« ថ្ងៃទី ២០–២៦ ខែ កញ្ញា ៖ ‹ ឱព្រះអង្គអើយ តើព្រះអង្គគង់នៅទីណា ? › ៖ គោលលទ្ធិ និងសេចក្តីសញ្ញា ១២១–១២៣ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

« គោលលទ្ធិ និងសេចក្តីសញ្ញា ១២១–១២៣ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥

Liberty Jail [ គុកលិបើទី ] ដោយ វ៉ែលឌិន អាន់ឌើរសិន

ថ្ងៃទី ២០–២៦ ខែ តុលា ៖ « ឱព្រះអង្គអើយ តើព្រះអង្គគង់នៅទីណា ? »

គោលលទ្ធិ និងសេចក្ដីសញ្ញា ១២១–១២៣

នៅជាន់ក្រោមក្នុងគុកលិបើទីរដ្ឋមិសសួរី ត្រូវបានគេស្គាល់ថាជា « គុកងងឹត » ។ មានជញ្ជាំងក្រាស់ ហើយថ្មកម្រាលឥដ្ឋត្រជាក់ និងកខ្វក់ អាហារគ្មានអនាម័យ និងរលួយ—ហើយបង្អួចតូចដែលមានរនាំងដែកពីរនៅជិតពិដានមានតែពន្លឺបន្តិចបន្តួចប៉ុណ្ណោះដែលអាចចូលបាន ។ នេះជាកន្លែងដែល យ៉ូសែប ស្ម៊ីធ និងមនុស្សពីរបីនាក់ទៀតបានជាប់នៅទីនោះអស់រយៈពេលបួនខែដ៏ត្រជាក់ក្នុងអំឡុងរដូវរងាឆ្នាំ ១៨៣៨–១៨៣៩ ។ អំឡុងពេលនេះ យ៉ូសែប នៅតែបន្តទទួលព៌ត័មានអំពីការរងទុក្ខវេទនារបស់ពួកបរិសុទ្ធ ។ អារម្មណ៍នៃភាពសុខសាន្ត និងសុទិដ្ឋិនិយមនៅហ្វារវែស្ទ បានមានត្រឹមតែរយៈពេលពីរបីខែប៉ុណ្ណោះ ហើយឥឡូវនេះពួកបរិសុទ្ធបានបាត់បង់ផ្ទះសម្បែងជាថ្មីម្តងទៀត ត្រូវរត់ចូលទៅក្នុងទីរហោស្ថានស្វែងរកកន្លែងថ្មីដើម្បីចាប់ផ្តើមជាថ្មី—ហើយលើកនេះព្យាការីរបស់ពួកគេកំពុងជាប់ឃុំឃាំង ។

ហើយសូម្បីតែនៅក្នុងគុកដ៏វេទនានោះក្តី « តម្រិះពីស្ថានសួគ៌ » បាន « ចាក់ … មក » ( គោលលទ្ធិ និងសេចក្តីសញ្ញា ១២១:៣៣ ) ។ សំណួររបស់ យ៉ូសែប « ឱព្រះអង្គអើយ តើព្រះអង្គគង់នៅទីណា ? » ត្រូវបានឆ្លើយយ៉ាងច្បាស់លាស់ និងខ្លាំងក្លា ៖ « ចូរកុំខ្លាច … ដ្បិតព្រះទ្រង់នឹងគង់នៅជាមួយអ្នក ជារៀងដរាបតទៅ » ( គោលលទ្ធិ និងសេចក្តីសញ្ញា ១២១:១; ១២២:៩ ) ។

សូមមើល ពួកបរិសុទ្ធ, ១:៣២៣–៣៩៦; « Within the Walls of Liberty Jail » នៅក្នុង Revelations in Context ទំព័រ ២៥៦–២៦៣ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ

