei nā ’ō mai ē, e mea ti’a roa ia ’outou ’ia rave i te i’oa o te Mesia, ’oia ho’i, i tō’u nei i’oa i ni’a iho ia ’outou ? ’E ’o teie ho’i te i’oa e pi’ihia i ni’a iho ia ’outou i te mahana hope’a ra ;
« ’E ’o ’oia tē rave i tō’u nei i’oa i ni’a iho iāna ’e ’o te fa’aitoito tāmau noa ē tae noa atu i te hope’a ra, ’o ’oia ïa te fa’aorahia i te mahana hope’a ra ».1
’Ua ha’api’i mai peresideni Russell M. Nelson ia tātou ē, « Te ravera’a i te i’oa o te Fa’aora i ni’a iho ia tātou, ’o te paraura’a ’e te fa’a’itera’a ïa ia vetahi ’ē—nā roto i tā tātou mau ’ohipa ’e tā tātou mau parau ē—’o Iesu te Mesia ».2
’Ei mau melo nō te ’Ēkālesia a Iesu Mesia i te Feiā Mo’a i te Mau Mahana Hope’a nei, ’ua fāri’i a’enei tātou i te ha’amaita’ira’a ’e te fāna’ora’a ’ia ti’a ’ei ’ite pāpū nō te Fatu ’e tōna i’oa i te mau vāhi ato’a i reira tātou.3 ’A tūtava ai tātou ’ia ora i tō tātou orara’a mai te au i te ’evanelia a Iesu Mesia, e riro tā tātou mau peu ’ei ’itera’a pāpū ora nō te Fa’aora ’e tōna i’oa. Hau atu, e fa’a’ite pāpū tātou nō te Mesia nā roto i te parau i te fa’a’itera’a ia vetahi ’ē i tō tātou ti’aturira’a, te nino’a mana’o, ’aore rā te ’ite nō te Iesu Mesia.
I te taime iho tātou e fa’a’ite pāpū ai nō te Fatu nā roto i te parau ’e te ’ohipa, e ha’apāpū te Vārua Maita’i4 i te feiā ’ā’au tae, te māfatu matara, ’e te hina’aro mau ē ’o Iesu te Mesia.5
E fa’a’ite atu vau e piti nā hi’ora’a ’āpī ’e te fa’auru maita’i nō te mau melo tei fa’a’ite i te Atua ē tē rave nei rātou i te i’oa ’o Iesu Mesia i ni’a ia rātou nā roto i te ’āparaura’a nōna ’e tē fa’a’itera’a pāpū teatea nō te Fatu i te mau rurura’a a te ’Ēkālesia.
Hi’ora’a mātāmua : I tō māua tā’u vahine fa’aipoipo, Elaine, revara’a i te fenua Pāniola i te matahiti 2022, ’ua haere māua i te purera’a i te hō’ē ’āma’a na’ina’i a te ’Ēkālesia i reira. I te pārahira’a vau i ni’a ’e tā’u vahine i raro mai, tē ’ite rā vau ē ’ua pārahi ’oia i pīha’iiho i te hō’ē vahine pa’ari a’e iāna. I te fa’aotira’a te purera’a ’ōro’a, haerera’a ïa vau ia Elaine ’e ani atu ra vau iāna ’ia fa’a’ite mai na ’o vai teie hoa ’āpī tāna. ’Ua nā reira ’ōna ’e ’ua parau ē, e ’ere teie vahine i te melo o te ’Ēkālesia, a piti rā matahiti tōna haere-noa-ra’a mai i te purera’a. I te fa’aro’ora’a vau i te reira, ’ua ani vau i teie vahine, tei taiā i te Atua, nō te aha ’oia e tāmau noa ai i te haere mai i te purera’a terā rahira’a matahiti. Ma te here ’ua pāhono mai teie vahine, « mea au nā’u ’ia haere mai i ’ō nei nō te mea tē paraparau nei ’outou nō Iesu Mesia i tā ’outou mau rurura’a ».
