3 Nephi 12:1–16

“Pinagpala Kayo”

Nais ng Ama sa Langit at ni Jesucristo na pagpalain tayo. Makatitiyak tayo na kapag sinusunod natin ang Kanilang payo, matatanggap natin ang Kanilang mga pagpapala nang naaayon sa Kanilang panahon at paraan. Habang nagtuturo sa mga Nephita, ipinahayag ni Jesus ang marami sa mga pagpapalang matatanggap natin. Ang lesson na ito ay makatutulong sa iyo na maghandang tanggapin ang mga pagpapalang binanggit ng Tagapagligtas habang nagsisikap kang sundin ang Kanyang payo.

Pagtuon sa Ama sa Langit at kay Jesucristo bilang pinagmumulan ng ating mga pagpapala. Kapag pinag-aaralan ang mga banal na kasulatan at tinatalakay ang mga ipinangakong pagpapala, bigyang-diin na ang Ama sa Langit at si Jesucristo ang pinagmumulan ng mga pagpapalang iyon.

Paghahanda ng estudyante: Upang matulungan ang mga estudyante na maihanda ang kanilang puso na pag-aralan ang sermon ng Tagapagligtas sa 3 Nephi, na katulad ng Kanyang Sermon sa Bundok, maaari mong anyayahan sila na pagnilayan ang pahayag na ito mula kay Pangulong Joseph Fielding Smith (1876–1972). Sinabi niya na ang Sermon sa Bundok “ang pinakadakila[ng sermon] sa lahat ng naipangaral na, na alam natin” (Mga Turo ng mga Pangulo ng Simbahan: Joseph Fielding Smith [2013], 267).

Mga Posibleng Aktibidad sa Pag-aaral

Pinagpala

Upang matulungan ang mga estudyante na pag-isipan kung ano ang tunay na kahulugan ng pinagpala, maaari kang magdrowing ng isang simpleng pabalat ng magasin sa pisara. Pangalanan ang magasin gaya ng Magasin ng Tagumpay sa Mundo at isulat “Ang Limang Pinakapinagpalang Tao ng Taon” bilang tampok na artikulo ng magasin.

Sabihin sa mga estudyante na pumunta sa pisara at magsulat ng ilang pagpapala sa pabalat ng magasin na inaasahan nila na pagtutuunan ng pansin sa artikulo.

Magdrowing ng katulad na pabalat ng magasin na may parehong tampok na artikulo sa kabilang panig ng pisara, ngunit sa pagkakataong ito, pangalanan ang magasin na Liahona. Sabihin sa mga estudyante na magsulat ng ilang pagpapala na inaasahan nila na pagtutuunan sa artikulo ng magasin ng Simbahan.

• Anong mga partikular na pagpapala ang inaasahan mong pagtutuunan sa artikulo bilang pamantayan para sa pagpili ng mga tao?

Ngayon kunwari ay may isang artikulo sa magasing Liahona na may parehong pamagat.

• Anong mga partikular na pagpapala ang inaasahan mong tatalakayin sa artikulo bilang pinakamagagandang pagpapalang matatanggap ng sinuman?

• Sa iyong palagay, bakit itinuturo sa atin ng Tagapagligtas at ng Kanyang Simbahan na pahalagahan natin nang husto ang iba’t ibang pagpapala kaysa sa maraming bagay na hinahangad ng mundo?

Sa 3 Nephi 12–14, itinuro ni Jesucristo sa mga Nephita ang sermon na katulad ng Kanyang Sermon sa Bundok sa Bagong Tipan. Sinabi ni Pangulong Joseph Fielding Smith (1876–1972) na ang Sermon sa Bundok “ang pinakadakila[ng sermon] sa lahat ng naipangaral na, na alam natin” (Mga Turo ng mga Pangulo ng Simbahan: Joseph Fielding Smith [2013], 267).

