« ថ្ងៃទី ៣–៩ ខែ តុលា ។ អេសាយ ៥៨–៦៦ ៖ ‹ អ្នកដ៏ជួយប្រោសលោះមកឯក្រុងស៊ីយ៉ូន › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ៣–៩ ខែ តុលា ។ អេសាយ ៥៨–៦៦ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២២

ព្រះយេស៊ូវនៅក្នុងសាលាប្រជុំនៅឯភូមិណាសារ៉ែត ដោយ ហ្រ្គេក ខេ អូលសិន

ថ្ងៃទី ៣–៩ ខែ តុលា

អេសាយ ៥៨–៦៦

« អ្នកដ៏ជួយប្រោសលោះមកឯក្រុងស៊ីយ៉ូន »

នៅពេលបងប្អូនអាន អេសាយ ៥៨–៦៦ សូមពិចារណាអំពីរបៀបដែលពាក្យសម្តីរបស់អេសាយផ្តល់ឲ្យបងប្អូននូវអំណរ និងសេចក្តីសង្ឃឹមសម្រាប់ពេលអនាគត ។

កត់ត្រាចំណាប់អារម្មណ៍របស់បងប្អូន

នៅពេលចាប់ផ្តើមការងារបម្រើខាងលោកិយរបស់ទ្រង់ ព្រះយេស៊ូវគ្រីស្ទបានយាងទៅសាលាប្រជុំនៅក្នុងភូមិណាសារ៉ែត ជាភូមិដែលទ្រង់បានចម្រើនព្រះជន្មឡើង ។ ទ្រង់បានឈរអានព្រះគម្ពីរនៅទីនោះ បានបើកទៅគម្ពីរអេសាយ ហើយបានអានពីអ្វីដែលយើងហៅឥឡូវនេះថាជា អេសាយ ៦១:១–២ ។ បន្ទាប់មក ទ្រង់បានប្រកាសថា « នៅថ្ងៃនេះ បទគម្ពីរនេះបានសម្រេចនៅត្រចៀកអ្នករាល់គ្នាហើយ » ។ វាជាការប្រកាសដ៏ត្រង់បំផុតមួយរបស់ព្រះអង្គសង្រ្គោះថា ទ្រង់ជាអង្គចាក់ប្រេងតាំង ដែលនឹង « ប្រោសមនុស្សដែលមានចិត្តសង្រេង » និង « ប្រកាសប្រាប់ពីសេចក្តីប្រោសលោះដល់ពួកឈ្លើយ » ( សូមមើល លូកា ៤:១៦–២១ ) ។ ជាការពិត បទគម្ពីរនេះត្រូវបានបំពេញនៅសម័យនោះមែន ។ ហើយដូចជាការព្យាករជាច្រើនទៀតរបស់អេសាយដែរ វាបន្តបំពេញនៅក្នុងសម័យរបស់យើង ។ ព្រះអង្គសង្គ្រោះបន្តប្រោសមនុស្សទាំងអស់ដែលមានចិត្តសង្រេងដែលមកឯទ្រង់ ។ ប៉ុន្តែសេចក្តីរំដោះឲ្យរួចក៏ត្រូវប្រកាសដល់ពួកឈ្លើយផងដែរ ។ ហើយមានអនាគតដ៏រុងរឿងមួយដែលយើងត្រូវរៀបចំខ្លួនរង់ចាំ—ជាគ្រាដែលព្រះអម្ចាស់នឹង « បង្កើតផ្ទៃមេឃថ្មី ហើយនិងផែនដីថ្មី » ( អេសាយ ៦៥:១៧ ) និង « ធ្វើឲ្យសេចក្តីសុចរិត និងសេចក្តីសរសើរបានលេចឡើង នៅចំពោះអស់ទាំងសាសន៍យ៉ាងនោះដែរ » ( អេសាយ ៦១:១១ ) ។ ការអានគម្ពីរអេសាយ បើកភ្នែករបស់យើងឲ្យឃើញអ្វីដែលព្រះអម្ចាស់បានធ្វើរួចទៅហើយ អ្វីដែលទ្រង់កំពុងធ្វើ និងអ្វីដែលទ្រង់មិនទាន់បានធ្វើសម្រាប់រាស្រ្តរបស់ទ្រង់នៅឡើយ ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

