“Maʻu Ho Mālohingá ʻia Sīsū Kalaisi,” Ki Hono Fakamālohia ʻo e Toʻu Tupú, Māʻasi 2024.
Maʻu Hono Mālohí
Maʻu Ho Mālohingá ʻia Sīsū Kalaisi
Ko Sīsū Kalaisi ʻa e mālohinga ʻo e toʻu tupú—ʻa e toʻu tupu kotoa pē ʻi he māmaní—pea ko e moʻoni ʻoku kau ai koe!
Fanongo Kiate Ia, tā fakatātaaʻi ʻe Haley Miller
ʻOku ou fiefia ke fakafeʻiloaki atu ʻa e pulusinga makehe ko ʻeni ʻo e makasini Ki Hono Fakamālohia ʻo e Toʻu Tupú. ʻE tokoni ʻa e ngaahi fakamatala, ʻekitivitī, mo e talanoa mei he toʻu tupu ʻi he funga ʻo e māmaní ke fakamālohia hoʻo fakamoʻoni ki ha moʻoni mahuʻinga mo taʻengata naʻe fakahaaʻi ʻe he Kau Palesitenisī ʻUluakí. ʻOku nau fakamamafaʻi fekauʻaki mo Sīsū Kalaisi, “Ko Ia ʻa e ʻmālohinga ʻo e toʻu tupú.ʼ”1 ʻOku ʻuhinga ʻeni ko Sīsū Kalaisi ho mālohingá. ʻOku ou lotua ke mou tali fiefia ʻa e moʻoni ko ʻení ʻi he taimi mahuʻinga ko ʻeni ʻi hoʻomou moʻuí, ʻi he taimí ni pea taʻengata.
ʻOku Fiemaʻu ʻe he Tokotaha Kotoa ha Mālohi ʻia Kalaisi
ʻOku ʻikai hokonoa pē pe ko ha fehalaaki hoʻo ʻi hení. Naʻá ke fili ke haʻu ki he māmaní ke ako, tupulaki, fai ha ngaahi meʻa fakaofo, pea hoko ʻo tatau ange mo hoʻo Tamai Hēvaní. Te ke fehangahangai ʻi he fononga ko ʻení mo ha ngaahi taimi ʻo e faingataʻa, ʻahiʻahi fakataautaha, loto-foʻi, mo e loto-mamahi ʻe lava ke ongoʻi taulōfuʻu. Mahalo ʻokú ke ongoʻi fihia ʻi ha faʻahinga taimi pehē ʻi he taimí ni.
Lolotonga ʻo e ngaahi taimi peheé, kātaki ʻo manatuʻi ʻoku ʻofa hoʻo Tamai Hēvaní ʻiate koe. Kuó Ne fakahoko maʻu pē ia, pea te Ne fakahoko maʻu ai pē ia. Koeʻuhí ko ʻEne ʻofa taʻefakangatangata mo haohaoá, naʻá Ne fekauʻi mai ai Hono ʻAlo ko Sīsū Kalaisí ke fakamālohia mo tokoniʻi koe ke ke laka ki muʻa. Pea naʻe hāʻele mai mo Sīsū koeʻuhí he ʻokú Ne ʻofa lahi foki ʻiate koe.
Ko e meʻa fakamamahí, he ʻoku ʻi ai ha kakai ʻe niʻihi ʻoku ʻikai ke nau fakatokangaʻi ʻenau fiemaʻu ha Fakamoʻuí. ʻOku ʻikai mahino kiate kinautolu, te nau tatau mo e kakai kotoa pē, ʻo fai ha ngaahi fehalaaki he ʻikai ke nau lava ʻo fakaleleiʻi, aʻusia ha ngaahi mole he ʻikai ke nau lava ʻo toe maʻu, pea fehangahangai mo ha ngaahi faingataʻa mo ha ngaahi meʻa fakamamahi he ʻikai ke nau lava ʻo kātekina ʻiate kinautolu pē. Pea he ʻikai foki ke nau lava ʻo ikunaʻi ʻa e angahalá mo e maté ʻiate kinautolu pē. ʻOku ʻuhinga ʻeni ʻoku fiemaʻu ʻe kinautolu—mo e kakai kotoa pē—ʻa e Fakalelei ʻa Sīsū Kalaisí, fakataha mo e mālohi ʻoku lava ke ne ʻomí.
