« ថ្ងៃទី ៤-១០ ខែ មករា ។ យ៉ូសែប ស្ម៊ីធ—ប្រវត្តិ ១:១–២៦ ៖ ‹ ខ្ញុំបានឃើញបង្គោលពន្លឺមួយ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ គោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )
« ថ្ងៃទី ៤-១០ ខែ មករា ។ យ៉ូសែប ស្ម៊ីធ—ប្រវត្តិ ១:១–២៦ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០២១
ព្រៃពិសិដ្ឋ ដោយ ហ្រ្គេកខេ អូលសិន
ថ្ងៃទី ៤–១០ ខែ មករា
យ៉ូសែប ស្ម៊ីធ—ប្រវត្តិ ១:១–២៦
« ខ្ញុំបានឃើញបង្គោលពន្លឺមួយ »
នៅពេលអ្នកសិក្សាបទគម្ពីរ សូមគិតអំពីកុមារដែលអ្នកបង្រៀន ។ ព្រះវិញ្ញាណបរិសុទ្ធ អាចបំផុសគំនិតអ្នក តាមរយៈចំណាប់អារម្មណ៍ដែលអ្នកបានទទួល ដើម្បីដឹងថាត្រូវផ្ដោតទៅលើអ្វីនៅក្នុងថ្នាក់រៀន ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមអញ្ជើញកុមារមួយចំនួនឲ្យចែកចាយនូវអ្វីដែលពួកគេបានដឹងអំពីយ៉ូសែប ស្ម៊ីធ និងការអធិស្ឋានរបស់លោកនៅក្នុងព្រៃពិសិដ្ឋ ( ការបង្ហាញរូបភាពការនិមិត្តដំបូង អាចជាជំនួយ ) ។ ចូរសួរពួកគេថាតើពួកគេមានអារម្មណ៍យ៉ាងណា នៅពេលពួកគេស្ដាប់ឮថាព្រះវរបិតាសួគ៌ និងព្រះយេស៊ូវគ្រីស្ទបានយាងមកជួបនឹងយ៉ូសែប ស្ម៊ីធ ។ បើយ៉ូសែប ស្ម៊ីធមកក្នុង ថ្នាក់របស់យើង តើយើងនឹងសួរលោកអំពីបទពិសោធន៍របស់លោកអ្វីខ្លះ ?
បង្រៀនគោលលទ្ធិ ៖ កុមារតូចៗ
យ៉ូសែប ស៊្មីធ ត្រូវបានរៀបចំឲ្យធ្វើជាព្យាការីម្នាក់របស់ព្រះ ។
ការរៀនអំពីយុវវ័យរបស់យ៉ូសែប ស្ម៊ីធ អាចជួយកុមារមានទំនាក់ទំនងនឹងលោក ហើយរៀបចំខ្លួនដើម្បីរៀនមកពីបទពិសោធន៍របស់លោក ។ ប្រហែលជាអ្នកអាចជួយពួកគេឲ្យមើលឃើញថាបទពិសោធន៍របស់យ៉ូសែបកាលពីក្មេង បានជួយរៀបចំលោកឲ្យក្លាយជាព្យាការីម្នាក់របស់ព្រះយ៉ាងដូចម្ដេច ។
សកម្មភាពដែលអាចជ្រើសរើស
-
