Nauvoo the Beautiful, jān Larry C. Winborg. Copyright 2023

Oktoba 27–Nobōm̧ba 2: “Juon Em̧ n̄an Eta”

Katak im Bujen Ko 124

Jekdo̧o̧n iiō ko jiljino rekar pen n̄an Armej ro Rekwojarjar, men ko rekar jino em̧m̧anļo̧k ilo spring eo ilo 1839: Armej ro Rekwojarjar me rejipo̧kwe rekar loe jouj in tūriam̧o ilubwiljin armej ro ilo Quincy, Illinois. Riwaj ro rekar kōtļo̧k an Josep Smith im ritōl ro jet an Kabun̄ in ko jān kam̧akoko ilo Missouri. Bwe Kabun̄ in ej kab m̧ōj an kar wiaiki juon jikin ilo Illinois ijo Armej ro Rekwojarjar remaron̄ bar aiin doon ie. Aaet, ekar lukkuun epatpat e, jikin eo eobrak kōn ņam, ak keidi n̄an apan̄ ko me Armej ro Rekwojarjar rekar iooni, menin rekar anjo̧ jāni. Kōn menin rekar joļo̧k dān ko jān pat eo im rekar je juon aer jemānāe n̄an jikin eo aer ekāāl, eo rekar ņa etan Nauvoo. Ej meļeļein “aiboojoj” ilo kajin Hibru, men̄e ekar ļap aer kōjerbale n̄an kwaļo̧k tōmak ijjeļo̧kin juon kōmeļeļe eo ejejjet, ilo m̧okta jidik. Ejja wōt ilo iien in, Irooj ekar kajjieon̄ kōmeļeļeik Rikanaan eo An n̄an kōm̧akajļo̧k jerbal ko an. E ekar lōn̄ļo̧k m̧ool im kain̄i ko n̄an kōjepļaaki, im E ekar aikuji juon tampeļ ekwojarjar ijo E emaron̄ “kūrawūni [Rikwojarjar ro An] kōn utiej, mour ejjeļo̧k jem̧ļo̧kin, im mour indeeo” (Katak im Bujen Ko 124:55) Ilo elōn̄ wāween ko, ejja en̄jake kein wōt kōn tōmak n̄an kōm̧ōkajļo̧k jerbal in an Irooj rainin

Lale Armej ro Rekwojarjar, 1:399–427; “Organizing the Church in Nauvoo,” ilo Revelations in Context, 264–71.

Ekkatak eļapļo̧k kōn bwebwenato ko an Kabun̄ in ilo Illinois.

Ļōmņak ko n̄an Ekkatak ilo M̧weeo im ilo Kabun̄ in

Katak im Bujen Ko 124:2–11

Imaron̄ karuwaineneik ro jet n̄an itok n̄an Kraist?

Irooj eaar jiron̄ Rikanaan Josep Smith n̄an “kōm̧m̧ane juon kean̄ ekwojarjar kōn gospel eo [An]” n̄an “aolep kiin̄ ro an laļ” (lale Katak im Bujen Ko 124:2–11). N̄e kwonaaj bōk jerbal in, ta naan in kean̄ eo am̧ enaaj ba kōn Jisōs Kraist im gospel eo An em̧ōj an jepļaaktok? Bar lale elmen am̧ maron̄ kwaļo̧k kam̧ool eo am̧ n̄an armej ro kwoj ioone er aolep raan.

Bar lale “Jepļaaktok eo an Tarlep in Gospel eo an Jisōs Kraist: Juon Naan in Kean̄ n̄an Laļ in,” Gospel Library.

Katak im Bujen Ko 124:12–21

Imaron̄ erom̧ juon rikaļoor eo Irooj ej lōke.

Ļōmņak in kwaļo̧k n̄an ro jet, āinwōt an kar Rilo̧mo̧o̧r kōm̧m̧ane ilo Katak im Bujen Ko 124:12–21, m̧wiļ ko āinwōt an Kraist kwoj lo ippāer. Ekōjkan An kwaļo̧k n̄an eok iakwe im lōke eo An?

Bar lale Richard J. Maynes, “Bōk Lōke eo an Irooj im Baam̧le eo Am,” Liaona, Nob. 2017, 75–77.

Katak im Bujen Ko 124:22–24, 60–61

Irooj ekōņaan bwe in karuwaineneik im m̧ōņōņō kōn ro jet.

Ilo am̧ lin̄ūri katak eo an Irooj ilo Katak im Bujen Ko 124:22–24, 60–61, ļōmņak elmen am̧ maron̄ kōm̧m̧an bwe m̧weeo im̧ōm̧ im ward eo am̧ ren āinwōt jikin ko Irooj eaar pijaikļo̧k ilo Nauvoo.

Bar lale “A Friend to All” (video), ChurchofJesusChrist.org.

A Friend to All

Elder Ulisses Soares talks of the need for kindness and acceptance.