Pāpū maita’i ē, tē paraparau nei te mau melo o te ’Ēkālesia i terā pāroita nō te fenua Pāniora, tē ha’api’i nei, ’e tē fa’a’ite pāpū nei nō te Mesia i roto i tā rātou mau rurura’a.
Hi’ora’a piti : I muri noa i te tāvinira’a i te area nō Peretīria, ’ua fāri’i au i te pi’ira’a ’āpī ’ia tāvini i te pū ’ohipa a te ’Ēkālesia. I tō mātou haerera’a i Roto Miti i te hope’a o te ’āva’e Tiurai nō teie matahiti, ’ua haere mātou i te purera’a i te sābati i tā mātou pāroita ’āpī ’e te nehenehe mau. Hō’ē o teie mau purera’a o te purera’a ha’apaera’a mā’a ’e ’īritira’a mana’o. I muri noa i te ravera’a i te ’ōro’a mo’a, rave rahi melo tei ti’a atu nō te fa’a’ite i tō rātou ’itera’a pāpū nō roto roa mai i te ’ā’au, nō ni’a i te Fa’aora hō’ē i muri i te tahi. ’Ua rōtahihia te purera’a ’ōro’a i ni’a ia Iesu Mesia, ’e e nehenehe roa mātou e ’ite i te Vārua. ’Ua fa’ateiteihia mātou ’e tō mātou fa’aro’o ’ua ha’apūaihia ïa. ’Ahiri e hoa nō te ’Ēkālesia i reira, tē ’imi ra i te parau mau, i te reira purera’a, e ’ite ’oi’oi noa rātou o teie te ’Ēkālesia a Iesu Mesia.
’Auē ho’i te ha’amaita’ira’a ē ’ia ’ite ē tā tātou mau purera’a a te ’Ēkālesia e rāve’a ïa nō tātou ’ia fa’a’ite pāpū nō te Mesia ’e fa’a’itera’a i te Atua e tē ’oa’oa nei ’ia rave i te i’oa o tāna Tamaiti i ni’a ia tātou.
I teienei, e fa’a’ite atu vau i te hō’ē hi’ora’a pūai mau nō te ravera’a i te i’oa o Iesu Mesia i ni’a ia tātou nā roto i te fa’a’ite pāpūra’a nōna nā roto i te ’ohipa.
I te ’āva’e ’Ātete i ma’iri, ’ua ’āpe’e au ia Elder Johnathan S. Schmitt i te ’ōpani ’iriti nō te hiero nō Feather River, i Yuba City i California. I reira, ’ua fāna’o vau i te ha’amaita’ira’a ’ia arata’i i te mau pupu tere māta’ita’i i te hiero. I roto hō’ē o te mau pupu tē vai ra te hō’ē melo nō te ’Ēkālesia, ’o Virgil Atkinson, ’e tōna nā hitu hoa nō te tahi atu fa’aro’o. I te pae hope’a o te māta’ita’ira’a, i roto i te hō’ē piha tā’atira’a, ’ua paraparau te taea’e Atkinson ma te ta’i i te fa’a’itera’a i tōna here i tōna nā hoa tei tae mai i terā mahana i te hiero. Fa’atata i muri noa mai i tāna paraparaura’a, ti’a mai nei hō’ē hoa vahine o te rā pupu ’e te paraura’a ē, « Mātou pā’āto’a ’ua here ia Virgil. ’Aita roa atu ’oia i fa’ahepo noa a’e i tōna fa’aro’o ia mātou. Tera rā, e’ita ’ōna i te mea vai mū noa nō ni’a i te reira. E ora noa ’oia i te mea o tāna e ti’aturi nei ».
I terā rahira’a matahiti, ’ua riro te orara’a huru Mesia a te Taea’e Atkinson ’ei ’itera’a pāpū pūai nō tōna mau hoa. E ha’apāpūra’a pūai mau tōna hi’ora’a maita’i e fa’a’itera’a i e ’ua rave mau ’oia i te i’oa o te Mesia i ni’a iāna.