អេសាយ ៥៨:៣–១២

ការតមអាហារនាំមកនូវពរជ័យ ។

ខគម្ពីរទាំងនេះផ្តល់យោបល់ថា ការតាមអាហារគឺជាបន្ទុកជាជាងពរជ័យ ចំពោះសាសន៍អ៊ីស្រាអែលពីបុរាណជាច្រើន ។ នៅពេលខ្លះ ពួកយើងភាគច្រើនអាចយល់ពីអារម្មណ៍ទាំងនោះ ។ ប្រសិនបើបងប្អូនចង់ស្វែងរកអត្ថន័យ និងគោលបំណងបន្ថែមទៀតនៅក្នុងការតមអាហាររបស់បងប្អូន សូមអាន អេសាយ ៥៨:៣–១២ ដើម្បីស្វែងរកចម្លើយរបស់ព្រះអម្ចាស់ទៅនឹងសំណួរនេះ « ហេតុអ្វីយើងតមអាហារ ? » តាមបទពិសោធន៍របស់បងប្អូន តើការតមអាហារ « ដោះច្រវាក់ដែលឯងដាក់គេដោយអំពើអាក្រក់ » និង « បំបាក់គ្រប់ទាំងនឹមផង » យ៉ាងដូចម្តេច ? ( អេសាយ ៥៨:៦ ) ។ តើការតមអាហារនាំមកនូវពរជ័យដែលបានពិពណ៌នានៅក្នុង អេសាយ ៥៨:៨–១២ ដល់បងប្អូនយ៉ាងដូចម្តេច ? តើ អេសាយ ៥៨:៣–១២ ជះឥទ្ធិពលលើអ្វីដែលបងប្អូនគិតអំពីការតមអាហារយ៉ាងដូចម្តេច ?

នៅក្នុងសារលិខិត « Is Not This the Fast That I Have Chosen? »( Liahona ខែ ឧសភា ឆ្នាំ ២០១៥ ទំព័រ ២២–២៥ ) ប្រធាន ហិនរី ប៊ី អាវរិង បានចែកចាយគំរូជាច្រើន អំពីរបៀបដែលប្រជាជនបានទទួលពរជ័យតាមរយៈការតមអាហារ និងដង្វាយតមអាហារ ។ តើបងប្អូនបានឃើញពរជ័យស្រដៀងគ្នានេះកើតឡើងនៅក្នុងជីវិតរបស់បងប្អូនយ៉ាងដូចម្តេច ?

សូមមើលផងដែរ Gospel Topics « Fasting and Fast Offerings » ( នៅលើគេហទំព័រ topics.ChurchofJesusChrist.org ) ។

អេសាយ ៥៩:៩–២១; ៦១:១–៣; ៦៣:១–៩ ។

ព្រះយេស៊ូវគ្រីស្ទគឺជាព្រះអង្គសង្គ្រោះ និង ព្រះប្រោសលោះរបស់ខ្ញុំ ។

នៅក្នុង អេសាយ ៥៨–៦៦ បងប្អូននឹងឃើញមានសេចក្តីយោងជាច្រើនស្តីពីបេសកកម្មដ៏ធួនរបស់ព្រះយេស៊ូវគ្រីស្ទ ។ នេះគឺជាឧទាហរណ៍មួយចំនួន ព្រមជាមួយសំណួរដើម្បីជួយបងប្អូនឲ្យសញ្ជឹងគិតអំពីឧទាហរណ៍នេះ ។

