Siulai
ʻOku ou Fili ki he Totonú ʻi Heʻeku Moʻuiʻaki ʻa e Ngaahi Tefitoʻi Moʻoni ʻo e Ongoongoleleí
“Ko ia, tau tui faivelenga muʻa ʻi hono tauhi ʻo e ngaahi fekau ʻa e ʻEikí” (1 Nīfai 3:16).
Hiva: “Ko e Tangata Potó mo e Tangata Valé”
(THF, 132) pe fili pē ʻe koe ha hiva mei he Tohi Hiva ʻa e Fānaú
Fakalahiʻaki e ngaahi fakakaukau ʻoku ʻoatú ʻa hoʻo ngaahi fakakaukau pē ʻaʻaú. Palani ʻi he uike takitaha ʻa e ngaahi founga ke (1) fakamahinoʻi ʻa e tokāteliné, (2) tokoni ke mahino ia ki he fānaú, pea (3) tokoni ke nau moʻui ʻaki. Fehuʻi pē kiate koe, “Ko e hā ʻa e meʻa ʻe fai ʻe he fānaú ke nau ako aí, pea ʻe anga fēfē ʻeku lava ʻo tokoniʻi kinautolu ke nau ongoʻi ʻa e Laumālié?”
Uike 1: ʻE lava ʻe he ʻaukaí mo e lotú ʻo fakamālohia ʻeku fakamoʻoní.
Fakamahinoʻi ʻa e tokāteliné (vakai ki ha lēsoni fakataumuʻa): Teuteuʻi ha kaati lea ʻe ua: ʻAukaí mo e Lotú. Fakaafeʻi ha ongo tamaiki ke na tuʻu vāofi fakataha, pea ʻoange ki he tamasiʻi takitaha ha kaati lea. Fekau ha tamasiʻi ʻe taha ke lue ʻi hona vahaʻá. Kole ki he fuofua ongo tamaikí ke fepiki maʻu hona ongo nimá, pea kole ki he tamasiʻi ʻe tahá ke ne feinga ke toe lue ʻi hona vahaʻá. Fakahā ange ʻa e toe mālohi ange ʻa e ongo tamaikí ʻi he fepiki maʻu fakataha hona ongo nimá. Fakamatalaʻi ange ʻoku toe mālohi ange ʻa e ʻaukaí mo e lotú ʻi heʻetau fakaʻaongaʻi fakataha kinauá. Tohiʻi ʻeni ʻi he palakipoé pea tuku ki he fānaú ke nau lau fakataha ia, “ ʻE lava ʻe he ʻaukaí mo e lotu ʻo fakamālohia ʻeku fakamoʻoní.”
ʻOku maʻu atu ʻa e kaati leá ʻi he sharingtime.lds.org
Poupouʻi ke mahinó (fanongo ki he ngaahi folofolá mo kau atu ki ha lēsoni fakataumuʻa): Kole ki he fānaú ke nau fakafanongo ki he ngaahi meʻa naʻe fai ʻe he ngaahi foha ʻo Mōsaiá ke nau hoko ʻo mālohi ʻi he ongoongoleleí ʻi hoʻo lau ʻa ʻAlamā 17:2–3. Fakaafeʻi ʻa e fānaú ke fakafefeka honau ngaahi uouá ʻi he taimi kotoa pē ʻoku nau fanongo ki ha meʻa naʻá ne tokoniʻi ʻa e ngaahi foha ʻo Mōsaiá ke nau hoko ʻo mālohí.
Tataki ha fealeaʻaki ʻi he ʻaukaí ʻaki hoʻo fai e ngaahi fehuʻi hangē ko ʻení “Ko e hā ʻa e ʻaukaí?” “Ko e hā ʻoku totonu ke tau ʻaukai aí?” “Ko e fē ʻa e taimi ʻoku totonu ke tau ʻaukai aí?” mo e “Ko e hā e ʻuhinga ʻoku totonu ke tau lotu ai ʻi he taimi ʻoku tau ʻaukai aí?” (vakai, Joseph B. Wirthlin, “Ko e Fono ʻo e ʻAukaí,” Liahona, Siulai 2001, 88–91). Tuku ki he tamasiʻi kotoa pē ʻokú ne tānaki ki he fealeaʻakí ke ne pukepuke ha muiʻi kulasi pe tuaine. Pukepuke leva ʻa e mui ʻe taha ʻo e kulasí pe tuainé ʻi ho nimá. ʻI he ʻosi ʻa e fealeaʻakí, kole ki he fānau ʻoku nau pukepuke ʻa e ngaahi tuainé ke nau haʻu ki lotomālie mo vilohi fakataha ʻenau ngaahi tuainé ʻo ngaohi ai ha maea mālohi. Fakamatalaʻi ange ko e tuaine takitaha ʻoku tau tānaki ki he maeá ʻokú ne toe fakamālohi ange ai ʻa e maeá. Tokoni ke mahino ki he fānaú ʻoku tatau pē ʻeni mo e taimi kotoa pē ʻoku tau ʻaukai mo lotu aí ʻoku tau tānaki ha mālohi ki heʻetau fakamoʻoní.
