« ថ្ងៃទី ៩ ខែ មេសា ។ តើខ្ញុំអាចពង្រឹងទីបន្ទាល់របស់ខ្ញុំអំពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទដោយរបៀបណា ? បុណ្យអ៊ីស្ទើរ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិឆ្នាំ ២០២៣ ( ឆ្នាំ ២០២២ )
« ថ្ងៃទី ៩ ខែ មេសា ។ តើខ្ញុំអាចពង្រឹងទីបន្ទាល់របស់ខ្ញុំអំពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទដោយរបៀបណា ? » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិឆ្នាំ ២០២៣
ថ្ងៃទី ៩ ខែ មេសា
តើខ្ញុំអាចពង្រឹងទីបន្ទាល់របស់ខ្ញុំអំពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទដោយរបៀបណា ?
បុណ្យអ៊ីស្ទើរ
ប្រឹក្សាជាមួយគ្នា
ដឹកនាំដោយសមាជិកថ្នាក់ម្នាក់ ឬគណៈប្រធានកូរ៉ុម មានរយៈពេលប្រហែល ១០–២០ នាទី
នៅដើមការប្រជុំ សូមសូត្ររួមគ្នានូវ បាវចនាយុវនារី ឬ បាវចនាកូរ៉ុមបព្វជិតភាពអើរ៉ុន ។ រួចហើយ បន្ថែមលើការប្រឹក្សាអំពីកិច្ចការក្នុងថ្នាក់ ឬកូរ៉ុមជាក់លាក់នានា បងប្អូនអាចពិភាក្សាពីចំណាប់អារម្មណ៍ និងបាវចនាមកពី សន្និសីទទូទៅ ។ សំណួរខាងក្រោមនេះអាចនឹងជួយបាន ។
-
តើយើងចាប់អារម្មណ៍លើបាវចនា ឬសារលិខិតអ្វីខ្លះ ? តើអ្វីទៅដែលបានពង្រឹងសេចក្តីជំនឿរបស់យើងលើព្រះយេស៊ូវគ្រីស្ទ ?
-
តើអ្វីទៅដែលបានពង្រឹងទីបន្ទាល់របស់យើងលើពួកព្យាការីនៅរស់ ? តើយើងមានអារម្មណ៍បំផុសគំនិតឲ្យធ្វើអ្វីខ្លះ ដោយសារតែអ្វីដែលយើងបានរៀន ឬទទួលអារម្មណ៍នេះ ?
-
តើយើងត្រូវធ្វើអ្វីខ្លះក្នុងនាមជាថ្នាក់ ឬកូរ៉ុមមួយ ដើម្បីចងចាំ ហើយធ្វើតាមការទូន្មានដែលយើងស្ដាប់ឮនៅក្នុងសន្និសីទទូទៅ ?
នៅចុងបញ្ចប់នៃមេរៀននេះ សូមធ្វើកិច្ចការដូចខាងក្រោម តាមការគួរ ៖
-
ថ្លែងទីបន្ទាល់អំពីគោលការណ៍ដែលបានបង្រៀន ។
-
រំឭកសមាជិកថ្នាក់ ឬកូរ៉ុមអំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។
បង្រៀនគោលលទ្ធិ
ដឹកនាំដោយអ្នកដឹកនាំជាមជ្ឈិមវ័យ ឬយុវវ័យម្នាក់ រយៈពេលប្រហែល ២៥–៣៥ នាទី
រៀបចំខ្លួនខាងវិញ្ញាណ