អេសាយ ៥៩:៩–២១ ។ តើបងប្អូននឹងសង្ខេបស្ថានភាពខាងវិញ្ញាណរបស់ប្រជាជនដែលបានពិពណ៌នានៅក្នុង ខទី ៩–១៥ យ៉ាងដូចម្តេច ? តើអ្វីខ្លះដែលធ្វើឲ្យបងប្អូនចាប់អារម្មណ៍អំពីការពិពណ៌នាពី « អ្នកជួយអង្វរ » នៅក្នុង ខទី ១៦–២១ និងសេចក្តីសញ្ញាដែលទ្រង់ធ្វើជាមួយអស់អ្នកដែលងាកទៅរកទ្រង់ ?
អេសាយ ៦១:១–៣ ។ តើព្រះយេស៊ូវគ្រីស្ទបានប្រទានពរដល់បងប្អូនតាមរបៀបដែលបានពិពណ៌នានៅក្នុងខគម្ពីរទាំងនេះយ៉ាងដូចម្តេច ? តើ « ដំណឹងល្អ » អ្វីដែលទ្រង់បានប្រទានមកដល់បងប្អូន ? តើទ្រង់បានប្រទានឲ្យបងប្អូននូវភួងលម្អជំនួសឲ្យផេះយ៉ាងដូចម្តេច ?
អេសាយ ៦៣:៧–៩ ។ តើ « សេចក្តីសប្បុរសរបស់ព្រះយេហូវ៉ា » អ្វីខ្លះដែលបងប្អូនអាចរៀបរាប់បាន ? តើខគម្ពីរទាំងនេះបំផុសឲ្យអារម្មណ៍អ្វីខ្លះនៅក្នុងដួងចិត្តរបស់បងប្អូនអំពីព្រះអង្គសង្រ្គោះ ?

តើសេចក្តីយោងស្តីពីព្រះអង្គសង្រ្គោះអ្វីខ្លះទៀត ដែលបងប្អូនរកឃើញនៅក្នុង អេសាយ ៥៨–៦៦ ?

សូមមើលផងដែរ ម៉ូសាយ ៣:៧; គោលលទ្ធិ និង សេចក្តីសញ្ញា ១៣៣:៤៦–៥៣ ។

ស្រ្តីម្នាក់កំពុងអុជចង្កៀងពីចង្កៀងនៅលើដៃរបស់បុរសម្នាក់ — « ព្រះយេហូវ៉ា ទ្រង់នឹងជាពន្លឺដ៏នៅអស់កល្បជានិច្ចដល់ឯងវិញ » ( អេសាយ ៦០:១៩ ) ។ អំណោយទាននៃពន្លឺ ដោយ អ៊ីវ៉ា ធីម៉ូធី

អេសាយ ៦០; ៦២

« ព្រះយេហូវ៉ា ទ្រង់នឹងជាពន្លឺដ៏នៅអស់កល្បជានិច្ចដល់ឯងវិញ » ។

អេសាយ ៦០ និង ៦២ និយាយពីពន្លឺ និងសេចក្តីងងឹត ពីភ្នែក និងការមើលឃើញ ដើម្បីបង្រៀនអំពីរបៀបដែលដំណឹងល្អនៃព្រះយេស៊ូវគ្រីស្ទនឹងប្រទានពរដល់ពិភពលោកនៅថ្ងៃចុងក្រោយ ។ សូមរកមើលគោលគំនិតទាំងនេះ ជាពិសេសនៅក្នុង អេសាយ ៦០:១–៥, ១៩–២០; ៦២:១–២ ។ ពេលបងប្អូនអានជំពូកទាំងនេះ សូមសញ្ជឹងគិតអំពីរបៀបដែលព្រះប្រមូលផ្ដុំបុត្រាបុត្រីរបស់ទ្រង់ចេញពីសេចក្តីងងឹតទៅកាន់ពន្លឺរបស់ទ្រង់ ។ តើបងប្អូនមានតួនាទីអ្វីនៅក្នុងកិច្ចការនេះ ?

