“Kātaki ʻo Fakahaofi e Moʻui ʻa e Fineʻeikí,” Liahona, Māʻasi 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Kātaki ʻo Fakahaofi e Moʻui ʻa e Fineʻeikí
Naʻá ku ilifia ʻi he taimi naʻe fiemaʻu ai ʻe heʻeku fineʻeikí ke tafa hono mafú, ka naʻe akoʻi au ʻe ha faiako Palaimeli mateaki ke u lotu.
Ko Kulisitī Kelaki mo ʻene fineʻeikí
Laʻitā ne maʻu ʻi he angalelei ʻa e tokotaha faʻutohí
ʻI hoku taʻu 10, naʻe mahaki mafu lahi ʻeku fineʻeikí. Naʻá ne nofo falemahaki ʻi ha laulau uike ʻo feinga ke ne moʻui.
Lolotonga ʻa e taimi ko ʻení, naʻe haʻu tuʻo taha ʻi he uike ʻa ʻeku faiako Palaimeli ko Sisitā ʻĒleni Sionisoní, ke vakaiʻi au. Naʻá ku toki kamata pē ke ʻalu ki he Palaimelí pea naʻe siʻisiʻi ʻeku mahino ki he ongoongoleleí. Ko e uike kotoa pē naʻe vahevahe mai ai ʻe Sisitā Sionisoni ʻa ʻene fakamoʻoní peá ne talanoa fekauʻaki mo e lotú. Naʻá ne akoʻi mai kapau te u lotu, ʻe tali mai ʻe he Tamai Hēvaní.
Hili ha ngaahi uike, naʻe toe hōloa ange siʻi moʻui ʻa e Fineʻeikí. Naʻe maumau ʻa e halanga toto ʻo hono mafú pea naʻe fiemaʻu ai ke faitoʻo. Naʻe pehē ʻe heʻene toketaá te ne mate kapau he ʻikai ke ʻahiʻahi tafa hono mafú. Neongo ia, ka ko e faingamālie ke ne toe moʻuí naʻe pēseti pē ʻe 50.
Ko e tafa mafú naʻe kei foʻou pea ala hoko ai ha fakatuʻutāmaki ʻi he konga kimuʻa ʻo e 1960 tupú. Naʻe palani ʻa e kau toketā faitafá ke tafaʻi ʻa e fatafata ʻo e Fineʻeikí ki hono huituʻá pea fakaava mo hono hui palalulú kae lava ke nau aʻu ki hono mafú. Naʻe tokolahi ʻa e kau mahaki naʻe ʻikai ke nau toe moʻui ʻi he tafa ko iá. Naʻá ku loto-mamahi mo ilifia naʻa mate siʻeku fineʻeikí.
Naʻe meimei ke ʻi he ngāué maʻu pē ʻa e Tangataʻeikí pe ʻi he falemahakí mo e Fineʻeikí. Naʻe tokangaʻi ʻe hoku tokoua lahi ko Pemí au mo hoku tuongaʻané. ʻI he poʻulí, naʻá ku ongoʻi taʻelata mo ilifia, ka naʻá ku fakakaukau ki he meʻa naʻe akoʻi mai ʻe Sisitā Sionisoni fekauʻaki mo e lotú. Naʻá ku faʻa tūʻulutui ʻi hoku veʻe mohengá ʻo tangi, pea tautapa ki he Tamai Hēvaní ke fakahaofi e moʻui ʻa e Fineʻeikí.
Lolotonga ha taha ʻo e faʻahinga tautapa peheé, naʻe haʻu ha nonga lahi kiate au pea tuku leva ʻeku tangí. Naʻá ku ongoʻi ʻe lelei ʻa e meʻa kotoa pē. Naʻá ku ongoʻi naʻe fakapapauʻi mai ʻe moʻui ʻeku faʻeé ke mātā ʻeku tupu ʻo lahí pea naʻe ʻikai fiemaʻu ke u hohaʻa. Naʻe ʻikai ke u fanongo ki ha leʻo pe mamata ki ha meʻa-hā-mai, ka naʻá ku maʻu ha ngaahi ongo fakalongolongo mo nonga. Naʻe ʻikai ke u veiveiua ʻiate kinautolu. Kuo tali ʻe he Tamai Hēvaní ʻeku lotú, pea naʻá ku ʻiloʻi ia.
Tā fakatātaaʻi ʻe Alex Nabaum
Naʻe moʻui ʻa e Fineʻeikí hili ʻa e tafá. Naʻá ne vaivai mo mahamahaki he konga lahi ʻo ʻene moʻuí, ka kuo tali ʻe he Tamai Hēvaní ʻeku ngaahi lotú mo fakahaofi ʻene moʻuí. Naʻá ne moʻui ke siofia ʻeku tupu haké, malí mo e maʻu-fānaú.
Hili ha ngaahi taʻu lahi mei ai, ʻi he hoko ʻa Palesiteni Lāsolo M. Nalesoni ko e ʻAposetoló, naʻe talamai ʻe he Fineʻeikí ko e toketā tafa mafu naʻá ne fakahaofi siʻene moʻuí. Naʻá ku fai ha tohi ke fakamālō kiate ia. ʻI he taimi naʻá ne tali mai aí, naʻá ne fakamālō mai ʻi heʻeku tohí mo fakamoʻoniʻi ʻa e tokoni ʻa e ʻOtuá ʻi heʻene ngāué.