Ngayon, sa pag-aaral mo ng bahagi ng sermon ng Tagapagligtas na tinatawag na Lubos na Pagpapala o Beatitudes, magkakaroon ka ng pagkakataong matutuhan ang mga paraan na nais ng Ama sa Langit at ni Jesucristo na pagpalain ka. Tinukoy ni Pangulong Harold B. Lee (1899–1973) ang Beatitudes ng Tagapagligtas bilang “saligang-batas para sa perpektong buhay” at ipinaliwanag na “sa kanyang Sermon sa Bundok ay binigyan tayo ng Panginoon ng isang paghahayag ng kanyang sariling pagkatao, na ganap, … at sa paggawa nito ay binigyan tayo ng blueprint para sa ating sariling buhay” (Decisions for Successful Living [1973], 56–57). Sa iyong pag-aaral, pag-isipan kung bakit napakahalaga ng mga pagpapalang ibinibigay ni Cristo sa sermon na ito kaysa sa alinman sa mga pagpapalang ibinibigay ng mundo.

Ang Lubos na Pagpapala o Beatitudes sa lupain ng Amerika

Basahin ang 3 Nephi 12:1–12 at markahan ang salitang “pinagpala” at ang anumang pagpapalang nakita mo na inilahad ng Tagapagligtas sa mga talatang ito. Pansinin na ang ibig sabihin ng salitang “pinagpala” sa mga talatang ito ay napakapalad o pinagpala ng Diyos.

Maaari mong anyayahan ang mga estudyante na bilangin kung ilang beses nila nakita ang salitang “pinagpala” at ibahagi ang mga pagpapalang natagpuan nila.

• Isipin ang lahat ng pagpapalang inilahad ng Tagapagligtas sa mga talatang ito, ano ang sinasabi nito sa iyo tungkol sa Kanya at sa Kanyang Ama?

Ang isang katotohanan na matututuhan natin mula sa passage na ito ay nalulugod ang Ama sa Langit at si Jesus na pagpalain tayo habang nagsisikap tayong sundin ang Kanilang payo.

Basahin ang 3 Nephi 12:1–2 at maaari mong markahan ang ipinagagawa sa atin ng Tagapagligtas kung pagsisikapan nating matanggap ang mga pagpapalang ibinibigay Niya at ng Kanyang Ama sa atin.

Maaari mong sabihin sa mga estudyante na sagutin ang mga sumusunod na tanong sa kanilang study journal bago ipabahagi sa mga boluntaryo ang kanilang mga sagot sa klase. Maaari ding magbahagi ang mga estudyante sa kapartner o sa maliliit na grupo.

• Bakit sa palagay mo ay pinagpapala ng Diyos ang mga “makikinig sa mga salita [ng] labindalawang pinili [Niya]”? (3 Nephi 12:1).

• Paano ka pinagpala ng Diyos o ang iba pang kakilala mo dahil nakinig kayo sa mga salita ng mga propeta at apostol?

Kung may oras pa, sabihin sa mga estudyante na maghanap ng mga mensahe mula sa mga miyembro ng Unang Panguluhan o ng Korum ng Labindalawang Apostol sa pinakahuling pangkalahatang kumperensya at ibahagi ang mga paraan na sa palagay nila ay pinagpapala tayo sa pagsunod sa mga partikular na turo na nahanap nila.

Pagsisikap na matanggap ang mga pagpapala

Bago basahin ng mga estudyante ang mga sumusunod na talata, maaari kang gumuhit ng dalawang column sa pisara na may mga pagpapala mula sa mga talatang nakalista sa isang column at ang mga pag-uugali o mga katangian na humahantong sa mga pagpapalang iyon na nakalista nang hindi sunud-sunod sa isa pang column. Sabihin sa mga estudyante na subukang itugma ang mga pagpapala sa katugmang mga pag-uugali o mga katangian. Pagkatapos ay maaari nilang gamitin ang 3 Nephi 12:3–12 para tingnan kung tama ang kanilang mga sagot.

Basahing muli ang 3 Nephi 12:3–12, at alamin sa pagkakataong ito kung aling mga katangian ang iniugnay ng Tagapagligtas sa bawat pagpapala. Maaari mong markahan ang mga katangiang ito nang magkakaiba depende sa kung paano mo minarkahan ang mga pagpapala, tulad ng paggamit ng iba’t ibang kulay o bilugan sa halip na i-highlight.

Para sa alternatibong ideya sa pagtuturo ng Beatitudes, sumangguni sa aktibidad na “Beatitudes chart” na matatagpuan sa “Mga Karagdagang Aktibidad sa Pag-aaral” ng lesson na ito.