Mahalo ʻokú ke fakakaukau, “ʻOku sai ia ʻEletā Hōlani, ka te u lava fēfē ʻo ʻai ke hoko ʻa Sīsū Kalaisi ko hoku mālohingá?” Ke tokoni ki hono tali ʻo e fehuʻi ko ʻení, tuku muʻa ke u vahevahe atu ha niʻihi ʻo e ngaahi founga taʻefaʻalaua ʻoku fakamālohia ai koe ʻe Sīsū Kalaisi ʻi he ʻaho takitahá.
Deliverance Is Nigh [ʻOku Ofi ʻa e Fakamoʻuí], tā fakatātaaʻi ʻe David McClellan
ʻOkú Ne Maʻu ʻa e Mālohi ke Fakamālohia Koe
ʻI pō fakaʻosi ʻo Sīsū Kalaisi ʻi he moʻui fakamatelié, naʻá Ne hāʻele ki he Ngoue ko Ketisemaní. Naʻá Ne tūʻulutui ai ʻi he lotolotonga ʻo e ngaahi fuʻu ʻōlivé ʻo kamata ke Ne toʻo kiate Ia ʻa e ngaahi angahala ʻo e māmaní. Ko e mamahi lahi mo taʻefakangatangata ko ʻení “naʻe langaki ai ʻa [ʻene] tetetete … ko e tokotaha ʻoku mālohi tahá, koeʻuhí ko e mamahí, pea mo e tafe ʻa e totó ʻi he ava kotoa ʻo [hono] kilí” (Tokāteline mo e Ngaahi Fuakava 19:18).
Naʻe ʻave leva ʻa Sīsū ki Kalevale ʻo tutuki. Naʻá Ne fakakakato ai ʻEne feilaulau fakaleleí. Naʻá Ne finangalo lelei ke foaki ʻEne moʻuí, peá Ne toe tuʻu lāngilangiʻia mei he maté. ʻI he faʻahitaʻu Toetuʻu ko ʻení, ʻoku ou fiefia ke talaki ʻoku moʻui ʻa Sīsū Kalaisi! ʻOku ou toe fakahā foki ʻoku ʻikai ngata pē ʻi Heʻene toʻo atu ʻa e mafasia ʻo e angahalá ka ʻokú Ne “kātakiʻi [foki] ʻa e ngaahi mamahí mo e ngaahi faingataʻá pea mo e ngaahi ʻahiʻahi kehekehe kotoa pē” ʻi hono fai iá (ʻAlamā 7:11; tānaki atu hono fakamamafaʻí).
Naʻe ongoʻi ʻe he Fakamoʻuí ʻa e loto-mamahi mo e mamahi kotoa pē, pea kātekina, ʻi ha founga fakataautaha, ʻa e mamahi mo e faingataʻaʻia kotoa pē kuo foua ʻe koe, mo au, pea mo e tokotaha kotoa pē kuo moʻui pe ʻe moʻuí. Koeʻuhí ko e meʻa naʻá Ne foua fakatuʻasino, fakaʻatamai, mo fakalaumālie maʻaú, ʻokú Ne ʻafioʻi ʻa e founga ke fakamālohia ai koé.
Mahalo ʻoku faingataʻa ke ke tui ʻe fie tokoniʻi koe ʻe Sīsū ko ha toko taha pē ʻi he lauimiliona ʻoku mou toʻu tataú. Kapau ʻe faifai angé peá ke fakakaukau ʻoku ʻi ai ha ngaahi ngāue lelei ange ke Ne fakahoko kae ʻikai fakamālohia koe ʻi he taimi ʻokú ke faingataʻaʻia aí, fakakaukau kiate Ia ʻi he ngoue [ko Ketisemaní], fakakaukau kiate Ia ʻi he funga kolosí. “[Naʻá Ne mamahi, naʻá Ne tautaʻa pea pekia]”2 maʻau koeʻuhí he naʻá Ne ʻafioʻi ʻokú ke mahuʻinga. ʻOkú Ne kei ʻafioʻi pē ia. ʻOkú Ne mātuʻaki tokanga, hōifua, pea mo malava ke tokoniʻi koe—ʻi he taimí ni pea taʻengata. Naʻá Ne foaki ʻEne moʻuí koeʻuhí ke Ne lava ʻo fakamālohia koe ʻi hoʻo tali ʻEne fakaafe liliu moʻui: “Haʻu kiate aú” (Mātiu 11:28).