ចូរសុំឲ្យក្មេងម្នាក់កាន់រូបភាពមួយរបស់យ៉ូសែប ស្ម៊ីធ ( សូមមើល សៀវភៅរូបភាពដំណឹងល្អ លេខ ៨៧) ខណៈដែលអ្នកចែកចាយទិដ្ឋភាពមួយចំនួនអំពីយ៉ូសែប ដែលមាននៅក្នុង យ៉ូសែប ស្ម៊ីធ—ប្រវត្តិ ១:៣-១៤ ( សូមមើលផងដែរ « ជំពូកទី ១៖ យ៉ូសែប ស៊្មីធ និងគ្រួសាររបស់លោក » ដំណើររឿងក្នុងគោលលទ្ធិ និងសេចក្ដីសញ្ញា ៦-៨ ឬវីដេអូដែលមានដំណើររឿងនេះ នៅក្នុង ChurchofJesusChrist.org ) ។ សូមជួយពួកគេប្រៀបធៀបព័ត៌មានលម្អិតអំពីគ្រួសាររបស់លោក និងជីវិតលោកទៅនឹងគ្រួសារ និងជីវិតផ្ទាល់ខ្លួនរបស់ពួកគេ ។ សូមចែកចាយទីបន្ទាល់របស់អ្នកថា យ៉ូសែប ត្រូវបានជ្រើសរើសដោយព្រះ ហើយបានរៀបចំឲ្យធ្វើជាព្យាការីម្នាក់ ( សូមមើល « វីដេអូអំពីការស្ដារឡើងវិញ ៖ គ្រួសាររបស់យ៉ូសែប ស្ម៊ីធ » នៅក្នុង ចូរមកតាមខ្ញុំសម្រាប់បុគ្គល និងក្រុមគ្រួសារ ) ។ បើចាំបាច់ សូមបង្រៀនកុមារថា ព្យាការី គឺជាបុគ្គលម្នាក់ដែលពោលពាក្យជំនួសឲ្យព្រះ ។
-
សូមអញ្ជើញយុវជនម្នាក់នៅក្នុងវួដឲ្យមកក្នុងថ្នាក់របស់អ្នក សូមដើរតួធ្វើជាយ៉ូសែប ស្ម៊ីធ ។ សូមរៀបចំសំណួរមួយចំនួនសម្រាប់កុមារ ដើម្បីសួរដល់លោក ដែលមានចម្លើយនៅក្នុង យ៉ូសែប ស្ម៊ីធ—ប្រវត្តិ ១:៣–២០ ( អ្នកអាចនឹងចង់ចែកចាយសំណួរទាំងនេះជាមួយនឹងយុវជននោះទុកជាមុន ) ។ បន្ទាប់មកសូមអញ្ជើញយុវជនឲ្យអានពាក្យ សម្ដីផ្ទាល់របស់យ៉ូសែប ស្ម៊ីធអំពីការនិមិត្តដំបូង ( ឧទាហរណ៍ យ៉ូសែប ស្ម៊ីធ — ប្រវត្តិ ១:២៥ ) ។
យ៉ូសែប ស្ម៊ីធ—ប្រវត្តិ ១:១០–១៧
ព្រះវរបិតាសួគ៌ស្ដាប់ឮ ហើយឆ្លើយតបការអធិស្ឋានរបស់ខ្ញុំ ។
បទពិសោធន៍របស់យ៉ូសែប ស្ម៊ីធ អាចបំផុសគំនិតដល់កុមារឲ្យអធិស្ឋានដោយសេចក្ដីជំនឿថា ព្រះនឹងស្ដាប់ឮពួកគេ ។
សកម្មភាពដែលអាចជ្រើសរើស
-
សូមប្រាប់កុមារអំពីសំណួរដែលយ៉ូសែប ស្ម៊ីធ មាន ( សូមមើល យ៉ូសែប ស្ម៊ីធ — ប្រវត្តិ ១:១០ ) ។ តើយើងអាចធ្វើអ្វីខ្លះ នៅពេលយើងមានសំណួរអំពីព្រះ ? សូមបង្ហាញព្រះគម្ពីរប៊ីបមួយក្បាលដល់កុមារ ហើយពន្យល់ថា នៅពេលយ៉ូសែប អានព្រះគម្ពីរប៊ីប លោកបានដឹងថា លោកអាច « សូមសួរដល់ព្រះ » ( យ៉ាកុប ១:៥ សូមមើលផងដែរ សៀវភៅរូបភាពដំណឹងល្អ លេខ ៨៩ ) ។ សូមថ្លែងទីបន្ទាល់របស់អ្នកថា យើងអាចសួរសំណួរដល់ព្រះតាមរយៈការអធិស្ឋាន ។
-