គោលលទ្ធិ និងសេចក្តីសញ្ញា ១២១:១–១០, ២៣–៣៣; ១២២

ជាមួយព្រះ ទុក្ខលំបាកអាច « ជាការល្អ [ ដល់ខ្ញុំ ] » ទៅវិញ ។

នៅពេលយើង ឬមនុស្សដែលយើងស្រឡាញ់កំពុងរងទុក្ខលំបាក វាជារឿងធម្មតាដែលយើងងឿងឆ្ងល់ថា តើព្រះជ្រាបដឹងអំពីយើងដែរឬទេ ។ នៅពេលបងប្អូនអាន គោលលទ្ធិ និងសេចក្តីសញ្ញា ១២១:១–៦ សូមគិតពីពេលមួយ ដែលបងប្អូនមានសំណួរ ឬមានអារម្មណ៍ស្រដៀងអារម្មណ៍របស់ យ៉ូសែប ស្ម៊ីធ ។ តើបងប្អូនរកឃើញការឆ្លើយតបពីព្រះអម្ចាស់អ្វីខ្លះដែលអាចជួយបងប្អូននៅពេលបងប្អូនមានសំណួរ ឬមានអារម្មណ៍ទាំងនេះ ? ឧទាហរណ៍នៅក្នុង ខទី ៧–១០, ២៦–៣៣ សូមកត់សម្គាល់ពីពរជ័យដែលទ្រង់សន្យា ។ តើបងប្អូនគិតថា វាមានន័យដូចម្ដេចក្នុងការ « ស៊ូទ្រាំ … ដោយហ្មត់ចត់ » ? តើព្រះអង្គសង្រ្គោះជួយបងប្អូនធ្វើបែបនេះយ៉ាងដូចម្តេច ?

កាលបងប្អូនអាន កណ្ឌទី ១២២ សូមពិចារណាអំពីរបៀបដែលព្រះអម្ចាស់ចង់ឲ្យបងប្អូនពិនិត្យមើលសេចក្តីទុក្ខវេទនារបស់បងប្អូន ។ បងប្អូនអាចជញ្ជឹងគិតពីបទពិសោធន៍ដែលបានមកពីការសាកល្បងរបស់បងប្អូន និងរបៀបដែលវាអាច « នឹងទៅជាការល្អដល់ [ បងប្អូន ] » ( ខទី ៧ ) ។

សូមមើលផងដែរ ឃ្វីនថិន អិល ឃុក « សេចក្តីសុខសាន្តផ្ទាល់ខ្លួននៅក្នុងគ្រាលំបាក » លីអាហូណា, ខែ វិច្ឆិកា ឆ្នាំ ២០២១ ទំព័រ ៨៩–៩២; « ខ្ញុំរកក្តីសុខឯណា ? » ទំនុកតម្កើង ល.រ. ៦៩ ។

គោលលទ្ធិ និងសេចក្តីសញ្ញា ១២១:៣៤–៤៦

អានុភាព និងឥទ្ធិពលពិតប្រាកដគឺផ្អែកលើ « គោលការណ៍នៃសេចក្តីសុចរិត » ។

អំណាចរបស់លោកិយបានបង្ខំពួកបរិសុទ្ធចេញពីរដ្ឋមិសសួរី និងយ៉ូសែប ស្ម៊ីធ ទៅក្នុងគុក ។ ប៉ុន្តែកាលយ៉ូសែបនៅទីនោះ ព្រះអម្ចាស់បានបង្រៀនលោកអំពីអំណាចមួយប្រភេទផ្សេងទៀត ៖ អំណាចរបស់ទ្រង់ « អំណាចនៃស្ថានសួគ៌ » ។ ការអានអំពីអំណាចនោះ នៅក្នុង គោលលទ្ធិ និងសេចក្តីសញ្ញា ១២១:៣៤–៤៦ អាចជួយបងប្អូនរៀនអំពីរបៀបទទួលបានអំណាចនោះ—និងរបៀបប្រើវាដើម្បីផ្ដល់ពរដល់អ្នកដទៃ ។ ប្រហែលជាបងប្អូនអាចកត់ត្រាអ្វីដែលបងប្អូនរៀននៅក្នុងតារាងដែលមានស្លាកជួរឈរ អំណាចនៃស្ថានសួគ៌ និងអំណាចនៃលោកិយ ។ តើអំណាចទាំងពីរប្រភេទនេះខុសគ្នាយ៉ាងណា ? តើការពិពណ៌នាទាំងនេះអំពីអំណាចរបស់ព្រះអម្ចាស់បង្រៀនបងប្អូនអំពីទ្រង់អ្វីខ្លះ ?

