Noda Tabana

Kaulotu ni Veiqaravi me baleti Ira na Daukaulotu Gone Semati vata kei na Kaulotu ni Veivakavulici

Mai vei Sister Debra Pace

Kidavaki ira na daukaulotu ni veiqaravi gone na Kaulotu e Ositerelia

E vuqa na gonelalai era sa vakanamata tu ki na siga era na rawa ni laki kaulotu kina. Ia, eso na cauravou kei na goneyalewa e dodonu me ra kua ni yalorarawa ni ra mai raica ni na sega beka ni rawa me ra kaulotu ni veivakavulici ena vuku ni ituvaki ni nodra bulabula vakayago. Eso tale era sotava na bolebole vata oqori ni ra tauvimate ena gauna ni nodra kaulotu ka gadrevi kina me ra lesu totolo i vale.

Na veisau wale tikoga oqo ki na parokaramu ni kaulotu sa rawa kina vei ira kece na cauravou bula kilikili (yabaki 18–25) kei ira na goneyalewa (19–29) me ra laki kaulotu veitalia na nodra bulabula vakayago, vakasama se bulabula ni lomadra.

Ena nodratou veidusimaki na Mataveiliutaki Taumada, na tabana ni kaulotu e Melbourne kei Brisbane e Ositerelia erau tiki ni dua na parokaramu taumada ka cokoti vata kina na kaulotu ni veiqaravi kei na kaulotu veivakavulici me baleti ira na itabagone. Oqo ena rawa kina vei ira me ra lewena e rauta ni 180 tale na daukaulotu ena ruku ni peresitedi vata ga ni kaulotu.

Ena nodra itavi e veisiga, era dau cakacaka vata na daukaulotu veiqaravi kei na veisoqosoqo ni loloma cecere eso, cakacaka ni lotu, kei na loma ni itikotiko.

E vakayagataka talega kina o Peresitedi Paul Thomas ena Tabana ni Kaulotu na Australia Melbourne na ivakarau bibi vata ga oqo vei ira na nona daukaulotu veiqaravi me vakataki ira na daukaulotu veivakavulici:

Veivakatarogi wasoma kei na peresitedi ni kaulotu
Bolebole ni vuli ivolanikalou yadua, bose ni Zoom me baleta na “Vunautaka na Noqu Kosipeli,” kei na soqoni ni masu
Tomani ira na daukaulotu veivakavulici ni ra vakavulica na kosipeli
Kana vata kei ira na daukaulotu tale eso ena nona vale e dua.
Veitomani kei ira na daukaultou tale eso ena itaviqaravi ni P-day ena nodra tikina
Tiko ena Koniferedi ni iWasewase

“Ni ra okati ka kila na daukaulotu veiqaravi na sala me ra vakaitavi kina ena kaulotu, oqori na itukutuku kaukauwa duadua,” e kaya o Peresident Thomas. “Na iwalewale oqo e rawa ni dua na veivakalougatataki levu ki na matavuvale ni ra kila ni rawa ni ra veiqaravi na nodra daukaulotu namaki ena vuqa na sala vata ga era dau cakava kina na daukaulotu veivakavulici.”

O Elder Domonic McKendry, na daukaulotu yabaki 23 mai Melbourne, sa taleitaka na veika oqo. E marautaka o koya na veisau oqo ka vakavinavinakataka ni sa okati kina. Sa solia vua e dua na yalo ni inaki cecere cake. “Au sa vulica ni ra dau tu ga na kila maqosa vou me’u vulica kei na veika vou ena yaco mai.”

Eso na nona veiqaravi e veisiga e oka kina na cavu co ca, teitei, kei na vakarairaivinakataki ni lomanibai ena Valetabu e Melbourne Ositerelia. E dau cakacaka tale ga o Elder McKendry ena dua na isoqosoqo veivukei vakaitaukei, ka dau vakarautaka na kakana vei ira na tamata yadua era sotava na gauna dredre, oka kina eso e sega tu nodra itikotiko.

