Sune

ʻOku ou Fili ki he Totonú ʻi Heʻeku Moʻuiʻaki e Ngaahi Tefitoʻi Moʻoni ʻo e Ongoongoleleí

“Te u ʻalu ʻo fai ʻa e ngaahi meʻa kuo fekau ʻe he ʻEikí, he ʻoku ou ʻilo ʻoku ʻikai tuku mai ʻe he ʻEikí ha fekau ki he fānau ʻa e tangatá kae ʻikai te ne teuteu ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú” (1 Nīfai 3:7).

Hiva: “Loto-toʻa ʻa Nīfaí”

(THF, 64–65)

Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻi he uike takitaha ʻa e ngaahi founga ke (1) fakamahinoʻi ʻa e tokāteliné, (2) tokoni ke mahino ia ki he fānaú, pea (3) tokoni ke nau moʻui ʻaki. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”

Uike 1: ʻOku ou lotua ki he Tamai Hēvaní ki ha mālohi ke u fai ʻa e meʻa ʻoku totonú.

Poupouʻi ke mahinó (aleaʻi ʻa e lotú): Fakaʻaliʻali ki he fānaú ha telefoni pe ko ha toe nāunau fetuʻutaki. Aleaʻi ʻa e anga hono ngāue ʻakí. Fehuʻi ki he fānaú ʻa e founga ʻoku tau lava ʻo fetuʻutaki ai mo e Tamai Hēvaní. Fakamatalaʻi ange hangē pē ko ʻetau lomiʻi ha fika ʻo talanoa ki ha taha ʻi he telefoní, te tau lava ʻo lotu ke fetuʻutaki ki he Tamai Hēvaní; te tau lava ʻo kole kiate Ia ha mālohi ke fai ʻa e meʻa ʻoku totonú. ʻOange ki he kalasí takitaha ha fakatātā ʻo ha faʻahinga kehekehe ʻo e lotú (hangē ko ʻení, lotu fakataautahá, lotu fakafāmilí, tāpuakiʻi ʻo e meʻa tokoní, pe ko e lotu ʻi he kalasí). Kole ki he kalasí takitaha ke fakaʻaliʻali ʻenau fakatātaá ki he fānau kehé pea talaange ʻa e faʻahinga lotu ʻoku fakaʻaliʻalí mo e taimi, feituʻu, mo e ʻuhinga ʻoku fai ai ʻa e faʻahinga lotu ko ʻení.

Poupouʻi ke moʻui ʻaki (fakahoko ha vaʻinga): Fakaava siʻisiʻi ʻa e takele ʻo ha ongo ngeʻesi kapa, pea fakafehokotaki e ongo kapá ʻaki e tuaine. Fusiʻi e tuainé ke mafao, pea tuku e fānaú ke taufetongi ʻenau lea ki he loto kapa ʻe taha, ʻaki ha meʻa te nau lava ʻo lotua ki he Tamai Hēvaní ʻi heʻenau feinga ke fai ʻa e meʻa ʻoku totonú (hangē ko ʻení, ke lea ʻaki e moʻoní, ke loto ʻapasia, pe ko e angaʻofá). Tuku ki ha tamasiʻi ʻe taha ke ne fakaongo ʻi he kapa ʻe tahá. Vahevahe ha meʻa naʻá ke aʻusia (pe kole ki ha tamasiʻi ke ne vahevahe) ʻi ha taimi naʻe ʻoatu ai ʻe he Tamai Hēvaní ha mālohi ke fai ʻa e meʻa ʻoku totonú. Fakamoʻoniʻi ʻoku fanongo mo tali ʻe he Tamai Hēvaní ʻetau ngaahi lotú pea te Ne ʻomai kiate kitautolu ʻa e mālohi ke fai ʻa e meʻa ʻoku totonú.

Uike 2: ʻE tāpuekina au ʻe he Tamai Hēvaní ʻi heʻeku totongi vahehongofulú.

