Feinga ki Hono Mālohí

ʻOku tau lau ʻi he Tohi ʻa Maʻaké ki ha fefine naʻe fokoutua ʻi ha taʻu ʻe 12. Naʻe fakamatala ange ʻe ha tokotaha kiate ia fekauʻaki mo Sīsū. Ko ia, ʻi Heʻene fou mai ʻi he kolo [ʻo e fefiné], naʻe tangutu ʻa e fefiné ʻi he veʻe halá, ʻo tatali. ʻI Heʻene fakalaka atú, naʻe ala fakalongolongo atu [ʻa e fefiné] ki he konga ʻo Hono pulupulú.

Naʻe fakamoʻui [ʻa e fefiné] ʻi he taimi pē ko iá. Ka naʻe ʻikai ko ia pē naʻá ne fakatokangaʻi ʻa e mana ko iá; naʻe ʻiloʻi foki ia ʻe Sīsū. “Pea kuo ʻilo loto ʻe Sīsū kuo ʻalu atu ʻiate ia ʻa e mālohí, peá ne tafoki ia ki he kakaí, mo ne pehē, Ko hai naʻe ala ki hoku kofú?” (Maʻake 5:30). ʻE lava foki ke ʻuhinga ʻa e angamaʻá ki he mālohi. Naʻe ʻafioʻi ʻe Sīsū ʻi he taimi pē ko iá kuo maʻu ʻe ha taha ha mālohi meiate Ia. Ko Hono finangalo ʻi he taimi pē ko iá ke kumi [ʻa e fefiné], ke talanoa mo ia, pea mo fakamanatu ange kiate ia ʻa e mālohi ʻo e tuí. Naʻá Ne ui ia ko e “ʻofefine.” Koeʻuhí ko Ia, naʻe fakamoʻui ai ʻa e ʻofefiné ni.

Kuó u ako he ʻikai teitei taʻetali ʻa e lotu ke maʻu ha mālohí. Kapau te tau feinga ke falala kiate Ia, te Ne “talia [hotau] mamahí” (vakai, Ngaahi Himí, fika 63). ʻOku hoko ʻa e fakamatala takitaha ʻi he makasini ʻo e māhina ní ko ha fakamanatu ʻo e foʻi moʻoni ko iá.

ʻI he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí, ʻoku akoʻi ai ʻe he Kau Palesitenisī ʻUluakí “[ko e] Fakamoʻuí … ʻa e ʻmālohinga ʻo e toʻu tupúʼ” ([2022], 2). Mahalo ʻokú ke fifili pe te ke maʻu fēfē ʻa e mālohi ko iá. Ko ʻeku fakaʻamú ke ke maʻu ha meʻa ʻi he ngaahi pēsí ni te ne tākiekina koe ke ke feinga kiate Ia.

Fekumi ʻi he ngaahi peesi ko ʻení. Fekumi ki he ngaahi lea ʻo e ʻamanaki leleí, kumi ha potufolofola ʻo e mālohí, hiki hifo ʻa e ngaahi ueʻi kuó ne tākiekina fakaeloto koé. ʻOku fakafou ʻia Sīsū Kalaisi ʻa hono fakamoʻui kakato koé.

ʻĪmisi

Emily Belle Freeman

ʻI he loto-ʻofa lahi,

Emily Belle Freeman

Palesiteni Lahi ʻo e Kau Finemuí