ʻEpeleli
ʻOku Akoʻi Au ʻe Sīsū Kalaisi Ke u Fili ki he Totonú
“He kuó u tuku kiate kimoutolu ʻa e fakatātā, koeʻuhi ke mou fai ʻo tatau mo ia kuó u fai kiate kimoutolú” (Sione 13:15).
Hivá: Hiva fili fekauʻaki mo Sīsū Kalaisi mei he Tohi Hiva ʻa e Fānaú
Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻi he uike takitaha ʻa e ngaahi founga ke (1) fakamahinoʻi ʻa e tokāteliné, (2) tokoni ke mahino ia ki he fānaú, pea (3) tokoni ke nau moʻui ʻaki ia. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”
Uike 1: Ko Sīsū Kalaisi ʻa e faʻifaʻitakiʻanga haohaoa kiate aú.
Poupouʻi ke mahinó(lau ʻa e ngaahi folofolá mo tā e ngaahi fakatātaá): Tohiʻi ʻi ha laʻi pepa lahi ʻa e kupuʻi lea ko ʻení, “Ko Sīsū Kalaisi ʻa e faʻifaʻitakiʻanga haohaoa kiate aú.” Kosikosi ʻa e pepá ki ha konga pāsolo ʻe fā. Tohiʻi ʻa e taha ʻo e ngaahi sētesi ko ʻení ʻi he tuʻa ʻo e konga pāsolo takitaha:
-
Naʻá Ne fakahā mai kiate kitautolu ʻa e founga ke papitaiso aí (vakai, Mātiu 3:13–17).
-
Naʻá Ne fakahā ʻa e ʻofa ki he niʻihi kehé (vakai, Maʻake 10:13–16).
-
Naʻá Ne fakamolemoleʻi kinautolu naʻa nau fakamamahiʻi Iá (vakai, Luke 23:34).
-
Naʻá Ne fakahā mai kiate kitautolu ʻa e founga ʻo e lotú (vakai, Mātiu 6:5–13).
ʻI hoʻo akoʻi ʻa e ngaahi tefitoʻi moʻoni ʻo e ongoongoleleí, tokoniʻi ʻa e fānaú ke fekumi ki ha ngaahi founga te nau moʻui ʻaki iá.
Hivaʻi “ ʻOku ou Feinga ke Hangē ko Sīsuú” (THF, 40–41). Kole ki he fānaú ke fakamatalaʻi ʻa e meʻa ʻoku akoʻi ʻe he foʻi hivá. Fakaʻaliʻali ha fakatātā ʻo Kalaisi, pea talaange ki he fānaú naʻá Ne akoʻi mai kiate kitautolu ha ngaahi meʻa lahi ʻi Heʻene hoko ko e faʻifaʻitakiʻanga haohaoá. Vahevahe ʻa e fānaú ki ha ngaahi kulupu ʻe fā, pea ʻoange ki he kulupu takitaha ha taha ʻo e ngaahi konga pāsoló mo ha ʻū laʻi pepa. Kole kiate kinautolu ke lau fakataha ʻa e folofolá pea toki tā fakatātaaʻi ʻa founga te nau lava ai ʻo muimui ʻi he faʻifaʻitakiʻanga ʻa Kalaisí. Fakaafeʻi ʻa e kulupu takitaha ke fakamatalaʻi ʻenau folofolá mo e ngaahi fakatātaá pea ke tuku ʻenau konga pāsoló ki he palakipoé. Hili hono fokotuʻutuʻu e pāsoló, lau fakataha, “Ko Sīsū Kalaisi ʻa e faʻifaʻitakiʻanga haohaoa kiate aú.”
Uike 2 mo e 3: Naʻe akoʻi au ʻe Sīsū Kalaisi ki he founga totonu ke u moʻui aí.
Fakamahinoʻi ʻo e tokāteliné (hivaʻi ha foʻi hiva): Hivaʻi ʻa e “Fili e Hala Totonú” (THF, 82–83), pea kole ki he konga ʻo e fānaú ke nau fakafanongo ki he founga te nau lava ai ʻo fiefiá pea ko e konga ʻe tahá ke nau fakafanongo ki he meʻa te ne tokoniʻi mo fakahinohinoʻi ʻa e halá kiate kitautolú. Aleaʻi ʻa e meʻa naʻe ako ʻe he fānaú mei he hivá.