សាវកទាំងពីបុរាណ និងសម័យទំនើបថ្លែងទីបន្ទាល់ថាព្រះយេស៊ូវគ្រីស្ទមានព្រះជន្មរស់ ! ទ្រង់បានរងទុក្ខ ហើយសុគតនៅលើឈើឆ្កាង ទ្រង់ត្រូវបញ្ចុះនៅក្នុងផ្នូរ ហើយនៅថ្ងៃទីបីទ្រង់បានមានព្រះជន្មរស់ឡើងវិញ ។ ដោយសារទ្រង់ឈ្នះលើសេចក្ដីស្លាប់ នោះយើងទាំងអស់គ្នានឹងត្រូវប្រោសឲ្យរស់ឡើងវិញ ។ ការមានព្រះជន្មរស់ឡើងវិញរបស់ព្រះអង្គសង្គ្រោះបាននាំមកនូវការសន្យានៃអមតភាព និងក្តីសង្ឃឹមនៃជីវិតអស់កល្បជានិច្ច ។ ការសន្យានេះគឺជាមូលហេតុនៃការប្រារព្ធធ្វើបុណ្យអ៊ីស្ទើរ ។
ក្នុងនាមជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ យើងមានហេតុផលពិសេសដើម្បីជឿថា ព្រះយេស៊ូវគ្រីស្ទបានមានព្រះជន្មរស់ឡើងវិញ ។ បន្ថែមពីលើសាក្សីពីមនុស្សនៅសម័យព្រះគម្ពីរសញ្ញាថ្មី យើងមានទីបន្ទាល់របស់មនុស្សដែលរស់នៅក្នុងសម័យព្រះគម្ពីរមរមន ព្យាការី យ៉ូសែប ស្ម៊ីធ និងព្យាការី និងសាវកដែលនៅរស់របស់យើង ។ យើងក៏អាចទទួលបានសាក្សីផ្ទាល់ខ្លួនអំពីការមានព្រះជន្មរស់ឡើងវិញតាមរយៈព្រះវិញ្ញាណបរិសុទ្ធ ។ តើបងប្អូនអាចជួយយុវវ័យពង្រឹងទីបន្ទាល់របស់ពួកគេថាព្រះយេស៊ូវគ្រីស្ទបានមានព្រះជន្មរស់ឡើងវិញដោយរបៀបណា ? ពេលបងប្អូនរៀបចំខ្លួន សូមពិចារណាសិក្សាសារលិខិតរបស់ស៊ីស្ទើរ រ៉េណា អ៊ី អាប៊ើតូ « The Grave Has No Victory » ( Liahona ខែ ឧសភា ឆ្នាំ ២០២១ ទំព័រ ៨៥–៨៦ ) និងសារលិខិតរបស់អែលឌើរ អេស ម៉ាក ផលម័រ « Our Sorrow Shall Be Turned into Joy » ( Liahona ខែ ឧសភា ឆ្នាំ ២០២១ ទំព័រ ៨៨–៨៩ ) ។
រៀនជាមួយគ្នា
បងប្អូនអាចចាប់ផ្តើមការពិភាក្សាអំពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ដោយការអញ្ជើញយុវវ័យឲ្យចែកចាយអ្វីដែលពួកគេបានធ្វើនៅសប្តាហ៍នេះ ដើម្បីប្រារព្ធបុណ្យអ៊ីស្ទើរ ។ បងប្អូនអាចស្នើសុំឲ្យពួកគេពីអ្វីដែលពួកគេបានសិក្សា ឬបានធ្វើជាលក្ខណៈបុគ្គល ឬជាមួយគ្រួសាររបស់ពួកគេ ដើម្បីពង្រឹងទីបន្ទាល់របស់ពួកគេអំពីការមានព្រះជន្មរស់ឡើងវិញរបស់ព្រះអង្គសង្គ្រោះ ។ ខាងក្រោមនេះជាសកម្មភាពដើម្បីជួយសមាជិកថ្នាក់ ឬកូរ៉ុមរបស់បងប្អូនពង្រឹងទីបន្ទាល់របស់ពួកគេ ។
-
