“Ko ha Fofonga ʻi he Matapā Sioʻatá,” Liahona, Māʻasi 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ha Fofonga ʻi he Matapā Sioʻatá
Naʻá ku fakakaukau au ko ha fieʻilo pē ʻa hoku kaungāʻapí, ka naʻá ku toki ʻilo ko ʻene fiemaʻu pē ha kaungāmeʻa.
Laʻitā ne maʻu ʻi he angalelei ʻa e tokotaha faʻutohí
Naʻá ku faʻa fakatokangaʻi ʻa e fofonga tatau ʻoku fakasio mei ha matapā sioʻata ʻo ha fale nofo totongi. Naʻá ku pehē loto pē, “ʻIkai nai ko ha meʻa fakamamahi ke toutou fakasio ha taha mei hono matapā sioʻatá ki tuʻa, ʻo fakamāuʻi ʻa e meʻa ʻoku fai ʻe hono kaungāʻapí?”
Pea ʻi ha ʻaho ʻe taha naʻá ku pehē ai mahalo ʻoku totonu ke u ʻalu ʻo ʻeke pe te u lava ʻo fai ha tokoni. Naʻá ku fakakaukau ke u ʻalu mo ha foʻi mā naʻe toki moho mai pē.
Naʻe fakamolū ʻe he mā māfaná ʻa e loto-fefeka ʻa hoku kaungāʻapi toulekeleká. Naʻá ne tangi mo talamai ʻene ongoʻi tuēnoá. Naʻe ʻikai ha taha ʻe ʻaʻahi kiate ia, ʻo aʻu ki heʻene fānau tonú. Naʻá ne holoholo hono loʻimatá mei hono kouʻahé ʻaki hono nima naʻe teteteté.
Naʻá ne fakatau ʻene mānavá peá ne pehē mai, “ʻE fakaʻofoʻofa ke te mavahe ā mei māmani. ʻOku ʻikai ke u fakamaauʻi ha taha ʻi heʻeku sio ki tuʻa ʻi he matapā sioʻatá. ʻOku ou siofi pē e vaʻinga ʻa e fānaú mo e ngaahi meʻa kehe ʻoku hoko ʻi he loto ʻataʻataá.”
Tā fakatātaaʻi ʻe Alex Nabaum
ʻI he fakalau atu ʻa e taimí, naʻá ma talanoa fekauʻaki mo e ongoongoleleí. Ko e kamatá naʻe ʻikai ke ne lea tauʻatāina he naʻe hoko hono husepānití ko ha taki ʻi ha siasi ʻe taha. Ka ko e lahi ange ʻema talanoá, ko e lahi ange ia ʻene mālieʻia ʻi he ngaahi moʻoni ne u fakamatala kau kia Sīsū Kalaisi mo ʻEne ongoongolelei kuo fakafoki maí.
Naʻá ne pehē, “ʻOku fakaʻofoʻofa ʻetau maʻu ʻa e Sīsū tatau peé. Te ta toe fesiofaki ʻi langi?”
Naʻá ku tali ange, “ʻIo, te ta ʻi ai fakataha—ʻo fetākinima.”
Talu mei ai, mo ʻema hoko ko ha ongo kaungāmeʻa lelei ʻi ha ngaahi taʻu lahi, ʻo aʻu ki siʻene hiki atu mei he māmani ko ʻení.
ʻOku ou saiʻia ke fakakaukau he taimí ni, ʻoku sio hifo hoku kaungāʻapí mei he matapā sioʻata ʻo hono ʻapi fakalangí, ʻo muimuiʻi ʻemau ngaahi ngāué mo ʻamanaki ʻoku mau vālelei mo feʻofaʻaki.