Leyi ak Sarya Kite Jerizalèm

Avètisman Senyè a bay yon fanmi

Leyi ak Sarya Kite Jerizalèm avèk pitit yo. Leyi te fè yon vizyon Senyè a te ba li. Li te wè ke Senyè a ta pral vin nan mond la yon jou. Senyè a te montre l tou ke Jerizalèm ta pral detwi.

1 Nephi 1:4–18

Leyi te pale pèp la konsènan vizyon li a. Li te di yo ke Jezikri ta pral vini yon jou pou sove mond lan.

1 Nefi 1:18–19

Leyi te di moun yo tou Jerizalèm te gen pou l detwi. Li te envite yo pou yo te repanti.

2 Nefi 1:14, 18–19

Pèp la te move. Senyè a te pale avèk Leyi ankò nan yon rèv. Leyi te aprann ke li ak fanmi l pa t ap gen sekirite nan Jerizalèm. Yo te oblije kite.

1 Nefi 1:19–20; 2:1–2

Leyi ak Saria te obeyi Senyè a. Yo te kite vil la avèk fanmi yo. Leyi ak Saria te gen kat pitit gason ki te rele Laman, Lemyèl, Sam ak Nefi. Yo te oblije kite kay yo ak bèl bagay yo dèyè.

1 Nefi 2:3–5

Fanmi an te vwayaje nan dezè a pre Lanmè Wouj la. Leyi te remèsye Seyè a poutèt Li beni fanmi l. Li te anseye fanmi l pou yo suiv Senyè a ak kenbe kòmandman L yo.

1 Nefi 2:5–10

Laman ak Lemyèl te plenyen. Yo te pèdi kay yo ak tout bagay yo te kite dèyè yo. Yo pa t konnen poukisa Senyè a te mande yo pou yo sòti. Yo pa t kwè yon gwo vil tankou Jerizalèm te ka detwi.

1 Nefi 2:11–13

Laman ak Lemyèl te panse Leyi t ap imajine vizyon li yo. Sa k t ap pase si fanmi an te pèdi nan dezè a?

1 Nefi 2:11

Nefi te vle konnen pou tèt pa l sa Leyi t ap di yo sete laverite. Li te priye epi l mande Senyè a.

1 Nefi 2:16

Senyè a te voye Sentespri a pou ede Nefi kwè pawòl papa l yo. Nefi te kwè Senyè a epi l te pataje sa l te aprann avèk frè l yo. Sam te koute Nefi epi l te kwè l, men, Laman ak Lemyèl pa t koute.

1 Nefi 2:16–18