“Sa dua na ilesilesi vinaka sara mo vulica kina e levu na ka me baleti iko ka kila na veika dina o rawa ni rawata.”

E kaya o Elder Brodie Smythe, e dua talega na daukaulotu ena Tabana ni Kaulotu na Australia Melbourne, “Ni’u cakacaka vata kei na FamilySearch, au dau veisotari kei ira na lewenilotu me walia na leqa, ka vukei ira na tamata me ra vakarautaka na yaca ni matavuvale me ra kauta ki na valetabu.”

Mai na Tabana ni Kaulotu na Australia Brisbane, e kaya o Sisita Jessica Morgante, “Au sa vakalougatataki ni tu noqu . . . ilesilesi ena iwasewase oqo, oka kina ni’u sekeriteri ni kaulotu veiqaravi, volodia ena Sitoa ni Vinnies OP, ka vakarautaka na veitokoni ni ESL.

“Na ilesilesi oqo era sa vukei au me’u tubu cake vakayago ka vakayalo ka sa vaqaqacotaka na noqu ivakadinadina ni loloma i Tamada Vakalomalagi. Era sa vakavulici au me’u kila vakavinaka cake ka dau vakararavi ki na veisorovaki i Karisito ena ituvaki kece sara ni noqu bula.”

Era kauta talega mai na veisau na daukaulotu veiqaravi mai Adelaide kei Sydney.

Sa muria tiko o Elder Trent Yeow na we ni yava i tubuna. O Christina Yeow a dau ivakaraitaki wasoma ni veiqaravi ka dau qaravi ira vakavinaka na tamata kecega, ni dau kumuni ilavo me baleti ira e sega tu nodra vale, na vakadidike ni kenisa kei na vuqa tale na isoqosoqo veivukei. E kaya kina o Elder Yeow ena vosa veivakacaucautaki me baleti koya. “Au vinakata ga me’u veiqaravi ka vakamarautaki buqu.”

Dua na sala e veiqaravi kina oya ena nona vakatorocaketaka na veitokani kei ira na vakaitikotiko ena Regis Nursing Home, qito chess, veivosaki vata kei ira ka me dua tu ga na itokani dauvakarorogo. Na ka ga e vinakata me cakava oya me qaravi ira na tamata me vaka a cakava na iVakabula.

E dau taleitaka vakalevu o Elder Enos Fenunuti na cakacaka vata kei ira na daukaulotu ena Tabana ni Kaulotu e Serene. Dua na sala e veiqaravi kina o ya ena nona vukei ira na daukaulotu me ra sava motoka kei na tokitoki ena itikotiko.

O Elder Andrew Lam, mai Serene talega, e dau veivuke ena tabana ni Facebook me baleta na Welefea kei na Bula Rawati Koya. E dau taba piano ena vale ni veiqaravi baleti ira na qase ena rua na yakavi ena veimacawa. “Ena ikarua ni macawa, au a dau vakatagitaka na sere ‘Clair de Lune’. E dua vei ira na qase a tarai koya sara baleta ni a solia vua na vakanananu totoka duadua. E vinakata na Turaga me da tomana tikoga na vakatorocaketaki ni kila maqosa kei na taledi vovou eso. E vukei au o Jisu Karisito me’u yalovinaka vei ira na tani . . . ka kauta mai vei au na reki.”

O Sisita Jaidyn Reid e vakaitavi ena vica na ilesilesi ni veiqaravi ni loloma kei na veiqaravi vakaitikotiko e Sydney.

E cavuta o koya na vosa nei Peresitedi Russell M Nelson: “‘Ni sa nomu gagadre cecere duadua o ya mo laiva na Kalou me qaqa [ena nomu bula] . . . O na kila . . . na vanua mo vakayagataka kina na nomu gauna . . . O kila na ka o via rawata. O kila na mataqali tamata o . . . vinakata me yaco mo vakataka.’”¹