« ថ្ងៃទី ៤–១០ ខែ កក្កដា ។ ពង្សាវតារក្សត្រ ទី២ ២–៧ ៖ ‹ មានហោរា១នៅពួកអ៊ីស្រាអែលមែន › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ៤–១០ ខែ កក្កដា ។ ពង្សាវតារក្សត្រ ទី២ ២–៧ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២២

រចនារូបភាពអេលីសេកំពុងបង្ហាញរទះចម្បាំងដែលមានភ្លើងដល់បាវបម្រើរបស់លោក © Review & Herald Publishing/បានទទួលអាជ្ញាបណ្ណមកពី goodsalt.com

ថ្ងៃទី ៤–១០ ខែ កក្កដា

ពង្សាវតារក្សត្រ ទី២ ២–៧

« មានហោរា១នៅពួកអ៊ីស្រាអែលមែន »

ពេលបងប្អូនអានព្រះគម្ពីរ ព្រះវិញ្ញាណបរិសុទ្ធអាចធ្វើឲ្យបងប្អូនចាប់អារម្មណ៍នូវឃ្លា និងវគ្គបទគម្ពីរមួយចំនួន ។ សូមពិចារណាសរសេរទុកពីមូលហេតុដែលវគ្គបទគម្ពីរទាំងនេះមានន័យចំពោះបងប្អូន ។

កត់ត្រាចំណាប់អារម្មណ៍របស់បងប្អូន

បេសកកម្មចម្បងរបស់ព្យាការី គឺដើម្បីបង្រៀន និងថ្លែងទីបន្ទាល់ពីព្រះអង្គសង្រ្គោះ ព្រះយេស៊ូវ គ្រីស្ទ ។ ទោះជាយ៉ាងណាក្តី កំណត់ត្រារបស់យើងពីព្យាការី អេលីសេ មិនបានបញ្ចូលច្រើនពីការបង្រៀន ឬការថ្លែងទីបន្ទាល់របស់លោកឡើយ ។ អ្វីដែលកំណត់ត្រានេះបានបញ្ចូលគឺជាអព្ភូតហេតុដែលអេលីសេ បានសម្តែង ដោយរួមទាំងការប្រោសក្មេងម្នាក់ឲ្យរស់ពីស្លាប់ ( សូមមើល ពង្សាវតារក្សត្រ ទី២ ៤:១៨–៣៧ ) ការផ្តល់អាហារដល់ក្រុមមនុស្សជាមួយអាហារដែលមានតែបន្តិចបន្តួច ( សូមមើល ពង្សាវតារក្សត្រ ទី២ ៤:៤២–៤៤ ) ហើយនិងការព្យាបាលអ្នកកើតរោគឃ្លង់ ( សូមមើល ពង្សាវតារក្សត្រ ទី២ ៥:១–១៤ ) ។ ដូច្នេះ ខណៈដែលយើងគ្មានសម្ដីរបស់អេលីសេ ថ្លែងសាក្សីពីព្រះគ្រីស្ទ នោះយើងនៅតែមានទូទាំងការងារបម្រើរបស់អេលីសេ នូវការសម្តែងមកដ៏មានអនុភាពពីព្រះចេស្ដានៃការផ្តល់ព្រះជន្ម ការចិញ្ចឹមបីបាច់ និងអំណាចព្យាបាលរបស់ព្រះអម្ចាស់ដែរ ។ ការសម្តែងមកបែបនោះគឺមានច្រើនឥតគណនានៅក្នុងជីវិតរបស់យើង ដែលពេលខ្លះ យើងពុំបានដឹងឡើយ ។ ដើម្បីមើលឃើញវា យើងត្រូវតែស្វែងយល់ពីអព្ភូហេតុដែល អេលីសេ បានស្វែងរក នៅពេលលោកបានអធិស្ឋានជំនួសបាវបម្រើវ័យក្មេងដែលពេញដោយការភ័យខ្លាចរបស់គាត់ « ឱព្រះយេហូវ៉ាអើយ សូមទ្រង់ប្រោសឲ្យភ្នែកវាបានមើលឃើញ » ( ពង្សាវតារក្សត្រ ទី២ ៦:១៧ ) ។

សម្រាប់ព័ត៌មានបន្ថែមទៀតអំពី ពង្សាវតារក្សត្រ ទី២ សូមមើល « ពង្សាវតារក្សត្រ » នៅក្នុងសេចក្តីណែនាំដល់បទគម្ពីរទាំងឡាយ ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

