« ថ្ងៃទី ១១–១៧ ខែ តុលា ។ គោលលទ្ធិ និង សេចក្ដីសញ្ញា ១១៥–១២០ ៖ ‹ ការបូជារបស់គាត់នឹងបានរាប់ថាពិសិដ្ឋដល់យើង ជាងការដំឡើងរបស់គាត់ទៅទៀត › » ចូរមកតាមខ្ញុំ—សម្រាប់ថ្នាក់បឋមសិក្សា ៖ គោលលទ្ធិ និង សេចក្ដីសញ្ញា ឆ្នាំ ២០២១ ( ឆ្នាំ ២០២០ )
« ថ្ងៃទី ១១–១៧ ខែ តុលា ។ គោលលទ្ធិ និង សេចក្តីសញ្ញា ១១៥–១២០ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០២១
ហ្វារវែស ដោយ អល រ៉ោនស៍
ថ្ងៃទី ១១–១៧ ខែ តុលា
គោលលទ្ធិ និង សេចក្តីសញ្ញា ១១៥–១២០
« ការបូជារបស់គាត់នឹងបានរាប់ថាពិសិដ្ឋដល់យើង ជាងការដំឡើងរបស់គាត់ទៅទៀត »
សូមឲ្យព្រះវិញ្ញាណដឹកនាំអ្នកទៅកាន់គោលការណ៍ដែលកុមារត្រូវការបំផុត ។ អ្នកអាចស្វែងរកគំនិតល្អៗនៅក្នុងសកម្មភាពសម្រាប់កុមារតូចៗ ឬកុមារធំៗ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
ម្ដងម្កាល វាអាចជាការល្អដើម្បីនិយាយនឹងឪពុកម្ដាយរបស់កុមារម្នាក់ទុកជាមុន ហើយណែនាំឲ្យកុមារនោះឲ្យមកថ្នាក់ដើម្បីរៀបចំខ្លួនចែកចាយអ្វីមួយដែលគាត់ ឬនាងបានរៀននៅឯគេហដ្ឋាន ។ កុមារនោះអាចរីករាយនឹងការដឹកនាំសកម្មភាពមួយដែលគាត់ ឬនាងបានធ្វើជាមួយនឹងសមាជិកគ្រួសារនៅក្នុងថ្នាក់ ។
បង្រៀនគោលលទ្ធិ ៖ កុមារតូចៗ
គោលលទ្ធិ និង សេចក្ដីសញ្ញា ១១៥:៤–៥
ខ្ញុំជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
តើអ្នកអាចជួយកុមារឲ្យស្គាល់ពរជ័យនៃការធ្វើជាផ្នែកមួយនៃសាសនាចក្រនៃព្រះយេស៊ូវគ្រីស្ទតាមរបៀបណា ?
សកម្មភាពដែលអាចជ្រើសរើស
-
សូមសួរកុមារ ប្រសិនបើពួកគេណាម្នាក់អាចនិយាយឈ្មោះពេញរបស់សាសនាចក្របាន ។ សូមបង្ហាញស្លាកសញ្ញារបស់សាសនាចក្រ ( នៅលើទស្សនាវដ្ដីរបស់សាសនាចក្រ ឬនៅលើស្លាកឈ្មោះរបស់អ្នកផ្សព្វផ្សយសាសនា ) សូមសរសេរឈ្មោះនោះនៅលើក្ដារខៀន ឬអានវាឲ្យពួកគេស្ដាប់នៅក្នុង គោលលទ្ធិ និង សេចក្ដីសញ្ញា ១១៥:៤ ។ សូមឲ្យកុមារអានឈ្មោះនោះជាមួយនឹងអ្នក ពេលអ្នកចង្អុលពាក្យនីមួយៗ ។ សូមចង្អុលបង្ហាញពាក្យសំខាន់ៗនៅក្នុងឈ្មោះនោះ ហើយជួយកុមារឲ្យយល់ដឹងពីហេតុផលដែលពាក្យទាំងនេះមានសារៈសំខាន់ ( សូមមើល« ជំពូកទី ៤៣ ៖ ព្រះយេស៊ូវគ្រីស្ទដាក់ឈ្មោះឲ្យសាសនាចក្ររបស់ទ្រង់ » ដំណើររឿងគម្ពីរគោលលទ្ធិ និង សេចក្តីសញ្ញាទំព័រ ១៦៤ ) ។