Pumili ng isang pagpapala mula sa mga talatang ito na gusto mong matamo. Pansinin ang pag-uugali o katangian na humahantong sa pagpapalang iyon. Pag-aralan ang pag-uugali o katangiang iyon gamit ang available na resources, tulad ng Gabay sa mga Banal na Kasulatan, Gospel Library app, o mga footnote.

Maaari mong anyayahan ang mga estudyante na lumibot sa silid, humanap ng iba pang kaklase na nag-aral ng ibang passage, at ibahagi ang kanilang mga sagot sa mga sumusunod na tanong.

• Ano ang natutuhan mo tungkol sa kinakailangang gawin ng mga taong naghahangad ng pagpapalang napag-aralan mo?

• Paano ipinakita ng Tagapagligtas ang pag-uugali o kalagayang iyon? Paano makatutulong sa iyo ang Kanyang halimbawa para mas maunawaan mo kung paano mo matatamo ang pagpapalang iyon?

Alalahanin na dahil mahal tayo ng Ama sa Langit, pagpapalain Niya tayo ayon sa Kanyang itinakdang panahon at paraan. (Tingnan sa Doktrina at mga Tipan 88:64.)

Kung sa palagay mo ay makatutulong sa iyong mga estudyante ang karagdagang panghihikayat upang magtiwala sa Panginoon at sa Kanyang takdang panahon, maaari mo ring ibahagi ang pahayag ni Pangulong Dallin H. Oaks sa bahaging “Komentaryo at Impormasyon ng Konteksto.”

Ngayong natukoy mo na ang pagpapalang nais mo at napag-aralan mo kung paano ito matatamo sa iyong buhay, gumawa ng plano kung paano mo matatamo ang pagpapalang iyon. Maaaring makatulong ang mga sumusunod na tanong:

• Anong partikular na mga bagay ang magagawa mo upang matamo ang pagpapalang iyon?

• Kailan mo pinlanong simulan ito?

• Anong mga balakid ang maaaring maging hadlang, at paano mo malalampasan ang mga ito?

Maaaring makatulong na ibahagi kung paano mo nakita ang alinman sa mga pagpapalang ito sa iyong buhay at ang iyong patotoo tungkol sa hangarin ng Tagapagligtas na pagpalain tayo.

Komentaryo at Impormasyon ng Konteksto

Bakit hindi palaging dumarating ang mga pagpapala ng Diyos sa paraang inaasahan natin?

Itinuro ni Pangulong Dallin H. Oaks ng Unang Panguluhan:

Ang ibig sabihin ng pananampalataya ay pagtitiwala—pagtitiwala sa kalooban ng Diyos, pagtitiwala sa paraan Niya ng paggawa ng mga bagay-bagay, at pagtitiwala sa Kanyang itinakdang panahon. …

Katunayan, hindi tayo magkakaroon ng tunay na pananampalataya sa Panginoon nang hindi lubos na nagtitiwala sa kalooban ng Panginoon at sa itinakdang panahon ng Panginoon. (Dallin H. Oaks, “Timing,” Ensign, Okt. 2003, 12)

Ano ang makatutulong sa akin para mas maunawaan ang Beatitudes?

