Nōvema
Te u Lava ʻo Fili Ke u Hoko ko ha Faifekau ʻi he Taimí ni
“Pea pehē ʻe ia kiate kinautolu, Mou ʻalu ki māmani kotoa pē, ʻo malanga ʻaki ʻa e ongoongoleleí ki he kakai fulipē” (Maʻake 16:15).
Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻi he uike takitaha ʻa e ngaahi founga ke (1) fakamahinoʻi ʻa e tokāteliné, (2) tokoni ke mahino ia ki he fānaú, pea (3) tokoni ke nau nau moʻui ʻaki. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”
Uike 1: Te u lava ʻo hoko ko ha faifekau ʻi heʻeku tauhi e niʻihi kehé.
Poupouʻi ke mahinó (fakahoko e ngaahi faiva fakatātā): Lau ʻa e Mātiu 25:34–40, pea fakamatalaʻi ko e taimi ʻoku tau tauhi ai e niʻihi kehé ʻoku tau tauhi foki ki he Tamai Hēvaní (vakai, Mōsaia 2:17) pea ʻe ʻomai ʻe he ngāue fakatauhí ʻa e fiefiá mo tokoniʻi kitautolu ke tau lava ʻo toe nofo mo e ʻOtuá. Tuku ki ha niʻihi e fānaú ke nau fakafaivaʻi ʻa e ngaahi ngāue ʻofá, ʻo hangē ko e foaki ʻo e meʻatokoní ki ha tokotaha ʻoku fiekaiá, fakakaumeʻa ki ha tokotaha ʻoku nofo toko tahá, pe ko e ʻaʻahi ki ha tokotaha ʻoku puké. ʻAi e fānau kehé ke nau mateʻi ʻa e meʻa ʻoku hoko ʻi he fakafaivaʻi takitaha. Fakaʻaliʻali ha fakatātā ʻo ha kau faifekau. Fehuʻi ange pe ʻoku tauhi fēfē ʻa e kau faifekaú ki he ʻOtuá. Fakamatalaʻi ange ko e taimi ʻoku tau tokoniʻi ai e niʻihi kehé ʻoku tau hoko foki ko e kau faifekau.
Poupouʻi ke moʻui ʻaki (fakahoko ha vaʻinga): Faʻu ha papa vaʻinga ʻoku ʻi ai ha hala lanu kehekehe ʻe ono ʻoku fakatau ki ha fakatātā ʻo Sīsū. Teuteuʻi ha meʻa vilo ʻoku ʻi ai ha ngaahi konga fakalanu ʻe ono ke fakatauhoa ki he ngaahi lanu ʻi he papa vaʻingá. ʻI he lanu takitaha tohiʻi ʻa e hingoa ʻo ha tokotaha ʻe lava ke tokoniʻi ʻe he fānaú, hangē ko ha mātuʻa, kaungāmeʻa, mo ha kaungāʻapi. Fili ha tamasiʻi ke ne vilohi ʻa e meʻa viló pea talaange ki ai e founga ʻe lava ai ʻo tokoniʻi e tokotaha ʻoku tuhu ki aí. Tuku leva ki he tamasiʻí ke ne ʻunuakiʻi ha fakaʻilonga ki he tapafā hono hokó ʻoku fekauʻaki mo e lanu ʻo e meʻa viló. Toutou fai e meʻa tatau mo e fānau kehé kae ʻoua leva kuo aʻu ʻa e ngaahi fakaʻilonga vaʻingá ki he fakatātā ʻo e Fakamoʻuí. Fakamanatuʻi ki he fānaú ko e taimi ʻoku tau tauhi ai e niʻihi kehé ʻoku tau tauhi ki he ʻOtuá. Hivaʻi ʻa e “ ʻI heʻetau Tokoní” (THF, 108).
ʻOku maʻu atu ʻa e papa vaʻingá mo e meʻa viló ʻi he sharingtime.lds.org
Uike 2: Te u lava ʻo hoko ko ha faifekau ʻi heʻeku tā ha sīpinga lelei.
Fakamahinoʻi ʻa e tokāteliné (vakai ki ha lēsoni fakataumuʻa): Kimuʻa pea kamata ʻa e Palaimelí, langa ha fale ʻaki ha ngaahi poloka, pea ʻufiʻufiʻi ia ke ʻoua naʻa sio ki ai ʻa e fānaú. (Kapau ʻoku ʻikai maʻu ʻa e ngaahi poloká, te ke lava ʻo tā ha fakatātā ʻi he palakipoé pea ʻufiʻufiʻi ʻa e fakatātaá ʻaki ha laʻi pepa.) Fakamatalaʻi ʻa e faʻunga ʻoku fufuuʻí mo e founga naʻá ke langa ai iá. ʻOange leva ki ha niʻihi e fānaú ha ngaahi poloka pea kole kiate kinautolu ke nau feinga ke langa ha faʻunga ʻoku tatau mo ia naʻá ke langá. ʻI he ʻosi ʻenau langá, toʻo e pūlou ʻo e faʻungá, pea fakatokangaʻi hona ngaahi faikehekehé. Kole ki he fānaú ke toe langa hake ʻa e faʻungá lolotonga ʻenau mamata ki hoʻo sīpingá. Fakamatalaʻi ange ʻoku lahi ʻa e ngaahi meʻa ʻoku faingofua ange ʻi he taimi ʻokú ke muimui ai ki ha sīpinga.