-
សូមច្រៀងរួមគ្នាបទ « សាសនាចក្រព្រះយេស៊ូវគ្រីស្ទ » ( សៀវភៅចម្រៀងកុមារ ទំព័រ ៤៨ ) ហើយចែកចាយនឹងកុមារពីអារម្មណ៍របស់អ្នកចំពោះការក្លាយជាសមាជិកម្នាក់ក្នុងសាសនាចក្ររបស់ព្រះយេស៊ូវគ្រីស្ទ ។ ចូរឲ្យពួកគេចែកចាយអារម្មណ៍របស់ពួកគេពីសាសនាចក្រ ។
-
ចូរសុំឲ្យកុមារឈរ ពេលអ្នកអានពាក្យថា « ក្រោកឡើង » នៅក្នុង គោលលទ្ធិ និង សេចក្ដីសញ្ញា ១១៥:៥ ។ សូមឲ្យពួកគេដាក់ម្រាមដៃដូចជាពន្លឺព្រះអាទិត្យពេលអ្នកអានពាក្យ « បញ្ចាំងពន្លឺចេញទៅ » ។ សូមច្រៀងចម្រៀងមួយបទជាមួយគ្នាពីការធ្វើជាពន្លឺដល់មនុស្សដទៃ ដូចជាបទ « ខ្ញុំជាដួងតារា » ( សៀវភៅចម្រៀងកុមារ ទំព័រ ៨៤ ) ។ សូមរំឭកកុមារថា ពន្លឺរបស់យើងមកពីព្រះយេស៊ូវគ្រីស្ទ ហើយជួយពួកគេឲ្យគិតពីវិធីដែលពួកគេអាច « បញ្ចាំងពន្លឺចេញទៅ » ។
គោលលទ្ធិ និង សេចក្ដីសញ្ញា ១១៧:៦
ព្រះយេស៊ូវគ្រីស្ទបានបង្កើតពិភពលោកនេះ ព្រមទាំងគ្រប់របស់ទាំងអស់ដែលនៅលើនោះផង ។
ដើម្បីលើកទឹកចិត្តដល់វិលលាម ម៉ាក្ស និងនូវេល ខេ វិតនី ឲ្យ លះបង់ទ្រព្យសម្បត្តិរបស់ពួកគេ ហើយផ្លាស់ទៅរដ្ឋមិសសួរី នោះព្រះអម្ចាស់បានរំឭកពួកគេថា ទ្រង់បានបង្កើតអ្វីៗគ្រប់យ៉ាងនៅលើផែនដី ។ តើកុមារអាចនឹងមានពរដោយការដឹងពីសេចក្ដីពិតនេះតាមរបៀបណា ?
សកម្មភាពដែលអាចជ្រើសរើស
-
សូមយក ឬគូររូបភាពនៃការបង្កបង្កើតនៅក្នុង គោលលទ្ធិ និង សេចក្តីសញ្ញា ១១៧:៦ ដែលព្រះអម្ចាស់បានមានបន្ទូលថា ទ្រង់បានបង្កើត( ឬអញ្ជើញកុមារឲ្យគូររូបភាពរបស់ពួកគេផ្ទាល់ ) ។ សូមឲ្យកុមារលើក ឬចង្អុលរូបភាពនោះ ពេលអ្នកអានខគម្ពីរទាំងនេះ ។ សូមប្រាប់កុមារថាហេតុអ្វីវាសំខាន់ចំពោះអ្នកដើម្បីដឹងថា ព្រះយេស៊ូវគ្រីស្ទបានបង្កើតរបស់អស់ទាំងនេះ ?