ʻOku tokoni ʻa e ngaahi meʻa ʻoku fakatātaaʻi fekauʻaki mo e sió, ke mahino ki he fānaú ʻa e ngaahi fakakaukaú.
Uike 2: Ko e angaʻofá ko e fai e ngāue mo e lea lelei ki he niʻihi kehé.
Fakamahinoʻi ʻa e tokāteliné (lau maʻuloto ʻo ha folofola): Tohiʻi ʻeni ʻi he palakipoé, “Kae feangaleleiʻaki ʻa kimoutolu kiate kimoutolu” (ʻEfesō 4:32) pea tohiʻi ʻi lalo ʻi he lea takitaha ʻa e fika 1 ki he 6. Kamataʻaki hoʻo fokotuʻu ʻa e 1 kotoa pē ʻo pehē, “Kae” pea nau tangutu hifo fakavavevave. Fokotuʻu hake leva e kau 2 ʻo pehē “feangaleleiʻaki,” pea nau tangutu hifo fakavavevave. Hokohoko pehē ai pē ki he toenga ʻo e kupuʻi leá. Toutou fai ia. Fekau leva ki he fānaú kotoa ke toe lau fakataha ʻa e kupuʻi leá.
Poupouʻi ke mahinó (fanongo ki ha talanoa mo hivaʻi ha foʻi hiva): Talaange ki he fānaú ha talanoa fekauʻaki mo e angaʻofá, hangē “Ko hono Maluʻi ʻo Kēlepí” (Liahona, Māʻasi 2009, K8–K9). Kole ange ke nau hiki fakatouʻosi honau ongo motuʻa tuhú ʻi he taimi ʻoku nau fanongo ai ki ha ngāue angaʻofa ʻi he talanoá pea fakahanga ki lalo fakatouʻosi honau ongo motuʻa tuhú ʻi he taimi ʻoku nau fanongo ai ki ha ngāue taʻeʻofa. Hivaʻi ʻa e “Ko e Anga-ʻofá ʻe Kamata ʻIate Au” (THF, 83). Kole ki he fānaú ke nau tuʻu hake ʻi he taimi ʻoku nau hivaʻi ai pe ko hai ʻoku totonu ke tau angaʻofa ki aí. Toe hivaʻi ʻa e foʻi hivá, pea fekau ke nau tuhu pē kiate kinautolu ʻaki honau ongo motuʻa tuhú ʻi he taimi ʻoku nau hivaʻi ai ʻa e, “Ke u kamata ʻa e anga ʻofá.”
ʻE maʻu ʻa e tokanga ʻa e fānaú ʻi hono fakaʻaongaʻi ʻo e ngaahi meʻa ʻoku fakatātaaʻi fekauʻaki mo e sió pea ʻe toe tokoni ke pukepuke e tokanga ʻa e fānau kehé.
Poupouʻi ke moʻui ʻaki (vahevahe e ngaahi founga ʻo e angaʻofá): Fakaʻilongaʻi e kakai tokolahi ʻi he moʻui ʻa e fānaú (hangē ko e tamai, faʻē, tuofefine, tuongaʻane, kui, kaungāmeʻa, pe faiako) ʻaki ha kaati lea, fakatātā, pe ko ha meʻa kehe (hangē ko ha hēkesi ki he tamaí pe ko ha tokotoko ki he kuí). ʻOange ʻa e ngaahi meʻa ko ʻení ki he niʻihi pē ʻo e fānaú, pea fakaafeʻi kinautolu ke nau omi ki muʻa ʻi he lokí. Kole ki he tamasiʻi takitaha ke ne vahevahe ha meʻa lelei te ne lava ʻo leaʻaki pe fai maʻá e tokotaha ʻoku fakafofonga ʻe he meʻa ʻoku nau maʻú. Fekau leva ke nau paasi ʻenau kaati leá, ngaahi fakatātaá, pe nāunau kehé ki he fānau kehé. Toutou fakahoko ʻeni ʻo ka feʻunga e taimí.
