Noda Tabana
Taqomaki e Ligana
Keirau kei na watiqu o Eddie Uele e tolu na luvei keirau: o Indie-Rose, Rollo, kei Kamaukiterangi (Kamau). Enai ka 12 ni Janueri 2022, keirau a vakayalia kina na luvei keirau tagane o Kamau ka yabaki 2 voli ena gauna oya.
Ena yakavi oya, ni keirau qito ka dredre vata tiko kei na luvei keirau ena neitou rumu ni moce, keirau qai kidava mai ni sa yali tiko o Kamau. Ni oti o ya a qai kunei o Kamau ni sa sega ni vakilai koya tu ena neitou lomanibai e muri. A vakayacora vua o Eddie na CPR me yacova ni ra yaco mai na dauveivukei ni tabana ni bula ni keitou masuta tiko vakamatavuvale na veivuke nei Tamada Vakalomalagi.
A cicivaki yani o Kamau ki valenibula ka ra waraki koya tiko mai kina e dua na timi ni vuniwai. Ni keitou yaco yani, keirau a kau kei Eddi ki na dua na rumu vakaitaukei ka tiko kina me vica na miniti ka tarava ni keirau veitauri liga, ka masu tikoga. Sa qai curu mai e dua na vuniwai, dabe sobu e matai keirau ka tekivu vosa sara.
Au a sega ni rogoca rawa e dua na vosa e tukuna tiko o koya me vaka ni sa yaco me vakanomodi, vakadirorogo, ka veivakacegui na veika kece e wavoliti au—qai, me vaka ga na makaresese ni siga, au a raica na luvequ tagane e mataqu ni qitora voli ena dua na lori ni vakatatalo lailai, ni dredre ka marau tiko. Au a qai kila kina ni sa mate na luvequ tagane. Au a kila talega ni oqo na sala e vakarautaki au kina na Tamada Vakalomalagi ki na veika ena qai yaco mai.
A qai yaco e muri ena yakavi bogi o ya me’u sa qai kila vakaidina kina na veika bibi vakalomalagi ni gauna o ya.
A mokoti au o tinaqu ni’u tagi tiko e ligana, ka sega ni taura rawa na takali ni luvequ. A tarogi au o koya, “O iko cudruvi Tamada Vakalomalagi tiko beka?” Au a sauma yani, “Sega, au sega ni cudru, ia a sega ni kauwaitaki au o Koya, Nau. Au a vakamasuti koya me kakua ni kauti luvequ. Au a kerea na Tamada Vakalomalagi me yalovinaka me laivi koya me tiko ga. Ia a sega ni kauwaitaki au.”
A kaya vei au ena loloma o tinaqu, “A sega ni vakawaleni iko tiko na Tamada Vakalomalagi. A rogoci iko o Koya. A cakava e dua na cakamana ena nona dolava na ilati ki Lomalagi ka vakatara mo raica ni sa tiko vata kei Kamau o Koya, ka na taqomaki tawamudu tu o Kamau ena Ligana.”
E muri ena yabaki o ya, ena kena dolavi raraba na Valetabu e Hamilton Niu Siladi, au a lomaleqa ka rere. Au a kaya vei watiqu “Au vakabauta ni sa waraki au tiko o Kamau ena loma ni valetabu. Au vakabauta ni na tiko vata kei au e kea o koya.”
Ena loma ni valetabu, na rumu duadua ga au a vinakata dina me’u raica sa ikoya na Rumu Vakasilesitieli. Ni keitou wawa tiko me curuyani, a kaya mai na neitou iliuliu ni veivakasarasarataki, “Ni vosoti au sara ia ena sega ni levu na noda gauna ena Rumu Vakasilesitieli. Ia au rawa ni yalataka vei kemuni, na Taciqu kei na Ganequ, ni dina ga ni na lekaleka na nomuni gauna, ia na veivakalougatataki o ni na ciqoma ena rauta vinaka me yacova na veigauna tawamudu. Ka bibi duadua ni ko ni na vakila na loloma ni noda iVakabula o Jisu Karisito.”
Ni keimami vakarau curu yani, a taura tu na ligaqu o Indie-Rose na luvequ yalewa ka kaya mai vei au ena marau, “Nau, oqo beka na rumu digitaki o a tukuna tiko vei au?” Au a sauma, “Io, sa ikoya qo.” A qai tarogi au o koya, “Oqo beka na kena irairai ni datou na raici Kamau?” Au a sauma “Io, ena vaka ga ni datou taubale wavokita na kona ka sa tu sara o koya.”
A drodro na wainimataqu ni sa mai yaco dina na yalayala a kaya taumada na neitou iliuliu ni veivakasarasarataki. Au vakila rawa na loloma savasava ni noda iVakabula o Jisu Karisito ni vakacegui au. Au vakila ni vosa a kaya na neitou iliuliu ni veivakasarasarataki e dua dina na itukutuku a nakiti me baleti au mai vua na Tamaqu Vakalomalagi, ka kaya vei au ni dina ga ni lekaleka na noqu gauna vata kei luvequ tagane, na veivakalougatataki kei na loloma e tu vei au me baleti koya ena rauta vinaka me yacova na veigauna tawamudu.
Ena veirumu kece ni valetabu—na iyaloyalo kei na veika matailalai kece—au vakila rawa kina na yalo ni luvequ tagane totoka o Kamau. Sa vakadeitaki vei au ni’u gadreva me’u tiko ena valetabu. Rau a vakananuma tiko vei au na Tamada Vakalomalagi kei Jisu Karisito na vakacegu vakalomalagi kei na veivakabulai vakalou au rawa ni ciqoma ena loma ni kena lalaga ena vuku ni kaukauwa veivukei ni Veisorovaki ni noda iVakabula, o Jisu Karisito.
E se bera vakadua ni bibi cake na valetabu ena noqu bula me vaka na gauna oqo.