3 Nephi 11:12–17

“Lumapit sa Akin”

Matapos ipakilala bilang Pinakamamahal na anak ng Ama sa Langit, inanyayahan ni Jesucristo ang mga tao na personal na saksihan na Siya ay pinatay para sa mga kasalanan ng sanlibutan. Isa-isa silang lumapit sa Kanya at hinipo ang sugat sa Kanyang tagiliran at ang mga bakas ng pako sa Kanyang mga kamay at paa. Ang lesson na ito ay makatutulong sa iyo na matamo o mapalakas ang iyong patotoo na si Jesucristo ay nagdusa at namatay para sa iyo.

Pagtulong sa mga estudyante na mailarawan sa isipan ang nabasa nila. Kapag may nakikitang larawan ang mga estudyante tungkol sa mga pangyayari at ideya sa banal na kasulatan, mas malamang na maalaala nila ang mga ito. Bukod pa sa paggamit ng mga video, larawan, at iba pang media, maaari mong hikayatin ang mga estudyante na ilarawan sa isipan ang mahahalagang pangyayari at kung ano ang pakiramdam kung naroon sila. Maaanyayahan nito ang Espiritu Santo sa kanilang pag-aaral at matutulungan ang mga estudyante na madama ang katotohanan at kahalagahan ng natututuhan nila.

Paghahanda ng estudyante: Sabihin sa mga estudyante na basahin ang 3 Nephi 11:12–17 at isipin kung ano kaya ang madarama nila sa personal na pakikipag-ugnayang ito kay Jesucristo.

Mga Posibleng Aktibidad sa Pag-aaral

Alagaan ang iyong patotoo

Isipin kung paano naaangkop sa iyo ang sumusunod na paanyaya ni Pangulong Russell M. Nelson.

Nakikiusap ako na alagaan ninyo ang inyong patotoo. Pagsikapan ito. Angkinin ito. Pangalagaan ito. Pagyamanin ito para lumago ito. Busugin ito ng katotohanan. Huwag itong dungisan ng mga maling pilosopiya ng mga lalaki at babaeng walang pananalig at pagkatapos ay magtaka kung bakit humihina ang inyong patotoo. (Russell M. Nelson, “Mga Pagpiling May Epekto sa Kawalang-Hanggan”” [pandaigdigang debosyonal para sa mga young adult, Mayo 15, 2022], ChurchofJesusChrist.org)

• Sa iyong palagay, bakit mahalaga para sa bawat tao na “alagaan” ang kanilang patotoo?

Ang isa sa pinakamahahalagang katotohanan na maaari nating patotohanan ay si Jesucristo ang Anak ng Diyos at ang Tagapagligtas ng sanlibutan. Pag-isipan kung bakit kailangang malaman ito ng mga tao tungkol sa Kanya. Maaari mong pag-aralan ang Juan 14:6 at Mosias 3:17 para matulungan kang makita ang ilan sa mga dahilang ito.

Ibahagi ang sumusunod upang matulungan ang mga estudyante na masuri ang kanilang damdamin at patotoo tungkol kay Jesucristo. Ipakita ang mga tanong at bigyan ang mga estudyante ng oras upang maisulat ang kanilang mga sagot sa kanilang study journal.

• Nadarama mo ba na mayroon kang patotoo tungkol kay Jesucristo bilang Anak ng Diyos at Tagapagligtas ng sanlibutan?

• Ano ang nakatulong sa iyo para madama ang ganito tungkol sa Tagapagligtas?

Pag-aaralan mo ngayon ang isang sagradong pakikipag-ugnayan ni Jesucristo sa mga Nephita. Habang nag-aaral ka, isipin kung ano ang magagawa mo para matamo o mapalakas ang iyong patotoo tungkol kay Jesucristo.

Inanyayahan ni Jesucristo ang mga Nephita na hipuin ang mga bakas ng Kanyang sugat

Kung kinakailangan, sabihin sa mga estudyante na rebyuhin ang natutuhan nila noon sa pamamagitan ng pagpapabuod sa kanila ng mga pangyayari sa 3 Nephi 11:1–11.

Alalahanin na habang nagtitipon ang isang grupo ng mga Nephita sa lupain ng Masagana, ang Nabuhay na Mag-uling Panginoon ay bumaba mula sa langit. Ipinahayag Niya na Siya si Jesucristo at niluwalhati Niya ang Ama sa pamamagitan ng pagdurusa para sa mga kasalanan ng sanlibutan (tingnan sa 3 Nephi 11:1–11). Ang maraming tao ay binubuo ng kalalakihan, kababaihan, at mga bata, na may bilang na mga 2,500 katao (tingnan sa 3 Nephi 17:25).