Poupouʻi ke mahinó (fakahoko ha vaʻinga mateʻi ʻo ha taha mo lau e ngaahi folofolá): Teuteuʻi ha ngaahi kaati lea ʻoku tohiʻi ai ʻa e ngaahi lea mo e potu folofola ko ʻení: fiekaia (Mātiu 5:6); ngingila (Mātiu 5:16); ʻofa (Mātiu 5:44); mo e lotu (Mātiu 6:6). Fakaʻaliʻali ha fakatātā ʻo e Malanga ʻi he Moʻungá. Fakamatalaʻi ange naʻe hāʻele hake ʻa Sīsū ki he moʻungá ke akoʻi ʻEne kau ākongá; ʻoku ui ʻa e ngaahi meʻa naʻá Ne akoʻí ko e Malanga ʻi he Moʻungá. Fakaʻaliʻali ha taha ʻo e ngaahi kaati leá ki he konga e fānaú, pea kole ange kiate kinautolu ke nau fakatātaaʻi ʻa e foʻi leá kae mateʻi ʻe he fānaú kehé. Lau fakataha ʻa e folofola ʻoku fekauʻaki mo iá, pea tokoniʻi ʻa e fānaú ke mahino kiate kinautolu ʻa e meʻa naʻe akoʻi ʻe Sīsuú mo e founga te tau lava ai ʻo muimui ʻi Heʻene sīpingá. Toe fai e meʻa tatau mo e ngaahi foʻi leá mo e folofola kehé.
ʻOku maʻu atu ʻa e kaati leá ʻi he sharingtime.lds.org
Poupouʻi ke moʻui aki (aleaʻi ʻa e ngaahi fakatātā ke ako mei aí): Tohiʻi ʻi ha laʻi pepa ʻe fā ʻa e ngaahi akonaki ko ʻeni ʻa Sīsuú: (1) Fiekaia mo fieinua ki he māʻoniʻoní, (2) Tuku ke ulo hoʻo maamá, (3) ʻOfa ki ho ngaahi filí, (4) Lotu ki he Tamai Hēvaní. (Fakakaukauʻi hono fakaʻaongaʻi ʻo e ngaahi fakatātaá ke fakamatalaʻi ʻa e ngaahi akonaki ko ʻení ki he fānau iikí.) Fakaʻaliʻali ʻa e ngaahi laʻi pepá ʻi he ngaahi feituʻu kehekehe ʻi he lokí. Teuteuʻi ʻa e ngaahi fakatātā ke ako mei aí (vakai, IUMF, 198–199) ke ne tokoniʻi ʻa e fānaú ke maʻu ʻa e mahinó ke moʻui ʻaki ʻa e ngaahi akonaki ko ʻení. Hangē ko ʻení, “ ʻOku fakamataliliʻi koe ʻe ha taha ʻi he akó mo lau kiate koe. Ko e hā ʻa e meʻa te ke faí?” Toe vakaiʻi ʻa e ngaahi folofola mei he vaʻinga mateʻi ʻo ha tahá ʻa ia ʻoku fakamatalaʻi ʻi ʻolungá, pea fakahā ʻoku fekauʻaki ʻa e ngaahi laʻi pepa ʻoku fakaʻaliʻali takatakai ʻi he lokí mo e folofolá. Lau ha fakamatala ke ako mei ai, ki he fānaú, pea fakaafeʻi kinautolu ke tuʻu ʻo hanga ki he laʻi pepa te ne tokoniʻi kinautolu ke fili ki he totonú. Kole ki he niʻihi ʻo e fānaú ke vahevahe ʻa e fili te nau faí.
Uike 4: ʻOku ou ongoʻi ʻa e ʻofa ʻa e Fakamoʻuí ʻi heʻeku feinga ke u hangē ko Sīsū Kalaisí.
Poupouʻi ke mahinó (hivaʻi ha foʻi hiva mo fai e ngaahi filí): Hivaʻi ʻa e “ ʻOku Ongo ʻa e ʻOfá” (THF, 42–43). Tohiʻi e ngaahi fakatātā ke ako mei ai ke fakahā e founga ʻe lava ʻe ha tamasiʻi ʻo muimui ki he taha ʻo e ngaahi akonaki ʻa Kalaisí. Fakakau atu foki mo ha potu folofola ʻe maʻu ai ʻa e akonaki ko iá. ʻOku hā atu ʻi lalo ha ngaahi fakatātā.