Fakamahinoʻi ʻa e tokāteliné mo poupouʻi ke mahinó (vakai ki ha meʻa ʻoku fakatātaaʻi): Fakamatalaʻi ko e vahehongofulú ko e ʻoange ʻa e vahehongofulu ʻe taha ʻo e paʻanga ʻokú ke maʻú ki he ʻEikí ʻo fakafou ʻi Hono Siasí. Fakaʻaliʻali ki he fānaú ha silini maka ʻe 10. Fehuʻi ange pe ko e sēniti ʻe fiha ʻoku totonu ke nau ngāue ʻaki ke totongi e vahehongofulú. Fakaʻaliʻali ha sila vahehongofulu mo ha laʻi pepa foaki, pea fakamatalaʻi ʻoku tau totongi ʻa e vahehongofulú ʻaki ʻetau fakafonu ʻa e laʻi pepa foakí, faʻo ia ki he silá mo ʻetau vahehongofulú, pea ʻoange ia ki he pīsopé pe ko ha taha ʻo hono ongo tokoní.

Poupouʻi ke moʻui ʻaki (fakahoko ha vaʻinga mo fanongo ki he ngaahi fakamoʻoní): Fakaʻaliʻali e ngaahi fakatātā mo e ngaahi meʻa ʻoku nau fakafofongaʻi e ngaahi tāpuaki ʻoku maʻu mei hono totongi e vahehongofulú, hangē ko e ngaahi temipalé, ngaahi fale fakatahaʻangá, ko ha tohi himi, ko e Tohi Hiva ʻa e Fānaú, ko ha tohi lēsoni Palaimeli, mo e ngaahi folofolá. Fakahā ange ki he fānaú ʻoku lava ʻe he Siasí ʻo ʻomai e ngaahi meʻá ni koeʻuhí ko e paʻanga vahehongofulú. ʻUfiʻufiʻi ʻa e ngaahi fakatātaá mo e ngaahi meʻa naʻe fakaʻaliʻalí. Toʻo ha meʻa ʻe taha pe ua. Toʻo ʻa e ʻufiʻufí pea fehuʻi ange ki he fānaú ke nau mateʻi mai ʻa e meʻa ʻoku puliá. Toutou fai e meʻa tatau. Fakamatalaʻi ʻoku ʻi ai ha ngaahi tāpuaki kehe ʻoku maʻu mei hono totongi e vahehongofulú ka ʻoku ʻikai ke tau lava ʻo mamata ki ai (vakai, 3 Nīfai 24:10). Tuku ki ha toko taha pe toko ua lalahi ke fakahā ʻa e ngaahi tāpuaki kuo nau maʻu mei hono totongi e vahehongofulú.

Uike 3: ʻOku ou talangofua ki he Lea ʻo e Potó ʻaki ʻeku kai mo inu ʻa e meʻa ʻoku leleí pea fakaʻehiʻehi mei he meʻa ʻoku koví.

Poupouʻi ke mahinó (lau ʻa e ngaahi folofolá mo fakahoko ha vaʻinga): Lau fakataha ʻa e 1 Kolinitō 3:16–17. Fakaafeʻi ʻa e fānaú ke vahevahe ʻa e ʻuhinga ʻo e folofola ko ʻení kiate kinautolú. Fakamatalaʻi ʻoku fie maʻu ʻe he Tamai Hēvaní ke tau tokangaʻi hotau ngaahi sinó. Faʻo ʻi ha hina ʻa e ngaahi fakatātā ʻo e meʻa tokoni kehekehe, inu, mo e ngaahi meʻa kehe ʻoku lelei pe kovi ki he sinó (hangē ko e fuaʻiʻakaú, vesitapoló, maá, kava mālohí, mo e tapaká). Faitaaʻi ha tatau ʻo e peesi 43 ʻo e tohi lēsoni nesilií, pea kosikosi ia ki ha ngaahi kongokonga pāsolo. Tuku ke taufetongi ʻa e fānaú ʻi hono toʻo ʻa e ngaahi fakatātaá mei he hiná. Kapau ko e meʻa ʻi he fakatātaá ʻoku lelei maʻatautolu, tuku ke fokotuʻu ʻe ha tamasiʻi ha konga pāsolo ki he palakipoé. Kapau ko e meʻá ʻoku kovi, toʻo ha konga pāsolo. Hokohoko atu e vaʻingá kae ʻoua leva kuo kakato ʻa e pāsoló (ʻe fie maʻu ke lahi ange ʻa e ngaahi meʻa lelei ʻi he hiná ʻi he ngaahi meʻa ʻoku koví). Kole ki ha tokotaha lahi pe tamasiʻi ke ne vahevahe e niʻihi e ngaahi tāpuaki naʻá ne maʻu koeʻuhí ko ʻene talangofua ki he Lea ʻo e Potó (vakai, T&F 89:18–21).