-
សូមច្រៀងចម្រៀងមួយបទជាមួយកុមារអំពីការបង្កបង្កើតរបស់ព្រះអម្ចាស់ ដូចជាបទ « ព្រះវរបិតាស្រឡាញ់ខ្ញុំ » ( សៀវភៅចម្រៀងកុមារ ទំព័រ ១៦–១៧ ) ។ សូមឲ្យកុមារនិយាយពីរឿងមួយចំនួនដែលព្រះបានបង្កើត ដែលជួយពួកគេឲ្យទទួលអារម្មណ៍ពីសេចក្ដីស្រឡាញ់របស់ទ្រង់ ។
គោលលទ្ធិ និង សេចក្តីសញ្ញា ១១៩–២០
ដង្វាយមួយភាគក្នុងដប់ជួយសាសនាចក្រឲ្យធ្វើកិច្ចការរបស់ព្រះ ។
កុមារជាច្រើនដែលអ្នកបង្រៀនប្រហែលជាក្មេងពេកដើម្បីរកប្រាក់ ហើយបង់ដង្វាយមួយភាគក្នុងដប់ ប៉ុន្ដែវាគឺជាការល្អសម្រាប់ពួកគេដើម្បីយល់ដឹងពីរបៀបដែលដង្វាយមួយភាគក្នុងដប់ចូលរួមចំណែកក្នុងកិច្ចការដ៏អស្ចារ្យដែលសាសនាចក្រធ្វើនៅទូទាំងពិភពលោក ។
សកម្មភាពដែលអាចជ្រើសរើស
-
សូមពន្យល់ពីរបៀបដែលយើងបង់ដង្វាយមួយភាគក្នុងដប់ និងការប្រើប្រាស់មូលនិធិនេះ( សូមមើល « ជំពូកទី ៤៤ ៖ ដង្វាយមួយភាគក្នុងដប់ » ដំណើររឿងគម្ពីរគោលលទ្ធិ និងសេចក្ដីសញ្ញា ទំព័រ ១៦៥–៦៦ ឬវីដេអូដែលមានដំណើររឿងនោះនៅក្នុងគេហទំព័រ ChurchofJesusChrist.org ) ។ សូមគូររូបកាក់ចំនួន ១០ នៅលើក្តារខៀន ហើយសុំឲ្យកុមារជួយអ្នករាប់កាក់ទាំងនោះ ។ សូមកំណត់ពីចំនួនដែលត្រូវថ្វាយព្រះអម្ចាស់សម្រាប់ដង្វាយមួយភាគក្នុងដប់ ។
-
សូមច្រៀងចម្រៀងមួយបទជាមួយគ្នាអំពីដង្វាយមួយភាគក្នុងដប់ ដូចជាបទ « I Want to Give the Lord My Tenth » ( Children’s Songbook ទំព័រ ១៥០ ) ហើយប្រាប់កុមារពីហេតុផលដែលអ្នកជ្រើសរើសបង់ដង្វាយមួយភាគក្នុងដប់ ។ ប្រសិនបើអាចធ្វើទៅបាន សូមចែកចាយរឿងផ្ទាល់ខ្លួនមួយ ។
បង្រៀនគោលលទ្ធិ ៖ កុមារធំៗ
គោលលទ្ធិ និង សេចក្តីសញ្ញា ១១៥:៤–៦
គំរូរបស់ខ្ញុំអាចជួយមនុស្សដទៃឲ្យមករកព្រះគ្រីស្ទ ហើយរកឃើញសុវត្ថិភាព ។
កុមារដែលអ្នកបង្រៀនទំនងជាស្គាល់ពីមនុស្សដែលរងគ្រោះដោយព្យុះភ្លៀងនៃជីវិត ហើយត្រូវការ « ទីជម្រក » ( ខទី ៦ ) ដែលសាសនាចក្របានផ្ដល់ឲ្យ ។ សូមពិចារណាពីរបៀបដែលអ្នកនឹងបំផុសគំនិតកុមារឲ្យ « ក្រោកឡើង ហើយបញ្ចាំងពន្លឺចេញទៅ » ( ខទី ៥ ) ហើយចែកចាយពន្លឺរបស់ពួកគេជាមួយនឹងមនុស្សទាំងនេះ ។
សកម្មភាពដែលអាចជ្រើសរើស
-
សូមហុចតគ្នានូវពិល រូបព្រះអាទិត្យ ឬអ្វីមួយផ្សេងទៀតដែលតំណាងឲ្យពន្លឺនៃដំណឹងល្អរបស់ព្រះយេស៊ូវគ្រីស្ទ ។ ពេលដល់វេណរបស់ពួកគេដើម្បីកាន់ពន្លឺនោះ សូមឲ្យកុមារអាន គោលលទ្ធិ និង សេចក្ដីសញ្ញា ១១៥:៤–៥ ហើយប្រាប់ឈ្មោះពីអ្វីមួយដែលពួកគេអាចធ្វើដើម្បី « បញ្ចាំង » ដូចជាពន្លឺចេញទៅសម្រាប់មនុស្សដទៃ ( សូមមើលនីហ្វៃទី ៣ ១៨:២៤ ) ។
-
សូមអញ្ជើញកុមារឲ្យគូររូបដែលរៀបរាប់នៅក្នុង គោលលទ្ធិ និង សេចក្ដីសញ្ញា ១១៥:៦។ ឧទាហរណ៍ ពួកគេអាចគូរព្យុះមួយដែលមានមនុស្សកំពុងស្វែងរកទីជម្រកនៅក្នុងអគារសាសនាចក្រ ។ តើព្យុះភ្លៀងអាចតំណាងឲ្យអ្វីខ្លះ ? តើសាសនាចក្រផ្ដល់ទីជម្រកឲ្យចៀសផុតពីអ្វីៗទាំងនេះដោយរបៀបណា ?