បងប្អូនក៏អាចជញ្ជឹងគិតអំពី ឥទ្ធិពល លោកិយនៅក្នុង ខទី ៤១ ដែរ ។ តើស្ថានភាពមួយចំនួនណាខ្លះដែលបងប្អូនចង់ធ្វើជាឥទ្ធិពលសម្រាប់ការល្អ—ប្រហែលជានៅក្នុងទំនាក់ទំនងគ្រួសារ នៅសាលា នៅកន្លែងធ្វើការ ឬក្នុងការចាត់តាំងសាសនាចក្រ ? តើបងប្អូនរៀនអ្វីខ្លះមកពី ខ ៤១–៤៦ អំពីរបៀបដែលព្រះមានឥទ្ធិពលលើបុត្រាបុត្រីរបស់ទ្រង់ ? បងប្អូនអាចសង្ខេបអ្វីដែលបងប្អូនរៀនដោយបំពេញប្រយោគដូចនេះ ៖ « ដើម្បីមានឥទ្ធិពល សម្រាប់ការណ៍ល្អដែលខ្ញុំនឹង » ។

សូមមើលផងដែរ ជែហ្វ្រី អ័រ ហូឡិន « នោះមិនមែនដូចជាលោកីយ៍ឲ្យទេ » លីអាហូណា ខែ ឧសភា ឆ្នាំ ២០២១ ទំព័រ ៣៥–៣៨, ដេវីឌ អេ បែដណា « The Powers of Heaven » Liahona ខែ ឧសភា ឆ្នាំ ២០២១ ទំព័រ ៤៨–៥១ « The Powers of Heaven » ( វីដេអូ ) នៅលើបណ្ណាល័យដំណឹងល្អ ។

សូមជ្រើសរើសឃ្លាមួយ ហើយសិក្សាវាឲ្យស៊ីជម្រៅ ។ ដើម្បីស្វែងយល់បន្ថែមអំពីពរជ័យដ៏អស្ចារ្យដែលបានពិពណ៌នានៅក្នុង ខទី ៤៥–៤៦ នោះបងប្អូនអាចជ្រើសរើសឃ្លាដែលបងប្អូនចាប់អារម្មណ៍ ហើយសិក្សាវាឲ្យបានស៊ីជម្រៅ ។ ឧទាហរណ៍ តើពាក្យ តុបតែង មានអត្ថន័យយ៉ាងណា ហើយតើគុណធម៌តុបតែងគំនិតរបស់បងប្អូនដោយរបៀបណា ? ឬប្រហែលជាបងប្អូនអាចរករូបភាពទឹកសន្សើម ហើយរៀនអំពីរបៀបដែលទឹកសន្សើមកើតឡើងនៅលើរុក្ខជាតិ ។ តើការណ៍នេះស្រដៀងគ្នាទៅនឹងរបៀបដែលព្រះអម្ចាស់បង្រៀនគោលលទ្ធិរបស់ទ្រង់ដោយរបៀបណា ? សូមចែកចាយអ្វីដែលបងប្អូនរកឃើញជាមួយក្រុមគ្រួសារ ឬមិត្តភក្តិរបស់បងប្អូន រួមទាំងមិត្តភក្តិរបស់បងប្អូននៅព្រះវិហារផងដែរ ។