Uike 4: ʻOku ou fakaʻapaʻapaʻi hoku sinó ko ha meʻafoaki mei he ʻOtuá, ʻi he taimi ʻoku ou vala taau mo feʻunga aí.

Fakamahinoʻi ʻa e tokāteliné (vakai ki ha fakatātā mo lau e ngaahi folofolá): Tohiʻi ʻa e ngaahi meʻá ni ʻi he palakipoé: “Ko hoku ko ha .” Fakaʻaliʻali ha fakatātā ʻo ha temipale. Fehuʻi ange, “Ko e hā nai ʻoku makehe ai ʻa e ngaahi temipalé?” Tuku ki he fānaú ke nau huke ki he 1 Kolinitō 6:19. Kole ange ke nau vakai pe ko e hā e meʻa ʻoku fakahā mai fekau ʻaki mo hotau ngaahi sinó ʻi heʻenau lau leʻo lahi fakataha mo koe ʻa e folofolá. Fehuʻi ange ki he fānaú ʻa e ngaahi lea te ne fakakakato e sētesi ʻi he palakipoé (sino, temipale). Fakaafeʻi ʻa e fānaú ke nau tuʻu ʻo lau fakataha ʻa e sētesí.

Poupouʻi ke mahino pea moʻui ʻaki (hivaʻi ha foʻi hiva mo fealeaʻaki): Talaange ki he fānaú ko hotau ngaahi sinó ko e ngaahi temipale ia ʻoku lava ʻo nofo ai ʻa e Laumālie Māʻoniʻoní. Hivaʻi ʻa e kupu ʻuluaki ʻo e “Ko Hoku Temipale Mei he ʻEikí” (THF, 73). Fakaafeʻi ʻa e fānaú ke vahevahe ʻa e vala ʻoku finangalo ʻa e Tamai Hēvaní ke tau tuí mo hono ʻuhingá. Fakamatala ange kuo akonakiʻi maʻu pē ʻe he kau palōfita ʻa e ʻOtuá ʻEne fānaú ke nau vala taau mo feʻunga. Fakaafeʻi ʻa e fānaú ke fakafanongo ki he ngaahi konga ʻo honau sinó ʻoku totonu ke kofukofuʻí lolotonga hoʻo lau ʻa e konga ko e “Teungá mo e Fōtungá” ʻi he Ki Hono Fakamālohia ʻo e Toʻu Tupú. Kole ki he fānaú ke nau fakakaukau ki ha founga ʻe taha te nau lava ʻo vala taau mo feʻunga aí. Lī ha meʻa molū ki ha tamasiʻi pea fakaafeʻi ʻa e tamasiʻi ko iá ke ne vahevahe ʻene fakakaukaú. Kole ki he tamasiʻi ko iá ke ne lī ʻa e meʻa ko iá ki ha tamasiʻi ʻe taha, ʻa ia te ne vahevahe ʻene fakakaukaú. Hoko atu mo e fānau kehé.