’Ei pū’ohura’a, e fa’a’ite atu vau i te ha’api’ira’a tā’u i ’apo mai e nāhea ’ia rave i te i’oa o te Mesia i ni’a ia tātou ’e tē fa’a’itera’a nōna ma te fa’a’ohipara’a i te i’oa o te ’Ēkālesia.
I roto hō’ē o tāna mau a’ora’a i te matahiti 2018, pi’ihia « Te i’oa ti’a o te ’Ēkālesia », ’ua parau mai te peresideni Nelson, e peropheta ora a te Atua, « E fa’atītī’aifarora’a teie. E fa’auera’a nā te Fatu. ’Aita Iosepha Semita i hōro’a i te i’oa o te ’Ēkālesia i fa’aho’i-fa’ahou-hia mai nā roto noa iāna ; ’aita ato’a o Moromona. ’O te Fa’aora iho tei parau mai ē, ‘nō te mea ’o teie te i’oa e topahia i ni’a i tā’u ’Ēkālesia i te mau mahana hope’a nei, ’oia Te ’Ēkālesia a Iesu Mesia i te Feiā Mo’a i te mau Mahana Hope’a nei’ [Te Ha’api’ira’a Tumu ’e te mau Fafaura’a 115:4] ».6
’Ua fa’aru’e mātou pā’āto’a i te ’āmuira’a rahi i te reira mahana ma te fafaura’a ’e te pāpū ’ia pe’e i te peropheta ’e ’ia fa’a’ohipa, mai teie atu taime, i te i’oa o te ’Ēkālesia mai tei heheuhia mai. E ha’apāpū vau iā’u iho ē, ’ia fa’a’ohipa i te i’oa ti’a o te ’Ēkālesia ? Te mau taime mātāmua ’ua tītauhia iā’u ’ia feruri māite ’e ’eiaha e ho’i fa’ahou i te ravera’a tahito. I muri iho i nā tāmatara’a mātāmua, ’ōhie ri’i ’ia fa’a’ohipa i te i’oa o te ’Ēkālesia i heheuhia mai. E fa’ari’i au ē, e rave rahi taime, e parau vitiviti vau i te i’oa o te ’Ēkālesia. Ha’ape’ape’a ri’i au ’aita te ta’ata e tāu’a mai i te i’oa tā’āto’a o te ’Ēkālesia, ’e e feruri rātou ē, e mea roaroari’i te reira.
Terā rā, ’ua ’itehia mai iā’u ē ’ia parau pāpū ana’e au i te i’oa o te ’Ēkālesia ma te mana’o pāpū, e roa’a mai ïa te rāve’a nō te parau i te i’oa o Iesu Mesia ’e ’oia mau ’ia fa’a’ite nō ni’a i te Fa’aora nā roto i te paraura’a i tōna i’oa e vai nei i roto i te i’oa o tāna ’Ēkālesia. ’E ’ia parau ana’e vau i te i’oa mau o te ’Ēkālesia ia vetahi ’ē, e ha’amana’o pinepine au ia Iesu Mesia ’e e fāri’i au i tāna ha’amaita’ira’a i roto i tō’u orara’a.
Ma te pe’e i te peropheta, e nehenehe pā’āto’a tātou e ha’api’i mai ’ia fa’a’ite pāpū pinepine nō Iesu Mesia ma te fa’a’ohipa i te i’oa tano o te ’Ēkālesia, i reira tātou e rave-pāpū ai i te i’oa o te Fatu.
I teie nei Sābati po’ipo’i, tē ’oa’oa nei au ’ia fa’a’ite pāpū ē, te peresideni Nelson e peropheta ora ïa teie nā te Atua, ’e Te ’Ēkālesia a Iesu Mesia i te Feiā Mo’a i te Mau Mahana Hope’a nei, ’o te ’Ēkālesia ïa a te Mesia i fa’aho’ihia mai. Ma te haeha’a, tē fa’aite pāpū nei au nō te Tamaiti a te Atua ’e nō tōna hanahana. O ’oia te Matahiapo a te Atua ’e tāna Tamaiti fānau tahi, tō tātou Fa’aora ’e te Tāra’ehara, ’o te Emanuela.7 I te i’oa o Iesu Mesia, ’āmene.