« ថ្ងៃទី ១៦–២២ ខែ តុលា ។ ថែស្សាឡូនីច ទី១ និង ទី២ ៖ ‹ បំពេញសេចក្តីអ្វីដែលខ្វះ ខាងឯសេចក្តីជំនឿរបស់អ្នករាល់គ្នា › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ១៦–២២ ខែ តុលា ។ ថែស្សាឡូនីច ទី១ និង ទី២ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២៣
ថ្ងៃទី ១៦–២២ ខែ តុលា
ថែស្សាឡូនីច ទី១ និង ទី២
« បំពេញសេចក្តីអ្វីដែលខ្វះ ខាងឯសេចក្តីជំនឿរបស់អ្នករាល់គ្នាផង »
បើយើងមិនបានកត់ត្រាចំណាប់អារម្មណ៍ដែលយើងបានទទួលមកពីព្រះវិញ្ញាណទេ នោះយើងអាចនឹងភ្លេចវា ។ តើព្រះវិញ្ញាណបំផុសគំនិតបងប្អូនឲ្យកត់ត្រាអ្វីខ្លះ នៅពេលបងប្អូនអាន ថែស្សាឡូនីច ទី១ និង ទី២ ?
កត់ត្រាចំណាប់អារម្មណ៍របស់បងប្អូន
នៅក្នុងក្រុងថែស្សាឡូនីច ប៉ុល និងស៊ីឡាបានត្រូវគេចោទប្រកាន់ថា « នាំឲ្យក្រឡាប់ផែនដី » ( កិច្ចការ ១៧:៦ ) ។ ការផ្សាយរបស់ពួកគេបានធ្វើឲ្យពួកអ្នកដឹកនាំមួយចំនួននៅក្នុងចំណោមពួកយូដាខឹង ហើយពួកអ្នកដឹកនាំទាំងនេះបានចាក់រុកប្រជាជនឲ្យមានកំហឹង ( សូមមើល កិច្ចការ ១៧:១–១០ ) ។ ជាលទ្ធផល ប៉ុល និងស៊ីឡាត្រូវបានគេឲ្យចេញពីក្រុងថែស្សាឡូនីច ។ ប៉ុលបានបារម្ភអំពីអ្នកផ្លាស់ប្រែចិត្តជឿនៅក្រុងថែស្សាឡូនីចថ្មីៗ និងការបៀតបៀនដែលពួកគេកំពុងជួបប្រទះ ប៉ុន្តែលោកពុំអាចត្រឡប់មកជួបពួកគេវិញបានទេ ។ លោកបានសរសេរថា « កាលខ្ញុំទ្រាំមិនបានទៀត នោះខ្ញុំបានចាត់គាត់មកឲ្យបានដឹងពីសេចក្ដីជំនឿរបស់អ្នករាល់គ្នា » ។ ជាការឆ្លើយតបនោះធីម៉ូថេដែលជាជំនួយការរបស់ប៉ុល ដែលបានកំពុងបម្រើនៅក្រុងថែស្សាឡូនីចបាន « នាំដំណឹងល្អពីសេចក្ដីជំនឿ និងសេចក្ដីស្រឡាញ់របស់អ្នករាល់គ្នាទៅប្រាប់យើងខ្ញុំផង » ( ថែស្សាឡូនីច ទី១ ៣:៥–៦ ) ។ តាមពិត ពួកបរិសុទ្ធថែស្សាឡូនីចត្រូវបានគេស្គាល់ថាជាគំរូ « ដល់អស់អ្នកដែលជឿ » ( ថែស្សាឡូនីច ទី១ ១:៧ ) ហើយដំណឹងអំពីសេចក្ដីជំនឿរបស់ពួកគេបានផ្សាយទៅទីក្រុងឆ្ងាយៗជាច្រើន ។ សូមនឹកស្រមៃអំពីអំណរ និងភាពធូរស្បើយរបស់ប៉ុលនៅពេលស្ដាប់ឮថាការងាររបស់លោកនៅក្នុងចំណោមពួកគេ « មិនមែនជាឥតកើតផល » នោះឡើយ ( ថែស្សាឡូនីច ទី១ ២:១ ) ។ ប៉ុន្ដែប៉ុលបានដឹងថា ភាពស្មោះត្រង់កាលពីអតីតកាលគឺពុំល្មមគ្រប់គ្រាន់ដើម្បីរស់រានមានជីវិតខាងវិញ្ញាណនៅក្នុងពេលអនាគតកាលនោះទេ ហើយលោកប្រយ័ត្នចំពោះឥទ្ធិពលរបស់គ្រូបង្រៀនខុសឆ្គងនៅក្នុងចំណោមពួកបរិសុទ្ធ ( សូមមើល ថែស្សាឡូនីច ទី២ ២:២–៣ ) ។ សារលិខិតរបស់លោកចំពោះពួកគេ និងចំពោះពួកយើងគឺត្រូវបន្ដ « ឲ្យបានបំពេញសេចក្ដីអ្វីដែលខ្វះខាងឯសេចក្ដីជំនឿ [ របស់យើង ] » និងដើម្បីមានសេចក្ដីស្រឡាញ់ « កាន់តែខ្លាំងឡើងចុះ » ( សូមមើល ថែស្សាឡូនីច ទី១ ៣:១០; ៤:១០ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
សិស្សរបស់ព្រះគ្រីស្ទបម្រើអ្នកដទៃទៀតដោយភាពស្មោះត្រង់ និងសេចក្ដីស្រឡាញ់ ។
នៅក្នុង ថែស្សាឡូនីច ទី១ ពាក្យសម្ដីរបស់ប៉ុលបានបង្ហាញទាំងកង្វល់ និងអំណរអំពីនរណាម្នាក់ដែលបានថ្វាយខ្លួនគេទាំងស្រុងក្នុងការបម្រើដល់បុត្រាបុត្រីរបស់ព្រះ ។ ជាពិសេសនៅក្នុងជំពូកពីរដំបូងនៃគម្ពីរ ថែស្សាឡូនីច ទី១ បងប្អូននឹងរកឃើញពាក្យ និងឃ្លាទាំងឡាយដែលពិពណ៌នាអំពីឥរិយាបទ និងសកម្មភាពនៃសិស្សរបស់ព្រះអម្ចាស់ ។ ឧទាហរណ៍ តើបងប្អូនរៀនអ្វីខ្លះចេញមកពី ថែស្សាឡូនីច ទី១ ១:៥–៨; ២:១–១៣ អំពីការបម្រើព្រះអម្ចាស់ ?
សូមគិតអំពីឱកាសរបស់បងប្អូនដើម្បីបម្រើព្រះ និងបុត្រាបុត្រីរបស់ទ្រង់ ។ តើបងប្អូនរកឃើញអ្វីខ្លះនៅក្នុងជំពូកទាំងនេះ ដែលបំផុសគំនិតបងប្អូនឲ្យកែលម្អការបម្រើរបស់បងប្អូន ? សូមពិចារណាសួរខ្លួនឯងនូវសំណួរទាំងឡាយ ដោយផ្អែកលើអ្វីដែលបងប្អូនរកឃើញ ដូចជា « តើខ្ញុំជាគំរូអំពីអ្វីៗដែលខ្ញុំដឹងដែរឬទេ ? » ( សូមមើល ថែស្សាឡូនីច ទី១ ១:៧ ) ។
ថែស្សាឡូនីច ទី១ ៣:៧–១៣; ៤:១–១២
« ចម្រើនសេចក្តីស្រឡាញ់របស់អ្នករាល់គ្នាឲ្យបានពេញពោរហូរហៀរ » ។
