“Folofola ʻe 12 ki he Taimi ʻOkú ke Ongoʻi …,” Ki Hono Fakamālohia ʻo e Toʻu Tupú, Māʻasi 2024, peesi–peesi.
Mālohi mei he Folofolá
Folofola ʻe 12 ki he Taimi ʻOkú Ke Ongoʻi …
ʻOku fonu ʻa e folofolá ʻi he ueʻi fakalaumālié, ʻo tatau ai pē pe ko e hā ʻa e ongo ʻoku tau maʻú.
Tā Fakatātaaʻi ʻe Toby Newsome
ʻI he ngaahi taʻu siʻi kuohilí, naʻe kamata ke hohaʻa ʻa ʻIlisapeti A., taʻu 17, mei ʻAlesona, ʻIunaiteti Siteiti ʻo ʻAmeliká, pea naʻe fakaʻau pē ke toe kovi ange. Naʻá ne pehē, “Naʻá ku ongoʻi ia ʻi he ʻahó kakato, ʻi he ʻaho kotoa pē. Naʻe faingataʻa kiate au ke u kātekina ʻa e ʻahó.”
Naʻe fakakaukau ʻa ʻIlisapeti ke ne lau ʻa e folofolá he pō kotoa pē ke ne maʻu ha fakafiemālie. Naʻe ʻalu pē taimí mo e kamata ke ne ongoʻi fiefia angé.
Naʻá ne pehē, “Naʻá ku ʻilo naʻe ʻikai ke u tuenoa. Naʻá ku ʻiloʻi naʻe ʻofa ʻa e ʻOtuá ʻiate au pea naʻá Ne fekauʻi mai Hono ʻAlo ko Sīsū Kalaisí, ʻa ia naʻá Ne ongoʻi ʻetau faingataʻaʻiá, loto-mamahí, mamahí, mo e siva ʻa e ʻamanakí. ʻOku fakafou ʻi he folofolá ʻa ʻeku maʻu ha vā fetuʻutaki mālohi mo Kalaisí pea mo ha fakatuʻamelie lelei ki he moʻuí!”
Naʻe ʻilo ʻe ʻIlisapeti ʻoku fonu ʻa e folofolá ʻi he ngaahi veesi mo e ngaahi talanoa fekauʻaki mo e founga ʻoku maʻu ai ʻa e ʻamanaki leleí, melinó, mo e mālohí ʻia Sīsū Kalaisí. Ko e tokolahi ʻo ʻetau kau moʻungaʻi tangata ʻi he folofolá ne nau fehangahangai mo ha ngaahi tūkunga faingataʻa. Pea ʻi he meʻa kotoa pē, naʻa nau maʻu ha ʻamanaki lelei, nonga, mo ha mālohi ʻi he taimi naʻa nau tafoki ai kia Sīsū Kalaisí.
Mahalo he ʻikai lava ʻe hono lau ʻo e folofolá ʻo fakaleleiʻi ʻa e meʻa ʻokú ke fouá, ka ʻe lava ke ʻoatu ʻe he ngaahi moʻoni ʻoku akoʻi ʻi he folofolá ha mālohi mo ha fakafiemālie kiate koe. Ko ha ngaahi potufolofola ʻeni ʻe niʻihi te ke lava ʻo kumi hake kapau ʻokú ke fiemaʻu ha fakakaukau fakalaumālie maʻau pe ko ha kaungāmeʻa. Te ke lava nai ʻo kumi ʻiate koe pē ha ngaahi potufolofola ʻe niʻihi?
Ki he taimi ʻokú ke ongoʻi …
Loto-mamahi: Tokāteline mo e Ngaahi Fuakava 68:6
Ko ia, ke mou fiefia, pea ʻoua ʻe manavahē, he ko au ko e ʻEikí ʻoku ou ʻiate kimoutolu, pea te u tuʻu ʻi homou tafaʻakí.
Taʻefeʻunga: Luke 12:6–7
Ka ko e ngaahi tuʻoni louʻulu ʻo homou ʻulú kuo lau kotoa pē. Ko ia ʻoua ʻe manavahē: he ʻoku mou mahuʻinga hake ʻi he fanga kihiʻi [manupuna] lahi.
Mā: ʻĪsaia 54:8
ʻI he ʻofa taʻengatá te u ʻaloʻofa kiate koe.
Loto-foʻi: ʻAlamā 26:27
Kātakiʻi ʻi he faʻa kātaki ʻa [hoʻo] ngaahi mamahí, pea te u tuku ke [ke] lavaʻi ʻa e ngāué.
Siva ʻa e ʻamanakí: Molonai 7:41
Te [ke] maʻu ʻa e ʻamanaki leleí ʻi he fakalelei ʻa Kalaisí pea mo e mālohi ʻo ʻene toetuʻú.
Vaivai: ʻEta 12:27
Kapau te nau fakavaivaiʻi ʻa kinautolu ʻi hoku ʻaó, pea tui kiate au, te u liliu ʻa e ngaahi meʻa vaivaí ko e mālohi kiate kinautolu.
Tailiili: Tokāteline mo e Ngaahi Fuakava 84:88
Te u ʻi [ho] nima toʻomataʻú pea ʻi [ho] toʻohemá, pea ʻe ʻi [ho] lotó ʻa hoku Laumālié, pea ʻe takatakai [ʻia koe] ʻa ʻeku kau ʻāngeló, ke poupouʻi hake [koe].
Mamahi: Saame 30:2
ʻE [ʻEiki] ko hoku ʻOtua, naʻá ku tangi kiate koe, pea kuó ke fakamoʻui au.
Ilifia: Sosiua 1:9
Ke ke mālohi koe peá ke loto-to‘a; … he ko [e ʻEiki] ko ho ʻOtuá ʻoku ʻiate koe ia ʻi he potu kotoa pē ʻokú ke ʻalu ki aí.
Tuenoa: Sione 14:18
ʻE ʻikai te u tuku koe ke [ke] tuenoa: te u haʻu kiate [koe].
ʻIta: Molonai 7:48
Lotu ki he Tamaí ʻaki ʻa e ivi kotoa ʻo e lotó, koeʻuhi ke fakafonu [koe] ʻaki ʻa e ʻofá ni.
ʻIkai faʻa kātaki: Tokāteline mo e Ngaahi Fuakava 100:15
Ko ia, tuku ke fiemālie ʻa [ho] lotó; koeʻuhí ʻe fengāueʻaki fakataha ʻa e ngaahi meʻa kotoa pē koeʻuhi ko e lelei ʻanautolu ʻoku ʻaʻeva ʻo angatonú.