ពង្សាវតារក្សត្រ ទី២ ២–៦

ព្រះអាចធ្វើឲ្យមានអព្ភូតហេតុនៅក្នុងជីវិតរបស់ខ្ញុំ ។

ជាញឹកញាប់ អព្ភូតហេតុជួយយើងយកឈ្នះលើរឿងលំបាកនៃជីវិតរមែងស្លាប់នេះ—នៅសម័យរបស់អេលីសេ ដីឥតជីវជាតិត្រូវការទឹកបរិសុទ្ធ ហើយពូថៅដែលបាត់ត្រូវរកឲ្យឃើញ ( សូមមើល ពង្សាវតារក្សត្រ ទី២ ២:១៩–២២; ៦:៤–៧ ) ។ ប៉ុន្តែអព្ភូតហេតុក៏អាចបង្វែរចិត្តរបស់យើងទៅរកព្រះអម្ចាស់ និងបង្រៀនយើងពីមេរៀនខាងវិញ្ញាណផងដែរ ។ នៅពេលបងប្អូនអាន ពង្សាវតារក្សត្រ ទី២ ២–៦ សូមពិចារណាពីការធ្វើបញ្ជីអព្ភូតហេតុដែលបងប្អូនរកឃើញ ហើយសូមពិចារណាពីមេរៀនខាងវិញ្ញាណដែលបងប្អូនរៀនចេញពីអព្ភូតហេតុនីមួយៗ ។ តើអព្ភូតហេតុទាំងនេះបង្រៀនបងប្អូនអ្វីខ្លះអំពីព្រះអម្ចាស់ និងអ្វីដែលទ្រង់អាចធ្វើនៅក្នុងជីវិតរបស់បងប្អូន ?

សូមមើលផងដែរ នីហ្វៃទី២ ២៦:១២–១៣; ២៧:២៣; មរមន ៩:៧–២១; មរ៉ូណៃ ៧:៣៥–៣៧ ។ Liahona, ខែ វិច្ឆិកា ឆ្នាំ២០១៧ ទំព័រ ៨៨–៩០ ។

ពង្សាវតារក្សត្រ ទី២ ៤:៨–១៧; ៧:១–១៦

ព្រះបន្ទូលនៃព្រះអម្ចាស់នឹងត្រូវបានបំពេញ តាមរយៈព្យាការីរបស់ទ្រង់ ។

ដូចដែលបានកត់ត្រានៅក្នុង ពង្សាវតារក្សត្រ ទី២ ៤:៨–១៧; ៧:១–១៦ ព្រះអម្ចាស់បានបំផុសអេលីសេ ឲ្យព្យាករពីអ្វីៗដែលនឹងកើតឡើង—អ្វីៗដែលតាមទស្សនៈរបស់អ្នកដទៃ ហាក់ដូចជាមិនកើតឡើងឡើយ ។ នៅពេលបងប្អូនអានខគម្ពីរទាំងនេះ សូមគិតអំពីរបៀបដែលបងប្អូនឆ្លើយតបចំពោះព្រះបន្ទូលរបស់ព្រះអម្ចាស់តាមរយៈព្យាការីរបស់ទ្រង់នៅសព្វថ្ងៃនេះ ។ តើការបង្រៀន ការព្យាករ ឬការសន្យាអ្វីដែលបងប្អូនបានឮពីព្យាការីដែលនៅរស់ ? តើបងប្អូននឹងធ្វើអ្វីដើម្បីធ្វើតាមសេចក្តីជំនឿពីការសន្យាទាំងនោះ ?

សូមមើល នីហ្វៃទី៣ ២៩:៦; គោលលទ្ធិ និង សេចក្ដីសញ្ញា ១:៣៧–៣៨ ។

ពង្សាវតារក្សត្រ ទី២ ៥

ប្រសិនបើខ្ញុំបន្ទាបខ្លួន និងប្រតិបត្តិតាម ព្រះយេស៊ូវ គ្រីស្ទ អាចព្យាបាលខ្ញុំបាន ។

នៅពេលខ្លះវាងាយស្រួលជាងដើម្បីស្វែងរកអត្ថន័យផ្ទាល់ខ្លួននៅក្នុងព្រះគម្ពីរ នៅពេលបងប្អូនប្រៀបធៀបរឿងខាងរូបកាយទៅនឹងដំណើររឿងខាងវិញ្ញាណ ។ ឧទាហរណ៍ ខណៈកំពុងអាន ពង្សាវតារក្សត្រ ទី២ ៥ បងប្អូនអាចប្រៀបធៀបរោគឃ្លង់របស់ណាម៉ាន់ ជាមួយការប្រឈមខាងវិញ្ញាណដែលបងប្អូនកំពុងជួបប្រទះ ។ ដូចជា ណាម៉ាន់ ផងដែរ ប្រហែលជាបងប្អូនសង្ឃឹមថាព្រះអម្ចាស់នឹង « ធ្វើការអ្វីយ៉ាងធំ » ( ខទី ១៣ ) ដើម្បីជួយបងប្អូន ។ តើបទពិសោធន៍របស់ ណាម៉ាន់ បង្រៀនបងប្អូនអ្វីខ្លះ ? នៅក្នុងជីវិតរបស់បងប្អូន តើអ្វីដែលដូចនឹងការធ្វើតាមការប្រឹក្សាងាយៗដើម្បី « ឲ្យបានស្អាត » ?