គោលលទ្ធិ និងសេចក្ដីសញ្ញា ១២២:៨

ព្រះយេស៊ូវគ្រីស្ទបានចុះទាបជាងអ្វីៗទាំងនោះ ដើម្បីទ្រង់អាចលើកខ្ញុំឡើង ។

តើបងប្អូនគិតថា វាមានន័យដូចម្តេចដើម្បីនិយាយថា ព្រះយេស៊ូវគ្រីស្ទ « បានចុះទាបជាង [ អ្វីៗ ] ទាំងនោះ » ? នេះគឺជាខគម្ពីរបន្ថែមមួយចំនួនដែលអាចជួយបងប្អូនឲ្យយល់ឃ្លានេះ ៖ អេសាយ ៥៣:៣–៤; ហេព្រើរ ២:១៧–១៨; នីហ្វៃទី១ ១១:១៦–៣៣; អាលម៉ា ៧:១១–១៣ ។ ដោយផ្អែកលើអ្វីដែលបងប្អូនបានរៀន សូមពិចារណាថាឡើងវិញនូវ គោលលទ្ធិ និងសេចក្តីសញ្ញា ១២២:៨ ជាពាក្យពេចន៍របស់បងប្អូនផ្ទាល់ ។ តើបងប្អូនអាចបង្ហាញការដឹងគុណរបស់បងប្អូនចំពោះព្រះយេស៊ូវគ្រីស្ទដែលបានចុះទាបជាងអ្វីៗទាំងនោះយ៉ាងដូចម្ដេច ?

តើការយល់ដឹងនេះពីប្រធាន ដាល្លិន អេក អូក មានឥទ្ធិពលដល់ការយល់ដឹងរបស់បងប្អូនយ៉ាងដូចម្តេច ? « យើងថែមទាំងអាចនិយាយបានថា ការបានយាងចុះទាបជាងការណ៍ទាំងអស់ នោះ [ ព្រះយេស៊ូវគ្រីស្ទ ] អាចឈរលើកយើងឡើងបានយ៉ាងល្អឥតខ្ចោះ ហើយប្រទានកម្លាំងដល់យើង ដែលយើងត្រូវការដើម្បីស៊ូទ្រាំការរងទុក្ខរបស់យើង » ( « Strengthened by the Atonement of Jesus Christ » Liahona ខែ វិច្ឆិកា ឆ្នាំ ២០១៥ ទំព័រ ៦៤ ) ។

ព្រះយេស៊ូវគ្រីស្ទកំពុងរងការឈឺចាប់នៅសួនច្បារគែតសេម៉ានី — ព័ត៌មានលម្អិតមកពី Not My Will But Thine [ កុំតាមចិត្តទូលបង្គំឡើយ សូមតាមតែព្រះហឫទ័យទ្រង់វិញ ] ដោយ វ៉លធើរ រ៉េន

គោលលទ្ធិ និងសេចក្តីសញ្ញា ១២៣

« ចូរយើងប្រព្រឹត្តការណ៍ទាំងនេះដែលនៅក្នុងអំណាចយើង ដោយមានចិត្តរីករាយចុះ » ។

នៅក្នុង គោលលទ្ធិ និងសេចក្តីសញ្ញា ១២៣:៧–៨ យ៉ូសែប ស្ម៊ីធ បានសំដៅទៅលើជំនឿមិនពិតដែលនាំទៅរកការរងទុក្ខ រួមទាំងការបៀតបៀនពួកបរិសុទ្ធផងដែរ ។ នៅខែ មីនា ឆ្នាំ ១៨៣៩ វាហាក់បីដូចជាគ្មានអ្វីដែលពួកបរិសុទ្ធអាចធ្វើបានអំពីស្ថានភាពនោះឡើយ ។ ប៉ុន្តែ នៅក្នុងសំបុត្ររបស់លោកមកពីគុកលិបើទី យ៉ូសែប បានប្រាប់អំពីអ្វីដែលពួកគេអាចធ្វើបាន ៖ « [ ប្រមូលទុក ] ជាសម្គាល់អំពីការពិត » និង« ឈរនៅស្ងៀម ដោយជឿជាក់ថានឹងបានឃើញសេចក្តីសង្គ្រោះពីព្រះ » ( គោលលទ្ធិ និងសេចក្តីសញ្ញា ១២៣:១, ១៧ ) ។ នៅពេលបងប្អូនពិចារណាពីបញ្ហានៅក្នុងពិភពលោកសព្វថ្ងៃនេះ សូមគិតអំពីវិធីដើម្បីដោះស្រាយបញ្ហាទាំងនោះ « នៅក្នុងអំណាច [ របស់បងប្អូន ] » ( ខទី ១២, ១៧ ) ។ ហើយសូមកុំមើលរំលង « ការណ៍នោះជាតូចឡើយ » ( ខទី ១៥ ) ។ ហេតុអ្វីបានជាវាសំខាន់ដែលត្រូវធ្វើការណ៍ទាំងនេះដោយ « រីករាយ » ? ( ខទី ១៧ ) ។