Basahin ang 3 Nephi 11:12–15, at alamin ang unang paanyaya ng Nabuhay na Mag-uling Panginoon sa mga tao. Maaari mo ring panoorin ang “Nagpakita si Jesucristo sa Lumang Amerika,” na matatagpuan sa ChurchofJesusChrist.org, mula sa time code na 13:29 hanggang 16:03.

Habang nag-aaral ka, sikaping ilarawan sa isipan ang iyong sarili na kabilang sa maraming tao. Ang paglalarawan sa isipan ng mga pangyayari o ideya mula sa mga banal na kasulatan ay makapag-aanyaya sa Espiritu Santo sa iyong pag-aaral. Isulat ang anumang maiisip o madarama mo habang ikaw ay nag-aaral, nagninilay-nilay, at naglalarawan sa isipan.

Bigyan ng sapat na oras ang mga estudyante na mag-aral, maglarawan sa isipan, at magsulat ng mga naisip nila. Ang mga tanong na tulad ng mga sumusunod ay makatutulong sa mga estudyante na magtagumpay sa paglalarawan sa isipan:

• Habang iniisip mo ang iyong sarili sa templo sa Masagana, paano mo inilalarawan ang iyong kapaligiran habang naririnig mo ang tinig ni Jesucristo na nagsasabing, “Lumapit sa akin”? (3 Nephi 11:14).

• Ano ang nakikita mong ekspresyon sa mukha ng Tagapagligtas habang sinusuri mo ang mga bakas ng pako sa kanyang mga kamay at paa?

• Sa iyong palagay, ano ang nadama ng mga tao nang makita nila ang Tagapagligtas at nakisalamuha sila sa Kanya nang “isa-isa”? (3 Nephi 11:15).

• Anong mga bahagi ng salaysay na ito ang pinili mong ilarawan sa isipan? Ano ang ilan sa mga naiisip at nadarama mo nang gawin mo ito?

• Ano ang itinuturo sa iyo ng mga talatang ito tungkol sa hangarin ng Tagapagligtas para sa bawat isa sa atin?

Ang sumusunod ay isang alituntunin na matututuhan natin mula sa sagradong salaysay na ito: Inaanyayahan ako ni Jesucristo na tumanggap ng personal na patotoo na Siya ang Tagapagligtas ng sanlibutan. Maaari mong isulat ang alituntuning ito sa iyong mga banal na kasulatan o study journal.

Patungkol sa personal na paanyaya at ministeryo ng Tagapagligtas sa mga Nephita, itinuro ni Bishop Gérald Caussé ng Presiding Bishopric:

Ang dakilang tagpong ito ang pinakamahalagang [tagpo] sa Aklat ni Mormon. Ang buong “mabuting balita” ng ebanghelyo ay nasa imaheng ito ng Tagapagligtas na magiliw na iniuunat ang Kanyang “mga bisig ng awa” [Alma 5:33] para anyayahan ang bawat tao na lumapit sa Kanya at tumanggap ng mga pagpapala ng Kanyang Pagbabayad-sala. …

… Tulad noong anyayahan ni Jesus ang bawat isa sa mga disipulong Nephita na damhin ang Kanyang mga sugat, namatay Siya para sa bawat isa sa atin, sa personal na paraan, na para bang ikaw o ako lamang ang tao sa mundo. Ipinaaabot Niya sa atin ang personal na paanyaya na lumapit sa Kanya at humugot sa kagila-gilalas na mga pagpapala ng Kanyang Pagbabayad-sala. (Gerald Causse, “Isang Buhay na Saksi ng Buhay na Cristo,” Liahona, Mayo 2020, 39–40)

Humikayat ng maraming sagot sa sumusunod na tanong. Maaari ding ibahagi ng mga estudyante kung ano ang nakatulong sa kanila para magkaroon ng patotoo tungkol kay Jesucristo. Maaari mo ring ibahagi ang nakatulong sa iyo para magkaroon ng patotoo.

• Ano ang ilang paraan na matatamo natin ang sarili nating patotoo na si Jesucristo ang Tagapagligtas ng sanlibutan?

