“Naʻá Ku ʻIloʻi Naʻe Maluʻi Au,” Liahona, Māʻasi 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻá Ku ʻIloʻi Naʻe Maluʻi Au
Naʻe lolotonga fai ha tau ʻi tuʻa, ka ʻi heʻeku lau ʻa e Tohi ʻa Molomoná, naʻá ku ongoʻi nonga pea naʻe ʻikai ke u ilifia.
Tā fakatātaaʻi ʻe Alex Nabaum
ʻI he 1992, naʻe fakalilifu ʻa e tau ʻi ʻIukosilāviá. Naʻe tpomu fakaʻaho pē homau kolo ko Mositaá. Naʻe taʻofi fakataimi ʻa e ngaahi ngāue kotoa pē ʻa e puleʻangá, ʻo kau ai ʻa e positi ʻōfisí.
Ka, ʻi he ʻaho 1 ʻo ʻEpelelí, naʻe fai mai ha tukituki ʻi hoku matapaá. ʻI heʻeku fakaava haké, naʻe mono mai ʻe ha tangata kuo teʻeki ai ke u sio ai kimuʻa, ha kofukofu mei hoku ʻofefiné, ʻa ia naʻe nofo ʻi he taimi ko iá ʻi Malaka, ʻi Sipeini, peá ne kau ai ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe ʻi loto ai ha Tohi ʻa Molomona.
Naʻá ku kamata lau ia ʻi he ʻaho pē ko iá. Naʻe hoko ʻa e taú ʻi tuʻa, ka ʻi heʻeku lau [ʻa e tohí], naʻá ku ongoʻi nonga pea naʻe ʻikai ke u ilifia. Naʻá ku toki ʻilo kimui ko e nonga naʻá ku ongoʻí ko e Laumālie Māʻoniʻoní ia. Naʻá ku ʻiloʻi naʻe maluʻi au pea he ʻikai ke u mate.
ʻI heʻeku laú, naʻá ku ʻilo ai kau kia Sīsū Kalaisi pea ʻokú Ne kei moʻui. Naʻá ku ako kau ki he papitaisó pea mo e Siasi ʻo e Fakamoʻuí. Naʻá ku ongoʻi naʻe moʻoni ʻa e meʻa kotoa naʻá ku laú. Naʻe tali ʻe hoku ʻofefiné ʻa ʻeku ngaahi fehuʻí ʻi ha ngaahi taimi.
Ko e taimi naʻe mālōlō ai hoku husepānití ʻi he 2019, naʻá ku fakakaukau ke u ʻalu ki he ʻIunaiteti Siteití, ʻa ia kuo nofo ai hoku ʻofefiné he taimi ní. Naʻá ku fie sio kiate ia mo ʻilo lahi ange ki he Siasi kuo fakafoki maí.
Naʻá ku nofo ʻi Sōleki Siti, ʻIutā ʻi ha māhina ʻe fā mo e konga. Naʻá ku maʻulotu mo hoku ʻofefiné ʻi he uike kotoa. Ne u maʻu ha ongo naʻe ʻikai ke u lava ʻo fakamatalaʻi. Naʻe akoʻi mai ʻa e ngaahi lēsoni fakafaifekaú. Naʻá ku ʻiloʻi naʻe moʻoni kotoa ia. Naʻá ku aʻusia ʻa e ʻaho fakaʻofoʻofa taha ʻo ʻeku moʻuí ʻi he taimi naʻá ku hifo ai ki he vai ʻo e papitaisó pea hilifakinima ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he ʻaho 27 ʻo Siulai 2019.
Ko e taimi naʻá ku hū ai ki he lokí ke hilifakinima ʻi he hili hoku papitaisó, naʻe tangi ʻa e taha kotoa. Ko e papitaisó mo hono maʻu ʻa e meʻafoaki ʻo e Laumālie Māʻoniʻoní ko ha meʻaʻofa maʻongoʻonga ia mei heʻetau Tamai Hēvaní. Hili hoku hilifakinimá, naʻá ku ongoʻi kuo fakaava ʻa e langí pea kuo mau ʻi ai kātoa. Naʻá ku maʻu ha ngaahi talaʻofa taʻengata mo makehe kimui ange ʻi hoku tāpuaki fakapēteliaké.
ʻOku moʻoni ʻa e Tohi ʻa Molomoná. ʻI heʻetau lau mo lotua iá, ʻe lava ke tau maʻu ai haʻatau fakamoʻoni pē ʻatautolu ki ai. ʻI he fakamoʻoni ko iá, te tau ʻilo ai ko Siosefa Sāmitá ko ha palōfita, pea naʻe fakafou ʻiate ia ʻa hono fakafoki mai ki māmani ʻa e Siasi ʻo Sīsū Kalaisí.