ដំណើររឿងជាច្រើនដែល យ៉ូសែប ស្ម៊ីធ បានដាក់ស្នើសុំនៅក្នុងសំបុត្រនេះដែលបានដាក់ជូនទៅរដ្ឋាភិបាល ហើយបានបោះពុម្ភចំនួន ១១ ផ្នែកតៗគ្នានៅក្នុងកាសែត ណៅវ៉ូ Times and Seasons ( សូមមើល « A History, of the Persecution, of the Church of Jesus Christ, of Latter Day Saints in Missouri, December 1839–October 1840 » [ josephsmithpapers.org ] ) ។

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

គោលលទ្ធិ និងសេចក្តីសញ្ញា ១២១:១–៩; ១២២:៧–៩

ដោយមានព្រះ នោះឧបសគ្គរបស់ខ្ញុំអាចទៅជាការល្អដល់ខ្ញុំវិញ ។

ដើម្បីជួយកុមាររបស់បងប្អូនឲ្យស្រមៃមើលថា តើវានឹងទៅជាយ៉ាងណាសម្រាប់ យ៉ូសែប ស្ម៊ីធ និងមិត្តភក្តិរបស់លោកនៅក្នុងគុកលិបើទី បងប្អូនអាចអានជាមួយគ្នានូវ « ជំពូកទី ៤៦ ៖ យ៉ូសែប ស៊្មីធ នៅក្នុងគុកលិបើទី » ( នៅក្នុង ដំណើររឿងព្រះគម្ពីរគោលលទ្ធិ និងសេចក្តីសញ្ញា ទំព័រ ១៧២–១៧៤ ) ឬ « Voices of the Restoration: Liberty Jail » ឬផ្នែកនៃវីដេអូ « Joseph Smith: Prophet of the Restoration » ( បណ្ណាល័យដំណឹងល្អ ដោយចាប់ផ្ដើមពី ៤១:៣០ ) ។ បន្ទាប់មក នៅពេលបងប្អូនអានជាមួយគ្នា គោលលទ្ធិ និងសេចក្តីសញ្ញា ១២១:១–៩ នោះបងប្អូនអាចនិយាយអំពីរបៀបដែលព្រះអង្គសង្គ្រោះបានជួយយ៉ូសែបឲ្យទទួលអារម្មណ៍នៃសេចក្តីសុខសាន្ត ។ តើយើងរកឃើញសេចក្តីសុខសាន្តក្នុងព្រះអង្គសង្គ្រោះដោយរបៀបណា សូម្បីតែក្នុងគ្រាលំបាកក្តី ?

1:51
Chapter 46: Joseph Smith in Liberty Jail: November 1838–April 1839

62:4
Joseph Smith: The Prophet of the Restoration
ដើម្បីជួយកុមាររបស់បងប្អូនឲ្យស្គាល់ថា ឧបសគ្គរបស់យើងអាច « ជាការល្អដល់ [ យើង ] ទៅវិញ » ( គោលលទ្ធិ និងសេចក្តីសញ្ញា ១២២:៧ ) សូមនិយាយជាមួយពួកគេអំពីរបៀបដែលសាច់ដុំរបស់យើងឡើងធំ នៅពេលយើងលីរបស់ធ្ងន់ៗ ។ បងប្អូនអាចថែមទាំងអាចអញ្ជើញពួកគេឲ្យលើកវត្ថុធ្ងន់មួយ ។ បន្ទាប់មក បងប្អូនអាចពន្យល់អំពីរបៀបការឆ្លងកាត់ពេលលំបាកអាចជួយឲ្យវិញ្ញាណរបស់យើងរីកចម្រើន—នៅពេលយើងងាកទៅរកជំនួយពីព្រះអម្ចាស់ ។ សូមចែកចាយឧទាហរណ៍ខ្លះៗចេញពីជីវិតរបស់បងប្អូន ។

