“ʻE Lava Fēfē ʻe Heʻeku Hoko ko ha Tokotaha Faʻa Fakaleleí ʻo Tokoni ke U Tānaki ʻa ʻIsileli?,” Liahona, Māʻasi 2024.
Haʻu, ʻo Muimui ʻIate Au
ʻE Lava Fēfē ʻe Heʻeku Hoko ko ha Tokotaha Faʻa Fakaleleí ʻo Tokoni ke u Tānaki ʻa ʻIsileli?
Naʻe mamata ʻa Nīfai ʻe fakakikihi ʻa e kakai ʻi he ngaahi ʻaho fakaʻosí (vakai, 2 Nīfai 28:3–4, 20), ka ko e fakakikihí ʻoku ʻikai ʻo e ʻEikí ia. Ko hono moʻoní, ko e tānaki ʻo ʻIsilelí ʻoku fiemaʻu ia ke tau fengāueʻaki mo e kakaí ʻi ha founga “māʻolunga mo māʻoniʻoni ange”1.
Naʻe akoʻi ʻe Palesiteni Lāsolo M. Nalesoni: “Kapau ʻokú ke fakamaatoato ʻi he tokoni ke tānaki ʻa ʻIsilelí pea mo e tanumaki ha vā fetuʻutaki ʻe tuʻuloa ʻo aʻu ki ʻitānití, ko ʻeni ʻa e taimi ke tuku ai ki he tafaʻakí ʻa e loto-ʻitá. Ko ʻeni ʻa e taimi ke taʻofi ai ʻa e vili kikihi ko hoʻo foungá pē pe ʻikaí. Ko ʻeni ʻa e taimi ke taʻofi ai hono fai ʻa e ngaahi meʻa ʻokú ne ʻai ke fakaoloolo atu ai ʻa e niʻihi kehé telia naʻá ke ʻitá. Ko ʻeni ʻa e taimi ke tanu ai hoʻo ngaahi mahafu taú. Kapau ʻoku fonu hoʻo tōʻonga leá ʻi he lea koví mo e tukuakiʻí, ko ʻeni ʻa e taimi ke liʻaki ai iá. Te ke tuʻu ko ha tangata pe fefine mālohi fakalaumālie ʻo Kalaisi.”2
ʻOku ʻofa ʻa e Tamai Hēvaní mo Sīsū Kalaisi ʻi he fānau kotoa ʻa e ʻOtuá ʻo tatau ai pē pe ko e hā honau ngaahi faikehekehé. ʻOku feinga ʻa Sētane ke fakaʻaongaʻi ʻetau tō-kehekehé ke fakamavahevaheʻi ai kitautolu, ka ʻi heʻetau fili ʻa e melinó kae ʻikai ko e fakakikihí, ʻoku tau fakatupu ai ha ʻātakai talitali lelei ʻokú ne tohoakiʻi ʻa e kakaí ki he ongoongolelei ʻa e ʻEikí kuo fakafoki maí.
Fakakaukau ki he ngaahi tūkunga ko ʻení pea fakalaulauloto ki ha ngaahi founga te ke lava ai ʻo tali ʻi he ʻofá:
Kapau ʻokú ke ongoʻi moʻoni ha fakakaukau fakapolitikale, te ke lava fēfē ʻo maʻu ha mahino lahi ange ʻi hoʻo talanoa mo kinautolu ʻoku kehe ʻenau fakakaukaú?
Kapau ʻoku ʻikai vā lelei homou fāmilí, te ke lava fēfē ke ohi mai ha ʻātakai melino ʻo e ʻofá mo e fefiemālieʻaki kiate kinautolú?
Kapau ʻokú ke ongoʻi taʻe-fiemālie ʻi ha meʻa ʻokú ke lau ʻi he mītia fakasōsialé, ko e hā ha meʻa te ke lava ʻo fai ke fakaʻehiʻehi ai mei ha fakakikihí?