ប៉ុលរីករាយនឹងភាពស្មោះត្រង់របស់ពួកបរិសុទ្ធថែស្សាឡូនីច ( សូមមើល ថែស្សាឡូនីច ទី១ ៣:៧–៩ ) ។ ប៉ុន្តែលោកក៏ចង់ឲ្យពួកគេមានភាពស្មោះត្រង់នោះ « កាន់តែខ្លាំងឡើង » ( ថែស្សាឡូនីច ទី១ ៤:១ ) ។ កាលដែលបងប្អូនអាន ថែស្សាឡូនីច ទី១ ៣:៧–១៣; ៤:១–១២ សូមសញ្ជឹងគិតពីរបៀបដែលបងប្អូនអាចចម្រើន « កាន់តែខ្លាំងឡើង » ខាងវិញ្ញាណ ( ថែស្សាឡូនីច ទី១ ៤:១០ ) ។ ឧទាហរណ៍ សូមកត់សម្គាល់ថា ប៉ុលបានប្រើពាក្យដូចជា « សេចក្តីបរិសុទ្ធ » និង « ញែកជាបរិសុទ្ធ » ។ តើបងប្អូនរៀនអ្វីខ្លះមកពីការសរសេររបស់ប៉ុលអំពីអត្ថន័យនៃពាក្យទាំងនោះ ? តើព្រះអង្គសង្គ្រោះអាចជួយបងប្អូនឲ្យប្រែកាន់តែបរិសុទ្ធ និងញែកចេញជាបរិសុទ្ធដោយរបៀបណា ?
សូមមើលផងដែរ សេចក្តីណែនាំដល់បទគម្ពីរទាំងឡាយ « បរិសុទ្ធ » « ញែកជាបរិសុទ្ធ, ការញែកជាបរិសុទ្ធ » នៅលើគេហទំព័រ scriptures.ChurchofJesusChrist.org ។
ថែស្សាឡូនីច ទី១ ៤:១៦–១៨; ៥:១–១០; ថែស្សាឡូនីច ទី២ ១:៤–១០
បើខ្ញុំស្មោះត្រង់ ហើយប្រុងប្រយ័ត្ន នោះខ្ញុំនឹងបានត្រៀមខ្លួនសម្រាប់ការយាងមកជាលើកទីពីររបស់ព្រះអង្គសង្គ្រោះ ។
នៅក្នុង ថែស្សាឡូនីច ទី១ ៥:១–១០ ប៉ុលបានប្រើការប្រៀបធៀបជាច្រើនដើម្បីបង្រៀនអំពីពេលវេលាដែលព្រះយេស៊ូវនឹងយាងត្រឡប់មកកាន់ផែនដីវិញ ។ នៅពេលបងប្អូនសិក្សាពាក្យប្រៀបធៀបទាំងនេះ សូមពិចារណាធ្វើការកត់ត្រាទុកនូវចំណាប់អារម្មណ៍ដែលបងប្អូនទទួលបានអំពីការយាងមកជាលើកទីពីររបស់ព្រះយេស៊ូវគ្រីស្ទ ។
-
« ចោរមកនៅពេលយប់ » ៖
-
« ស្ត្រីមានគត៌ឈឺនឹងសម្រាល » ៖
-
ពាក្យប្រៀបធៀបផ្សេងទៀតដែលបងប្អូននឹងរកឃើញ ៖
តើសេចក្ដីពិតបន្ថែមទៀតអ្វីខ្លះដែលបងប្អូនរៀនចេញមកពី ថែស្សាឡូនីច ទី១ ៤:១៦–១៨; ៥:១–១០; ថែស្សាឡូនីច ទី២ ១:៤–១០ ? តើបងប្អូនត្រូវបានបំផុសគំនិតឲ្យធ្វើអ្វីខ្លះ ដើម្បីចាំមើល ហើយរៀបចំខ្លួនសម្រាប់ការយាងមករបស់ព្រះអង្គសង្គ្រោះ ?