គោលលទ្ធិ និងសេចក្តីសញ្ញា ១២១:៣៤–៤៦

សេចក្តីសុចរិតនាំមកនូវ « អំណាចនៃស្ថានសួគ៌ » ។

ប្រហែលការប្រៀបប្រដូចមួយអាចជួយកុមាររបស់បងប្អូនឲ្យយល់អំពី « អំណាចនៃស្ថានសួគ៌ » ។ ឧទាហរណ៍ បងប្អូនអាចប្រៀបធៀបអំណាចរបស់ព្រះ ដូចជាថាមពលអគ្គីសនី ។ តើអ្វីអាចរារាំងឧបករណ៍អគ្គិសនីពីការទទួលថាមពល ? តើអ្វីធ្វើឲ្យកម្លាំងខាងវិញ្ញាណរបស់យើងថយចុះ ? តើអ្វីដែលធ្វើឲ្យវាកើនឡើង ? ( សូមរកមើលពាក្យ និងឃ្លាក្នុង គោលលទ្ធិ និងសេចក្តីសញ្ញា ១២១:៣៤–៤៦; សូមមើលផងដែរ ក្បួនខ្នាត ៣.៥, ៣.៦ បណ្ណាល័យដំណឹងល្អ ) ។

គោលលទ្ធិ និងសេចក្តីសញ្ញា ១២២:៧–៩

ព្រះយេស៊ូវគ្រីស្ទជ្រាបដឹងពីអ្វីដែលខ្ញុំកំពុងឆ្លងកាត់ ។

បន្ទាប់ពីអាន គោលលទ្ធិ និងសេចក្តីសញ្ញា ១២២:៧–៩ ជាមួយកុមាររបស់បងប្អូនហើយ នោះបងប្អូនអាចចែកចាយបទពិសោធន៍មួយ នៅពេលបងប្អូនមានអារម្មណ៍ថា ព្រះអង្គសង្គ្រោះគង់នៅជាមួយបងប្អូនអំឡុងពេលសាកល្បងដ៏លំបាកមួយ ។ បងប្អូនអាចច្រៀងជាមួយគ្នាផងដែរនូវបទចម្រៀងដូចជា « គ្រាមួយកាលព្រះយេស៊ូវនៅតូច » ( សៀវភៅចម្រៀងកុមារ ទំព័រ ៣៤ ) ហើយថ្លែងទីបន្ទាល់ថា ព្រះយេស៊ូវគ្រីស្ទអាចជួយយើងបាន ពីព្រោះទ្រង់ជ្រាបដឹងពីអារម្មណ៍របស់យើង ។

គោលលទ្ធិ និងសេចក្ដីសញ្ញា ១២៣:១៥–១៧

សូម្បីតែរឿងតូចតាចក៏អាចធ្វើឲ្យមានភាពខុសគ្នាយ៉ាងខ្លាំងក្នុងការបម្រើព្រះដែរ ។

ដើម្បីជួយកុមាររបស់បងប្អូនយល់ គោលលទ្ធិ និងសេចក្តីសញ្ញា ១២៣:១៥–១៧ បងប្អូនអាចចែកចាយជាមួយពួកគេនូវរូបភាពកប៉ាល់ធំមួយ និងចង្កូតតូច ឬចែកចាយជាមួយពួកគេនូវការពន្យល់របស់អែលឌើរ ដេវីឌ អេ បែដណា នៅក្នុង « គោលការណ៍ទាំងឡាយនៃដំណឹងល្អរបស់យើង » ( លីអាហូណា ខែ ឧសភា ឆ្នាំ ២០២១ ទំព័រ ១២៥–១២៦ ) ។ បន្ទាប់មក បងប្អូនអាចនិយាយអំពីវិធីតូចៗដែលយើងអាចបម្រើគ្រួសារ និងមិត្តភក្តិរបស់យើងដោយរីករាយ ។

រូបភាពកប៉ាល់នៅសមុទ្រ — ដូចជាចង្កូតតូចមួយនៃកប៉ាល់ធំ ការខិតខំប្រឹងប្រែងតូចៗរបស់យើងអាចធ្វើឲ្យមានការផ្លាស់ប្តូរដ៏ធំមួយ ។

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

យ៉ូសែប ស៊្មីធ បានកត់ត្រាវិវរណៈនៅក្នុងគុកលិបើទី — Joseph Smith in Liberty Jail [ យ៉ូសែប ស្ម៊ីធ នៅក្នុងគុកលិបើទី ] ដោយហ្គ្រេគ អូលសិន