« ថ្ងៃទី ១៨–២៤ ខែ កក្កដា អែសរ៉ា ១; ៣–៧; នេហេមា ២; ៤–៦; ៨ ៖ ‹ ខ្ញុំកំពុងតែធ្វើការមួយយ៉ាងធំ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ១៨–២៤ ខែ កក្កដា អែសរ៉ា ១; ៣–៧; នេហេមា ២; ៤–៦; ៨ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២២

រចនារូបភាពព្រះវិហារបរិសុទ្ធសូរ៉ូបាបិល ដោយ សែម ឡយឡ័រ

ថ្ងៃទី ១៨–២៤ ខែ កក្កដា

អែសរ៉ា ១; ៣–៧; នេហេមា ២; ៤–៦; ៨

« ខ្ញុំកំពុងតែធ្វើការមួយយ៉ាងធំ »

ប្រធាន អែសរ៉ា ថាហ្វ ប៊ែនសិន បានបង្រៀនថា « ព្រះបន្ទូលរបស់ព្រះ … មានអនុភាពដើម្បីពង្រឹងពួកបរិសុទ្ធ ហើយបំពាក់អាវុធដល់ពួកគេជាព្រះវិញ្ញាណ ដើម្បីពួកគេអាចតតាំងនឹងអំពើអាក្រក់ កាន់ខ្ជាប់នឹងសេចក្ដីល្អ ហើយរកឃើញអំណរនៅក្នុងជីវិតនេះ » ( Teachings of Presidents of the Church: Ezra Taft Benson [ ឆ្នាំ២០១៤ ] ទំព័រ ១១៨ ) ។

កត់ត្រាចំណាប់អារម្មណ៍របស់បងប្អូន

ប្រជាជនយូដាបានជាប់ជាឈ្លើយនៅក្រុងបាប៊ីឡូនប្រមាណជា ៧០ ឆ្នាំ ។ ពួកគេបានបាត់បង់ក្រុងយេរូសាឡិម និងព្រះវិហារបរិសុទ្ធ ហើយមានពួកគេជាច្រើនបានភ្លេចការតាំងចិត្តរបស់ខ្លួនចំពោះក្រឹត្យវិន័យរបស់ព្រះ ។ ប៉ុន្តែព្រះមិនបានភ្លេចពួកគេទេ ។ ពិតណាស់ ទ្រង់បានប្រកាសតាមរយៈព្យាការីរបស់ទ្រង់ថា « អញនឹងប្រោសឯងរាល់គ្នា ហើយនឹងធ្វើសម្រេចដល់ឯងរាល់គ្នា តាមពាក្យល្អរបស់អញ ដោយធ្វើឲ្យឯងរាល់គ្នាវិលមកឯទីនេះវិញ » ( យេរេមា ២៩:១០ ) ។ ដោយគោរពដល់ការព្យាករនេះ ព្រះអម្ចាស់បានបើកផ្លូវមួយឲ្យសាសន៍យូដាត្រឡប់មកវិញ ហើយទ្រង់បានបង្កើតពួកអ្នកបម្រើដែលបានសម្រេច « ការមួយយ៉ាងធំ » សម្រាប់រាស្ត្ររបស់ទ្រង់ ( នេហេមា ៦:៣ ) ។ ពួកអ្នកបម្រើទាំងនេះរួមមាន អ្នកគ្រប់គ្រងម្នាក់មានឈ្មោះថា សូរ៉ូបាបិលផងដែរ ដែលមើលខុសត្រូវលើការសាងសង់ព្រះដំណាក់របស់ព្រះអម្ចាស់ឡើងវិញ ឯ អែសរ៉ា ជាសង្ឃ និងជាអាចារ្យម្នាក់ដែលបានបង្វែរដួងចិត្តប្រជាជនឲ្យត្រឡប់ទៅរកក្រឹត្យវិន័យរបស់ព្រះអម្ចាស់វិញ ហើយ នេហេមា ក្រោយមកក្លាយជាអ្នកគ្រប់គ្រងសាសន៍យូដា ដែលបានដឹកនាំការងារសាងសង់កំផែងការពារជុំវិញយេរូសាឡិម ។ ពិតប្រាកដណាស់ ពួកលោកបានជួបនឹងការប្រឆាំង ប៉ុន្តែក៏បានទទួលជំនួយពីប្រភពដែលពុំបានរំពឹងទុកផងដែរ ។ បទពិសោធន៍របស់ពួកលោកអាចប្រាប់ និងបំផុសដល់យើង ពីព្រោះយើងក៏កំពុងធ្វើកិច្ចការមួយយ៉ាងធំផងដែរ ។ ដូចជាពួកលោកផងដែរ កិច្ចការរបស់យើងដែលត្រូវធ្វើជាច្រើនមានជាប់ទាក់ទងជាមួយនឹងព្រះដំណាក់នៃព្រះអម្ចាស់ ក្រឹត្យវិន័យរបស់ព្រះអម្ចាស់ និងការការពារខាងវិញ្ញាណដែលយើងឃើញមាននៅក្នុងទ្រង់ ។