Kōmeļeļe ko jān Joseph Smith at the Nauvoo Temple, jān Gary E. Smith

Katak im Bujen Ko 124:25–45, 55

Jej ekkal tampeļ n̄an Irooj n̄an bōk kain̄i ko rekwojarjar.

Etke kwoj en̄jake ke Irooj ekar “iien otemjej jiron̄” armej ro An “n̄an kalōke [tampeļ ko] n̄an [Etan] ekwōjarjar”? Ļōm̧ņak in kōm̧m̧ane juon laajrak in un ko kwoj loi ilo Katak im Bujen Ko 124:25–45, 55. Kwomaron̄ lo ko jet ilo juon al āinwōt in “We Love Thy House, O God” (Hymns, no. 247) ak pijaan alooj eo “What Is a Temple?” (Gospel Ļāibrāre). Elmen an jerbal in ekkal tampeļ āinwōt juon kōkaļļein iakwe eo an Irooj n̄an kwe?

What Is a Temple?

The difference between chapels, where Latter-day Saints meet for regular Sunday worship, and temples is also explained.

Jān tōre eo Nauvoo Tampeļ ekar ekkal ilo 1840 eo, elōn̄ļo̧k jān 300 tampeļ ko em̧ōj aer ekkal ak kar kōjeļļā kaki. Būreejtōn Russell M. Nelson ekar katakin: “Jekar jeļā bwe iien ko am ilo tampeļ ekar lukkuun aorōk n̄an lo̧mo̧o̧r eo am im mour eo eutiejtata im n̄an aolepān baam̧le eo am. … Kakure ko an rikapo eo reļapļo̧k, ilo kajoor im ilo elōn̄ wāween ko. Ad aikuj pād ilo tampeļ eo ilo kajjojo iien ej jan̄in kar ļapļo̧k” (“Erom̧ Riwaanjon̄ak ro rej Armej ro Rekwojarjar ilo Raan Ko Āliktata,” Liaona, Nob. 2018, 114). Elmen an tampeļ eo kar jipan̄ eok jelm̧ae “ankamājur ko an rinana eo”? Ta eo kwar en̄jake ej im̧we eok n̄an kōm̧m̧ane n̄an ļoor kapilōk eo an Būreejtōn Nelson?

Bar lale “Why Latter-day Saints Build Temples,” temples.ChurchofJesusChrist.org.

Katak im Bujen Ko 124:45–55

Irooj ej kōjeraam̧m̧an ro me rej kajjieon̄ pokake kien ko An.

Kar kakien Armej ro Rekwojarjar n̄an kalōk juon tampeļ ilo Jackson County, Missouri, bōtaab “kar pinej er jān rikōjdāt ro aer” (Katak im Bujen Ko 124:51). Eoon 49–55 epād ie juon ennaan in kaenōm̧m̧an n̄an armej ro rekōņaan pokake kien ko an Anij ak jekjek ko an baam̧le ak ko jet rej bōbrae er. Ta kapilōk eo jej loe ilo eoon kein me emaron̄ jipan̄ juon eo epād ilo kain jekjek rōt in?

Katak im Bujen Ko 124:91–92

Irooj emaron̄ tōl eō kōn kōjeraam̧m̧an in petriak eo aō.

Ejjab to ālkin an jemān Rikanaan eo, Josep Smith Sr., mej, Irooj eaar kūr Hyrum Smith n̄an kūr eo an kar jemān—Petriak eo an Kabun̄ in. Kwomaron̄ riit kōn menin ilo Katak im Bujen Ko 124:91–92.

N̄an ekkatak eļapļo̧k kōn bwebwenato in petriak ro im kōjeraam̧m̧an in petriak ko, jiped ijin.

Elmen am̧ naaj kar kōmeļeļe kōn kōjeraam̧m̧an in petriak n̄an juon eo me ejan̄in kar ron̄ kake? Ta eo kwon kar ba n̄an kōketak juon armej n̄an bōk juon? Pukot uwaak ko n̄an kajjitōk kein ilo enaan eo an Elder Randall K. Bennet “Kōjeraam̧m̧an an Petriak eo Am—Im̧we in Tōl jān Jemedwōj Ilan̄” (Liaona, Māe 2023, 42–43) ak Topics and Questions, “Patriarchal Blessings” (Gospel Library).

Pedped ioon ta ko kwaar ekkatak im en̄jake, ļōmņak elmen am̧ maron̄ kadedeļo̧k jantōj in: “Juon kōjeraam̧m̧an an petriak ej āinwōt .” Etke Jemedwōj Ilan̄ ekōņaan bwe ajri ro Nejin ren bōk juon kōjeraam̧m̧an in petriak?

N̄e kwon kar jab bōk juon kōjeraam̧m̧an in petriak, ta eo kwon kar kōm̧m̧ane n̄an keppopo n̄an bōke? Eļan̄n̄e kwaar bōk juon kōjeraam̧m̧an in petriak, ekōjkan am̧ maron̄ kwaļo̧k n̄an Anij ke kwoj kaorōk mennin letok in?