សូមមើលផងដែរ ឌី ថត គ្រីស្តូហ្វឺសិន « Preparing for the Lord’s Return » Liahona ខែ ឧសភា ឆ្នាំ ២០១៩ ទំព័រ ៨១–៨៤ ។
ការក្បត់សាសនា ឬការធ្លាក់ចុះចេញពីសេចក្ដីពិតត្រូវបានព្យាករថាកើតមាននៅពីមុនការយាងមកជាលើកទីពីរ ។
នៅក្នុងកណ្ដាលការបៀតបៀនកាន់តែច្រើនឡើង នោះមានពួកបរិសុទ្ធថែស្សាឡូនីចជាច្រើនបានជឿថា ការយាងមកជាលើកទីពីររបស់ព្រះអង្គសង្គ្រោះប្រាកដជាជិតមកដល់ហើយ ។ ប៉ុន្ដែប៉ុលបានដឹងថា ពីមុនព្រះយេស៊ូវយាងត្រឡប់មកកាន់ផែនដីវិញ នោះនឹងមានការក្បត់សាសនាមួយកើតឡើង—ជាការបះបោរ ឬ « ការធ្លាក់ចុះចេញ » ពីសេចក្ដីពិត ( សូមមើល ថែស្សាឡូនីច ទី២ ២:១–៤ ) ។ បងប្អូនអាចយល់ដឹងកាន់តែជ្រៅជ្រះអំពីការក្បត់សាសនាដ៏ធំ—និងកាន់តែមានអំណរគុណចំពោះការស្ដារឡើងវិញ—តាមរយៈការសញ្ជឹងគិតអំពីចំណុចមួយចំនួនដូចខាងក្រោម ៖
-
បទគម្ពីរដែលទាយទុកជាមុនអំពីការក្បត់សាសនា ៖ អេសាយ ២៤:៥; អេម៉ុស ៨:១១–១២; ម៉ាថាយ ២៤:៤–១៤; ធីម៉ូថេ ទី២ ៤:៣–៤
-
បទគម្ពីរដែលបង្ហាញអំពីការក្បត់សាសនាបានចាប់ផ្ដើមរួចទៅហើយនៅក្នុងជំនាន់របស់ប៉ុល ៖ កិច្ចការ ២០:២៨–៣០; កាឡាទី ១:៦–៧; ធីម៉ូថេ ទី១ ១:៥–៧
-
ការអង្កេតមើលអំពីការក្បត់សាសនាដ៏ធំដោយពួកអ្នកកែទម្រង់អ្នកកាន់គ្រិស្ដសាសនា ៖
ម៉ាទីន លូធើរ ៖ « ខ្ញុំពុំបានព្យាយាមធ្វើអ្វីក្រៅពីកែទម្រង់ព្រះវិហារឲ្យស្របតាមព្រះគម្ពីរបរិសុទ្ធនោះទេ ។ … ខ្ញុំនិយាយដោយសាមញ្ញថា គ្រិស្ដសាសនាបានឈប់មានវត្តមាននៅក្នុងចំណោមអ្នកទាំងឡាយដែលគួរតែបានរក្សាវាទុកនោះរួចទៅហើយ » ( នៅក្នុង E. G. Schweibert, Luther and His Times: The Reformation from a New Perspective [ ឆ្នាំ ១៩៥០ ] ទំព័រ ៥៩០ ) ។
រ៉ូជើរ វិល្លាម ៖ « ការក្បត់សាសនា … បានបំផ្លាញអ្វីៗបាត់អស់ទៅហើយ ដែលពុំអាចបានសង្គ្រោះចេញពីការក្បត់សាសនាបានឡើយ ទាល់តែព្រះគ្រីស្ទបញ្ជូនពួកសាវកថ្មីឲ្យមករៀបចំព្រះវិហារសារជាថ្មីសិន » ( នៅក្នុង Philip Schaff, The Creeds of Christendom [ ឆ្នាំ ១៨៧៧ ] ទំព័រ ៨៥១ ) ។
សូមមើលផងដែរ នីហ្វៃទី២ ២៨; សេចក្ដីណែនាំដល់បទគម្ពីរទាំងឡាយ « សេចក្ដីក្បត់សាសនា » scriptures.ChurchofJesusChrist.org ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ
-
ថែស្សាឡូនីច ទី១ ៣:៩–១៣ ។តើបងប្អូនមានចំណាប់អារម្មណ៍អ្វីខ្លះអំពីអារម្មណ៍ដែលប៉ុលមានចំពោះមិត្តរបស់លោក ? តើយើងអាច « ចម្រើនសេចក្តីស្រឡាញ់របស់អ្នករាល់គ្នា ឲ្យបានពេញពោរហូរហៀរដល់គ្នាទៅវិញទៅមក » យ៉ាងដូចម្ដេច ? ( ខទី ១២ ) ។
-
ថែស្សាឡូនីច ទី១ ៤:១៣–១៨ ។តើឃ្លាអ្វីខ្លះនៅក្នុងខគម្ពីរទាំងនេះអំពីដំណើររស់ឡើងវិញ ដែលផ្ដល់ការលួងលោមដល់បងប្អូន ?