Uike 3: Ko e loto ʻapasiá ʻa e fakaʻapaʻapa moʻoní mo e ʻofa ki he ʻOtuá.
Fakamahinoʻi ʻa e tokāteliné (hivaʻi ha foʻi hiva): Teuteuʻi ha ngaahi kahoa kula pea fakapipiki takitaha ki ai ha pepa ʻi he fōtunga ʻo e mafú. Tohiʻi ha foʻi lea pe kupuʻi lea mei he “ ʻApasia ko e ʻOfá” (THF, 12) ʻi he mafu takitaha (hangē ko ʻení, nofo maʻu, manatua, ongoʻi, mo e hā fua). Fakaafeʻi ha fānau ke nau tui ʻa e ngaahi kahoa kulá. Hivaʻi ʻa e “ ʻApasia ko e ʻOfá,” pea kole ange ki he fānau ʻoku tui kahoa kulá ke nau luelue ki muʻa ʻi hono hivaʻi ʻa e foʻi lea ʻi honau mafú. Fakaafeʻi ʻa e fānau ʻoku tui kahoa kulá ke nau tuʻu fakahokohoko, pea toe hivaʻi ʻa e foʻi hivá.
ʻOku maʻu atu ʻa e ngaahi foʻi hātí ʻi he sharingtime.lds.org
Poupouʻi ke moʻui ʻaki (aleaʻi ʻa e loto ʻapasiá): Teuteuʻi ha ngaahi kaati lea pe tā e ngaahi fakatātā ʻo e matá, nimá, vaʻé, telingá, ngutú, mo e ʻatamaí. Vahevahe ʻa e fānaú ki he ngaahi kulupu, pea tuku e kulupu takitaha ke nau fili ha kaati lea pe fakatātā ʻe taha pe ua. Tuku ki he kulupu takitaha ke nau vahevahe (ʻi he lea mo e fakatātā) ʻa e ngaahi founga ʻe lava ai e konga ko ʻeni e sinó ʻo loto ʻapasia ʻaki hano fakahā e fakaʻapaʻapá mo e ʻofa ki he ʻOtuá.
ʻOku maʻu atu ʻa e ngaahi fakatātaá ʻi he sharingtime.lds.org
Uike 4: Ko e faitotonú ʻa e tala ʻo e moʻoní neongo ʻa e ngaahi nunuʻá.
Poupouʻi ke mahinó (aleaʻi ʻa e ngaahi nunuʻá): Teuteuʻi ha ngaahi fakatātā ke ako mei ai (vakai, IUMF, 198–199) ʻa ia ʻoku fehangahangai e fānaú mo ha fili ke faitotonu pe taʻefaitotonu. Hangē ko ʻení, “ ʻOkú ke taaʻi ho tuongaʻané, pea fehuʻi atu ʻe hoʻo faʻeé ʻa e ʻuhinga ʻoku tangi aí.” Fehuʻi ange, “Ko e hā e ngaahi ola ʻo e faitotonú?” Fehuʻi leva, “Ko e hā e ngaahi nunuʻa ʻo e taʻefaitotonú?” Tokoniʻi ʻa e fānaú ke nau ʻiloʻi ʻe malava pē ke faingataʻa ʻa e ngaahi ola vave ʻo e faitotonú ka ʻoku tākiekina ʻa e ngaahi ola taimi lōloá ki he melinó mo e fiefiá.
Poupouʻi ke moʻui ʻaki (faʻu ha maau): Fakaafeʻi ʻa e kalasi takitaha (ʻaki e tokoni ʻenau kau faiakó) ke nau faʻu ha kupuʻi lea laine ʻe taha pe ko ha maau fekauʻaki mo e faitotonú. Hangē ko ʻení, “Kapau te u tala ʻa e moʻoní, ʻe ʻikai pe te u tō ha taimí!” Fakaafeʻi ʻa e kalasi takitaha ke vahevahe ʻenau kupuʻi leá mo e fānau kehé. Poupouʻi ke nau lau ʻa e kupuʻi leá ʻi he taimi ʻoku ʻahiʻahiʻi ai kinautolu ke nau taʻefaitotonú.