ដង្វាយមួយភាគក្នុងដប់

ពរជ័យមួយក្នុងចំណោមពរជ័យទាំងឡាយនៃសមាជិកភាពនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាឯកសិទ្ធនៃការថ្វាយដង្វាយមួយភាគក្នុងដប់ ។ ដោយការរស់នៅតាមច្បាប់ដង្វាយមួយភាគក្នុងដប់ នោះអ្នកបានចូលរួមកសាងនគរព្រះនៅលើផែនដី ។

និយមន័យ និង គោលបំណងនៃដង្វាយមួយភាគក្នុងដប់

ដើម្បីថ្វាយដង្វាយមួយភាគក្នុងដប់ពេញលេញ អ្នកត្រូវផ្តល់មួយភាគក្នុងដប់នៃប្រាក់ចំណូលរបស់អ្នកដល់ព្រះអម្ចាស់តាមរយៈសាសនាចក្ររបស់ទ្រង់ ។ អ្នកបង់ដង្វាយមួយភាគក្នុងដប់ទៅកាន់សមាជិកម្នាក់ក្នុងគណៈប៊ីស្សព ឬគណៈប្រធានសាខារបស់អ្នក ។

ថ្នាក់ដឹកនាំក្នុងតំបន់បញ្ជូនមូលនិធិដង្វាយមួយភាគក្នុងដប់ដោយផ្ទាល់ទៅកាន់ទីស្នាក់ការកណ្ដាលរបស់សាសនាចក្រ ជាកន្លែងដែលក្រុមប្រឹក្សាកំណត់យកមាគ៌ាជាក់លាក់ក្នុងការប្រើប្រាស់មូលនិធិដ៏ពិសិដ្ឋនេះ ។ ក្រុមប្រឹក្សានេះមានគណៈប្រធានទីមួយ កូរ៉ុមនៃពួកសាវកដប់ពីរនាក់ និងគណៈប៊ីស្សពជាអធិបតី ។ ដោយធ្វើតាមវិវរណៈ ពួកគាត់ធ្វើការសម្រេចចិត្ត នៅពេលពួកគាត់ត្រូវបានដឹកនាំដោយព្រះអម្ចាស់ ។ ( សូមមើល គ. និង ស. ១២០:១ ) ។

មូលនិធិដង្វាយមួយភាគក្នុងដប់តែងតែយកមកប្រើសម្រាប់ជាគោលបំណងរបស់ព្រះអម្ចាស់ជានិច្ច—ដើម្បីកសាង និងថែទាំព្រះវិហារបរិសុទ្ធ និងសាលាប្រជុំទាំងឡាយ ដើម្បីគាំទ្រដល់កិច្ចការផ្សព្វផ្សាយសាសនា និងដើម្បីអនុវត្តកិច្ចការរបស់សាសនាចក្រនៅទូទាំងពិភពលោក ។

ពរជ័យនៃការថ្វាយដង្វាយមួយភាគក្នុងដប់ពេញលេញ

ច្បាប់ដង្វាយមួយភាគក្នុងដប់តម្រូវឲ្យមានការលះបង់ ប៉ុន្តែការគោរពប្រតិបត្តិរបស់អ្នកចំពោះច្បាប់នេះនាំមកនូវពរជ័យ ដែលមានទំហំមហិមាជាងអ្វីមួយដែលអ្នកបានលះបង់ទៅទៀត ។ ព្យាការីម៉ាឡាគីបានបង្រៀនថា

« ចូរនាំយកដង្វាយ១ភាគក្នុង១០ទាំងអស់មកដាក់ក្នុងឃ្លាំងចុះ ដើម្បីឲ្យមានស្បៀងអាហារនៅក្នុងដំណាក់នៃអញ ហើយល្បងលអញឥឡូវ បើអញមិនបើកទ្វារស្ថានសួគ៌ ដើម្បីចាក់ព្រះពរមកលើឯង ដែលនឹងគ្មានកន្លែងល្មមទុកបានទេ » ( ម៉ាឡាគី ៣:១០ ) ។

ពរជ័យទាំងនេះធ្លាក់មកលើអស់អ្នក ដែលថ្វាយដប់ភាគរយពេញលេញនៃប្រាក់ចំណូលរបស់ខ្លួន សូម្បីតែចំនួននោះជាចំនួនតិចតួចក៏ដោយ ។ នៅពេលអ្នកគោរពប្រតិបត្តិតាមច្បាប់នេះ ព្រះអម្ចាស់នឹងប្រទានពរដល់អ្នក ទាំងខាងវិញ្ញាណ និងខាងសាច់ឈាមផង ។

ការតាំងចិត្តដើម្បីថ្វាយដង្វាយមួយភាគក្នុងដប់

ប្រសិនបើអ្នកមិនទាន់បានបង្កើតលំនាំនៃការថ្វាយដង្វាយមួយភាគក្នុងដប់បានជាប់លាប់ទេ អ្នកអាចមានការលំបាកក្នុងការជឿថា អ្នកអាចលះបង់ប្រាក់ចំណូលមួយភាគដប់របស់អ្នក ។ ប៉ុន្តែអ្នកថ្វាយដង្វាយមួយភាគក្នុងដប់ដ៏ស្មោះត្រង់ដឹងថា ពួកគេមិនអាច មិន ថ្វាយដង្វាយមួយភាគក្នុងដប់បានទេ ។ នៅតាម របៀបដ៏អស្ចារ្យ ទ្វារនៃស្ថានសួគ៌បានបើកឡើង ហើយពរជ័យទាំងឡាយបានចាក់មកលើពួកគេ ។

ចូរចងចាំថា ការថ្វាយដង្វាយមួយភាគក្នុងដប់ មិនមែនជាបញ្ហាដ៏ធំខាងលុយកាក់នោះទេ ប៉ុន្តែវាជាបញ្ហាខាងឯសេចក្តីជំនឿវិញ ។ ចូរទុកចិត្តលើព្រះអម្ចាស់ ។ ទ្រង់បានប្រទានព្រះបញ្ញត្តិទាំងឡាយ សម្រាប់ជាប្រយោជន៍ដល់យើង ហើយទ្រង់បានធ្វើសេចក្តីសន្យាអមជាមួយ ។ ចូរស្វែងរកភាពរឹងមាំនៅក្នុងសេចក្ដីជំនឿរបស់នីហ្វៃ ដែលបានមានប្រសាសន៍ថា « ចូរយើងមានចិត្តស្មោះត្រង់ក្នុងការកាន់តាមព្រះបញ្ញត្តិទាំងឡាយនៃព្រះអម្ចាស់ ដ្បិតមើលចុះ ទ្រង់មានអំណាចជាងអ្វីៗនៅលើផែនដីនេះ ទាំងអស់ » ( នីហ្វៃទី ១ ៤:១ ) ។