Fakaʻaongaʻi lelei ʻa e ngaahi faingamālie ke fakaʻaiʻai ʻa e fānaú ke fakakaukau. ʻOku fakalakalaka ʻa e akó ʻi hono poleʻi honau ʻahiʻahiʻi ʻenau ngaahi fakakaukaú ʻaki ʻa e ngaahi fehuʻi pe tūkunga ʻoku feʻunga mo honau taʻu motuʻá.
Poupouʻi ke mahinó pea moʻui ʻaki (fanongo ki ha ngaahi talanoa mo hivaʻi ha ngaahi hiva): Fakaʻaliʻali ʻa e ngaahi fakatātaá pea fakamatalaʻi nounou ha ngaahi talanoa fakafolofola ʻa ia naʻe hoko ai ʻa e toʻu tupú ko e ngaahi sīpinga leleí (hangē ko ʻení, fakaʻikaiʻi ʻe Taniela mo hono ngaahi kaungāmeʻá ke inu ʻa e uaine ʻa e tuʻí [vakai, Taniela 1:5–16]; Seteleki, Mēsake, mo ʻApetenikō [vakai, Taniela 3:4–29]; mo Taniela ʻi he ʻana ʻo e fanga laioné [vakai, Taniela 6]). Fakaʻaliʻali ha fakatātā ʻo e kau faifekaú, pea fehuʻi ange ki he fānaú pe ʻoku hoko fēfē ʻa e kau faifekaú ko ha ngaahi sīpinga lelei. Fakamatalaʻi ange ko e taimi ʻoku tau tā ai ha sīpinga leleí, ʻoku tau hoko ai ko e kau faifekau koeʻuhí ʻe lava ʻe heʻetau sīpingá ʻo tokoniʻi e niʻihi kehe ʻoku fie ako lahi ange kia Sīsū Kalaisí. Vahevahe ʻo fekauʻaki mo ha ngaahi taimi naʻá ke mamata ai ki he fānau ʻi ho uōtí pe koló ʻoku nau hoko ai ko e ngaahi sīpinga lelei.
Kole ki he fānaú ke hivaʻi ʻa e “Ulo Atu” (THF, 96). Lolotonga ʻenau hivá, tuku ke nau pāpaasi takai he lokí ha foʻi laʻā naʻe ngaohi mei ha laʻi pepa. ʻI he taimi takitaha ʻoku tuʻu ai ʻa e hivá, kole ki he tamasiʻi ʻokú ne pukepuke ʻa e foʻi laʻaá ke ne fakahā ʻa e founga ke ne hoko ai ko ha sīpinga leleí (hangē ko ʻení, ʻaki ʻene angaʻofá, tala ʻa e moʻoní, pe fakaafeʻi hono ngaahi kaungāmeʻá ki he Palaimelí).
Fakaafeʻi ʻa e fānaú takitaha ke nau faʻu haʻanau foʻi laʻā pepa pē ʻanautolu pea tohiʻi ai “Te u Lava ʻo Hoko ko ha Sīpinga Ngingila.” Tuku ke hiki hake ʻe he fānaú ʻenau ngaahi foʻi laʻaá lolotonga ʻenau hivaʻi ʻa e “Ko ha Foʻi Fetuʻu Au” (THF, 84), “Fie maʻu Au ʻe Sīsū Ke u Ulo Hangē ko ha Hueló” (THF, 38–39), pe “Ulo Atu” (THF, 96).
Uike 3: Te u lava ʻo akoʻi hoku ngaahi kaumeʻá fekauʻaki mo Sīsū Kalaisi mo Hono Siasí.
Fakamahinoʻi ʻa e tokāteliné (vakai ki ha meʻa ʻoku fakatātaaʻi): Lulululu mo ha tokotaha pe tokolahi ange ʻo e fānaú pea tau pehē pē ko hoʻo fakaafeʻi kinautolu ke nau haʻu ki he Palaimelí mo ako kia Sīsū. Fakahinohino kinautolu ʻoku nau maʻu ha fakaafé ke nau fakaafeʻi ha niʻihi kehe kae ʻoua leva kuo fakaafeʻi ʻa e fānaú kotoa. Fakamatalaʻi ʻoku fie maʻu ʻe he ʻEikí ke tau hoko kotoa pē ko e kau faifekau ʻaki ʻetau akoʻi hotau ngaahi kaungāmeʻá ʻo kau kia Sīsū Kalaisi mo Hono Siasí.