សូមកត់ចំណាំ ពីរបៀបដែលបទពិសោធន៍របស់ ណាម៉ាន់ បានជះឥទ្ធិពលលើសេចក្តីជំនឿរបស់គាត់លើព្រះនៃអ៊ីស្រាអែល ? ( សូមមើល ខទី ១៥ ) ។ តើបទពិសោធន៍អ្វីដែលបានពង្រឹងសេចក្តីជំនឿរបស់បងប្អូនលើព្រះ ?

សូមមើលផងដែរ លូកា ៤:២៧; ពេត្រុស ទី១ ៥:៥–៧; អាលម៉ា ៣៧:៣–៧; អេធើរ ១២:២៧ L. Whitney Clayton, « Whatsoever He Saith unto You, Do It » Liahona, ខែ ឧសភា ឆ្នាំ ២០១៧, ទំព័រ ៩៧–៩៩; “Naaman and Elisha” ( វីដេអូ ), គេហទំព័រChurchofJesusChrist.org ។

ពង្សាវតារក្សត្រ ទី២ ៦:៨–២៣

« ពួកដែលនៅខាងយើង មានគ្នាច្រើនជាងពួកដែលនៅខាងគេទៅទៀត » ។

តើបងប្អូនធ្លាប់មានអារម្មណ៍ថា មានភាពលើសលប់ និងភ័យខ្លាចទេ ដោយងឿងឆ្ងល់ដូចជាបាវបម្រើវ័យក្មេងរបស់អេលីសេ បានមានដែរឬទេ « តើយើងនឹងធ្វើដូចម្តេច ? » ( សូមមើល ពង្សាវតារក្សត្រ ទី២ ៦:៨–២៣ ) ។ តើអ្វីដែលបំផុសបងប្អូនអំពីចម្លើយរបស់អេលីសេ ? តើដំណើររឿងនេះផ្លាស់ប្តូររបៀបដែលបងប្អូនគិត និងមានអារម្មណ៍អំពីការសាកល្បងរបស់បងប្អូន ការទទួលខុសត្រូវរបស់បងប្អូន ឬការខិតខំរបស់បងប្អូនដើម្បីរស់នៅតាមដំណឹងល្អដែរឬទេ ?

នៅពេលបងប្អូនសញ្ជឹងគិត សូមពិចារណាប្រសាសន៍របស់ប្រធាន ហិនរី ប៊ី អាវរិង ៖ « ដូចជាបាវបម្រើរបស់អេលីសេ រូបនោះផងដែរមានអ្នកនៅជាមួយបងប្អូនច្រើនជាងអ្នកដែលបងប្អូនអាចឃើញប្រឆាំងនឹងបងប្អូន ។ ពួកគេខ្លះដែលនៅជាមួយបងប្អូន ប៉ុន្តែកែវភ្នែករមែងស្លាប់របស់បងប្អូនមិនអាចមើលឃើញឡើយ ។ ព្រះអម្ចាស់នឹងលើកបងប្អូនឡើង ហើយនៅពេលខ្លះក៏ហៅអ្នកដទៃមកនៅជាមួយបងប្អូន » ( « O Ye That Embark » Liahona ខែ វិច្ឆិកា ឆ្នាំ ២០០៨ ទំព័រ ៥៨ ) ។

សូមមើលផងដែរ ទំនុកដំកើង ១២១; គោលលទ្ធិ និងសេចក្តីសញ្ញា ៨៤:៨៨ ។

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

ពង្សាវតារក្សត្រ ទី២ ២:១–១៤ ។សូមគិតអំពីមនុស្សដែលបានឃើញ អេលីសេ « ពាក់ » ក្រមារបស់អេលីយ៉ា ( ឬសម្លៀកបំពាក់—ដែលជានិមិត្តរូបនៃការហៅជាព្យាការី ) ។ តើរឿងនេះអាចជះឥទ្ធិពលលើរបៀបដែលពួកគេបានឆ្លើយតបទៅនឹងការងារបម្រើរបស់អេលីសេ យ៉ាងដូចម្តេច ? ( សូមមើល ផងដែរ ពង្សាវតារក្សត្រ ទី១ ១៩:១៩ ) ។ ប្រហែលជាសមាជិកគ្រួសារ អាចប្តូរវេនគ្នាពាក់ « ក្រមា » និងថ្លែងពីរបៀបដែលពួកគេបានឃើញព្រះអម្ចាស់បានគាំទ្រ និងពង្រឹងអស់អ្នកដែលត្រូវបានហៅឲ្យបម្រើសាសនាចក្ររបស់ទ្រង់ ។