ការលះបង់របស់ខ្ញុំមានភាពពិសិដ្ឋចំពោះព្រះអម្ចាស់ ។
នៅក្នុងកណ្ឌទី ១១៧ ព្រះអម្ចាស់បានប្រឹក្សាដល់វិលលាម ម៉ាក្ស និងនូវេល ខេ វិតនី ឲ្យលះបង់ទ្រព្យសម្បត្តិរបស់ពួកគេនៅក្រុងខឺតឡង់សម្រាប់ពរជ័យដ៏កាន់តែអស្ចារ្យជាងនេះនៅរដ្ឋមិសសួរី ។ ទ្រង់បានកោតសរសើរចំពោះអូលីវើរ គ្រែនជើរ ផងដែរសម្រាប់ការលះបង់ដែលគាត់បានធ្វើ ។ តើអ្នកចាប់អារម្មណ៍ថា កុមារអាចរៀនអ្វីខ្លះមកពីគំរូរបស់ពួកគាត់ ?
សកម្មភាពដែលអាចជ្រើសរើស
-
សូមអញ្ជើញកុមារឲ្យស្រមៃថា ពួកគេគឺជាម្ចាស់ហាងម្នាក់ដ៏មានជោគជ័យនៅក្រុងខឺតឡង់ដូចជា នូវេល ខេ វិតនីដែរ ។ តើពួកគេនឹងមានអារម្មណ៍បែបណា ប្រសិនបើព្រះអម្ចាស់សុំឲ្យពួកគេទុកហាងពួកគេចោល ហើយផ្លាស់ទៅកន្លែងមួយថ្មីនោះ ? សូមអាន គោលលទ្ធិ និង សេចក្ដីសញ្ញា ១១៧:១–១១ ឲ្យកុមារស្ដាប់ ហើយសុំឲ្យកុមារបញ្ឈប់អ្នក ពេលពួកគេឮអ្វីមួយដែលនឹងជួយពួកគេឲ្យមានសេចក្ដីជំនឿដើម្បីធ្វើការលះបង់ ហើយគោរពតាមព្រះអម្ចាស់ ។ តើយើងលះបង់អ្វីខ្លះនៅសព្វថ្ងៃនេះដើម្បីគោរពតាមព្រះអម្ចាស់ ?
-
សូមប្រាប់កុមារដោយសង្ខេបពីហេតុផលដែលពួកបរិសុទ្ធបានចាកចោលក្រុងខឺតឡង់ ឬឲ្យកុមារម្នាក់សម្ដែងរឿងនេះ ( សូមមើល« ជំពូកទី ៤១ ៖ ក្តីអំពល់នៅក្នុងទីក្រុងខឺតឡង់ »ដំណើររឿងគម្ពីរគោលលទ្ធិ និង សេចក្តីសញ្ញា ទំព័រ ១៥៨–១៦០ ) ។ សូមពន្យល់ថា ព្រះអម្ចាស់បានសុំឲ្យអូលីវើរ គ្រែនជើរ នៅទីក្រុងខឺតឡង់ ហើយបង់សងបំណុលរបស់សាសនាចក្រ ។ ហេតុអ្វីការណ៍នោះគឺជាកិច្ចការដ៏លំបាកមួយ ? តើព្រះអម្ចាស់មានបន្ទូលអ្វីខ្លះនៅក្នុង គោលលទ្ធិ និង សេចក្តីសញ្ញា ១១៧:១៣ ដែលអាចជួយអូលីវើរ—ឬពួកយើងណាម្នាក់—ឲ្យលះបង់ដើម្បីគោរពតាមព្រះអម្ចាស់ ?
