“ʻE Tuku ʻa Fē ʻEku Ongoʻi Halaiá mo e Maá?,” Ki Hono Fakamālohia ʻo e Toʻu Tupú, Māʻasi 2024.
Mālohi ke Ikunaʻi ʻa e Angahalá
ʻE Tuku ʻa Fē ʻEku Ongoʻi Halaiá mo e Maá?
ʻOku ngali faingofua ange ʻi he taimi ʻe niʻihi ke ke ongoʻi kuo siva ho ʻamanakí ʻi haʻo ongoʻi ʻa e ʻofa ʻa e Fakamoʻuí kiate koé—kae hangē ko ia ne ʻilo ʻe Nīfaí, ʻoku ʻikai totonu ke pehē ia.
ʻI he taimi ʻokú ke fai ai ha meʻa ʻoku halá, mahalo te ke maʻu ha fakakaukau ʻokú ke tōnounou. Naʻe tonu ke ke fakapotopoto ange. ʻOku ʻikai ke ke taau ke ʻofaʻi.
Ka, ʻokú ke ʻiloʻi moʻoni ʻoku ʻikai moʻoni ha taha ʻo e ngaahi meʻa ko iá. Kuó ke ako fekauʻaki mo ho mahuʻinga ko e foha pe ʻofefine ʻo e ʻOtuá, pea ʻokú ke ʻiloʻi ʻoku moʻoni pea ʻoku malava ʻa e fakatomalá. Ka neongo iá, hili hoʻo faiangahala pe fai ha fehalaākí, mahalo ʻe ʻahiʻahiʻi koe ke lahi ange hoʻo tauteaʻi koe ʻaki ʻa e ngaahi fakakaukau ʻo e ongoʻi halaiá mo e fakamāʻiá ʻi hano tauteaʻi koe ʻe ha taha.
Naʻa mo e kakai ʻe niʻihi ʻoku tau saiʻia taha ai ʻi he folofolá naʻa nau ongoʻi peheni ʻi ha ngaahi taimi.
Naʻe Pehē mo Nīfai?
Hili ʻa e tohi ʻa Nīfai ʻo kau ki he mālōlō ʻene tamaí, naʻá ne tohi ʻo pehē, “Pea neongo ʻa e fuʻu angalelei lahi ʻa e ʻEikí, ʻi he fakahā mai kiate au ʻa ʻene ngaahi ngāue maʻongoʻonga mo fakaofó, ka ʻoku kaila ʻa hoku lotó: ʻOiauē ko e tangata loto-mamahi ko au! ʻIo, ʻoku mamahi ʻa hoku lotó koeʻuhi ko hoku kakanó; ʻoku mamahi hoku laumālié koeʻuhi ko ʻeku ngaahi angahalá. ʻOku kāpui au, ʻi he ngaahi ʻahiʻahí mo e ngaahi angahala ʻa ia ʻoku faingofua ʻaupito ʻeku moʻua ki aí. Pea ʻo kau ka holi ke fiefia, ʻoku tangi ʻa hoku lotó koeʻuhi ko ʻeku ngaahi angahalá” (2 Nīfai 4:17–19).
Ko Nīfai ʻeni ʻoku tau talanoa ki aí—ʻa e tokotaha tatau pē naʻá ne fakahaofi ʻa e ʻū lauʻi peleti palasá meia Lēpaní, ngaohi ha kaufana mei he ʻakau ʻi he feituʻu maomaonganoá, pea foʻu ha vaka ka kuo teʻeki ai ke ne foʻu ha vaka kimuʻá. Naʻá ne maʻu ha fakamoʻoni ki he angalelei ʻa e ʻEikí; ka naʻá ne ongoʻi taʻefeʻunga koeʻuhí ko ʻene ngaahi angahalá mo e ngaahi vaivaí.
Ko e hā leva ʻa e meʻa ʻoku totonu ke tau faí? Kapau naʻe fefaʻuhi ʻetau moʻungaʻi tangata ʻi he Tohi ʻa Molomoná mo e ongo loto-halaiá mo e taʻefeʻungá, ko e hā ha meʻa te tau lava ʻo fai ʻi he taimi ʻoku tau ongoʻi pehē aí?
Ko e Foungá ke Tokanga Taha kia Sīsū Kalaisi
Naʻe ʻikai ngata ai ʻa e talanoa ʻo Nīfaí. Ko e founga tefito kia Nīfaí ke liliu ʻene tokangá meiate ia kia Sīsū Kalaisi.
ʻI he tangilāulau ʻa Nīfaí, ʻokú ne pehē, “Ka neongo iá, ʻoku ou ʻiloʻi ʻa ia ʻoku ou falala ki aí. Kuo hoko ʻa hoku ʻOtuá ko hoku poupou” (2 Nīfai 4:19–20).
Hili ʻa e liliu ko ʻeni ʻo e fakakaukaú, ʻoku ʻikai leva ke toe tokanga ʻetau moʻungaʻi tangata ʻi he folofolá ki he mamahi ʻokú ne ongoʻi mei heʻene ngaahi fehalaākí. Ka, ʻokú ne fiefia ʻi hono Fakamoʻuí! ʻOku pehē ʻe Nīfai, “Fiefia, ʻe hoku loto, pea lotu ki he ʻEikí, ʻo pehē: ʻE ʻEiki, te u fakalāngilangiʻi koe ʻo taʻengata; ʻio, ʻe fiefia ʻa hoku laumālié ʻiate koe, ko hoku ʻOtuá, mo e maka ʻo hoku fakamoʻuí” (2 Nīfai 4:30).
Hangē ko Nīfaí, te ke lava ʻo maʻu ʻa e ʻaloʻofá, fakamolemolé, mo e melinó ʻo fakafou ʻia Sīsū Kalaisi. Mahalo he ʻikai te ke ongoʻi te ke lava ʻo foaki kiate koe pē ʻa e ʻaloʻofá, ka ʻoku ʻi ai ʻa e Tokotaha te Ne fakahoko ia. Naʻe pehē ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku ʻikai ngata pē ʻi hono foaki mai ʻe he ʻaloʻofa ʻa Kalaisí ʻa e fakamoʻui mei he mamahí mo e angahalá pea mo e maté ka ʻoku fakahaofi ai foki kitautolu mei heʻetau toutou fakaangaʻi pē kitautolú.”1
Ko ia ko e taimi ʻokú ke matuʻaki ongoʻi mamahi aí ʻo ʻikai ke ke sio ki ha founga ke ikunaʻi ai hoʻo ngaahi angahalá mo e fehalaākí, ʻiloʻi pē kuo teʻeki ʻaupito ke taʻofi ʻe he Tamai Hēvaní mo Sīsū Kalaisi ʻEna ʻofa ʻiate koé. Tuku taha hoʻo tokangá ki ho Fakamoʻuí, pea te Ne lava ʻo tokoniʻi koe ke ke ikunaʻi fakatouʻosi hoʻo ngaahi angahalá mo hoʻo ongoʻi halaiá.