“ʻE Lava Ke U Tokoni Kapau ʻOku ʻIkai ko ha Tokotaha Feohi Au?,” Ki Hono Fakamālohia ʻo e Toʻu Tupú, Māʻasi 2024.
Mālohi ke Tokoni
ʻE Lava Nai Ke U Tokoni Kapau ʻOku ʻIkai ko ha Tokotaha Feohi Au?
ʻE lava ke fakamālohia kitautolu ʻe he Fakamoʻuí neongo kapau ʻoku faingataʻa ke tau tokoniʻi ʻa e kakaí.
ʻI heʻeku kei ʻi he ako māʻolungá, naʻá ku fakakaukau ʻoku ʻikai ko ha ākonga mahuʻinga au ʻa Sīsū Kalaisi koeʻuhí he naʻá ku faingataʻaʻia ʻi he talanoa mo e kakaí. Naʻe ʻikai ke u fakamaheningataʻa pē—ka naʻá ku matuʻaki mā ʻaupito! Naʻá ku fuʻu mā ʻaupito naʻe faingataʻa ke u fakakaungāmeʻa pea fakahaaʻi hoku tuʻunga totonú ʻi he feohi mo hoku kaungā ako ʻi he akó mo e lotú.
Koeʻuhí ko e meʻa ko iá, naʻá ku fakamamaʻo ai mei he ngaahi uiuiʻi ʻi he Kau Finemuí pea naʻá ku ongoʻi hangē he ʻikai ke u lava ʻo anga fakalaumālie tatau mo hoku toʻú ʻa ia naʻa nau ngutu faʻa lea mo fakamaheningofua ange ʻiate aú.
Ko ia ʻi heʻeku ʻosi mei he akoʻanga māʻolungá peá u fakakaukau ke u ʻalu ʻo ngāue fakafaifekaú, naʻá ku fuʻu ilifia!
Naʻá ku ongoʻi hangē naʻe finangalo ʻa e ʻOtuá ke u ngāué, ka ne u ʻuluaki fakakaukau, “Ko e hā ʻoku finangalo ai ʻa e ʻOtuá ke ʻalu ha tokotaha hangē ko aú ʻo ngāue fakafaifekaú? ʻOku ʻikai ke u lava ʻo talanoa ki he kakaí!”
Ka neongo ʻeku ilifiá, naʻá ku pehē ke u falala pē ki he ʻOtuá ke u ʻalu ʻo ngāue fakafaifekau.
Fakafalala ki he Mālohi ʻo Kalaisí
ʻI heʻeku ngāué, naʻe faingataʻa ʻa e ngaahi meʻá ʻi he kamataʻangá, ka ʻi he hokohoko atu ʻeku feingá (mo ʻeku fakaʻatā ke u tōnounoú), naʻá ku ʻiloʻi naʻe fakamālohia au ʻe he ʻEikí ke u fai ʻa e ngāue naʻá Ne kole mai ke u faí.
ʻI he Tohi ʻa Molomoná, ʻoku folofola ai ʻa e ʻEikí ʻo pehē: “Kapau ʻe haʻu kiate au ʻa e tangatá te u fakahā kiate kinautolu ʻa honau vaivaí. ʻOku ou foaki ki he tangatá ʻa e vaivaí koeʻuhí ke nau loto-fakatōkilalo; pea ʻoku feʻunga ʻa ʻeku ʻofá ki he tangata kotoa pē ʻoku nau fakavaivaiʻi ʻa kinautolu ʻi hoku ʻaó, he kapau te nau fakavaivaiʻi ʻa kinautolu ʻi hoku ʻaó, pea tui kiate au, te u liliu ʻa e ngaahi meʻa vaivaí ko e mālohi kiate kinautolu” (ʻEta 12:27).
Naʻá ku fakatokangaʻi ʻi heʻeku ngāue fakafaifekaú ʻe lava ke fakahoko ʻe Sīsū Kalaisi ha ngaahi meʻa fakaofo kiate au ʻo ʻikai koeʻuhí ko hoku mālohí ka koeʻuhí ko Hono mālohí. Pea naʻá ku ʻiloʻi foki naʻe ʻikai ke u maʻu Hono mālohí koeʻuhí pē ko ha faifekau au, ka ko ha meʻa foki ia ne u mei lava ʻo fakafalala ki ai ʻi he ako māʻolungá.
Ko e meʻa fakaofo fekauʻaki mo Sīsū Kalaisí ko e ʻikai ke tau fiemaʻu ha ngaahi mataʻitohi fakaako pe tohi tala-ngāue lōloa ke ngāue ʻi Hono puleʻangá pea hoko ko ha kau ākonga mālohi! Kapau ʻoku tau loto-fakatōkilalo mo fakamātoato ʻi heʻetau holi ke ngāué, ʻe tali kitautolu ʻe Sīsū Kalaisi ʻi he tuʻunga totonu ʻoku tau ʻi aí, feituʻu ʻoku tau ʻi aí, pea foaki mai ʻa e tokoni mo e ivi ʻoku fiemaʻu ke tau tauhi kiate Iá.