ʻOkatopa
ʻOku ʻAtā ki he Tokotaha Kotoa Pē ʻa e Ngaahi Tāpuaki ʻo e Lakanga Fakataulaʻeikí
“Pea ko kinautolu kotoa pē foki ʻoku maʻu ʻa e lakanga fakataulaʻeiki ko ʻení ʻoku nau maʻu au, ʻoku folofola ʻe he ʻEikí” (T&F 84:35).
Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻi he uike takitaha ʻa e ngaahi founga ke (1) fakamahinoʻi ʻa e tokāteliné, (2) tokoni ke mahino ia ki he fānaú, pea (3) tokoni ke nau moʻui ʻaki. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”
Uike 1: ʻOku maʻu ʻa e lakanga fakataulaʻeikí ʻe he kau talavou ʻoku moʻui taau ʻi heʻenau taʻu 12.
Fakamahinoʻi ʻa e tokāteliné (vakai ki ha fakatātā): Fakaʻaliʻali ki he fānaú ha fakatātā ʻo Sīsū Kalaisi ʻi Heʻene fakahoko ʻa e sākalamēnití. Fakamatala ange naʻe ʻoange ʻe Kalaisi ʻa e sākalamēnití ki Heʻene Kau ʻAposetoló mo e ʻEne kau ākonga ʻi he Tohi ʻa Molomoná, peá Ne kole ke nau hokohoko atu hono tāpuakiʻi mo tufaki ʻa e sākalamēnití ʻi Heʻene ʻalú. Lau fakataha ʻa e 3 Nīfai 18:5–6. Fehuʻi ange ki he fānaú ha ngaahi fehuʻi hangē ko ʻení: Ko hai ʻokú ne tāpuakiʻi ʻa e sākalamēnití ʻi hotau ʻaho ní? Ko hai ʻokú ne tufaki ʻa e sākalamēnití? Ko e hā ʻa e mafai ʻoku fie maʻu ke maʻu ʻe ha tokotaha ke ne tāpuakiʻi mo tufaki ʻa e sākalamēnití?
Poupouʻi ke mahinó (aleaʻi ʻa e tokāteliné): Fakamatalaʻi ange ko e lakanga fakataulaʻeikí ko e mafai ia ʻa e ʻOtuá ke tauhi mo tāpuakiʻi ʻa e kakaí ʻi māmaní. Kuo akoʻi kitautolu ʻe Kalaisi ʻi he ngaahi ʻaho kimui ní ʻe lava ke maʻu ʻe ha tangata ʻa e lakanga fakataulaʻeikí ʻi heʻene fakakakato ha ongo fie maʻu ʻe ua. Ko e ʻuluakí ke ne aʻu ki ha faʻahinga taʻu motuʻa. Kole ange ki he fānaú ke nau tuʻu ʻi heʻenau fanongo ʻokú ke lau mai ʻa e taʻu motuʻa ʻe lava ai ke maʻu ʻe ha tamasiʻi ʻa e lakanga fakataulaʻeikí. Lau māmālie mei he tahá ki he hongofulu mā uá. Talaange ki he fānaú ko e fie maʻu ʻe tahá kuo pau ke taau mo feʻunga ʻa e tamasiʻi ko iá. Fakamatalaʻi ange ʻa e ʻuhinga ke te taau mo feʻungá, pea fakamatalaʻi ʻe lava ke fakaʻaongaʻi ʻe he tamaiki tangatá mo e fefiné ʻa e “Ko Hoku Ngaahi Tuʻunga Mahuʻinga ʻi he Ongoongoleleí” ke tokoniʻi kinautolu ke nau ʻilo e founga ke moʻui taau mo feʻunga aí.
Poupouʻi ke moʻui ʻaki (kau atu ki ha ʻekitivitī fakatuʻasino): Vahevahe ʻa e fānaú ki ha ngaahi kulupu. Vahe ki he kulupu takitaha ha tuʻunga mahuʻinga ʻe taha mei he “Ko Hoku Ngaahi Tuʻunga Mahuʻinga ʻi he Ongoongoleleí.” Kole ki he kulupu takitaha ke fakakaukauʻi ha fakatātā faingofua pē ʻokú ne fakafofongaʻi honau tuʻunga mahuʻingá. Lau ha ngaahi lea ʻokú ne fakafofongaʻi ha tuʻunga moʻuí, pea tuku ki he kulupu naʻe vahe ki aí ke nau tuʻu ʻo fakaʻaliʻali ʻenau fakatātaá. Hokohoko atu ai pē kae ʻoua leva kuo tuʻu ʻa e kulupu kotoa pē. Fakamatalaʻi ʻoku tokoni ʻa hono moʻuiʻaki ʻa e ngaahi tuʻunga moʻui ko ʻení ke nofo taau mo feʻunga e tamaiki tangatá ke nau maʻu ʻa e lakanga fakataulaʻeikí mo maʻu e ngaahi ouau ʻo e lakanga fakataulaʻeikí pea nofo taau mo feʻunga ʻa e tamaiki fefiné ke maʻu ʻa e ngaahi ouau ʻo e lakanga fakataulaʻeikí, ʻo hangē ko e papitaisó mo e ngaahi ouau ʻo e temipalé.