សូមប្រាប់អំពីបទពិសោធន៍មួយ នៅពេលដែលអ្នកមានភាពច្របូកច្របល់ អ្នកទូលសូមព្រះឲ្យជួយ ហើយទទួលបានចម្លើយ ។ សូមជួយកុមារឲ្យគិតអំពីគ្រាដែលពួកគេអធិស្ឋានទទួលបានចម្លើយ ។ អ្នកក៏អាចចែកចាយរឿងមួយមកពីទស្សនាវដ្ដីសាសនាចក្រអំពីការអធិស្ឋានរបស់កុមារត្រូវបានឆ្លើយតបផងដែរ ។
យ៉ូសែប ស្ម៊ីធ--ប្រវត្តិ ១:១៧–១៩
យ៉ូសែប ស្ម៊ីធ បានឃើញព្រះជាព្រះវរបិតា និងព្រះរាជបុត្រារបស់ទ្រង់ ព្រះយេស៊ូវគ្រីស្ទ ។
អ្នកអាចជួយកុមារឲ្យដាក់គ្រឹះដើម្បីមានទីបន្ទាល់រឹងមាំអំពីការនិមិត្តដំបូងរបស់យ៉ូសែប ស្ម៊ីធ ។ សូមចែកចាយជាមួយពួកគេអំពីរបៀបដែលអ្នកអាចទទួលបានទីបន្ទាល់អំពីព្រឹត្តការណ៍សំខាន់នេះ ។
សកម្មភាពដែលអាចជ្រើសរើស
-
សូមបង្ហាញរូបភាពនៃការនិមិត្តដំបូង នៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ ហើយចែកចាយអំពីអ្វីៗដែលបានកើតឡើងនៅពេលយ៉ូសែប អធិស្ឋានដោយសម្ដីរបស់អ្នកផ្ទាល់ ។ សូមអញ្ជើញកុមារឲ្យគូររូបភាពអំពីរឿងនោះដោយផ្ទាល់ខ្លួនពួកគេ ។
-
សូមអញ្ជើញកុមារឲ្យផាត់ពណ៌ទំព័រសកម្មភាពសម្រាប់សប្ដាហ៍នេះ ហើយប្រើវាដើម្បីប្រាប់អំពីរឿងនៃការនិមិត្តដំបូង ( សូមមើលផងដែរ « ជំពូកទី ២៖ ការនិមិត្តដំបូងរបស់យ៉ូសែបស្ម៊ីធ» ដំណើររឿងគោលលទ្ធិ និងសេចក្ដីសញ្ញា ទំព័រ ៩-១២ ឬវីដេអូដែលមានដំណើររឿងនេះ នៅក្នុង ChurchofJesusChrist.org ) ។
-
សូមអាន យ៉ូសែប ស្ម៊ីធ—ប្រវត្តិ ១:១៧ ហើយចង្អុលប្រាប់កុមារអំពីព្រះបន្ទូលដែលព្រះវរបិតាសួគ៌មានបន្ទូលទៅកាន់យ៉ូសែប ស្ម៊ីធ ។
បង្រៀនគោលលទ្ធិ ៖ កុមារធំៗ
យ៉ូសែប ស្ម៊ីធ—ប្រវត្តិ ១:១០-១៣
ព្រះអាចឆ្លើយតបចំពោះសំណួររបស់ខ្ញុំតាមរយៈបទគម្ពីរ ។
យ៉ូសែប ស៊្មីធ ត្រូវបានបំផុសគំនិតដោយវគ្គបទគម្ពីរមួយ ដែលលោកអាននៅក្នុងព្រះគម្ពីរប៊ីប ហើយវានាំឲ្យមានការនិមិត្តដំបូង និងការស្ដារឡើងវិញនៃសាសនាចក្ររបស់ព្រះគ្រីស្ទ ។ សូមជួយកុមារឲ្យមើលឃើញថាការសិក្សាព្រះគម្ពីរអាចជួយពួកគេស្វែងរកចម្លើយចំពោះសំណួរខាងវិញ្ញាណរបស់ពួកគេរបៀបណាខ្លះ ។
សកម្មភាពដែលអាចជ្រើសរើស
-