សម្រាប់ទិដ្ឋភាពទូទៅស្ដីពីគម្ពីរអែសរ៉ា និងគម្ពីរនេហេមា សូមមើល « អែសរ៉ា » និង « នេហេមា » នៅក្នុងសេចក្ដីណែនាំដល់បទគម្ពីរទាំងឡាយ ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

អែសរ៉ា ១

ព្រះអម្ចាស់បានបំផុសគំនិតដល់ប្រជាជនឲ្យសម្រេចនូវព្រះរាជបំណងរបស់ទ្រង់ ។

បន្ទាប់ពី ពើស៊ី បានច្បាំងដណ្តើមយកអាណាចក្របាប៊ីឡូន ស្តេចសាសន៍ ពើស៊ី ព្រះនាម ស៊ីរូស ត្រូវបានបំផុសគំនិតដោយព្រះអម្ចាស់ឲ្យបញ្ជូនសាសន៍យូដាមួយក្រុមទៅកាន់យេរូសាឡិមដើម្បីសង់ព្រះវិហារបរិសុទ្ធឡើងវិញ ។ នៅពេលបងប្អូនអាន អែសរ៉ា ១ សូមកត់សម្គាល់ពីអ្វីដែលស្តេចស៊ីរូស ស្ម័គ្រព្រះទ័យធ្វើដើម្បីគាំទ្រដល់សាសន៍យូដានៅក្នុងកិច្ចការដ៏សំខាន់នេះ ។ តើបងប្អូនមើលឃើញព្រះអម្ចាស់កំពុងធ្វើការតាមរយៈបុរស និងស្ត្រីជុំវិញបងប្អូន រួមទាំងអ្នកដែលមិនមែនជាសមាជិកសាសនាចក្ររបស់ទ្រង់យ៉ាងដូចម្ដេច ? តើការណ៍នេះប្រាប់អ្វីខ្លះដល់បងប្អូនអំពីព្រះអម្ចាស់ និងកិច្ចការរបស់ទ្រង់ ?

សូមមើលផងដែរ អេសាយ ៤៤:២៤–២៨ ។

អេសរ៉ា ៣:៨–១៣; ៦:១៦–២២

ព្រះវិហារបរិសុទ្ធអាចនាំយកអំណរមកឲ្យខ្ញុំ ។

នៅពេលសាសន៍បាប៊ីឡូនដណ្ដើមបានក្រុងយេរូសាឡិម ពួកគេបានយកព្រះវិហារបរិសុទ្ធ ហើយបានដុតបំផ្លាញចោលគ្មានសល់ ( សូមមើល ពង្សាវតារក្សត្រ ទី២ ២៥:១–១០; របាក្សត្រ ទី២ ៣៦:១៧–១៩ ) ។ តើបងប្អូនគិតថា បងប្អូនអាចមានអារម្មណ៍បែបណា ប្រសិនបើបងប្អូនស្ថិតនៅក្នុងចំណោមពួកយូដាដែលបានឃើញហេតុការណ៍នេះ ? ( សូមមើល ទំនុកដំកើង ១៣៧ ) ។ សូមកត់សម្គាល់ពីអារម្មណ៍របស់ពួកយូដា ច្រើនឆ្នាំក្រោយមក ពេលពួកគេត្រូវបានអនុញ្ញាតឲ្យត្រឡប់មកវិញ ហើយសង់ព្រះវិហារបរិសុទ្ធជាថ្មី ( សូមមើល អែសរ៉ា ៣:៨–១៣; ៦:១៦–២២ ) ។ សូមពិចារណាពីអារម្មណ៍របស់បងប្អូនផ្ទាល់អំពីព្រះវិហារបរិសុទ្ធ ។ ហេតុអ្វីព្រះវិហារបរិសុទ្ធគឺជាប្រភពនៃអំណរ ? តើបងប្អូនអាចបង្ហាញការដឹងគុណរបស់បងប្អូនថ្វាយព្រះអម្ចាស់ចំពោះព្រះវិហារបរិសុទ្ធដោយរបៀបណា ?