Uike 2: ʻOku tau maʻu ʻa e ngaahi ouau ʻo e fakamoʻuí ʻo fakafou mai ʻi he lakanga fakataulaʻeikí.
ʻE lava ke fakaʻaongaʻi ʻa e ngaahi lēsoni fakataumuʻá ke fakatupu ʻa e fieʻiló, tāfataha e tokanga ʻa e fānaú, pe fakafeʻiloaki ha tefitoʻi moʻoni ʻo e ongoongoleleí.
Fakamahinoʻi ʻa e tokāteliné (vakai ki ha lēsoni fakataumuʻa): Tuku ki ha tamasiʻi ke ne pukepuke ha fakamalu kuo teke. ʻAi ha fānau tokosiʻi ke nau fakamalumalu ai. Fakatatau ʻa e fakamalú ki he lakanga fakataulaʻeikí. Fakahā ange kapau naʻe ʻuha, ʻe maʻu kotoa ʻe he fānau naʻe fakamalumalú ʻa e tāpuaki ʻo e mātuʻú, ʻo ʻikai ko e tokotaha pē ʻokú ne pukepuke iá. Hangē ko iá, kuo ʻomi ʻe he ʻOtuá, ʻo fakafou ʻi Hono lakanga fakataulaʻeikí, ha founga ke tāpuekina ai ʻa e kotoa ʻo ʻEne fānaú. ʻOku tau maʻu ʻa e ngaahi ouau ʻo e fakamoʻuí, ʻo fakafou ʻi he lakanga fakataulaʻeikí, ke fakaʻatā kitautolu ke toe foki ʻo nofo fakataha mo e ʻOtuá.
Poupouʻi ke mahinó (fokotuʻutuʻu fakataha ʻa e ngaahi pāsoló): Tohiʻi ʻa e ngaahi meʻá ni ʻi ha ngaahi laʻi pepa kehekehe: papitaisó, hilifakinimá, fakanofo ʻo e lakanga fakataulaʻeikí (maʻá e kakai tangatá), ʻenitaumeni ʻi he temipalé, mo e sila ʻi he temipalé. Kosikosi ʻa e laʻi pepa takitaha ʻo hangē ha pāsoló. Fakamatalaʻi nounou ki he fānaú ʻa e ʻuhinga ʻo e ouaú (ko ha fakafuakava toputapu pe ko ha ngāue ʻoku ʻi ai hano ngaahi ʻuhinga fakalaumālie), pea talaange ki he fānaú ʻoku ʻi ai e ngaahi ouau lakanga fakataulaʻeiki ʻe niʻihi ʻoku tau fie maʻu kae lava ke tau foki ʻo nofo mo e Tamai Hēvaní. Tā ha ngaahi sitepu ʻe nima ʻi he palakipoé, pea tuku ʻa e fakatātā ʻo Sīsū Kalaisí ʻi he sitepu ʻi ʻolungá. Vahevahe ʻa e fānaú ki ha ngaahi kulupu ʻe nima pea ʻoange ki he kulupu takitaha ʻa e taha ʻo e ngaahi pāsolo naʻá ke faʻú. Kole ke nau fokotuʻutuʻu ʻenau pāsoló pea vahevahe leva ʻa e meʻa ʻoku nau ʻiloʻi ki he ouaú mo e toenga ʻo e Palaimelí. Tuku ki he ngaahi kulupú ke nau fakapipiki ʻa e ngaahi pāsolo kuo fokotuʻutuʻú ʻi hono fokotuʻutuʻu totonú ʻi he ngaahi sitepu ʻi he palakipoé.
Uike 3: Te u lava ʻo maʻu ʻa e mālohi ʻoku fakamālohiá tuʻunga ʻi he ngaahi tāpuaki ʻo e lakanga fakataulaʻeikí.
Fakamahinoʻi ʻa e tokāteliné (aleaʻi ʻa e tokāteliné): Kole ki he fānaú ke hiki hake honau ongo nimá pea sio ki ai. Fehuʻi ange pe ʻoku anga fēfē ʻa e tokoni honau ongo nimá ke nau vaʻinga, ngāue, mo teuteu ki he lotú. Fakaafeʻi kinautolu ke nau fakatātaaʻi e tali takitaha. Fehuʻi ange leva kiate kinautolu pe ʻe lava fēfē ʻa e kakaí ʻo fakaʻaongaʻi honau ongo nimá ke tokoniʻi e niʻihi kehé. Fakamatalaʻi ange ʻoku lava ke ngāue ʻaki ʻe he kau maʻu lakanga fakataulaʻeikí honau ongo nimá ke foaki ha ngaahi tāpuaki ʻoku nau tokoniʻi mo fakamālohia kitautolú.