សូមពិភាក្សាជាមួយគ្នាថាហេតុអ្វីបានជាសាក្សីមានសារៈសំខាន់ក្នុងជីវិតប្រចាំថ្ងៃ ។ បន្ទាប់មក សូមធ្វើបញ្ជីពីសាក្សីនៃការមានព្រះជន្មរស់ឡើងវិញរបស់ព្រះយេស៊ូវឲ្យបានច្រើនតាមដែលថ្នាក់ ឬកូរ៉ុមរបស់បងប្អូនអាចគិតដល់ ។ បន្ទាប់មកបុគ្គលម្នាក់ៗអាចជ្រើសរើសបទគម្ពីរចេញពីបញ្ជីទាំងនោះដែលមាននៅក្នុង « ធនធានគាំទ្រ » ដើម្បីរៀនអំពីសាក្សីទាំងនេះ ។ សូមអញ្ជើញសមាជិកថ្នាក់ ឬកូរ៉ុមឲ្យចែកចាយអ្វីដែលពួកគេបានរៀន ។ សូមលើកទឹកចិត្តពួកគេឲ្យចែកចាយផងដែរពីរបៀបដែលសាក្សីទាំងនេះពង្រឹងទីបន្ទាល់របស់ពួកគេអំពីការមានព្រះជន្មរស់ឡើងវិញនៃព្រះយេស៊ូវគ្រីស្ទ ។
-
តើក្នុងស្ថានភាពណាខ្លះ ជាពេលយើងអាចចែកចាយទីបន្ទាល់របស់យើងអំពីការមានព្រះជន្មរស់ឡើងវិញរបស់ព្រះអង្គសង្គ្រោះ ? ប្រសិនបើនរណាម្នាក់នៅក្នុងថ្នាក់ ឬកូរ៉ុមមានបទពិសោធន៍និយាយជាមួយនរណាម្នាក់អំពីការមានព្រះជន្មរស់ឡើងវិញរបស់ព្រះអង្គសង្គ្រោះ សូមពិចារណាអញ្ជើញគាត់ឲ្យចែកចាយបទពិសោធន៍ទាំងនោះ ។ សូមលើកទឹកចិត្តសមាជិកថ្នាក់ ឬកូរ៉ុមឲ្យគិតអំពីរបៀបដែលពួកគេនឹងជួយនរណាម្នាក់ ឲ្យយល់អំពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ហើយទទួលបានទីបន្ទាល់ថា ដោយសារទ្រង់ នោះយើងទាំងអស់គ្នាអាចរស់ឡើងវិញដែរ ។ តើមានសេចក្ដីពិតសំខាន់ៗអ្វីខ្លះអំពីការរស់ឡើងវិញរបស់មនុស្សទាំងអស់ដែលនឹងមានសារៈសំខាន់ក្នុងការបង្រៀនអ្នកដទៃ ? សមាជិកថ្នាក់ ឬកូរ៉ុមអាចរកចម្លើយនៅក្នុងព្រះគម្ពីរក្នុង « ធនធានគាំទ្រ » ។
-
នៅពេលសាវកទាំងឡាយបានប្រាប់ថូម៉ាសថា ពួកគេបានឃើញព្រះអង្គសង្គ្រោះដែលមានព្រះជន្មរស់ឡើងវិញ ថូម៉ាសបាននិយាយថា លោកនឹងមិនជឿទេ លុះត្រាតែលោកបានឃើញដោយខ្លួនលោកផ្ទាល់ ។ ក្រោយមកព្រះយេស៊ូវបានប្រាប់ ថូម៉ាសថា « មានពរហើយ អ្នកណាដែលជឿឥតឃើញសោះ » ។ សូមរំឭកឡើងវិញជាមួយគ្នាពីបទពិសោធន៍របស់ថូម៉ាសដែលមាននៅក្នុង យ៉ូហាន ២០:២៤–២៩ ។ តើយើងបានទទួលពរជ័យដោយការជឿលើព្រះអង្គសង្គ្រោះដោយមិនបានឃើញទ្រង់ដោយរបៀបណា ? តើយើងអាចពង្រឹងជំនឿរបស់យើងលើព្រះយេស៊ូវគ្រីស្ទដោយរបៀបណា ? សូមអញ្ជើញសមាជិកថ្នាក់ ឬកូរ៉ុមឲ្យស្វែងរកសារលិខិតមួយ ឬច្រើនពីថ្នាក់ដឹកនាំសាសនាចក្រនៅក្នុង « ធនធានគាំទ្រ » ហើយចែកចាយពីមូលហេតុដែលពួកគេមានអំណរគុណចំពោះការមានព្រះមានជន្មរស់ឡើងវិញរបស់ព្រះអង្គសង្រ្គោះ ។ តើចំណេះដឹងរបស់យើងដែលថា យើងនឹងត្រូវប្រោសឲ្យរស់ឡើងវិញមានឥទ្ធិពលយ៉ាងណា ទៅលើរបៀបដែលយើងគិតអំពីរូបកាយរបស់យើង និងការសម្រេចចិត្តដែលយើងធ្វើ ?
