“ʻOku Mau Lea ʻia Kalaisi,” Liahona, Māʻasi 2024.
Maʻá e Ngaahi Mātuʻá
ʻOku Mau Lea ʻia Kalaisi
Placeholder credit line
Siʻi Ngaahi Mātuʻa,
Naʻe akoʻi ʻe Nīfai ki hono kakaí ʻa e mahuʻinga ko ia ke fakamuʻomuʻa taha ʻa e ʻEikí ʻi heʻetau moʻuí. Naʻá ne tohi, “ʻOku mau lea ʻia Kalaisi, ʻoku mau fiefia ʻia Kalaisi, ʻoku mau malanga ʻaki ʻa Kalaisi, ʻoku mau kikite ʻia Kalaisi, pea ʻoku mau tohi ʻo fakatatau mo ʻemau ngaahi kikité, ke ʻilo ʻe heʻemau fānaú ki he tupuʻanga ʻa ia te nau lava ke sio ki ai ke maʻu ai ha fakamolemole ʻo ʻenau ngaahi angahalá” (2 Nīfai 25:26). Te ke lava ʻo toe vakaiʻi ʻa e ngaahi fakamatala ko ʻení mo ho fāmilí ke fakahinohinoʻi kinautolu mo ha niʻihi kehe ʻokú ke ʻofa ai ki he ongoongolelei ʻo Sīsū Kalaisí, ko ʻEne fakahinohinó, pea mo e ngaahi tefitoʻi moʻoni fakapotopoto ʻe tokoni ke tau kumi kiate Ia ʻi ha māmani moveuveu mo fakaonopōní.
Fealēleaʻaki ʻi he Ongoongoleleí
Ko e Ongoongolelei ʻo Sīsū Kalaisí ʻOku Maʻá e Tokotaha Kotoa Ia
ʻOku fiemaʻu ʻe he kakai kotoa pē ʻa e ʻamanaki lelei mo e huhuʻi ʻoku ʻomi ʻe he ongoongoleleí mo e Fakalelei ʻa Sīsū Kalaisí. Aleaʻi mo ho fāmilí ha ngaahi akonaki mei he fakamatala ʻa ʻEletā Sefilī R. Hōlani ki he founga te ke lava ai ʻo ʻofa, vahevahe pea fakaafeʻi ha taha ke ne tali mo pukenimā ʻa e ongoongolelei ʻo Sīsū Kalaisí (vakai, peesi 4).
Ngaahi Tefitoʻi Moʻoni Fakapotopoto ki hono Fakaʻaongaʻi ʻo e Mītiá
Ko e tekinolosiá mo e mītiá ko ha meʻangāue ʻaonga ia ʻi he taimi ʻoku fakaʻaongaʻi totonu aí. Toe fakamanatu ha ngaahi tefitoʻi moʻoni fakahinohino ʻi he peesi 22 pea aleaʻi ʻa e ngaahi tuʻunga homou fāmilí ki hono fakaʻaongaʻi ʻo e mītiá. ʻI hono fakaʻaongaʻi ʻo e “ngaahi fehuʻí ke fakalaulauloto ki aí,” fakakaukauʻi pe ko e hā ʻa e meʻa ʻoku ola leleí pea ko e hā ʻa e meʻa ʻe lava ke fakaleleiʻí.
Ko e Muimui ki he Fakamoʻuí ʻi he Tuí
ʻI he fakamatala ʻa ʻEletā Penisimani M. Z. Tai ʻi he peesi 40, ʻokú ne vahevahe ai ha founga ʻe fā ʻoku tokoniʻi ai kitautolu ʻe he Fakamoʻuí. Hili hoʻomou vakaiʻi ʻeni mo homou fāmilí, aleaʻi ha founga kuo faitokonia ai koe ʻi haʻo muimui ki he Fakamoʻuí ʻi he tuí.
Mei he Makasini Ki Hono Fakamālohia ʻo e Toʻu Tupú
Ko e makasini ʻo e māhina ní ko ha pulusinga makehe ia ʻo e kaveinga “Ko Sīsū Kalaisi ʻa e Mālohinga ʻo e Toʻu Tupú.”
Lau ha pōpoaki meia ʻEletā Sefilī R. Hōlani fekauʻaki mo e founga ʻe lava ke ʻilo ai ʻe he toʻu tupu kotoa ha mālohi ʻia Sīsū Kalaisí.
Kumi ha ngaahi fakamatala fekauʻaki mo e founga ʻoku fakamālohia ai kitautolu ʻe he Fakamoʻuí ke tau matuʻuaki ʻa e loto-mafasiá, loto-mamahí, angahalá, maá, vaivaí, anga-fakamāmaní, mo e loto-taʻemanongá, kae pehē ki ha ngaahi fakamatala fekauʻaki mo e founga ʻokú Ne fakamālohia ai kitautolu ke tau tokoni, teuteu, mo aʻusiá.
Saiʻia ʻi he ngaahi pousitā fakalaumālie mo e ngaahi ngāue fakaʻaati ʻo e Fakamoʻuí.
Mei he Makasini Kaumeʻá
Maʻu ha Toetuʻu Fiefia!
Kumi ha ngaahi talanoa mo ha ngaahi ʻekitivitī ke tokoniʻi homou fāmilí ke nau maʻu ha Toetuʻu mahuʻingamālie, mo ha Toetuʻu ʻoku fakatefito ʻia Kalaisi.
Maau ki he Konifelenisi Lahí
ʻOkú ke vēkeveke nai ke mamata ʻi he konifelenisí ʻi he māhina katuʻú? Ko e Kaumeʻa ʻo e māhina ní ʻoku ʻi ai ha ʻekitivitī maʻá e longaʻi fānaú ke nau fakahoko he lolotonga ʻenau fanongó.
Malu ʻi he ʻInitanetí
Lau ha talanoa fekauʻaki mo ha taʻahine naʻá ne ongoʻi ʻa e ueʻi ʻa e Laumālie Māʻoniʻoní ke taʻofi ʻene sio he ʻū vitiō koví. Te ke lava ʻo maʻu ha ngaahi maʻuʻanga tokoni lahi ange ki he malu ʻi he mītiá ʻi he Friend.ChurchofJesusChrist.org.
Ako mei he Tohi ʻa Molomoná
Kumi ha ngaahi ʻekitivitī fakauike, ngaahi talanoa mei he folofolá kuo tā fakatātaaʻi, mo ha toe meʻa lahi ange ke tokoni ke fakafiefia hoʻomou ako fakafāmili ʻa e folofolá.