Poupouʻi ke mahinó pea moʻui ʻaki (vakai ki he ngaahi fakatātaá mo vahevahe ʻa e ngaahi meʻa naʻe ʻausiá): Fakaʻaliʻali takatakai ʻi he lokí ha ngaahi fakatātā ʻo e sākalamēnití, papitaisó, hilifakinimá, ko ha tāpuakiʻi ʻo ha pēpē, mo e faingāue ki he mahakí, pea fakamatalaʻi ʻa e meʻa ʻoku hoko ʻi he fakatātā takitaha. Fakaafeʻi ʻa e fānaú ke nau tā fakatouʻosi honau ongo nimá ʻi ha laʻi pepa pea kosiʻi. Tuku ke nau tohiʻi honau hingoá ʻi he laʻinima takitaha. Fakaafeʻi ke nau fakapipiki e taha ʻo honau nima pepá ofi ki ha fakatātā ʻoku fakaʻaliʻali ai ha tāpuaki pe ouau naʻa nau maʻu mei he nima ʻo ha tokotaha maʻu lakanga fakataulaʻeikí. Fili ha ngaahi nima siʻisiʻi, pea fakaafeʻi ʻa e fānau ko iá ke nau vahevahe ʻenau ngaahi ongó ki hono tāpuekina mo fakamālohia kinautolu ʻe he lakanga fakataulaʻeikí. Talaange ʻa e talanoa ʻo hono tāpuakiʻi ʻe Sīsū ʻa e fānaú mei he 3 Nīfai 17:11–25. Tuku ha fakatātā ʻo Sīsū mo e fānaú ʻi muʻa ʻi he lokí, pea fakaafeʻi ʻa e tamasiʻi takitaha ke fakapipiki honau nima pepa hono uá ʻo ofi ki he fakatātaá. Fakamatalaʻi ange ʻoku maʻu ʻe he kau maʻu lakanga fakataulaʻeikí ʻa e mafai ke ngāue ʻi he huafa ʻo Sīsū Kalaisí; ʻe lava ke nau tāpuakiʻi kitautolu ʻo hangē pē kapau naʻe ʻi heni ʻa Sīsū.
ʻE tokoniʻi ʻa e fānaú ke nau moʻuiʻaki ʻa e tokāteline ʻoku akoʻí ʻi hono tokoniʻi kinautolu ke nau kau fakamātoato ki he lēsoní.
Uike 4: ʻE lava ke u ʻalu ki he temipalé ʻi heʻeku lahi haké ʻo maʻu ʻa e ngaahi ouau ki heʻeku ngaahi kuí.
Fakamahinoʻi ʻa e tokāteliné mo poupouʻi ke mahinó (tā valivalí): Fakamanatu ki he fānaú ʻoku tau fie maʻu ke maʻu ha ngaahi ouau pau ʻo e lakanga fakataulaʻeikí kimuʻa pea tau lava ke foki ʻo nofo mo ʻetau Tamai Hēvaní. Kole kiate kinautolu ke nau fakahā mai e niʻihi ʻo e ngaahi ouau ko iá. Fakamatalaʻi ange kuo tokolahi e kakai kuo nau pekia ʻoku teʻeki ai ke nau maʻu ʻa e ngaahi ouau ko ʻení, pea ʻoku nau fie maʻu ʻetau tokoní. Talaange ki he fānaú fekauʻaki mo e taha ʻo hoʻo ngaahi kuí naʻe pekia kimuʻa teʻeki ke ne maʻu ʻa e ngaahi ouau ko ʻení. ʻOange ki he tamasiʻi takitaha ha fakatātā ʻo ha taha kuo ʻosi kosikosi mei he pepá. Kole ange ke nau tā kinautolu ʻi he tafaʻaki ʻe taha ʻo e pepá pea mo ha fakatātā ʻo e kui kuo ʻosi pekiá ʻa ia naʻá ke fakahā kiate kinautolú ʻa ia naʻe teʻeki ai ke ne maʻu ʻa e ngaahi ouau ʻo e lakanga fakataulaʻeikí ʻi he tafaʻaki ʻe tahá. (Kapau ʻoku ʻiloʻi ʻe he fānaú ha taha ʻo ʻenau ngaahi kui kuo pekiá ka ʻoku teʻeki ai ke ne maʻu ʻa e ngaahi ouau ʻo e lakanga fakataulaʻeikí, ʻe lava ke nau tā ʻa e tokotaha ko iá.) Tuku ke nau toe lau ʻa e kaveinga ʻo e uike ko ʻení lolotonga ʻenau hiki hake ʻa e tokotaha pepá ʻi muʻa ʻiate kinautolú. Kole ange ke nau fakaʻaliʻali ʻa e fakatātā ʻo kinautolú ʻi heʻenau lea ʻaki ʻa e “Ko aú” pea ko e fakatātā leva ʻo e kuí ʻi he taimi ʻoku nau lea ʻaki ai ʻa e “ngaahi kuí.”