Kung kinakailangan, magbahagi ng isang salaysay mula sa mga banal na kasulatan o mensahe sa pangkalahatang kumperensya na naglalarawan kung paano nagkaroon ng patotoo ang mga tao tungkol sa Tagapagligtas. Maaaring kabilang sa mga halimbawa sa mga banal na kasulatan ang Samaritana sa may balon (Juan 4:1–29), ama ni Haring Lamoni (Alma 22:1–18), o Nakababatang Alma (Alma 36:5–23).

“Hosana!”

Ang mga Nephita ay lubhang naantig ng kanilang personal na pakikipag-ugnayan sa Tagapagligtas.

Basahin ang 3 Nephi 11:16–17, at alamin kung paano tumugon ang mga tao kasunod ng kanilang karanasan kasama ang Nabuhay na Mag-uling Panginoon.

Maaaring makatulong na malaman na ang hosana ay salitang Hebreo na ang ibig sabihin ay “iligtas kami” o “mangyari pong iligtas kami.” Ginamit ito sa buong banal na kasulatan bilang pagpapahayag ng papuri at pagsamo at naging bahagi ng pagdiriwang tungkol sa Mesiyas sa lahat ng panahon (tingnan sa Gabay sa mga Banal na Kasulatan, “Hosana,” scriptures.ChurchofJesusChrist.org).

Ang sumusunod ay tutulong sa iyo na magkaroon ka ng oras na ipahayag ang iyong damdamin tungkol sa Tagapagligtas o pag-aralan ang tungkol sa iba na nagbahagi ng kanilang patotoo tungkol sa Kanya.

Ang sumusunod na mga aktibidad ay naglalayong tulungan ang mga estudyante na maipahayag ang sarili nilang patotoo tungkol kay Jesucristo o matuto mula sa mga patotoo ng iba. Ipakita ang mga opsiyon upang matingnan ito ng mga estudyante sa oras ng aktibidad. Huwag mag-atubiling i-adjust ang mga opsiyon para mas matugunan ang mga pangangailangan ng iyong mga estudyante.

1. Ibahagi ang iyong personal na patotoo tungkol kay Jesucristo sa pamamagitan ng pagsulat ng liham sa isang tao na sa palagay mo ay makikinabang dito.

2. Pumili ng isang talata sa mga banal na kasulatan o isang himno na naglalarawan ng nadarama mo tungkol sa kung sino si Jesucristo at kung ano ang ginawa Niya para sa iyo. Sumulat ng maikling paliwanag kung bakit makabuluhan sa iyo ang talata o himnong ito.

3. Sumulat ng isang tula o mga titik ng isang awitin na naglalarawan ng nadarama mo tungkol kay Jesucristo.

4. Pag-aralan ang patotoo ng ibang tao tungkol kay Jesucristo. Ibuod ang napag-aralan mo at kung ano ang ipinadama sa iyo ng salaysay na iyon. Maaaring kabilang sa mga halimbawa ang Alma 26:1–16, 35–37 o “Ang Buhay na Cristo: Ang Patotoo ng mga Apostol” (ChurchofJesusChrist.org).

Anyayahan ang ilang nakahandang estudyante na ibahagi ang ginawa nila para sa nakaraang aktibidad. Pasalamatan sila sa kahandaan nilang magbahagi. Patotohanan ang mga katotohanang tinalakay ninyo at hikayatin ang mga estudyante na patuloy na magsikap na matamo o mapalakas ang kanilang patotoo tungkol kay Jesucristo.

Komentaryo at Impormasyon ng Konteksto

3 Nephi 11:14. Paano ako “[lalapit]” sa Tagapagligtas?

Itinuro ni Pangulong Russell M. Nelson:

Ang desisyon na lumapit kay Cristo ay hindi nakabatay sa kinaroroonan ninyo; ito’y batay sa katapatan ng tao. Lahat ng miyembro ng Simbahan ay may access sa mga doktrina, ordenansa, susi ng priesthood, at pagpapala ng ebanghelyo, saan man sila naroon. (Russell M. Nelson, “Ang Kinabukasan ng Simbahan: Paghahanda sa Mundo para sa Ikalawang Pagparito ng Tagapagligtas,” Liahona, Abr. 2020, 15)

Paano maiimpluwensyahan ng personal na patotoo kay Jesucristo ang buhay ko?

