“Mālohi Ange ʻi he ʻAhiʻahí,” Ki Hono Fakamālohia ʻo e Toʻu Tupú, Māʻasi 2024.
Mālohi ke Ikunaʻi ʻa e Angahalá
Mālohi Ange ʻi he ʻAhiʻahí
ʻE lava ke fakamālohia koe ʻe he Fakamoʻuí ʻi hoʻo feinga ke fakaʻehiʻehi mei he angahalá.
Ko e fakatomalá ko ha mana ia. Naʻe ʻai ʻe Sīsū Kalaisi ke malava ia. ʻOku hōifua ʻa e Tamai Hēvaní ke fakamolemoleʻi kitautolu ʻi he taimi ʻoku tau fili ai ke fakatomala pea muimui ki Heʻene ngaahi fekaú. Neongo ʻe fiemaʻu ke tau fakatomala kotoa ʻi heʻetau moʻuí, ka te tau lava fēfē ʻo matuʻuaki ʻa e angahalá pea fai ha ngaahi fili ʻoku lelei angé?
Ko ha ngaahi tokoni ʻeni ke maʻu ai ha mālohi ʻo fakafou ʻia Sīsū Kalaisi ke fakafepakiʻi ʻaki ʻa e ʻahiʻahí:
-
Lau fakaʻaho ʻa e folofolá.
-
Lotu fakaʻaho.
-
ʻAlu maʻu pē ki he lotú.
Ko e taimi ʻe niʻihi ʻoku tau tukunoaʻi ʻa e ngaahi meʻá ni ko ha ngaahi tali fakalūkufua mo mahino. ʻOua naʻá ke tō ki he tauhele ko iá! ʻOku toutou fakahoko maʻu pē ʻa e ngaahi tali tefito mo mahuʻinga ko ʻení he ko e ngaahi tali tefito mo mahuʻingá ia! ʻOku nau ʻaonga.
Fai ʻa e ngaahi meʻá ni, pea te ke toe ofi ange ai ki hoʻo Fakamoʻuí.