Ang Beatitudes

Reperensya	Katangian
Reperensya 3 Nephi 12:3	Katangian Aba sa espiritu. Pagiging mapagkumbaba, o “pagkilala nang may pasasalamat na umaasa [ang tao] sa Panginoon—na nauunawaang lagi kailangan [ng bawat tao] ang Kanyang tulong. Ang pagpapakumbaba ay pagkilala na ang mga talento at kakayahan [ng isang tao] ay mga kaloob ng Diyos” (Tapat sa Pananampalataya: Isang Sanggunian sa Ebanghelyo [2004], 148).
Reperensya 3 Nephi 12:4	Katangian Nahahapis. Makadama at magpakita ng kalungkutan tungkol sa isang bagay. Maaaring mahapis ang isang tao dahil sa mga pagsubok ng mortalidad na nararanasan niya at ng iba pa. Maaari ding magdalamhati ang isang tao dahil sa kasalanan.
Reperensya 3 Nephi 12:5	Katangian Maamo. Pagiging “may takot sa Diyos, matwid, mapagpakumbaba, natuturuan, at matiisin sa pagdurusa” (Gabay sa mga Banal na Kasulatan, “Maamo, Kaamuan,” scriptures.ChurchofJesusChrist.org).
Reperensya 3 Nephi 12:6	Katangian Nagugutom at nauuhaw sa kabutihan. Pagkakaroon ng matinding hangarin na malaman at magawa ang kalooban ng Diyos.
Reperensya 3 Nephi 12:7	Katangian Maawain. Pagiging “mahabagin, magalang, mapagpatawad, mahinahon, at matiisin, kahit alam ninyo ang mga pagkukulang ng iba” (Tapat sa Pananampalataya, 7).
Reperensya 3 Nephi 12:8	Katangian May dalisay na puso. Maibibilang sa mga taong “nagmamahal sa Panginoon, naghahangad na tularan Siya at sundin ang Kanyang mga kautusan, nagsisikap na mamuhay nang marangal at matapat at nagtitiis hanggang wakas. Ang mga taong may dalisay na puso ay kinokontrol ang kanilang pag-iisip upang hindi sila makaisip at makagawa ng mga bagay na imoral” (Sheldon F. Child, “Words of Jesus: Chastity,” Liahona, Ene. 2003, 44).
Reperensya 3 Nephi 12:9	Katangian Tagpamayapa. “Tumutulong sa tao na makita ang pagkakatulad nila kapag nakikita nila ang pagkakaiba-iba nila” (Henry B. Eyring, “Pagkatuto sa Priesthood,” Liahona, Mayo 2011, 63).
Reperensya 3 Nephi 12:10–12	Katangian Pinag-uusig dahil sa pangalan ni Cristo. Handang sundin at ipagtanggol si Jesucristo at ang Kanyang mga turo, kahit hinahamak o tinatrato nang masama ang isang tao sa paggawa nito.

Mga Karagdagang Aktibidad sa Pag-aaral

“Mapapalad ang [mga] tagapamayapa”

Upang matulungan ang mga estudyante na mas maunawaan ang ibig sabihin ng maging tagapamayapa, maaari mo silang bigyan ng limang minuto para pag-aralan ang mensaheng “Pagsunod kay Jesus: Pagiging Isang Tagapamayapa“ ni Elder Neil L. Andersen ng Korum ng Labindalawang Apostol. Pgkatapos ay anyayahan sila na ibahagi ang natutuhan nila tungkol sa pagiging tagapamayapa.

Beatitudes chart

Bigyan ang bawat estudyante ng kopya ng Beatitudes chart na matatagpuan sa bahaging “Komentaryo at Impormasyon ng Konteksto” ng lesson na ito. Hatiin ang klase sa maliliit na grupo at mag-assign sa kanila ng isa o dalawang Beatitudes na nakalista sa chart. Sabihin sa mga estudyante na maghanda ng maikling pagtatanghal tungkol sa naka-assign sa kanila na (mga) Beatitude. Maaaring kabilang sa kanilang mga pagtatanghal ang mga talatang naka-assign sa kanila, impormasyon mula sa chart, at iba pang mga ideyang makukuha nila habang pinag-aaralan at pinag-iisipan nila ang kanilang (mga) Beatitude. Maaari ding magbahagi ang mga estudyante ng mga halimbawa mula sa buhay ng Tagapagligtas tungkol sa pag-uugali o katangiang inilarawan sa kanilang (mga) talata.

“Hayaan na ang inyong ilaw ay magliwanag”

Magpakita ng mga larawan ng asin, lunsod, at nakasinding kandila. Itanong sa mga estudyante kung ano ang koneksyon ng bawat isa sa mga ito sa mga miyembro ng Simbahan. Ipabasa sa mga estudyante ang 3 Nephi 12:13–16 para makahanap ng sagot.

Itanong sa mga estudyante ang mga sumusunod: Alin sa mga analohiyang ito ang pinakamakabuluhan para sa iyo? Kailan nakatulong sa iyo ang nakita mong mabubuting gawa ng isang tao para mas mahalin o hangaring makilala pa ang iyong Ama sa Langit?

Upang matulungan ang mga estudyante na mas lubos na maunawaan kung ano ang ilaw na dapat nilang hayaang magliwanag, sabihin sa kanila na i-cross-reference ang talata 16 sa 3 Nephi 18:24 at ibahagi kung ano ang idinagdag ng talatang iyon sa naunawaan nila tungkol sa ating liwanag.