Itinuro ni Pangulong M. Russell Ballard ng Korum ng Labindalawang Apostol:

Sa madaling salita, ang patotoo—tunay na patotoo, na dulot ng Espiritu at pinagtibay ng Espiritu Santo—ay nagpapabago ng buhay. Binabago nito ang inyong pag-iisip at paggawa. Binabago nito ang inyong pananalita. Naaapektuhan nito ang lahat ng priyoridad na itinakda ninyo at bawat pagpiling ginawa ninyo. Ang pagkakaroon ng tunay at [matibay] na patotoo sa ebanghelyo ni Jesucristo ay ang maging “espirituwal na isinilang sa Diyos,” upang “[matanggap] ang kanyang larawan sa inyong mga mukha,” at maranasan ang “malaking pagbabago … sa inyong mga puso” (Alma 5:14). (M. Russell Ballard, “Dalisay na Patotoo,” Liahona, Nob. 2004, 40)

Ano ang kahalagahan ng mga sugat at bakas ng mga sugat sa nabuhay na mag-uling katawan ng Tagapagligtas?

Itinuro ni Elder Gerrit W. Gong ng Korum ng Labindalawang Apostol:

Inaanyayahan tayo ng [ating] Tagapagligtas na lagi Siyang alalahanin tulad ng pag-alaala Niya sa atin.

Sa Amerika, inanyayahan ng ating nabuhay na mag-uling Tagapagligtas ang mga naroon na lumapit, nang isa-isa, at ihipo ang kanilang mga kamay sa Kanyang tagiliran at salatin ang bakas ng mga pako sa Kanyang mga kamay at paa.

… Pag-isipan kung bakit naroon pa rin sa perpekto at nabuhay na mag-uling katawan ng ating Tagapagligtas ang mga sugat sa Kanyang tagiliran at ang bakas ng mga pako sa Kanyang mga kamay at paa.

Kung minsan sa kasaysayan, ang mga mortal na tao ay pinarusahan ng kamatayan sa pamamagitan ng pagpapako sa krus. Ngunit ang ating Tagapagligtas na si Jesucristo lamang ang yumayakap sa atin na kakikitaan ng mga [tanda] ng Kanyang dalisay na pagmamahal. Siya lamang ang nagsasakatuparan ng propesiya na maipako sa krus upang mailapit Niya ang bawat isa sa atin sa Kanya, na tinatawag tayo sa pangalan [tingnan sa 3 Nephi 27:14].

Ipinahayag ng ating Tagapagligtas:

“Oo, maaaring makalimot [sila], gayon pa man hindi kita malilimutan.

“Narito, aking inanyuan ka sa mga palad ng aking mga kamay” [Isaias 49:15–16]. (Gerrit W. Gong, “Lagi Siyang Aalalahanin,” Liahona, Mayo 2016, 110)

Mga Karagdagang Aktibidad sa Pag-aaral

Paglilingkod sa bawat isa

Habang pinag-aaralan ang 3 Nephi 11:12–15, maaari mong bigyang-diin ang halimbawa ng paglilingkod ng Tagapagligtas sa mga tao nang isa-isa. Maaari mong anyayahan ang mga estudyante na mag-isip ng mga karagdagang salaysay sa banal na kasulatan tungkol sa paglilingkod ni Jesus sa personal na paraan. Sabihin sa mga estudyante na isipin kung paano patuloy na naglilingkod si Jesucristo sa atin nang isa-isa sa panahon ngayon. Hikayatin ang mga estudyante na tularan ang halimbawa ng Tagapagligtas sa pagtulong sa mga nangangailangan nang isa-isa.

“Buhay ang Aking Manunubos”

Habang tinatalakay ninyo ang kahalagahan ng pagkakaroon ng personal na patotoo tungkol kay Jesucristo, makatutulong na kantahin o pakinggan ang himnong “Buhay ang Aking Manunubos” (Mga Himno, blg. 78). Maaari mong ibahagi ang sumusunod na salaysay na naglalarawan ng ilang karanasan ni Samuel Medley, na sumulat ng mga titik ng himnong ito.

Habang naglilingkod sa British Navy noong 1759, malubhang nasugatan ang binti ni Samuel. Sinabi ng isang doktor na kailangan itong putulin. Si Samuel, na hindi isang relihiyosong tao, ay ginugol ang gabi sa pagninilay sa mga turo tungkol kay Jesucristo at pagdarasal na maligtas ang kanyang buhay at binti. Kinaumagahan, bumuti nang husto ang binti ni Samuel kaya hindi na ito kailangang putulin. Ginugol ni Samuel ang buong buhay niya bilang matapat na Kristiyano (tingnan sa “I Know That My Redeemer Lives,” What’s New with The Tabernacle Choir [blog], Peb. 12, 2014, thetabernaclechoir.org).