សូមបង្ហាញសៀវភៅផ្សេងៗដល់កុមារ ( ដូចជាសព្វវចនាធិប្បាយ ឬសៀវភៅចម្អិនអាហារ ) ហើយជួយពួកគេឲ្យគិតអំពីសំណួរទាំងឡាយដែលសៀវភៅទាំងនេះអាចឆ្លើយ ។ បន្ទាប់មកសូមបង្ហាញព្រះគម្ពីរមួយក្បាលដល់ពួកគេ ។ តើមានសំណួរអ្វីខ្លះដែលសៀវភៅទាំងនេះអាចផ្ដល់ចម្លើយឲ្យបាន ? អ្នកអាចផ្ដល់ឧទាហរណ៍អំពីសំណួរមួយ ដែលត្រូវបានឆ្លើយតបនៅក្នុងបទគម្ពីរ ។ សូមអានជាមួយគ្នានៅក្នុង យ៉ូសែប ស្ម៊ីធ—ប្រវត្តិ ១:១០–១១ ដើម្បីស្វែងរកសំណួរអ្វីខ្លះដែលយ៉ូសែប ស្ម៊ីធបានសួរ និងចម្លើយអ្វីខ្លះដែលលោកបានទទួលនៅក្នុងបទគម្ពីរនានា ។
-
សូមជួយកុមារស្វែងរកពាក្យនៅក្នុង ខ ១២ ដែលពិពណ៌នាអំពីរបៀបដែលការអាន យ៉ាកុប ១:៥ បានជះឥទ្ធិពលដល់យ៉ូសែប ស្ម៊ីធ ។ សូមចែកចាយបទពិសោធន៍មួយដែលអ្នកមានជាមួយនឹងបទគម្ពីរ —ឧទាហរណ៍ នៅពេលអ្នករកបានចម្លើយឆ្លើយសំណួរមួយរបស់អ្នកអំពីការអានបទគម្ពីរ ។ សូមច្រៀងជាមួយគ្នានូវបទ ស្វែងរក គិត អធិស្ឋានសៀវភៅចម្រៀងកុមារទំព័រ ៦៦ ) ។
យ៉ូសែប ស្ម៊ីធ—ប្រវត្តិ ១:១០–១៩
ព្រះវរបិតាសួគ៌ស្ដាប់ឮ ហើយឆ្លើយតបការអធិស្ឋានរបស់ខ្ញុំ ។
ព្រះស្គាល់យ៉ូសែប ស្ម៊ីធ ហើយនៅពេលយ៉ូសែបបានអធិស្ឋាន ព្រះបានស្ដាប់ឮលោក ។ ខណៈដែលបទពិសោធន៍របស់កុមារដែលអ្នកបង្រៀន អាចមានភាពផ្សេងៗគ្នាពីយ៉ូសែប នោះអ្នកអាចជួយពួកគេឲ្យទទួលអារម្មណ៍ថា ព្រះស្គាល់ពួកគេ ហើយស្ដាប់ឮពួកគេ នៅពេលពួកគេអធិស្ឋាន ។
សកម្មភាពដែលអាចជ្រើសរើស
-
សូមអញ្ជើញឪពុកម្ដាយរបស់កុមារម្នាក់មកឈរនៅខាងក្រៅបន្ទប់ ហើយឆ្លើយសំណួររបស់កុមារដោយប្រើវិធីសាស្ត្រដូចជា ផ្ញើរសារ ទូរសព្ទហៅ ការសរសេរកំណត់ចំណាំ ឬការផ្ញើសារតាមហ្វេសប៊ុក ។ តើព្រះវរបិតាសួគ៌ទំនាក់ទំនងជាមួយនឹងយើងតាមរបៀបមួយចំនួនអ្វីខ្លះ ? ( សូមមើល « វិវរណៈ» សេចក្ដីណែនាំដល់បទគម្ពីរទាំងឡាយ scriptures.ChurchofJesusChrist.org ) ។ ស្របតាម យ៉ូសែប ស្ម៊ីធ—ប្រវត្តិ ១:១៦–១៩ តើព្រះវរបិតាសួគ៌ឆ្លើយតបការអធិស្ឋានរបស់យ៉ូសែប ស្ម៊ីធយ៉ាងដូចម្ដេច ? តើទ្រង់បានឆ្លើយនឹងការអធិស្ឋានរបស់យើងយ៉ាងដូចម្ដេច ?