ពង្សាវតារក្សត្រ ទី២ ៤ ។បងប្អូនអាចអញ្ជើញសមាជិកគ្រួសារឲ្យអានអំពីអព្ភូតហេតុមួយនៅក្នុងចំណោមអព្ភូតហេតុនានានៅក្នុង ពង្សាវតារក្សត្រ ទី២ ៤ ( សូមមើល ខទី ១–៧, ១៤–១៧, ៣២–៣៥, ៣៨–៤១, ៤២–៤៤ ) ហើយសូមសរសេរតម្រុយមួយដើម្បីជួយសមាជិកគ្រួសារដទៃទៀតធ្វើការទាយពីអព្ភូតហេតុដែលគាត់ ឬនាងកំពុងពិពណ៌នា ។ តើយើងរៀនអ្វីខ្លះអំពីព្រះអម្ចាស់ និងអព្ភូតហេតុរបស់ទ្រង់ចេញពីជំពូកនេះ ? តើអព្ភូតហេតុអ្វី—ធំ ឬ តូច—ដែលយើងបានឃើញនៅក្នុងជីវិតយើង ?

ពង្សាវតារក្សត្រ ទី២ ៥:១–១៥ ។នៅពេលបងប្អូនអានខគម្ពីរទាំងនេះ ហើយពិចារណាពីកិច្ចការតូចតាចដែល ណាម៉ាន់ ត្រូវបានសុំឲ្យធ្វើ សូមពិចារណាកិច្ចការសាមញ្ញដែលព្យាការីរបស់យើងបានសុំឲ្យយើងធ្វើផងដែរ ។ តើក្រុមគ្រួសាររបស់យើងអាចធ្វើតាមពាក្យទូន្មានរបស់លោកឲ្យបានប្រសើរយ៉ាងដូចម្តេច ?

ក្រុមគ្រួសារបងប្អូនអាចអាន « អេលីសេ ព្យាបាល ណាម៉ាន់ » ( នៅក្នុង ដំណើររឿងព្រះគម្ពីរសញ្ញាចាស់ ) ។

ពង្សាវតាក្សត្រ ទី២ ៥:២០–២៧ ។តើ កេហាស៊ី អាចទទួលអត្ថប្រយោជន៍មកពីការអាន « សេចក្តីស្មោះត្រង់ និងសេចក្ដីសុចរិត » នៅក្នុង ដើម្បីកម្លាំងនៃយុវជន យ៉ាងដូចម្តេច ? ( ទំព័រ ៣១ ) ។ តើការមិនមានភាពស្មោះត្រង់បំផ្លាញយើងយ៉ាងដូចម្តេច ? តើយើងមានពរយ៉ាងណាដោយសារភាពស្មោះត្រង់ ?

ពង្សាវតាក្សត្រ ទី២ ៦:១៣–១៧ ។សមាជិកគ្រួសារអាចរីករាយនឹងការគូររូបភាពមួយពីបទពិសោធន៍របស់អេលីសេ និងបាវបម្រើរបស់លោកដែលបានពិពណ៌នានៅក្នុងខគម្ពីរទាំងនេះ ។ តើខគម្ពីរទាំងនេះជួយយើងនៅពេលយើងមានអារម្មណ៍ឯកោ ឬធុញថប់យ៉ាងដូចម្តេច ?

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្តាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់ថ្នាក់បឋមសិក្សា ។

ចម្រៀងលើកទឹកចិត្តឲ្យប្រើ ៖ « កូនចៅនៃព្រះអើយទ្រង់គង់ក្បែរអ្នក » ទំនុកតម្កើង ល.រ. ៤៥ ។

ការកែលម្អការបង្រៀនរបស់យើង

សូមលើកទឹកចិត្តឲ្យមានការសួរសំណួរ ។ សំណួររបស់កុមារគឺជាការបង្ហាញថាពួកគេត្រៀមខ្លួនជាស្រេចដើម្បី រៀន ។ ប្រសិនបើបងប្អូនមិនដឹងពីចម្លើយចំពោះសំណួររបស់ពួកគេទេ សូមស្វែងរកចម្លើយសម្រាប់ពួកគេ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥–២៦ ) ។

ណាម៉ាន់ កំពុងលាងសម្អាតខ្លួននៅក្នុងទន្លេ — ការរចនារូបភាពពីណាម៉ាន់ បានជាសះស្បើយពីរោគឃ្លង់ ដោយ ផល ម៉ាន