Naʻe kole ʻe Sala ki hono tehiná ke ʻoua naʻá ne ngāue ʻaki ʻene kalá, ka naʻe fakaʻaongaʻi pē ia ʻe hono tehiná. Ke hangē ko Sīsuú, ʻe lava ʻa Sala ʻo:
-
ʻIta ki hono tehiná.
-
Fufuuʻi ʻene kalá.
-
Fakamolemoleʻi hono tehiná.
ʻOku vaʻinga soka ʻa Sione mo hono ngaahi kaungāmeʻá, peá ne fakatokangaʻi ha tamasiʻi ʻe taha ʻoku tuʻu toko taha pē ʻo sio ki he vaʻingá. Ke hangē ko Sīsuú, ʻe lava ʻa Sione ʻo:
-
Fakakata ʻaki ʻa e tamasiʻí koeʻuhi ko ʻene tuēnoá.
-
Tukunoaʻi ʻa e tamasiʻí mo hoko atu ʻene vaʻinga mo hono ngaahi kaungāmeʻá.
-
Fakaafeʻi ʻa e tamasiʻí ke nau vaʻinga soka.
Kole ki ha tamasiʻi ke lau e taha ʻo e ngaahi fakatātā ke ako mei aí. Kole leva ki ai ke ne lau tahataha ʻa e ngaahi talí. Fakaafeʻi ʻa e fānau kehé ke tuʻu ʻi heʻenau fanongo ki he tali te ne muimui ai ki he sīpinga ʻa Sīsuú. Fakaafeʻi e niʻihi ʻo e fānaú ke lau leʻolahi e folofolá, pea aleaʻi ʻa e akonaki ʻa Sīsuú. Aleaʻi ʻa e founga ʻe lava ʻe he muimui ki he sīpinga ʻa Sīsuú ʻo tokoniʻi kitautolu ke tau ongoʻi ʻa e ʻofa ʻa e Fakamoʻuí. Fai e meʻa tatau ki he fakamatala takitaha ke ako mei aí.
ʻAi e fānaú ke lau leʻolahi mei he folofolá. Fakatokangaʻi ʻa e tuʻunga ʻo e meʻa ʻe malava ʻe he tamasiʻi takitaha, pea tokoniʻi ke nau takitaha kau mai.
Poupouʻi ke moʻui ʻaki: Fakaafeʻi ʻa e fānaú ke fai e meʻa ʻoku finangalo ki ai ʻa Sīsuú ʻi he uike ko ʻení. Talaange kiate kinautolu te ke kole ki honau niʻihi ʻi he uike kahaʻú ke vahevahe ʻa e meʻa naʻa nau faí mo e anga ʻo ʻenau ongoʻi ʻa e ʻofa ʻa e Fakamoʻuí.
Ngaahi Tokoni maʻá e fai hivá
Ke tokoni ki he fānaú ke ako ha hiva foʻoú, fakakaukau ki he ngaahi meʻa ko ʻení:
-
Fakaafeʻi ʻa e fānaú ke nau fai ha fakaʻilonga ʻi heʻenau hivaʻi ha foʻi lea pe lau e tuʻo lahi ʻo ʻenau hivaʻi ʻo ha foʻi lea. Hangē ko ʻení, hivaʻi ʻa e “Naʻá Ne Fekau Hono ʻAló” (THF, 20–21), pea kole ke nau lau e tuʻo lahi ʻo ʻenau hivaʻi ʻa e lea “Hono ʻAló.”
-
Fili ha fakatātā mo ha foʻi lea ʻokú ne fakafofongaʻi ʻa e kupuʻi lea takitaha ʻi ha foʻi hiva, pea hikiʻi hifo ʻi ha laʻi pepa. Hangē ko ʻení, ʻi he taimi ʻokú ke hivaʻi ai ʻa e “Naʻá Ne Fekau Hono ʻAló” (THF, 20–21), tā fakatātaaʻi ʻa e kupuʻi lea “Tala fēfē ʻe he Tamaí ki māmani e ʻofá?” ʻaki ha fakatātā ʻo ha foʻi mafu mo e foʻi lea ko e ʻofá. Ki he kupuʻi lea “ ʻOmi e melinó mo e māʻoniʻoni he ʻAló,” fakaʻaliʻali ha fakatātā ʻo e ʻaloʻí mo e foʻi lea ko e melinó. Te ke lava ʻo fakakau mai ʻa e fānaú ʻaki ʻenau pukepuke ʻa e ngaahi fakatātaá lolotonga ʻenau hivá.