-
សូមច្រៀងជាមួយគ្នា « ការអធិស្ឋានរបស់កុមារ» ( សៀវភៅចម្រៀងកុមារទំព័រ ៦–៧ ) ។
រូបភាពយុវនារីម្នាក់កំពុងអធិស្ឋានព្រះស្ដាប់ឮ ហើយឆ្លើយតបការអធិស្ឋានរបស់យើង ។
យ៉ូសែប ស៊្មីធ—ប្រវត្តិ ១:១៤–១៩, ២៥
ព្រះជាព្រះវរបិតាសួគ៌ និងព្រះយេស៊ូវគ្រីស្ទបានបង្ហាញព្រះកាយដល់យ៉ូសែប ស៊្មីធ ។
កុមារម្នាក់ៗដែលអ្នកបង្រៀនចាំបាច់ត្រូវមានទីបន្ទាល់មួយអំពីបទពិសោធន៍របស់យ៉ូសែប ស្ម៊ីធនៅក្នុងព្រៃពិសិដ្ឋ ។ តើអ្នកអាចជួយពួកគេទទួល ឬពង្រឹងទីបន្ទាល់របស់ពួកគេយ៉ាងដូចម្ដេច ?
សកម្មភាពដែលអាចជ្រើសរើស
-
ដើម្បីរំឭកដំណើររឿងនៃការមិនិត្តដំបូង សូមសរសេរសេចក្ដីសង្ខេបអំពីខគម្ពីរនីមួយៗមកពី យ៉ូសែប ស្ម៊ីធ—ប្រវត្តិ ១:១៤–១៩ នៅលើសន្លឹកក្រដាសផ្សេងៗគ្នា ។ សូមដាក់ក្រដាសនៅក្នុងប្រអប់មួយ ហើយអញ្ជើញកុមារឲ្យជ្រើសរើសយកវាម្ដងមួយៗ ហើយដាក់វានៅលើក្ដាខៀនតាមលំដាប់ត្រឹមត្រូវ ។
-
សូមអញ្ជើញកុមារឲ្យបិទភ្នែក ហើយស្រមៃអំពីយ៉ូសែបជាយ៉ាងណា នៅពេលអ្នកអានផ្នែកជម្រើសចេញមកពី យ៉ូសែប ស្ម៊ីធ—ប្រវត្តិ ១:១៤–១៧ ។ ចូរសុំឲ្យពួកគេចែកចាយគំនិត និងអារម្មណ៍របស់ពួកគេអំពីបទពិសោធន៍របស់យ៉ូសែប ។
-
សូមបង្ហាញវីដេអូ « សូមសួរដល់ព្រះ ៖ ការនិមិត្តដំបូងរបស់យ៉ូសែប ស្ម៊ីធ » (ChurchofJesusChrist.org ) ហើយសុំឲ្យកុមារចែកចាយអំពីអ្វីមួយដែលពួកគេបានរៀនអំពីការនិមិត្តរបស់យ៉ូសែបអំពី ព្រះវរបិតាសួគ៌ និងព្រះយេស៊ូវគ្រីស្ទ ។
-
សូមអានទីបន្ទាល់របស់យ៉ូសែបនៅក្នុង យ៉ូសែប ស្ម៊ីធ—ប្រវត្តិ ១:២៥ ជាមួយគ្នា ។ ចូរសុំឲ្យកុមាររកមើលពាក្យ និងឃ្លានានាដែលបង្ហាញពីជំនឿរបស់យ៉ូសែប ។ តើយើងអាចបន្ដស្មោះត្រង់ចំពោះព្រះ និងទីបន្ទាល់របស់យើង នៅពេលមនុស្សដទៃពុំយល់ស្របនឹងយើងដោយរបៀបណា ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យចែកចាយដំណើររឿងនៃការនិមិត្តដំបូងរបស់យ៉ូសែប ស្ម៊ីធ ជាមួយនរណាម្នាក់— បើអាចធ្វើទៅបាន ជាមួយនឹងនរណាម្នាក់ដែលពុំធ្លាប់បានស្ដាប់ឮកាលពីមុនមក ។ ពួកគេអាចប្រើទំព័រសកម្មភាពសប្ដាហ៍នេះដើម្បីជួយពួកគេប្រាប់អំពីរឿងនោះ ។
ការកែលម្អការបង្រៀនរបស់យើង
លើកទឹកចិត្តឲ្យមានគារវភាព ។ ដើម្បីរំឭកដល់កុមារឲ្យមានគារវភាព អ្នកអាចច្រៀង ឬគ្រហឹមបទចម្រៀងមួយ បង្ហាញរូបភាពរបស់ព្រះយេស៊ូវ ឬប្រើដៃធ្វើសញ្ញាដើម្បីឲ្យកុមារស្គាល់ ។