សម្រាប់គំរូនៅសម័យទំនើបអំពីភាពរីករាយចំពោះការសាងសង់ព្រះវិហារបរិសុទ្ធ សូមមើល « The Laie Hawaii Temple Youth Cultural Celebration » ( ChurchofJesusChrist.org ) ។

គ្រួសារដើរនៅក្នុងបរិវេណព្រះវិហារបរិសុទ្ធ — ព្រះវិហារបរិសុទ្ធអាចជាប្រភព នៃសេចក្តីអំណរនៅក្នុងជីវិតរបស់យើង ។

អែសរ៉ា ៤–៦; នេហេមា ២; ៤; ៦

ខ្ញុំអាចជួយកិច្ចការរបស់ព្រះឲ្យលឿនទៅមុខ ទោះជាមានឧបសគ្គក្ដី ។

កិច្ចការរបស់ព្រះអម្ចាស់កម្រគ្មានឧបសគ្គណាស់ ហើយរឿងនេះក៏មានពិតចំពោះការខិតខំដែលបានដឹកនាំដោយសូរ៉ូបាបិល និងនេហេមាដែរ ។ ចំពោះករណីទាំងពីរនេះ « ពួកខ្មាំងសត្រូវរបស់ពួកយូដា » ( អែសរ៉ា ៤:១ ) គឺជាពួកសាសន៍សាម៉ារី—ជាពូជពង្សអ៊ីស្រាអែលដែលបានលាយបញ្ចូលគ្នានឹងពួកសាសន៍ដទៃ ។ ការអានអំពីឧបសគ្គរបស់ពួកគេក្នុងការសង់ព្រះវិហារបរិសុទ្ធ ( សូមមើល អែសរ៉ា ៤–៦ ) អាចដឹកនាំបងប្អូនឲ្យពិចារណាពីឧបសគ្គដែលកិច្ចការរបស់ព្រះជួបប្រទះសព្វថ្ងៃនេះ និងរបៀបដែលបងប្អូនអាចឆ្លើយតបពេលឧបសគ្គកើតឡើង ។

ស្រដៀងគ្នានេះដែរ ការអានកិច្ចការរបស់នេហេមាជួសជុលកំផែងក្រុងយេរូសាឡិម ( សូមមើល នេហេមា ២; ៤; ៦ ) អាចបណ្ដាលឲ្យបងប្អូនសញ្ជឹងគិតពីកិច្ចការដែលព្រះសព្វព្រះទ័យឲ្យបងប្អូនធ្វើ ។ តើបងប្អូនរៀនអ្វីខ្លះមកពីគំរូរបស់នេហេមា ?

សូមមើលផងដែរ Dieter F. Uchtdorf, “We Are Doing a Great Work and Cannot Come Down,” Liahona, ខែ ឧសភា ឆ្នាំ ២០០៩ទំព័រ ៥៩–៦២ ។

អែសរ៉ា ៧; នេហេមា ៨

ខ្ញុំមានពរ ពេលខ្ញុំសិក្សាព្រះគម្ពីរ ។

សូម្បីតែបន្ទាប់ពីព្រះវិហារបរិសុទ្ធបានសង់ឡើងវិញក្ដី ក៏ប្រជាជននៅក្រុងយេរូសាឡិមបានមានបញ្ហាខាងវិញ្ញាណអស់ជាច្រើនជំនាន់ដែរ ផ្នែកមួយគឺដោយសារពួកគេមានសិទ្ធិប្រើប្រាស់ « គម្ពីរក្រឹត្យវិន័យរបស់លោកម៉ូសេ » ( នេហេមា ៨:១ ) មានកំណត់ ។ អែសរ៉ា ដ៏ជាអាចារ្យបានទទួលការអនុញ្ញាតមកពី ស្ដេចពើស៊ី ឲ្យទៅកាន់ក្រុងយេរូសាឡិម ជាកន្លែងដែលលោក « យកក្រឹត្យវិន័យមកនៅចំពោះមុខនៃពួកជំនុំ » ( នេហេមា ៨:២ ) ។ តើបងប្អូនអាចធ្វើតាមគំរូរបស់ អែសរ៉ា ដូចដែលបានរៀបរាប់នៅក្នុង អែសរ៉ា ៧:១០ យ៉ាងដូចម្តេច ? នៅពេលបងប្អូនអាន នេហេមា ៨ ដែលបានផ្ដល់ដំណើររឿងអំពី អែសរ៉ា កំពុងអានក្រឹត្យវិន័យទៅកាន់ប្រជាជន តើបងប្អូនមានគំនិតអ្វីខ្លះ អំពីអនុភាពនៃបន្ទូលរបស់ព្រះនៅក្នុងជីវិតរបស់បងប្អូន ?

