ការពន្យារកំណើត

នៅពេលគូស្វាមីភរិយាដែលរៀបការរួចមានសមត្ថភាពខាងរូបកាយ នោះពួកគេមានឯកសិទ្ធិក្នុងការផ្ដល់រូបកាយរមែងស្លាប់ដល់បុត្រាបុត្រីខាងវិញ្ញណរបស់ព្រះវរបិតាសួគ៌ ។ ពួកគេដើរតួជាផ្នែកមួយក្នុងផែនការនៃសុភមង្គលដ៏អស្ចារ្យ ដែលអនុញ្ញាតឲ្យបុត្រាបុត្រីរបស់ព្រះ អាចទទួលរូបកាយខាងសាច់ឈាម និង បទពិសោធន៍ក្នុងជីវិតរមែងស្លាប់ ។

ប្រសិនបើអ្នកបានរៀបការ អ្នក និង ស្វាមី/ភរិយាអ្នក គួរតែពិភាក្សាជាមួយគ្នា អំពីការទទួលខុសត្រូវដ៏ពិសិដ្ឋរបស់អ្នក ដើម្បីនាំយកកូនចៅមកកាន់ពិភពលោក ហើយចិញ្ចឹមបីបាច់ពួកគេដោយសេចក្ដីសុចរិត ។ ពេលអ្នកធ្វើដូច្នេះ សូមពិចារណាអំពីការធ្វើឲ្យបរិសុទ្ធ និង ខ្លឹមសារនៃជីវិត ។ ចូរសញ្ជឹងគិតអំពីអំណរដែលកើតមាន កាលក្នុងគេហដ្ឋានមានកុមារតូចៗ ។ ចូរពិចារណាអំពីពរជ័យដ៏នៅអស់កល្បជានិច្ច ដែលកើតមានពីការមានកូនចៅសន្តានក្រោយល្អៗ ។ ជាមួយនឹងទីបន្ទាល់អំពីគោលការណ៍ទាំងនេះ អ្នក និង ស្វាមី/ភរិយាអ្នកនឹងត្រូវរៀបចំខ្លួនដើម្បីសម្រេចចិត្ត លើចំនួន និង ពេលវេលាដែលត្រូវមានកូន ។ ការសម្រេចចិត្តបែបនេះធ្វើឡើងរវាងអ្នកទាំងពីរ និង ព្រះអម្ចាស់ ។

នៅពេលអ្នកពិភាក្សាអំពីកិច្ចការដ៏ពិសិដ្ឋនេះ ចូរចាំថា ទំនាក់ទំនងខាងផ្លូវភេទក្នុងចំណងអាពាហ៍ពិពាហ៍ ត្រូវបានអនុម័តិយ៉ាងទេវភាព ។ ទន្ទឹមនឹងគោលបំណងមួយនៃទំនាក់ទំនងនេះគឺដើម្បីផ្ដល់រូបកាយខាងសាច់ឈាមដល់បុត្រាបុត្រីព្រះ នោះមានគោលបំណងមួយទៀត គឺដើម្បីបង្ហាញសេចក្ដីស្រឡាញ់ចំពោះគ្នាទៅវិញទៅមក—ដើម្បីចងភ្ជាប់ស្វាមី និង ភរិយារួមគ្នាដោយសេចក្ដីស្មោះត្រង់ ភក្ដីភាព ការពិនិត្យពិច័យ និង គោលបំណងទូទៅ ។