គោលលទ្ធិ និង សេចក្តីសញ្ញា ១១៩–២០
ដង្វាយមួយភាគក្នុងដប់ជួយសាសនាចក្រឲ្យធ្វើកិច្ចការរបស់ព្រះ ។
សូមពិចារណាពីរបៀបដែលអ្នកនឹងជួយកុមារឲ្យយល់ដឹងពីរបៀបដែលដង្វាយមួយភាគក្នុងដប់—សូម្បីតែពួកគេបង់នូវចំនួនតិចតួចក្ដី—ចូលរួមចំណែកក្នុងការស្ថាបនានគររបស់ព្រះអម្ចាស់( សូមមើល ពិតចំពោះសេចក្តីជំនឿ ទំព័រ ១៨២ ) ។
សកម្មភាពដែលអាចជ្រើសរើស
-
សូមឲ្យកុមារស្រមៃថា មិត្តភក្តិម្នាក់មើលឃើញអគារសាសនាចក្រ ហើយសួរថា « តើសាសនាចក្របង់ថ្លៃសម្រាប់អគារនោះតាមរបៀបណា ? តើយើងនឹងពន្យល់ពីដង្វាយមួយភាគក្នុងដប់ទៅកាន់មិត្តនេះយ៉ាងដូចម្ដេច ? សូមណែនាំឲ្យកុមារមើលនៅក្នុង គោលលទ្ធិ និង សេចក្តីសញ្ញា ១១៩:៤, ១២០:១ ពេលពួកគេពិចារណាពីសំណួរនេះ ។
-
សូមជួយកុមារឲ្យគិតអំពីរឿងដែលសាសនាចក្រមានលទ្ធភាពធ្វើ ដោយសារតែដង្វាយមួយភាគក្នុងដប់ ។ តើរឿងទាំងនេះផ្ដល់ពរជ័យដល់ជីវិតរបស់យើងយ៉ាងដូចម្តេច ? សូមចែកចាយអារម្មណ៍របស់អ្នកពីក្រឹត្យវិន័យនៃដង្វាយមួយភាគក្នុងដប់ និងរបៀបដែលក្រឹត្យវិន័យនេះបានផ្ដល់ពរជ័យដល់អ្នក ។
រូបភាពក្មេងប្រុសកំពុងបង់ដង្វាយមួយភាគក្នុងដប់តាមរយៈការបង់ដង្វាយមួយភាគក្នុងដប់ យើងអាចបង្ហាញសេចក្ដីស្រឡាញ់របស់យើងចំពោះព្រះ ហើយជួយនៅក្នុងកិច្ចការរបស់ទ្រង់ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមឲ្យកុមារកត់ចំណាំពីអារម្មណ៍នៅក្នុងដួងចិត្ត ឬគំនិតរបស់ពួកគេដែលបានកើតឡើងអំឡុងថ្នាក់កុមារនៅថ្ងៃនេះ ។ សូមលើកទឹកចិត្តពួកគេឲ្យចែកចាយអារម្មណ៍ និងគំនិតទាំងនោះជាមួយនឹងក្រុមគ្រួសាររបស់ពួកគេ ។
ការកែលម្អការបង្រៀនរបស់យើង
គាំទ្រដល់ឪពុកម្តាយ ។ សូមស្វែងរករបៀបដើម្បីចែកចាយជាមួយនឹងឪពុកម្ដាយនូវអ្វីដែលកូនៗរបស់ពួកគេកំពុងរៀននៅក្នុងថ្នាក់កុមារ ហើយសួរពួកគេពីរបៀបដែលអ្នកអាចគាំទ្រដល់ការខិតខំរបស់ពួកគេក្នុងនាមជាឪពុកម្ដាយ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។