Bar lale Kazuhiko Yamashita, “N̄aat Kwoj Bōk Petriak Kōjeraam̧m̧an Eo Am̧,” Liaona, Māe 2023, 88–90; Bok in Bōk Meļeļe Eļap, 18.17, Gospel Library.

Katakin jān bōro. Katakin ej meļeļe eo eļap tokjen n̄e juon ej kobaik naan in kam̧ool eo an. N̄an waanjon̄ak, eļan̄n̄e em̧ōj am̧ bōk juon kōjeraam̧m̧an in petriak, etale ilo am̧ keppopo n̄an katakin kōjeraam̧m̧an kein rejenolo̧k. Etke kwoj kam̧m̧oolol kōn kōjeraam̧m̧an eo am̧? Ekōjkan am̧ naaj im̧we ro jet n̄an keppopo n̄an bōki ko aer ak ikutkut ekkatak kōn kōjeraam̧m̧an an petriak?

Ļōmņak ko n̄an Katakin Ajri ro

Katak im Bujen Ko 124:15, 20

Jisōs Kraist ej iakwe m̧ool.

• N̄an jipan̄ ajri ro keememej ta eo raar ekkatak jān Katak im Bujen Ko 124:15, 20, kwomaron̄ jipan̄ er jin̄a im m̧wijit pepa in annan̄in menono ko. Ioon annan̄in menono ko, kwomaron̄ jipan̄ er je naan ko raorōk jān eoon kein. Juon al āinwōt “Stand for the Right” (Children’s Songbook, 159) emaron̄ jipan̄ kapenļo̧k naan ko an Irooj.

• Ālkin riit ippān doon Katak im Bujen Ko 124:15, 20, bōlen kwomaron̄ jipan̄ ajri ro pukot ta meļeļein n̄an mour kōn m̧ool ilo peij 31 ilo N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko. Ta eo Irooj ekar ba kōn George Miller ilo eoon 20 “kōnke m̧ool eo an būruōn [George]”? Kwomaron̄ bar kwaļo̧k waanjon̄o̧k ko n̄an an ajri ro kwaļo̧k m̧ool jen en̄jake eo am make ak jān Friend māākjiin. Karuwaineneik ajri ro n̄an kōm̧m̧an kōtōpar ko n̄an kwaļo̧k m̧ool wiik in im jiron̄ eok kōn aer kar en̄jake ke raar kōm̧m̧ane.

Katak im Bujen Ko 124:28–29, 39

Jisōs eaar jiron̄ armej ro An n̄an kalōk tampeļ ko.

• Ajri ro remaron̄ m̧ōņōņō in kalimjōk pijaan tampeļ ko, ekoba juon tampeļ in etto im juon tampeļ epaake ijo rej jokwe ie (lale ChurchofJesusChrist.org/temples/list Kwomaron̄ kōjerbal pija kein im Katak im Bujen Ko 124:39 n̄an kōmeļeļe bwe Jisōs Kraist aolep iien E kar kakien armej ro An n̄an ekkal tampeļ ko—ilo iien ko etto im ilo raan kein ad (bar lale peij in m̧akūtkūteo an wiik in).

• N̄e kwoj jokwe epaake juon tampeļ, ļōmņak in bōk ajri ro n̄an ijo im etetal ilo meļaaj in tampeļ in ilo kautiej. Karuwaineneik er n̄an pukot naan ko “Holiness to the Lord—The House of the Lord” ilo nam̧ojin tampeļ eo. Kōnono ippān ajri ro kōn ta meļeļein naan kein.

• Ļōmņak in kōjerbal ļōmņak eo ilo “Being Baptized and Confirmed for Ancestors” ilo appendix A n̄an jipan̄ ajri ro reim̧aanļo̧k n̄an raan eo me remaron̄ deļo̧n̄e tampeļ (bar lale “The Temple and the Plan of Happiness” ilo appendix B).

Solomon’s Temple, jān Sam Lawlor

Katak im Bujen Ko 124:91–92

Irooj enaaj kōjeraam̧m̧an eō jān juon kōjeraam̧m̧an an petriak.

• Ilo ami riit ippān doon Katak im Bujen Ko 124:91–92, jipan̄ ajri ro pukot ta eo Irooj ekar kūr Hyrum Smith n̄an kōm̧m̧ane. Kōnono kōn ta in kōjeraam̧m̧an an petriak: juon kōjeraam̧m̧an ejenolo̧k me Irooj ej katakin kōj kōn kōj make im ta eo E kōņaan bwe jen kōm̧m̧ane im erom̧. Ļōmņak n̄an kōjerbal jekjōn “Receiving a Patriarchal Blessing” ilo appendix A n̄an jipan̄ ajri ro keppopo n̄an bōk juon kōjeraam̧m̧an in petriak.

N̄an ļōmņak ko reļļapļo̧k, lale ennaan eo an allōn̄ in ilo eo Jeramāākjin.

The Nauvoo Temple, jān George D. Durrant