“Ko Koe mo e Fakamoʻuí ke Ikunaʻi ʻa e Māmaní,” Ki Hono Fakamālohia ʻo e Toʻu Tupú, Māʻasi 2024.
Mālohi ke Ikunaʻi ʻa e Māmaní
Ko Koe mo e Fakamoʻuí ke Ikunaʻi ʻa e Māmaní
Ngaahi fakahohaʻá, ʻahiʻahí, fakatangá—kuo ikunaʻi ʻe Sīsū Kalaisi ʻa e ngaahi meʻa ʻo e māmani ko ʻení pea ʻe lava ke Ne fakamālohia koe ke ke ikunaʻi foki ʻa e meʻa tatau.
Tā fakatātaaʻi ʻe Alex Nabaum
Naʻe ikunaʻi ʻe Sīsū Kalaisi ʻa e māmaní, pea ʻokú Ne fakaafeʻi kitautolu ke tau fai ʻa e meʻa tatau. Ka ko e hā ʻa e “māmaní,” pea ko e hā ʻene ʻuhinga kiate kitautolu ke ikunaʻi iá?
Naʻe fakamatalaʻi peheni ia ʻe Palesiteni Lāsolo M. Nalesoni: “ʻOku ʻuhinga [hono ikunaʻi ʻo e māmaní] ke ikunaʻi ʻa e fakatauele ke tokanga lahi ange ki he ngaahi meʻa ʻo māmaní ʻi he ngaahi meʻa ʻa e ʻOtuá.”1
ʻE lava ke kau ʻi he “ngaahi meʻa ʻo māmaní” ʻa e koloá, manakoá, mālohí, fakalāngilangí, holí, pe ko ha toe meʻa pē ʻoku fiefia ai ʻa e tangata fakakakanó ko ha konga ʻo e moʻui fakamatelié. Tatau ai pē kapau ʻoku ʻikai kovi maʻu pē ha niʻihi ʻo e ngaahi meʻá ni, ka ko e taimi pē ʻoku toʻo ai ʻetau tokangá mei he ʻOtuá koeʻuhí ko haʻatau tokanga lahi ange ki he ngaahi meʻa fakamāmaní, ʻoku tau faʻu leva ai ha ngaahi nunuʻa kovi ki ha taimi lōloa.
Naʻe akoʻi ʻe Sīsū Kalaisi te tau fehangahangai mo e fakafepakí mo e fakatangá ʻi heʻetau ikunaʻi ʻa e māmaní (vakai, Sione 15:18–21). Ka te tau kei lava pē ʻo maʻu ʻa e melinó mo e “loto-toʻá” koeʻuhí he naʻá Ne tomuʻa ikunaʻi ʻa e māmaní (Sione 16:33).
Naʻe maʻu ʻe he toʻu tupu ko ʻení ha mālohi ʻia Sīsū Kalaisi ke ikunaʻi ʻaki ʻa e ngaahi fakafeʻātungia ʻa e māmaní, pea te ke lava foki mo koe!
Ngaahi Fakahohaʻa Fakamāmaní
Naʻe laui taʻu ʻa ʻeku fakamoleki ha taimi lahi ke keimi pē ʻi he komipiutá ʻi he ʻaho kotoa pē. Naʻá ku maʻu ha ngaahi kaungāmeʻa, pea naʻá ku ongoʻi mahuʻinga. Ka ʻi he hili ʻeku keimí, ne u ongoʻi tuenoa, ʻo hangē ʻoku ʻi ai ha meʻa ne mole meiate aú. Naʻe ʻikai ke kakato ʻeku fiefiá.
Naʻá ku fakaʻamu ke tokanga taha ki he ngaahi meʻa te ne fakafiefiaʻi au mo tokoniʻi au ke u fakalakalaká. Naʻe kamata ke u lotu maʻu pē. ʻI he taimi naʻá ku fakahā ai ki he Tamai Hēvaní ʻa e meʻa naʻe ʻi hoku lotó, naʻá ku ongoʻi ha ongo mālohi ʻo e ʻofá.
Naʻá ku fakaʻamu ke fai ʻa e ngaahi meʻa te ne kei teke au ke u ʻunu ke ofi ange kia Kalaisí, ko ia ne u tokanga taha ki he fanga kiʻi meʻa faingofua hangē ko e ako fakaʻaho e folofolá mo e lotú, feohi mo e kakai ʻoku nau maʻu ʻa e Laumālié, pea feinga ke ʻoua naʻa tohoakiʻi au ʻe he ngaahi meʻa te ne tuli ʻa e Laumālie Māʻoniʻoní. Naʻe liliu ʻeku moʻuí. ʻOku fakafiefia ange ia kiate au.
ʻI he taimi ʻoku ou ʻunu ai ke ofi ange kia Kalaisí, ʻoku ou ʻiloʻi ʻoku ʻi ai ha ngaahi meʻa ʻoku mahuʻinga ange ʻi he keimi ʻi he komipiutá kapau ʻoku ou fiemaʻu ke u fiefia moʻoni. ʻOku ʻi ai ha ngaahi meʻa ʻoku taʻengata.
Alina U., taʻu 18, Lituēnia
Ngaahi Tūkunga Fakamāmaní
Naʻe fakamamahiʻi mo manukiʻi au ʻi he akó koeʻuhí ko ʻeku tuí. Koeʻuhí ko e meʻa ko iá mo ha ngaahi faingataʻa kehe, ne u ongoʻi hangē naʻe faingataʻa ai ke u fonongaʻia ʻa e moʻui fakaʻahó. Ka naʻe poupouʻi au ʻe heʻeku faʻeé ke u falala ki he Fakalelei ʻa Sīsū Kalaisí koeʻuhí he ʻoku mahino kiate Ia hoku mamahí pea ʻe lava ke Ne ʻomi ha nonga mo ha fakafiemālie (vakai, Tokāteline mo e Ngaahi Fuakava 19:23).
Naʻá ku fakakaukau ke u palōmesi ki he Tamai Hēvaní te u ʻaukai maʻu pē. Naʻá ku kole kiate Ia ke Ne tokoniʻi au ʻi hoku ngaahi vaivaí mo hoku ngaahi faingataʻaʻiá, pea kuó Ne fakahoko maʻu pē ia talu mei ai.
Kuo hoko ʻa e ʻaukaí ke u ofi ange ai ki he Tamai Hēvaní mo Sīsū Kalaisi. ʻOku ou ʻiloʻi ʻokú Na faitokonia maʻu pē au mo ʻomi ha ivi ke u ikunaʻi hoku ngaahi faingataʻaʻiá pea maʻu ʻa e fiefia moʻoní. ʻOku fakamoʻui ʻe Sīsū Kalaisi hoku ngaahi kafó mo tokoniʻi au ke u toe foki ki heʻeku Tamai Hēvaní.
Vera R., 17, Palāsilia, Palāsila