សូមមើលផងដែរ នីហ្វៃទី១ ២២:៣–១២; នីហ្វៃទី៣ ១៨:២៤; គោលលទ្ធិ និង សេចក្ដីសញ្ញា ១៤:៩; ប៊ូនី អេច ខ័រឌុន « That They May See » Liahona ខែ ឧសភា ឆ្នាំ ២០២០ ទំព័រ ៧៨–៨០ ។

អេសាយ ៦៤:១–៥; ៦៥:១៧–២៥; ៦៦

ព្រះគ្រីស្ទនឹងគ្រងរាជ្យនៅលើផែនដីនៅអំឡុងពេលសហស្សវត្សរ៍ ។

អេសាយបាននិយាយពីថ្ងៃមួយដែល « សេចក្តីវេទនាពីជាន់មុនបានភ្លេចទៅហើយ » ( អេសាយ ៦៥:១៦ ) ។ ខណៈពេលដែលការព្យាករនេះបានសម្រេចជាច្រើន នៅក្នុងភាពពេញលេញនៃថ្ងៃនោះ ថ្ងៃនោះមិនទាន់មកដល់នៅឡើយទេ—នៅពេលដែលព្រះយេស៊ូវគ្រីស្ទនឹងយាងមកផែនដីម្តងទៀត ហើយបង្កើតយុគសម័យនៃសេចក្តីសុខសាន្ត និងសេចក្តីសុចរិតមួយដែលហៅថា សហស្សវត្សរ៍ ។ អេសាយបានពិពណ៌នាពីថ្ងៃអនាគតនេះ នៅក្នុង អេសាយ ៦៤:១–៥; ៦៥:១៧–២៥; ៦៦ ។ សូមកត់សម្គាល់ថា តើលោកប្រើពាក្យដូចជា « រីករាយ » និង « ជាទីរីករាយ » ញឹកញាប់ប៉ុណ្ណា ។ សូមពិចារណាពីមូលហេតុដែលការយាងមកវិញរបស់ព្រះអង្គសង្រ្គោះនឹងជាថ្ងៃជាទីរីករាយមួយសម្រាប់បងប្អូន ។ តើបងប្អូនអាចធ្វើអ្វីខ្លះដើម្បីរៀបចំខ្លួនសម្រាប់ការយាងមករបស់ទ្រង់ ?

សូមមើល មាត្រានៃសេចក្តីជំនឿ ១:១០; រ័សុល អិម ណិលសុន « The Future of the Church: Preparing the World for the Savior’s Second Coming » Ensign ខែ មេសា ឆ្នាំ ២០២០ ទំព័រ ១៣–១៧ ។

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ

អេសាយ ៥៨:៣–១១ ។សមាជិកគ្រួសារអាចយល់ពីសារលិខិតរបស់អេសាយ អំពីការតមអាហារកាន់តែច្បាស់ ប្រសិនបើពួកគេសម្តែងពីរបៀបតមអាហារដែលបានពិពណ៌នានៅក្នុង អេសាយ ៥៨:៣–៥ និងរបៀបតមអាហារដែលបានពិពណ៌នានៅក្នុង អេសាយ ៥៨:៦–៨ ។ តើយើងអាចធ្វើឲ្យការតមអាហាររបស់យើងកាន់តែដូច « ជាការតមអត់យ៉ាងនេះវិញដែល [ ព្រះបាន ] ពេញចិត្ត » យ៉ាងដូចម្ដេច ? តើពរជ័យអ្វីដែលបងប្អូនបានឃើញមកពីការតមអាហារ ?