សូមមើលផងដែរ Teachings: Ezra Taft Benson ទំព័រ ១១៥–២៤ ។

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ

អែសរ៉ា ៣:៨–១៣; ៦:១៦–២២ ។តើពួកយូដាបានបង្ហាញអំណររបស់ពួកគេដោយរបៀបណាចំពោះព្រះវិហារបរិសុទ្ធ ពេលវាត្រូវបានសង់ឡើងវិញ ហើយបានឧទ្ទិសឆ្លង ? តើយើងនឹងធ្វើអ្វីខ្លះដើម្បីបង្ហាញអំណររបស់យើងចំពោះព្រះវិហារបរិសុទ្ធ ? ប្រហែលជាគ្រួសាររបស់បងប្អូនអាចមើលរូបភាពព្រះវិហារបរិសុទ្ធ ហើយពិភាក្សាអំពីរបៀបដែលព្រះវិហារបរិសុទ្ធនាំអំណរដល់បងប្អូន ( សូមមើល temples.ChurchofJesusChrist.org ) ។

អែសរ៉ា ៧:៦, ៩–១០, ២៧–២៨ ។ជាច្រើនដងនៅក្នុងខគម្ពីរទាំងនេះ អែសរ៉ាបានសរសេរថា ព្រះអម្ចាស់បានការពារលោក ពេលលោកបានធ្វើដំណើរទៅកាន់ក្រុងយេរូសាឡិម ។ តើឃ្លានេះអាចមានន័យយ៉ាងណា ? តើយើងមានអារម្មណ៍យ៉ាងណាចំពោះការការពាររបស់ព្រះអម្ចាស់ ? ប្រហែលជាសមាជិកគ្រួសារអាចចែកចាយគំរូមកពីជីវិតរបស់ពួកគេ ។

នេហេមា ២; ៤ ៦ ។ដំណើររឿងរបស់នេហេមាអាចបំផុសដល់សមាជិកគ្រួសារ នៅពេលពួកគេជួបនឹងឧបសគ្គ កាលពួកគេធ្វើ « ការមួយយ៉ាងធំ » ( នេហេមា ៦:៣) ។ សមាជិកគ្រួសារអាចសង់កំផែងមួយពីវត្ថុដែលបងប្អូនមាននៅក្នុងផ្ទះរបស់បងប្អូន ពេលបងប្អូនអានរួមគ្នាពីវគ្គសំខាន់ៗ ( ដូចជា នេហេមា ២:១៧–២០; ៤:១៣–១៨; ៦:១–៣ ) ។ តើយើងរៀនអ្វីខ្លះមកពីនេហេមាចំពោះការប្រឈមនឹងឧបសគ្គ ? តើព្រះអម្ចាស់សព្វព្រះទ័យចង់ឲ្យយើងធ្វើកិច្ចការធំអ្វីខ្លះ ? តើព្រះអម្ចាស់បានពង្រឹងយើងឲ្យយកឈ្នះឧបសគ្គក្នុងកិច្ចការនេះតាមរបៀបណា ?

នេហេមា ៨:១–១២ ។នៅក្នុង នេហេមា ៨ អែសរ៉ាអានក្រឹត្យវិន័យរបស់ម៉ូសេទៅកាន់ប្រជាជនដែលស្រែកឃ្លានចង់ឮបន្ទូលរបស់ព្រះ ។ ការអាន ខទី ១–១២ អាចជួយពង្រឹងការដឹងគុណរបស់គ្រួសារបងប្អូនចំពោះបន្ទូលរបស់ព្រះ ។ តើប្រជាជននោះមានអារម្មណ៍បែបណាចំពោះក្រឹត្យវិន័យរបស់ព្រះ ? តើយើងអាចជួយគ្នាទៅវិញទៅមកឲ្យ « យល់បទដែលអានមើលនោះ » ដោយរបៀបណា ? ( ខទី ៨ ) ។

សម្រាប់គំនិតបន្ថែមពីការបង្រៀនដល់កុមារ សូមមើល គម្រោងមេរៀនសប្តាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ចម្រៀងលើកទឹកចិត្តឲ្យប្រើ ៖ « ខ្ញុំចូលចិត្តមើលព្រះវិហារបរិសុទ្ធ » សៀវភៅចម្រៀងកុមារ ទំព័រ ៩៩ ។

ការកែលម្អការបង្រៀនរបស់យើង

ចែកចាយបទគម្ពីរជាគ្រួសារ ។ អំឡុងការសិក្សាបទគម្ពីរជាគ្រួសាររបស់បងប្អូន សូមផ្ដល់ពេលឲ្យសមាជិកគ្រួសារចែកចាយនូវវគ្គបទគម្ពីរ មកពីការសិក្សាព្រះគម្ពីរផ្ទាល់ខ្លួនរបស់ពួកគេ ដែលមានអត្ថន័យជាក់លាក់ចំពោះពួកគេ ។

ការរចនារូបភាពពីអែសរ៉ា កំពុងអានបទគម្ពីរទៅកាន់ប្រជាជននៅក្រុងយេរូសាឡិម ដោយ អេច វិល្ល័ដ អ័តធិប © Providence Collection/បានទទួលអាជ្ញាបណ្ណមកពី goodsalt.com