Poupouʻi ke mahinó (fanongo ki ha talanoa): Vahevahe ʻa e talanoa naʻe fai ʻe Palesiteni Sipenisā W. Kimipolo ki ha tamasiʻi Palaimeli naʻe hoko ko ha faifekau lelei: Naʻe fehuʻi ʻe ha tangata ʻi ha lēlue ki he tamasiʻí fekau ʻaki mo e Siasi Māmongá. Naʻe lau maʻuloto ʻe he tamasiʻí ʻa e kotoa ʻo e Ngaahi Tefito ʻo e Tuí. Naʻe fuʻu ongoʻi moʻoni ʻe he tangatá naʻe ʻiloʻi ʻe he talavou ko ʻení ʻa e meʻa naʻá ne tui ki aí ko ia ai naʻá ne ʻalu ki Sōleki Siti ke ako lahi ange ki he Siasí (vakai, Conference Report, Oct. 1975, 117–19; pe Ensign, Nov. 1975, 77–79). Fakamatalaʻi ange ʻe lava ʻe heʻetau ako ʻa e Ngaahi Tefito ʻo e Tuí ʻo tokoniʻi kitautolu ke tau hoko ko e kau faifekau ʻi he taimí ni.
Poupouʻi ke moʻui ʻaki (toe vakaiʻi ʻa e Ngaahi Tefito ʻo e Tuí): Teuteuʻi ha ngaahi laʻi pepa ʻe 13 pea fakafika takitaha kinautolu mei he 1 ki he 13. Vahevahe ʻa e fānaú ki he ngaahi kulupu. Tuku ki he kulupu takitaha ke ne fili ha laʻi pepa pea ngāue fakataha ke ako ʻa e tefito ʻo e tui ʻoku fekauʻaki mo e fika ko iá. ʻI he maau ʻa e kulupu takitahá, ʻai ke nau lau ki he fānau kehé pea toʻo hake leva ha laʻi pepa ʻe taha. Hokohoko atu ʻo ka feʻunga e taimí.
Uike 4: Te u lava ʻo teuteu he taimí ni ke ngāue fakafaifekau taimi kakato.
Fakamahinoʻi ʻa e tokāteliné (vakai ki he ngaahi meʻa ʻoku fekauʻaki mo e ngāue fakafaifekaú): Teuteuʻi ha kiʻi kato pe katoleta siʻisiʻi ʻoku faʻo ai ʻa e ngaahi meʻa ʻoku ngāue ʻaki ʻe he kau faifekau ngāue taimi kakató, hangē ko e sū Sāpaté, ko ha hēkesi, mo e ngaahi folofolá. Fakaafeʻi e niʻihi e fānaú ke toʻo ʻa e ngaahi meʻá ni mei he kató pea fakaʻaliʻali kinautolu ki he toenga ʻo e fānaú. Fehuʻi ange ki he fānaú ʻa e ʻuhinga ʻoku ʻikai ngata ʻa e mateuteu ke hoko ko ha faifekaú ʻi he ngaahi meʻa ʻataʻatā pē ko ʻení. Lau ʻa e Tokāteline mo e Ngaahi Fuakava 84:62, pea fakaafeʻi ʻa e fānaú ke nau fakafanongo ki ha toe meʻa ʻe taha ʻoku fie maʻu ʻe he faifekau kotoa pē (ko e fakamoʻoní). Fakamoʻoni ki he mahuʻinga ʻo e maʻu ʻo ha fakamoʻoni fakatāutahá.
Palaniʻi ha ngaahi founga ke maʻu ai ʻa e tokanga ʻa e fānaú ʻi he kamataʻanga ʻo ha ʻekitivitī. Hangē ko ʻení, ʻi he ʻekitivitī ko ʻení ʻe tokanga ʻa e fānaú ʻi heʻenau ʻamanaki atu pe ko e hā ʻe toʻo hake mei he kató.
Poupouʻi ke mahinó (vakai ki he ngaahi fakatātaá mo tali ʻa e ngaahi fehuʻí): Tokoniʻi ʻa e fānaú ke maʻu ʻa e mahino ki he ngaahi konga mahuʻinga ʻo ha fakamoʻoni. Fakaʻaliʻali ʻa e ngaahi fakatātā ʻoku nau fakafofongaʻi ʻa e ngaahi konga ko iá (hangē ko ʻení, ʻoku ʻofa ʻa e Tamai Hēvaní ʻiate kitautolu, ko hotau Fakamoʻuí ʻa Sīsū Kalaisi, ko Siosefa Sāmitá ko ha palōfita, Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e Siasi moʻoni ia ʻo e ʻEikí, pea ʻoku tataki kitautolu ʻe ha palōfita moʻui). Fai ha ngaahi fehuʻi fekauʻaki mo e fakatātā takitaha, hangē ko ʻení: Ko e hā pe ko hai ʻeni? Ko e hā ʻa e meʻa ʻokú ke ʻiloʻi ki hení? Te ke lava fēfē ʻo fakamālohia hoʻo fakamoʻoni ki hení? Kole ki he fānaú ke nau fakahingoa ʻa e kakai te nau lava ke vahevahe ki ai ʻenau fakamoʻoní. Fakamoʻoniʻi ko e taimi ʻoku vahevahe ai ʻe he fānaú ʻa e meʻa ʻoku nau ʻiloʻí mo e niʻihi kehé, ʻe tupulaki ʻenau ngaahi fakamoʻoní pea te nau teuteu atu ke ngāue fakafaifekau.