ដើម្បីឲ្យឯងបានដឹង ដោយ ហ្គែរី អិល ខាប
ធ្វើសកម្មភាពដោយសេចក្ដីជំនឿ
សូមលើកទឹកចិត្តសមាជិកថ្នាក់ ឬកូរ៉ុមឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីធ្វើតាមការបំផុសគំនិត ដែលពួកគេបានទទួលនៅថ្ងៃនេះ ។ ពួកគេអាចចែកចាយគំនិតរបស់ពួកគេបាន ប្រសិនបើពួកគេចង់ចែកចាយ ។ សូមអញ្ជើញពួកគេឲ្យគិត អំពីរបៀបដែលការធ្វើតាមចំណាប់អារម្មណ៍របស់ពួកគេនឹងពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។
ធនធានគាំទ្រ
-
ម៉ាថាយ ២៨:១–១០; លូកា ២៤:១៣–៣៥; លូកា ២៤:៣៦–៤៨; យ៉ូហាន ២០:១១–២៩; កូរិនថូស ទី១ ១៥:៣–៨; នីហ្វៃទី ៣ ១១:១–១៥; អេធើរ ១២:៣៨–៣៩; គោលលទ្ធិ និងសេចក្តីសញ្ញា ៧៦:១៩–២៤ ( សាក្សីនៃការមានព្រះជន្មរស់ឡើងិវញ )
-
នីហ្វៃទី ២ ៩:១០–១៥; ម៉ូសាយ ១៦:៨–១១; អាលម៉ា ១១:៤២–៤៥; អាលម៉ា ៤០:២៣–២៥; គោលលទ្ធិ និងសេចក្តីសញ្ញា ៩៣:៣៣–៣៤ ( បទគម្ពីរដែលបង្រៀនអំពីការរស់ឡើងវិញនៃមនុស្សទាំងអស់ )
-
ឌី ថត គ្រីស្តូហ្វឺសិន « The Resurrection of Jesus Christ » Liahona ខែ ឧសភា ឆ្នាំ ២០១៤ ទំព័រ ១១១–១១៤
-
ជែរីត ដបុលយូ ហ្គង « Hosanna and Hallelujah—The Living Jesus Christ: The Heart of Restoration and Easter » Ensign ខែ ឧសភា ឆ្នាំ ២០២០ ទំព័រ ៥២–៥៥
-
រ៉េណា អ៊ី អាប៊ើតូ « The Grave Has No Victory » Liahona ខែ ឧសភា ឆ្នាំ ២០២១ ទំព័រ ៨៥–៨៦
-
អេស ម៉ាក ផលម័រ « Our Sorrow Shall Be Turned into Joy » Liahona ខែ ឧសភា ឆ្នាំ ២០២១ ទំព័រ ៨៨–៨៩
-
វីដេអូពីបុណ្យអ៊ីស្ទើរអាចរកបាននៅគេហទំព័រ ChurchofJesusChrist.org/study/video/easter-videos ។
ការបង្រៀនតាមរបៀបរបស់ព្រះអង្គសង្គ្រោះ
មនុស្សម្នាក់ដែលស្គាល់របៀបដើម្បីទាញអត្ថន័យពីបទគម្ពីរ ហើយបែរទៅរកបទគម្ពីរជាប្រចាំថ្ងៃ នឹងអាចមាននូវការណែនាំដ៏ទេវភាពដើម្បីយកឈ្នះលើគ្រប់ឧបសគ្គ ។ នៅពេលអ្នកបង្រៀន ចូរសួរសំណួរដែលតម្រូវឲ្យអ្នករៀនស្វែងរកចម្លើយនៅក្នុងបទគម្ពីរ ។