Fili ke ʻAʻeva mo Ia
Ko e fili ia ʻaʻau ke muimui ʻia Sīsū Kalaisi pea ʻai Ia ke hoko ko ho mālohingá. Kuó Ne “[fakaʻilongaʻi mo tataki ʻa e hala]”3 ke foki ai ki he Tamai Hēvaní. Ko hono moʻoní, ko Ia ʻa e “halá, mo e moʻoní, pea mo e moʻuí” (Sione 14:6).
Te ke ʻilo ʻa e halá ʻi hoʻo tali ʻa e ongoongolelei ʻo Sīsū Kalaisí ʻi hoʻo ngāue ʻi he tui kiate Iá mo fakatomala mei hoʻo ngaahi angahalá. ʻOkú ke fakaloloto ho vā fetuʻutaki mo Iá ʻi he taimi ʻokú ke fili ai ke papitaiso ʻi Hono huafá pea maʻu ʻa e meʻafoaki ʻo e Laumālie Māʻoniʻoní. ʻOkú ke hoko atu leva ʻi Heʻene hala ʻo e ongoongoleleí ʻaki hoʻo tauhi ʻa e ngaahi fekaú, maʻu ʻa e ngaahi ouaú, tauhi ʻa e ngaahi fuakavá, mo moʻui ko ʻEne ākongá.
ʻOku fakatupu ʻe he ngaahi tōʻonga ko ʻení ha fehokotaki mālohi—ko ha fehokotaki ʻi he fuakavá—ʻa ia ʻokú ne haʻi maʻu koe kia Kalaisi—pea mo Ia kiate koe. ʻI hoʻo ʻaʻeva mo Iá, ʻokú Ne hoko ai mo e Tamaí ko hoʻo maʻuʻanga tokoni taupotu taha ʻo e fakahinohino mo e mālohinga fakalaumālié. Te ke lava leva ʻo vilitaki atu ki muʻa ʻi he malu mo e fiefia ʻi he ʻaho kotoa pē, hoko ʻo hangē ko Kinauá, pea foki ʻi ha ʻaho ʻo nofo mo Kinaua pea maʻu ʻa e faʻahinga moʻui ʻokú Na moʻui aí.
Sio kiate Au, tā fakatātā ʻa Eva Koleva Timothy
Laka Ki Muʻa ʻi Hono Mālohí
ʻOku ou fakamoʻoni ʻaki hoku lotó kotoa, ko Sīsū ʻa e Kalaisí. ʻI hoʻo ʻunu ke ofi kiate Iá, feinga ke fakafalala kiate Ia, pea fakaafeʻi Ia ke Ne hoko ko ho mālohingá, te Ne tāpuekina koe pea te ke ʻilo Ia.4 ʻOku ʻikai ha fili te ke lava ʻo fai te Ne taʻemalava ai ke tokoniʻi koe. ʻOku ou tui moʻoni ki he meʻa kuó u lea ʻaki kimuʻá: “He ʻikai malava ke taʻe aʻu atu kiate koe [pe ko ha toe taha pē] ʻa e maama taʻengata ʻo e Fakalelei ʻa Kalaisí.”5
Kapau te ke haʻu kia Kalaisi, ʻo ʻuluaki tauhi maʻu pē ʻEne ngaahi fekaú ʻaki ha “loto-fakamātoato moʻoni” (3 Nīfai 18:32), te Ne ʻaʻeva mo koe ʻi he fonongaʻanga ʻo e moʻuí. Te Ne puke ho nimá pea hoko ko ho ʻamanakiʻanga. Te Ne hoko ko ho mālohinga. Pea te Ne ʻomi ʻa e fiefia tuʻuloá, nonga moʻoní, mo e nēkeneká kiate koe.
ʻI heʻeku hoko ko e taha ʻo ʻEne kau fakamoʻoni makehé, ʻoku ou fakamoʻoni mo palōmesi atu ʻoku moʻoni ʻeni.