អេសាយ ៥៨:១៣–១៤ ។តើការ « ស្វែងរកសេចក្តីអំណរដល់ [ ខ្លួនយើង ] » និងការស្វែងរក « ចិត្តរីករាយក្នុងព្រះយេហូវ៉ា » នៅថ្ងៃឈប់សម្រាក មានភាពខុសគ្នាអ្វីខ្លះ ? តើយើងធ្វើឲ្យថ្ងៃឈប់សម្រាកជាថ្ងៃមាន « ចិត្តរីករាយ » យ៉ាងដូចម្តេច ?

អេសាយ ៦០:១–៥ ។កាលបងប្អូនអាន អេសាយ ៦០:១–៣ នោះសមាជិកគ្រួសារអាចបើកភ្លើង នៅពេលខគម្ពីរទាំងនេះនិយាយពីពន្លឺ និងបិទភ្លើងវិញ នៅពេលខគម្ពីរទាំងនេះនិយាយពីសេចក្តីងងឹត ។ តើដំណឹងល្អនៃព្រះយេស៊ូវគ្រីស្ទដូចជាពន្លឺចំពោះយើងយ៉ាងដូចម្តេច ? តើអេសាយបានទាយទុកថា នឹងមានអ្វីកើតឡើង កាលដែលរាស្រ្តរបស់ព្រះចែកចាយពន្លឺនៃដំណឹងល្អ ? ( សូមមើល អេសាយ ៦០:៣–៥ ) ។

អេសាយ ៦១:១–៣ ។តើព្រះអង្គសង្គ្រោះបានបំពេញការព្យាកររបស់អេសាយ នៅក្នុងខគម្ពីរទាំងនេះយ៉ាងដូចម្តេច ? បងប្អូនអាចអញ្ជើញសមាជិកគ្រួសារឲ្យស្វែងរករូបភាពព្រះអង្គសង្រ្គោះ ដែលពួកគេមានអារម្មណ៍ថា វាបង្ហាញពីទិដ្ឋភាពទាំងនេះអំពីបេសកកម្មរបស់ទ្រង់ ( រូបភាពទាំងឡាយអាចរកបាននៅក្នុងទស្សនាវដ្តីរបស់សាសនាចក្រ ឬ សៀវភៅរូបភាពដំណឹងល្អ ) ។ បងប្អូនក៏អាចច្រៀងចម្រៀងមួយបទអំពីរបៀបដែលព្រះអង្គសង្រ្គោះប្រទានពរជ័យដល់យើងបានផងដែរ ដូចជាបទ « ខ្ញុំស្គាល់ក្តីស្នេហ៍ព្រះសង្គ្រោះ » ( សៀវភៅចម្រៀងកុមារ ទំព័រ ៤២–៤៣ ) ។

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្តាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ចម្រៀងដែលលើកទឹកចិត្តឲ្យប្រើ ៖ « ពេលទ្រង់យាងមកម្តងទៀត » សៀវភៅចម្រៀងកុមារ ទំព័រ ៤៦–៤៧ ។

ការកែលម្អដល់ការសិក្សាផ្ទាល់ខ្លួន

រៀបចំបរិស្ថានជុំវិញខ្លួនរបស់បងប្អូន ។ បរិស្ថានជុំវិញខ្លួនយើងអាចជះឥទ្ធិពលលើសមត្ថភាពរៀនសូត្ររបស់យើង ។ សូមស្វែងរកកន្លែងមួយដើម្បីសិក្សាព្រះគម្ពីរ ដែលបងប្អូនអាចទទួលអារម្មណ៍ពីព្រះចេស្តានៃព្រះវិញ្ញាណ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ១៥ ) ។

ព្រះយេស៊ូវនៅលើមេឃ — « ចូរក្រោកឡើង ហើយភ្លឺមកចុះ ដ្បិតពន្លឺរបស់ឯងបានមកដល់ហើយ សិរីល្អនៃព្រះយេហូវ៉ាក៏បានរះឡើងដល់ឯងដែរ » ( អេសាយ ៦០:១ ) ។ ពន្លឺ និង ជីវិត ដោយ ម៉ាក ម៉ាប្រី