Maʻu Hono Mālohí

Founga ʻe 7 ke Maʻu ʻa e Mālohi ʻo Sīsū Kalaisí

Fai ʻe Becca Aylworth Wright

ʻŪ Makasini ʻa e Siasí

“Ko Sīsū Kalaisi ʻa e mālohinga ʻo e toʻu tupú.” ʻE lava fēfē ke hoko ʻeni ko ha meʻa moʻoni kiate koe kae ʻikai ko ha lea ʻataʻatā pē?

“Ko Sīsū Kalaisi ʻa e mālohinga ʻo e toʻu tupú.” ʻOku mahulu hake ʻeni ia ʻi ha foʻi fakakaukau lelei pē. Ko ha foʻi moʻoni mālohi ia naʻe akoʻi ʻe he kau palōfitá mo e kau ʻaposetoló¹—ka ʻo kapau pē te tau fakaʻaongaʻi ia, kapau te tau ʻai ʻa Sīsū Kalaisi ke hoko ko e tupuʻanga ʻo hotau mālohingá. Ka te tau fakahoko fēfē iá? Te tau fakaʻatā fēfē ʻa Sīsū Kalaisi ke Ne tokoniʻi kitautolu ke tau mālohi angé? Ko ha ngaahi fakakaukau ʻeni ʻe niʻihi.

Tā Fakatātaaʻi ʻe Toby Newsome

1 Maʻu ha Mālohi mei hono Tauhi Hoʻo Ngaahi Fuakavá

“Ko e hā ʻa e maʻuʻanga ʻo e mālohi angatonu mo fakalaumālie peheé, pea ʻoku founga fēfē ʻetau maʻu iá? Ko e ʻOtuá ʻa e tupuʻanga ʻo e mālohí. ʻOku tau maʻu ʻa e mālohi ko iá ʻo fakafou ʻi heʻetau ngaahi fuakava mo Iá.”

ʻEletā D. Todd Christofferson ʻo e Kōlomu ʻa e Kau ʻAposetolo ʻe Toko Hongofulu Mā Uá, konifelenisi lahi ʻo ʻEpeleli 2019 (Ensign pe Liahona, Mē 2009, 20).

2 Maʻu ha Mālohi mei hono Lau ʻEne Folofolá

“Ko e folofola ‘a e ‘Otuá … ʻokú ne maʻu ‘a e mālohi ke maluʻi ‘a e Kāingalotú … ke nau lava ‘o tekeʻi ‘a e koví, tuʻu maʻu ʻi he leleí, mo maʻu ha fiefia ‘i he moʻui ko ʻení.”

Palesiteni Ezra Taft Benson (1899–1994), “The Power of the Word,” Apr. 1986 general conference (Ensign, May 1986, 80).

“ʻE lava ke fakafiemālieʻi ʻe he [ngaahi] folofolá ʻa e laumālie taʻemanongá, ʻo ʻomai ʻa e melinó, ʻamanaki leleí, mo toe fakafoki ʻa e loto-falalá ke malava ai ʻe ha taha ʻo ikunaʻi ʻa e ngaahi faingataʻa ʻo e moʻuí. [ʻOku nau] maʻu ʻa e ivi mālohi ke fakaleleiʻi ʻa e ngaahi faingataʻaʻia fakaelotó ʻi he taimi ʻoku tau tui ai ki he Fakamoʻuí.”

ʻEletā Richard G. Scott (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá, konifelenisi lahi ʻo ʻOkatopa 2011 (Liahona, Nōvema 2011, 6).

3 Maʻu ha Mālohi mei hono Tauhi ʻEne Ngaahi Fekaú

“ʻOku tupu mei he fakatomalá ʻetau malú. ʻOku maʻu hotau iví mei he talangofua ki he ngaahi fekau ʻa e ʻOtuá.”

Palesiteni Gordon B. Hinckley (1910–2008), “The Times in Which We Live,” Oct. 2001 general conference (Ensign, Nov. 2001, 74).

“Kapau ʻe hanga ʻe he fānau ʻa e tangatá ʻo tauhi ʻa e ngaahi fekau ʻa e ʻOtuá ʻokú ne fafanga ʻa kinautolu, pea fakamālohi ʻa kinautolu.”

1 Nīfai 17:3.

4 Maʻu ʻa e Mālohi mei he Fakatomala Fakaʻahó

“ʻOku fakafou ʻi he tui ki he Fakalelei ʻa Sīsū Kalaisí mo e fakatomala ʻa e niʻihi fakafoʻituituí mei heʻenau ngaahi angahalá, ʻa ʻenau maʻu ʻa e mālohi mo e tokoni ke fai ʻa e ngaahi ngāue lelei naʻe ʻikai ke nau mei malava ke fai kapau naʻe tuku pē kiate kinautolu.”

Bible Dictionary, “Grace,” Gospel Library.

5 Maʻu ʻa e Mālohi mei he Fekumi mo e Muimui ki he Fakahaá

“Ko e hā ʻe hoko ʻi hoʻo fanongo, tokanga, mo talangofua ange ki he meʻa kuo folofola ʻaki ʻe he Fakamoʻuí mo e meʻa ʻokú Ne folofola ʻaki he taimí ni ʻo fakafou ʻi Heʻene kau palōfitá? ʻOku ou palōmesi ʻe tāpuekina kimoutolu ʻaki ha mālohi lahi ange ke fepaki mo e ʻahiʻahí, faingataʻá, mo e vaivaí. … Pea ʻoku ou palōmesi ʻe tupulaki homou ivi ke ongoʻi e fiefiá neongo ʻo ka fakautuutu e palopalemá ʻi hoʻomou moʻuí.”

Palesiteni Russell M. Nelson, “Fanongo Kiate Ia,” konifelenisi lahi ʻo ʻEpeleli 2020 (Ensign pe Liahona, Mē 2020, 90).

6 Maʻu ha Mālohi mei he Lotú

“ʻOku fakafou ʻi he lotú ʻa hono fakamālohia ʻetau maʻuʻanga mālohi fakalaumālié. ʻI heʻetau fealeaʻaki mo e ʻOtuá ʻi he meʻa kotoa pē ʻoku tau faí, te Ne fakahinohinoʻi kitautolu ki he leleí.”

Palesiteni Russell M. Nelson, konifelenisi lahi ʻo ʻOkatopa 1984 (Ensign, Nov. 1984, 31).

7 Maʻu Ha Mālohi mei he Ngāue Fakatemipalé

“Kātaki ʻo fokotuʻu ha taimi moʻó e ʻEikí ʻi Hono fale tapú. ʻOku ʻikai ha meʻa te ne fakamālohia ho tuʻunga fakalaumālié ʻo tatau mo e ngāue ʻi he temipalé mo e moihū ʻi he temipalé.”

Palesiteni Russell M. Nelson, “Fokotuʻu ha Taimi moʻó e ʻEikí,” konifelenisi lahi ʻo ʻOkatopa 2021 (Liahona, Nōvema 2021, 121).

“ʻOku ou saiʻia ʻaupito ʻi he founga ʻoku tau maʻu ai ʻa e mālohi meia Sīsū Kalaisí, ka kuo pau ke tau fekumi ki ai mo ngāue ʻi he tuí.”

Grace T., 15, ʻIunaiteti Siteiti ʻo ʻAmeliká

Maʻuʻanga Fakamatalá

1. Vakai, Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (2022), 2.