-
ថែស្សាឡូនីច ទី១ ៥:១៤–២៥ ។កាលដែលបងប្អូនរំឭកពីដំបូន្មានរបស់ប៉ុលនៅក្នុង ថែស្សាឡូនីច ទី១ ៥:១៤–២៥ សូមអញ្ជើញសមាជិកគ្រួសារឲ្យស្វែងរកឃ្លាមួយដែលគ្រួសារអាចផ្ដោតលើ ។ សូមស្វែករកវិធីដ៏ឆ្នៃប្រឌិតនានា ដើម្បីដាក់បង្ហាញឃ្លាទាំងនេះនៅក្នុងផ្ទះរបស់បងប្អូនទុកជាការរំឭកមួយ ។ ឧទាហរណ៍ ម្នាក់ៗអាចរកមើល ឬគូររូបភាពដែលបង្ហាញ ឬពង្រឹងដល់ឃ្លាដែលគាត់បានជ្រើសរើស ។
-
ថែស្សាឡូនីច ទី២ ៣:១៣ ។តើយើងធ្លាប់មានអារម្មណ៍ « រសាយចិត្តខាងឯការល្អ »—អារម្មណ៍ធុញថប់ ប្រហែលជាមកពីតម្រូវការជាច្រើននៃភាពជាសិស្សដែរឬទេ ? តើមានអ្វីខ្លះបានជួយយើងនៅពេលយើងមានអារម្មណ៍បែបនេះ ? ( សូមមើល កាឡាទី ៦:៩; គោលលទ្ធិ និង សេចក្ដីសញ្ញា ៦៤:៣៣ ) ។ តើយើងអាចគាំទ្រគ្នាទៅវិញទៅមកនៅពេលរឿងនេះកើតឡើងយ៉ាងដូចម្ដេច ?
សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្ដាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។
ចម្រៀងដែលលើកទឹកចិត្តឲ្យប្រើ ៖ « ខ្ញុំព្យាយាមក្លាយដូចព្រះយេស៊ូវ » សៀវភៅចម្រៀងកុមារ ទំព័រ ៤០–៤១ ។
ការកែលម្អដល់ការសិក្សាផ្ទាល់ខ្លួន
ស្វែងរកវិវរណៈប្រចាំថ្ងៃ ។ « ជាញឹកញាប់ វិវរណៈកើតមាន ‹ មួយបន្ទាត់ម្ដងៗ › ( នីហ្វៃទី២ ២៨:៣០ ) មិនកើតមានទាំងអស់ក្នុងពេលតែមួយឡើយ ។… ចូរកុំគិតថា [ ការសិក្សាដំណឹងល្អ ] ជាអ្វីមួយដែលបងប្អូនត្រូវឆ្លៀតពេលដើម្បីសិក្សា ប៉ុន្តែចូរគិតថាវាជាអ្វីមួយដែលបងប្អូនកំពុងធ្វើជានិច្ចកាល » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ១២ ) ។
ព្រះគ្រីស្ទដែលមានព្រះជន្មរស់ឡើងវិញ ដោយ រ៉ូប៊ើត ធី បារ៉ែត