Mau parau rahi nō te 193ra’a o te ’āmuira’a rahi nō ’Ātopa

’Aita e ta’ata i ni’a i te pārahira’a o te peresideni Russell M. Nelson i te roara’a o te ’āmuira’a rahi, ’ua fāna’o rā te mau melo o te ’Ēkālesia i te fa’ari’ira’a i te parau a’o ’e te ’itera’a pāpū o tō rātou peropheta 99 matahiti i te hope’a o te tuha’a purera’a hope’a maoti te hō’ē poro’i haruharuhia.

’Ua parau te peresideni Nelson ē, ’ua rahi atu ā tōna « māuruuru […] nō Iesu Mesia ’e te hōro’a māere o tāna tāra’ehara » i teie māuiui tōna i te tua. Nō te fa’aitoito i te mau melo ’ia « feruri tiretiera », ’ua fa’a’ite ’oia i te tahi mau ha’api’ira’a tāna i ’apo mai nō ni’a i te « fa’anahora’a pāpū maita’i » a te Metua i te ao ra.

« Te mau mea ’o tē fa’ariro i tō ’outou orara’a i te tāhuti nei ’ei mea maita’i roa a’e, ’o te mau mea ato’a ïa ’o tē fa’ariro i tō ’outou orara’a i te tau a muri atu ’ei mea maita’i roa a’e ! »
« Nā tā ’outou mā’itira’a i teie mahana e fa’ata’a e toru ’ohipa : i hea ’outou e ora ai ē a muri noa atu, te huru o te tino e ti’afa’ahou mai ai ’outou ’e e ora ’outou i pīha’i iho ia vai ē a muri noa atu » (’api 117).

’Ua hōro’a te peresideni Dallin H. Oaks i tōna ’itera’a pāpū nō te fa’ateiteira’a e tīa’i ra i te feiā mo’a ha’apa’o maita’i (hi’o i te ’api 26). ’Ua parau pāpū te peresideni Henry B. Eyring nō te arata’ira’a a te Vārua Maita’i tei parauhia i te feiā mo’a ha’apa’o maita’i (hi’o ’api 92 ; hi’o ato’a Elder Stevenson, ’api 42). ’E ’ua hōro’a te peresideni M. Russell Ballard i te hō’ē ’itera’a pāpū pūai nō te peropheta Iosepha Semita ’e « tāna hōpoi’a hanahana i te rirora’a ’ei peropheta nō […] te tau tu’ura’a nō te ’īra’a o te mau tau » (’api 74)

’Ua ha’api’i te feiā a’o i roto i te ’āmuira’a ē, tā tātou mau mā’itira’a faufa’a roa a’e i te tāhuti nei, tei ni’a ïa i te Fatu Iesu Mesia ’e te ha’apa’ora’a i tāna mau fa’auera’a, mai te ture nō te tuha’a ’ahuru (hi’o peresideni Nelson ’e Elder Andersen, ’api 117 ’e 32). ’Ua ha’api’i ato’a mai rātou ē, e ’itehia mai te ’oa’oa, te fa’aorara’a māuiui ’e te tīa’ira’a nā roto i te Fa’aora mai te mea e haere ti’a tātou i mua i ni’a i te ’ē’a nō te fafaura’a (hi’o Elder Bednar, Godoy, Choi, ’e Cook, mau ’api 6, 16, 46 ’e 82 ; Taea’e Newman, ’api 36 ; ’e nā tuahine Wright, Freeman ’e Runia, mau ’api 9, 76 ’e 62) ’e mai te mea e « fa’a’ite [tātou] i tā tātou pūpūra’a ’e te fafaura’a ’ōro’a ia Iesu Mesia ’e i te tahi ’e te tahi, nā roto i tā tātou mau pi’ira’a, te ’āmui-’ōhie-ra’a i te ta’ata, ’e te tāvinira’a » (Elder Gong, ’api 111).

’Ua fa’aitoito te feiā fa’atere o te ’Ēkālesia i te mau melo ’ia fa’ari’i i te « hōro’a o te tātarahapa » (Elder Renlund, ’api 96 ; hi’o ato’a Peresideni Eyring ’e Elder Uchtdorf, mau ’api 92 ’e 86). ’Ua ha’api’i rātou ē, maoti te Fa’aho’i-fa’ahou-ra’a i mani’i ai te māramarama nō ni’a i tō tātou « nātura [’e] faufa’a ’āi’a [’e] fāito pūai hanahana » (Elder Soares, ’api 70 ; hi’o ato’a Elder Phillips, Giraud-Carrier ’e Sabin, mau ’api 49, 114 ’e 56). ’E ’ua fa’aha’amana’o mai rātou i te feiā mo’a ē « nō te ha’aputuputu ia ’Īserā’ela, tītauhia te mau misiōnare—rahi atu i tei tāvini i teie taime », te mau misiōnare feiā pa’ari iho ā rā (Elder Rasband, ’api 52 ; hi’o ato’a Elder Parrella, ’api 80).

I te fa’aarara’a te peresideni Nelson i te patura’a o nā hiero ’āpī e 20, ’ua parau ’oia : « Tā ’outou tāvinira’a ’e te ha’amorira’a i roto i te hiero, e tauturu te reira ia ’outou ’ia feruri tiretiera » (’api 117 ; hi’o ato’a Elder Christofferson ’e Esplin, mau ’api 19 ’e 108).